Bo Ta Konfia den un Dios Ku Ta Real?

Museo Merikano di Historia Natural a organisá un ekspedishon pa bai studia un tera den region di Polo Norte ku e eksploradó Robert E. Peary supuestamente a mira un shete aña promé, na 1906.

FOR di Kabo Colgate den e parti ekstremo nortwèst di Nort-Amérika, Peary a mira loke a parse di ta punta di seru blanku di un tera leu. El a yam’é Tera di Crocker, na onor di un dje personanan ku a dun’é respaldo finansiero. Tabata un momentu masha eksitante p’e miembronan dje ekspedishon di Museo Merikano ora nan a haña un bistaso di un área nan dilanti yen di seru, vaye i punta di seru kubrí ku sneu. Pero no a tarda hopi ku nan a realisá ku ta simplemente un ilushon, un espehismo di Polo Norte nan a mira. E efekto visual aki di atmósfera a gaña Peary, i pa ora nan a realisá esei ya nan a gasta tempu, energia i rekurso pa eksplorá algu ku no tabata real.

Awe, hopi hende ta duna deboshon i tempu na diosnan ku nan ta kere ta real. Den tempu dje apòstelnan di Hesus, hende a adorá diosnan manera Hermes (na latin, Merkurio) i Zeus (na latin, Yupiter). (Echonan 14:11, 12) Awe, hende di religion sinto, hindú i di otro religion ta adorá miónes di dios. Sí, manera Beibel ta bisa, “tin hopi dios i hopi shon.” (1 Korintionan 8:5, 6) Tur e diosnan aki di bèrdat por ta eksistí?

Diosnan “Ku No Por Salba”

Por ehèmpel, konsiderá e uso di imágen òf símbolo den adorashon. Pa hende ku ta konfia den nan òf ta resa na nan, e ídolonan aparentemente ta salbadornan ku poder sobrehumano i ku por rekompensá hende òf libra nan for di peliger. Pero di bèrdat nan por salba? E salmista a bisa den un kantika tokante ophetonan asina: “E ídolonan di e nashonnan ta plata i oro, obra di mannan di hende. Nan tin boka, ma nan no ta papia; nan tin  wowo, ma nan no ta mira; nan tin orea, ma nan no ta tende; tampoko no tin rosea den nan boka.” En bèrdat nan ta dios “ku no por salba.”—Salmo 135:15-17; Isaías 45:20.

Hende ku ta traha ídolo por kere ku loke nan traha tin bida i poder. I esnan ku ta adorá ídolo ta konfia den nan. Profeta Isaías a bisa: “Nan ta his’é [e ídolo] pone riba skouder i ta kargu’é; nan ta pon’é na su lugá i einan e ta keda para.” Anto el a agregá: “E no ta kita for di su lugá. Maske un hende sklama na dje, e no por kontestá; e no por libr’é for di su angustia.” (Isaías 46:7) Bèrdat ta ku un ídolo ta keda un opheto sin bida, maske kon ferviente e kreensia di esnan ku ta konfia den dje ta. Tal imágennan grabá òf estatuanan bashá ta “diosnan sin balor.”—Habakuk 2:18, NW.

Tambe ta komun awe pa hende venerá òf adorá artistanan di farándula, personahenan di deporte, sistemanan polítiko i sierto lidernan religioso, i mira esakinan komo nan ídolo. Ademas, pa hopi hende ta plaka ta nan dios. Den tur e kasonan aki, e ídolonan ei ta haña un balor ku en realidat nan no tin. Ta imposibel pa e ídolonan ei perkurá tur loke esnan ku ta kere den nan ta spera. Por ehèmpel, rikesa por parse di ta e solushon pa hopi problema, pero e poder di rikesa ta engañoso. (Marko 4:19) Un investigadó a puntra: “Kon nos por splika ku algu ku asina tantu hende ta anhelá, algu ku nan ta kere ta un sorto di ‘kura-lo-todo,’ una bes nan hañ’é, ta produsí efektonan ku ta varia for di desepshon te trouma?” Sí, korementu tras di rikesa por pone un persona sakrifiká kosnan ku di bèrdat ta balioso, kosnan manera bon salú, dushi bida di famia, amigunan será òf un relashon presioso ku e Kreador. E persona ei su dios ta resultá di ta nada mas ku un ‘ídolo sin balor’!—Yónas 2:8.

“Ningun Hende No Tabata Kontestá”

Ta bobo pa bisa ku algu ta real, miéntras ku e no ta. Adoradónan dje dios Baal den tempu di profeta Elías a siña esaki mediante un eksperensia amargo. Nan a kere firmemente ku Baal tabatin poder pa laga kandela baha for di shelu i kima un sakrifisio di bestia. De echo, nan “a inboká e nòmber di Baal for di mainta te mèrdia, bisando: ‘O Baal, kontestá nos.’” Baal tabatin orea ku por a tende i un boka ku por a papia? E relato ta sigui bisa: “Ma no tabatin ni un bos i ni un hende no a kontestá.” Sí, “ningun hende no tabata paga atenshon.” (1 Reinan 18:26, 29) Baal no tabata real, ni bibu ni aktivo.

Ta masha esensial pa nos siña konosé i adorá un Dios ku sí ta real! Pero ken e ta? I kon nos lo benefisiá si nos konfia den dje?

[Plachinan na página 3]

Egingwah, kompañero di Peary, ta inspekshoná horizonte en buska di tera firme

Robert E. Peary

[Rekonosementu]

Egingwah: For dje buki The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Plachinan na página 4]

Hopi hende ta ser engañá dor di loke e mundu aki ta adorá komo dios