Historia di Bida

Yehova A Duna “Poder Mas Ayá di Loke Ta Normal”

SEGUN E RELATO DI HELEN MARKS

Tabata un dia masha kalor i húmedo den e zomer di 1986. Mi tabata e úniko hende ku tabata warda bou di e afdak di duana den un di Europa su aeropuertonan mas ketu. Esaki ta keda na Tiranë, kapital di Albania, ku a deklará su mes “e promé pais ateista na mundu.”

ORA un duanero armá a kuminsá listra mi ekipahe mi a sinti mi insigur i na e mesun momentu angustiá. Si mi a bisa òf hasi kualkier kos ku lo a pon’é deskonfiá, nan lo por a deportá mi dje pais, anto esnan ku tabata warda riba mi pafó, lo por a kai será òf ser mandá na kampo di trabou fòrsá. Mi ta kontentu ku mi a logra animá e ofisial pa ta mas amabel dor di dun’é bals i buskuchi. Pero kon bin ami, un muhé di sesent’i piku aña, a haña su mes den e situashon aki? Dikon lo mi sakrifiká un bida konfortabel i tuma riesgo pa promové interesnan di Reino den un di e último lugánan marksista?

Un Hobensita Enfermo Yen di Pregunta

Dos aña despues ku mi a nase, na aña 1920, na Ierápetra, Kreta, mi tata a muri di pulmonia. Mama tabata pober i no por a lesa ni skirbi. Nos tabata kuater ruman i ami ta esun di mas chikitu, i dor ku mi tabatin dehel, mi tabata blek i malu. Bisiñanan a konsehá Mama pa e dediká tur su atenshon i e poko rekursonan ku e tabatin na e tres yunan ku tabata mas saludabel i laga ami muri numa. Mi ta kontentu ku e no a sigui nan konseho.

Pa hasi sigur ku Tata su alma tabata sosegá den shelu, Mama tabata bishitá su graf frekuentemente, hasiendo uso dje servisionan di  un pastor òrtodòks. Pero e servisionan ei no tabata barata. Ainda mi ta kòrda un Pasku sumamente friu, ora el a bin bèk di santana ku mi ta kana lastra pia banda di dje. Nos a kaba di duna pastor e tiki sèn ku nos a sobra. Despues ku Mama a herebé poko bèrdura pa nos ku ta yu, e mes a bai stoma bashí den un otro kamber, ku lágrima di desesperashon ta kore na su kara. Poko despues, mi a tuma kurashi i bai serka e pastor i puntr’é dikon Tata a muri i pakiko mi mama ku ta pober mester a paga pastor. El a bisa pokopoko yen di bèrgwensa: “Dios a tum’é. Asina kos ta bai. Lo bo pasa over di bo tristesa.”

Tabata masha difísil pa mi relashoná su kontesta ku e orashon di Nos Tata, ku mi a siña na skol. I ainda mi ta kòrda e palabranan signifikativo ku e ta kuminsá kuné: “Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.” (Mateo 6:9, 10) Si Dios kier pa su boluntat sosodé riba tera, dikon nos mester sufri asina tantu?

Mi a hera di haña e kontesta na aña 1929, ora Emmanuel Lionoudakis, un Testigu di Yehova ku ta un predikadó di tempu kompleto, a bishitá nos kas. * Ora mi mama a puntr’é ku kiko e por a yud’é, Emmanuel no a bisa ni un palabra pero a duna mama un karchi di testimonio. Mama a duna mi e karchi pa mi les’é. Pero dor ku mi tabatin nuebe aña so, mi no a komprendé mashá. Dor ku mi mama a pensa ku e bishitante tabata muda, e di: “Ai pobersitu! Abo no por papia i ami no por lesa.” Despues el a hasi seña ku e por bai numa.

Algun aña despues, mi a haña e kontesta. E mesun minister di tempu kompleto ei a duna mi ruman hòmber Emmanuel Paterakis e foyeto chikitu Unda e Mortonan Ta?, publiká dor di Testigunan di Yehova. * Ora mi a les’é mi a haña alivio, pasobra mi a haña sa ku no ta Dios a tuma mi tata. Mi a bin komprendé ku morto ta e resultado di imperfekshon di hende i ku mi tata ta sperando riba un resurekshon p’e bai biba den Paradeis riba tera.

“E Buki Aki A Destruí Bo!”

Bèrdat di Beibel a habri nos wowo. Nos a haña un Beibel bieu ku tabata di Tata i a kuminsá studi’é. Nos tabata hasi esei hopi bes ku lus di bela rònt di un fogon. Dor ku mi tabata e úniko mucha muhé den e área ku tabata interesá den Beibel, nan no a inkluí mi den e aktividatnan di e grupo chikitu di Testigunan lokal. Pa un tempu—maske mi tabata robes—mi a kere sinseramente ku e religion aki tabata solamente pa hende hòmber.

E entusiasmo di mi ruman hòmber pa e trabou di prediká tabata un fuente di animashon pa mi. No a tarda mashá ku polis a kuminsá presta atenshon spesial na nos famia. Nan tabata bishitá nos ki ora ku ta, sea di dia òf anochi pa buska Emmanuel i literatura. Mi ta kòrda kla-kla ora ku un pastor a bin bishitá nos pa konvensé nos pa bolbe misa bèk. Emmanuel a mustr’é for di Beibel ku Dios su nòmber ta Yehova. E ora ei e pastor a gara e Beibel, i a menasá mi ruman hòmber kuné dor di zuai e bai bin den su kara anto grita: “E buki aki a destruí bo!”

Na aña 1940 ora ku Emmanuel a nenga di drenta servisio militar, nan a arest’é i a mand’é n’e zona di bataya na Albania. Nos a pèrdè kontakto kuné i a pensa ku el a muri. Pero dos aña despues, inesperadamente nos a haña un karta di dje for di prizòn. E tabata sano i salvo! Un di e tekstonan di Beibel ku el a sita den e karta ei a keda den mi mente desde e tempu ei: “Wowo di SEÑOR ta move bai bin dor di henter tera, pa e por sostené fuertemente esnan ku nan kurason ta kompletamente di dje.” (2 Krónikanan 16:9) Nos tabatin ègt mester dje animashon ei!

Ounke e tabata den prizòn, Emmanuel a logra haña algun ruman pa bishitá mi. Mesora nan a hasi areglo pa tene reunionnan kristian  klandestinamente den un kas di kunuku. Nos no tabata sa ku nan tabata vigilá nos! Riba un djadumingu, polis armá a rondoná nos. Nan a hinka nos den un trùk habrí i a pasa dor dje pueblo ku nos. Ainda mi ta kòrda kon hende tabata hasi mofa di nos i a rebahá nos. Pero Yehova mediante su spiritu a duna nos un pas interno.

Nan a trasladá nos pa un otro pueblo kaminda nan a benta nos den un par di sèl masha skur i fis. E w.c. den mi sèl tabata un hèmber ku nan tabata basha afó un bes pa dia. Mi a haña ocho luna di prizòn pasobra segun nan, ta ami tabata “maestra” dje grupo. Pero un ruman ku tabata será den prizòn a hasi areglo pa su abogado bringa nos kaso, i el a perkurá pa nos haña nos libertat.

Un Bida Nobo

Ora Emmanuel a sali for di prizòn, el a kuminsá bishitá e kongregashonnan den Aténas komo superintendente biahero. Mi a bai biba einan na aña 1947. Porfin mi a topa un grupo grandi di Testigu ku no tabata konsistí di hende hòmber so, pero tambe di hende muhé i mucha. Anto finalmente na yüli 1947, mi a simbolisá mi dedikashon na Yehova mediante boutismo bou di awa. Hopi bes mi tabata soña pa bira misionero i a kuminsá bai lès di ingles parti anochi. Na aña 1950 mi a bira pionero. Mama a bin biba ku mi, i e tambe a aseptá e bèrdat di Beibel. E tabata un Testigu di Yehova pa 34 aña, te dia el a muri.

E mesun aña ei, mi a konosé John Marks (Markopoulos), un hòmber spiritual masha respetá di Merka. John a nase den zùit Albania, i despues ku el a muda bai Merka el a bira un Testigu di Yehova. Na aña 1950 e tabata na Gresia p’e purba haña visa p’e drenta Albania. E tempu ei Albania tabata e pais komunista mas estrikto, i no tabata permití entrada di stranhero ni ningun influensia di pafó. Ounke John no a mira su famia desde aña 1936, nan no a permitié drenta Albania. Su selo ardiente pa Yehova su sirbishi i su amor profundo pa e hermandat a konmové mi. Nos a kasa dia 3 di aprel 1953. Despues mi a muda bai mi kas nobo huntu kuné na New Jersey, Merka.

Pa nos por a gana nos pan di kada dia miéntras nos tabata predikadó di tempu kompleto,  ami ku John tabatin un negoshi chikitu kant’i awa na New Jersey. Aki nos tabata prepará desayuno pa e piskadónan. Nos tabata traha solamente durante lunanan di zomer, for di ora solo sali te nueb’or di mainta. Dor di hiba un bida simpel i enfoká prinsipalmente riba aktividatnan spiritual, nos por a usa mayor parti di nos tempu den e trabou di prediká. Atrabes dje añanan, nan a pidi nos pa muda bai vários pueblo kaminda tabatin mas nesesidat di predikadó. Ku Yehova su sosten, nos a yuda personanan interesá, establesé kongregashon i yuda konstruí Salon di Reino.

Yudando Nos Rumannan den Nesesidat

Pero pronto un oportunidat emoshonante a habri pa nos. E rumannan ku tabata dirigí kier a haña kontakto ku kompañeronan kristian ku ta biba den paisnan di Balkan kaminda nos aktividat tabata prohibí. Pa hopi aña Testigunan di Yehova den e paisnan ei tabata isolá di nan hermandat internashonal; kasi nan no tabata risibí alimento spiritual i nan a enfrentá oposishon kruel. Outoridatnan tabata vigilá mayoria di nan konstantemente, i hopi tabata den prizòn òf den kamponan di trabou fòrsá. Nan tabatin nesesidat urgente di publikashonnan basá riba Beibel, tambe guia i animashon. Por ehèmpel, un mensahe den kódigo ku nos a risibí for di Albania a bisa: “Resa na Señor pa nos. Nan a konfiská literatura di kas pa kas. Nan no ta laga nos studia. Tres hende enkarselá.”

Pues, na novèmber 1960 nos a kuminsá ku nos biahe di seis luna largu pa bishitá algun dje paisnan ei. Tabata masha kla ku nos lo tabatin  mester di “poder mas ayá di loke ta normal,” tambe kurashi ku Dios ta duna i kreatividat pa kumpli ku nos mishon. (2 Korintionan 4:7, NW) Nos promé destinashon tabata Albania. Nos a kumpra un outo na Paris i a kuminsá nos biahe. Ora nos a yega Roma, ta John so a haña visa pa bai Albania. Ami mester a bai Aténas, Gresia, i ward’é einan.

John a drenta Albania na final di febrüari 1961 i a keda ei te na fin di mart. Na Tiranë el a topa personalmente ku 30 ruman. Esta kontentu nan tabata ora nan a haña e literatura i animashon ku nan tabatin asina tantu mester di dje! Pa 24 aña nan no a haña un bishita djafó.

E integridat i perseveransia di e rumannan ei a konmové John. El a haña sa ku hopi ruman a pèrdè nan trabou i tabata será dor ku nan no a partisipá den e aktividatnan dje pais komunista ei. Loke a konmov’é mas ainda ta ora ku dos ruman hòmber di 80’i piku aña di edat a dun’é un donashon di mas o ménos 180 florin pa e obra di prediká. Pa añanan largu nan a spar esaki di e tiki plaka di penshon ku nan tabata haña.

Trinta di mart 1961 tabata e último dia ku John a keda Albania. E dia ei tabatin e Konmemorashon dje morto di Hesus. John a duna e diskurso di Konmemorashon, i tabatin 37 persona presente. Na final di e diskurso, e rumannan a saka John purá-purá via e porta di patras i a hib’é ku outo n’e haf di Durrës, kaminda el a subi un barku di merkansia turko ku tabata bai Piraiévs (Piraeus), Gresia.

Mi tabata kontentu di hañ’é bèk sano i salvo. Awor nos por a sigui ku e restu di nos biahe peligroso. Nos a bishitá tres otro pais di Balkan kaminda nos trabou tabata prohibí. Tabata un mishon peligroso dor ku nos tabatin literatura bíbliko, mashin di taip i otro provishonnan huntu ku nos. Nos tabatin e privilegio di konosé algun ruman masha leal mes ku tabata kla pa riska nan trabou, nan libertat i asta nan bida mes pa Yehova. Nan selo i amor berdadero tabata un fuente di animashon. Tambe nos a keda impreshoná ku e echo ku Yehova tabata duna e “poder mas aya di loke ta normal.”

Despues ku nos a terminá nos biahe ku éksito, nos a bai Merka bèk. Durante e añanan ku a sigui, nos a sigui usa diferente manera pa purba manda literatura pa Albania i pa haña informe di e aktividat di nos rumannan.

Di Biahe Hopi Bes i den Peliger

Añanan a pasa, i ora John a muri na 1981 na edat di 76 aña, mi a keda mi so. Mi subrina Evangelia ku su kasá George Orphanides tabatin e bondat di tuma mi den nan kas, i nan a duna mi sosten emoshonal i práktiko balioso desde e tempu ei. Nan a mira Yehova su sosten personalmente ora nan tabata sirbi na Sudan, kaminda e trabou tabata prohibí. *

Ku tempu, nan a purba komuniká atrobe ku nos rumannan na Albania. Dor ku e famianan di mi kasá tabata biba ei, nan a puntra mi si mi lo kier biaha bai e pais ei. Klaro ku lo mi kier a bai!

Na mei di aña 1986, despues di lunanan di esfuerso konstante, mi a logra haña un visa di e konsulado albanes na Aténas. Personal diplomátiko dje konsulado a spièrta mi seriamente ku si algu bai robes, lo mi no por spera ningun yudansa di otro pais. Ora mi a bai un agensia di biahe pa kumpra un pasashi pa bai Albania, e persona ku a atendé mi a keda boka habrí. Sin laga miedu stroba mi, pronto mi a subi e úniko avion ku ta bai un bes pa siman di Aténas pa Tiranë. Ta tres albanes di edat avansá so tabata riba e mesun vuelo ku mi; nan tabata na Gresia pa dòkter.

Un poko despues ku e avion a baha, nan a hiba mi bou di un afdak bashí i ku tabata funshoná komo e ofisina di duana. Maske e ruman hòmber i ruman muhé di mi kasá no tabata Testigu di Yehova, nan tabata dispuesto pa yuda mi haña kontakto ku algun ruman lokal. Pa lei nan mester a informá e hefe dje komunidat en kuantu mi yegada. Esei a pone  ku polis tabata vigilá mi masha bon mes. P’esei mi famia a sugerí pa mi keda den nan kas miéntras nan a bai buska dos ruman ku tabata biba na Tiranë i trese nan serka mi.

Den e tempu ei, segun nos informenan tabatin nuebe ruman dediká den henter Albania. Añanan di prohibishon, persekushon i vigilansia estrikto a pone nan bira masha kouteloso. Nan tabatin ploinan profundo riba nan kara. Despues ku mi a gana konfiansa di e dos rumannan, nan promé pregunta tabata: “Unda E Toren di Vigilansianan ta?” Pa añanan largu nan tabatin solamente dos ehemplar di buki bieu, ni sikiera un Beibel.

Nan a papia masha hopi riba e medidanan kruel ku gobièrnu a tuma kontra nan. Nan a konta mi un kaso di un ruman stimá ku tabata determiná pa keda polítikamente neutral durante e siguiente elekshon. Dor ku gobièrnu tabata kontrolá tur kos, esaki a nifiká ku su famia lo no haña ningun porshon di kuminda. Nan lo a manda tur su yunan kasá huntu ku nan famia prizòn, maske nan no tabatin nada di haber ku su kreensianan religioso. A sali na kla ku pa motibu di miedu, miembronan di e famia dje ruman aki a mat’é e anochi promé ku elekshon, a tira su kurpa den un pos, i despues a bisa ku el a haña miedu i a mata su mes.

E pobresa di e kompañeronan kristian ei a kibra mi kurason. Pero ora mi a purba di duna kada un di nan un papel di 20 dòler, nan a nenga bisando: “E úniko kos ku nos kier ta alimento spiritual.” Pa dékadanan e rumannan stimá aki a biba bou di un gobièrnu diktatorial ku a logra konvensé mayoria dje poblashon pa no kere den Dios. Pero nan fe i determinashon tabata mes fuerte ku esun dje Testigunan na otro parti di mundu. Dos siman despues, pa ora ku mi mester a bai for di Albania, mi tabata realmente impreshoná di mira Yehova su abilidat di duna “poder mas ayá di loke ta normal,” asta bou di e sirkunstansianan di mas difísil.

Tambe mi tabatin e privilegio di bishitá Albania na aña 1989 i na 1991 atrobe. Segun ku libertat di ekspreshon i di religion pokopoko a bira bisto den e pais ei, e kantidat di adoradó di Yehova a oumentá rápidamente. E poko kristiannan dediká ku tabatin na aña 1986 a oumentá awor te na mas ku 2.200 publikadó aktivo. Melpo, e ruman muhé di mi kasá ta entre nan. Akaso nos por duda ku Yehova su bendishon tabata riba e grupo fiel ei?

Un Bida Yen di Satisfakshon, ku Poder di Yehova

Ora mi wak atras, mi tin sigur ku nos trabou, tantu di mi komo di John, no tabata pòrnada. Nos a usa nos forsa hubenil den e mihó manera. Nos karera den e ministerio di tempu kompleto a bal mas ku kualkier otro kos ku nos por a hasi. Mi ta masha kontentu ku nos por a siña e bèrdat di Beibel na hopi hende kerí. Awor ku mi ta mas grandi, mi por animá hóbennan ku henter mi kurason pa ‘kòrda riba nan Kreador den e dianan di nan hubentut.’—Eklesiástes 12:1.

Maske mi tin 81 aña di edat, ainda mi por sirbi komo un publikadó di tempu kompleto dje bon nobo. Mi ta lanta mainta trempan i duna testimonio na hende na parada di bus, na lugá di parker, riba kaya, den pakus i den parkenan. E problemanan di edat avansá ku mi tin awor ta hasi mi bida difísil, pero tantu mi rumannan spiritual amoroso—mi famia spiritual grandi—komo e famia di mi subrina, a demostrá di ta un berdadero sosten pa mi. Loke spesialmente mi a siña ta ku “e poder mas ayá di loke ta normal [ta] di Dios i no loke ta bini di nos mes.”—2 Korintionan 4:7, NW.

[Nota]

[Plachi na página 25]

Ariba: John, (te na man robes), ami (meimei), ku mi ruman hòmber Emmanuel na mi man robes i nos mama na su man robes, ku un grupo di bètelita na Aténas, 1950

[Plachi na página 25]

Man robes: Ami ku John den nos negoshi kant’i awa na New Jersey, 1956

[Plachi na página 26]

Kongreso di distrito na Tiranë, Albania, 1995

[Plachi na página 26]

Kompleho di Bètel, Tiranë, Albania. Terminá na 1996

[Plachi na página 26]

Ariba: artíkulo for di un “Toren di Vigilansia” di 1940 ku nan a tradusí klandestinamente na albanes

[Plachi na página 26]

Ku mi subrina Evangelia Orphanides (man drechi) i su kasá, George