Sigui Mustra Bondat

“Pasobra e fruta di lus ta konsistí di tur sorto di bondat i hustisia i bèrdat.”—EFESIONAN 5:9.

1. Kon miónes di hende awe ta demostrá ku nan ta di akuerdo ku Salmo 31:19?

E MIHÓ kos ku kualkier hende por hasi ta di duna gloria na Yehova. Awe, miónes di hende ta hasi esaki dor di alabá Dios pa su bondat. Komo Testigunan fiel di Yehova, di kurason nos por bisa loke e salmista a kanta: “Ki abundante ta bo bondat, ku bo a warda manera tesoro pa esnan temeroso di bo!”—Salmo 31:19.

2, 3. Kiko lo por sosodé si nos trabou di hasi disipel no ta ser kompañá pa bon kondukta?

² Temor i rèspèt profundo pa Yehova ta motivá nos na alab’é pa su bondat. Tambe esei ta impulsá nos pa ‘elogiá Yehova, bendishon’é i papia di e gloria di su reino.’ (Salmo 145:10-13) Ta p’esei nos ta partisipá ku selo den e trabou di prediká e Reino i hasi disipel. (Mateo 24:14; 28:19, 20) Naturalmente, bon kondukta mester kompañá nos aktividat di prediká, sino nos lo por trese reproche riba Yehova su nòmber santu.

³ Hopi hende ta pretendé ku nan ta adorá Dios, pero nan kondukta no ta kuadra ku e normanan deskribí den su Palabra inspirá. Refiriendo na hende ku a pretendé di ta hasi bon pero ku a laga esei solamente na palabra, apòstel Pablo a skirbi: “Abo, esun ku ta siña un otro persona, no ta siña bo mes? Abo, esun ku ta prediká: ‘No hòrta,’ ta hòrta? Abo, esun ku ta bisa: ‘No kometé adulterio,’ ta kometé adulterio? . . . ‘E nòmber di Dios ta ser blasfemá entre e nashonnan pa kousa di boso’; nèt manera ta pará skirbí.”—Romanonan 2:21, 22, 24.

4. Ki efekto nos bon kondukta tin?

⁴ En bes di trese reproche riba Yehova su nòmber, nos ta hasi esfuerso pa glorifik’é ku nos bon kondukta. Esaki tin un bon influensia riba hende pafó dje kongregashon kristian. Di un banda, e ta yuda nos silensiá nos opositornan. (1 Pedro 2:15) Pero mas importante, nos bon kondukta ta atraé hende na Yehova su organisashon, i ta habri kaminda pa nan dun’é gloria i gana bida eterno.—Echonan 13:48.

5. Kua preguntanan nos mester konsiderá awor?

⁵ Pero siendo imperfekto, kon nos por evitá kondukta ku lo por desonrá Yehova i pone hende ku ta buska e bèrdat trompeká? Sí, kon nos por tin éksito den mustra bondat?

Un Fruta di Lus

6. Kua ta algun di “e obranan infruktífero ku ta pertenesé na skuridat”? Pero kua fruta mester ta bisto entre kristiannan?

⁶ Komo kristiannan dediká, nos ta disfrutá di algu ku ta yuda nos evitá “obranan infruktífero ku ta pertenesé na skuridat.” E obranan aki ta inkluí kosnan ku ta desonrá Dios manera gañamentu, hòrtamentu, abla ofensivo,  papiamentu tokante sèks den un forma insaludabel, kondukta bergonsoso, chansanan vulgar i buracheria. (Efesionan 4:25, 28, 31; 5:3, 4, 11, 12, 18) En bes di praktiká e kosnan ei, nos ta sigui “kana komo yunan di lus.” Apòstel Pablo ta bisa ku “e fruta di lus ta konsistí di tur sorto di bondat i hustisia i bèrdat.” (Efesionan 5:8, 9) Pues ta dor di kana den e lus nos por sigui mustra bondat. Pero ki klase di lus esaki ta?

7. Kiko nos tin ku hasi pa sigui desplegá e fruta di bondat?

⁷ Apesar di nos imperfekshonnan, nos por mustra bondat si nos ta kana den e lus spiritual. E salmista a kanta: “Bo palabra ta un lampi pa mi pia, i un lus pa mi kaminda.” (Salmo 119:105) Si nos kier sigui desplegá “e fruta di lus” mediante “tur sorto di bondat,” anto nos tin ku hasi uso konstante dje lus spiritual ku tin den e Palabra di Dios, i ku ta ser analisá kuidadosamente den publikashonnan kristian i konsiderá regularmente na nos reunionnan pa adorashon. (Lukas 12:42; Romanonan 15:4; Hebreonan 10:24, 25) Tambe nos tin ku presta atenshon spesial n’e ehèmpel i siñansanan di Hesukristu, “e lus di mundu” i “e reflekshon di [Yehova] su gloria”—Huan 8:12; Hebreonan 1:1-3.

Un Fruta di Spiritu

8. Kon bini nos por mustra bondat?

⁸ Lus spiritual sin duda ta yuda nos mustra bondat. Tambe nos por manifestá e kualidat aki pasobra Dios su spiritu santu òf forsa aktivo ta guia nos. Bondat ta parti dje “fruta di spiritu.” (Galationan 5:22, 23) Si nos ta someté nos mes n’e guia di Yehova su spiritu santu, lo e produsí den nos su maravioso fruta di bondat.

9. Kon nos por aktua na armonia ku e palabranan di Hesus ku ta pará skirbí na Lukas 11:9-13?

⁹ Nos deseo sinsero pa agradá Yehova dor di demostrá bondat, un dje frutanan di spiritu, mester motivá nos pa aktua na armonia ku e palabranan di Hesus: “Sigui pidi, i lo e ser duná na boso; sigui buska, i boso lo haña; sigui bati, i lo ser habrí pa boso. Pasobra tur ku ta pidi ta risibí, i tur ku ta buska ta haña, i pa tur ku ta bati lo ser habrí p’e. En bèrdat, kua tata tin den boso ku si su yu ta pidi un piská, lo dun’é akaso un kolebra en bes di un piská? Òf si e pidi tambe pa un webu, lo dun’é un skòrpion? P’esei, si boso, ounke boso ta [imperfekto i pues relativamente] malbado, sa kon pa duna bon regalo na boso yunan, ku kuantu mas rason e Tata den shelu lo duna spiritu santu na esnan ku ta pidié!” (Lukas 11:9-13) Laga nos sigui Hesus su konseho dor di hasi orashon pidi Yehova pa su spiritu ya asina nos por sigui demostrá su fruta di bondat.

“Sigui Hasi Bon”

10. Éksodo 34:6 i 7 ta menshoná kua maneranan ku Yehova ta demostrá su bondat?

¹⁰ Teniendo lus spiritual for dje Palabra di Dios i ku yudansa di Dios su spiritu santu, nos por “sigui hasi bon.” (Romanonan 13:3) Dor di studia Beibel ku regularidat, nos ta siña mas tokante kon nos por imitá Yehova su bondat. E artíkulo anterior a konsiderá aspektonan di Dios su bondat menshoná den e deklarashon na Moises ku ta pará skirbí na Éksodo 34:6 i 7. Ei nos ta lesa: “Yehova, Yehova, un Dios miserikòrdioso i yen di grasia, ku ta tarda pa rabia i ta abundante den bondat amoroso i bèrdat, ku ta konserbá bondat amoroso pa míles, i ta pordoná eror i transgreshon i piká, pero di ningun manera lo e duna dispensashon di  kastigu.” Un análisis dje maneranan aki ku Yehova ta mustra su bondat lo yuda nos “sigui hasi bon.”

11. Ki influensia e echo ku nos sa ku Yehova ta miserikòrdioso i yen di grasia mester tin riba nos?

¹¹ E deklarashon divino aki ta spièrta nos ku nos tin ku imitá Yehova dor di ser miserikòrdioso i yen di grasia. Hesus a bisa: “Felis ta esnan miserikòrdioso, ya ku nan lo ser mustrá miserikòrdia.” (Mateo 5:7; Lukas 6:36) Konsiente dje echo ku Yehova ta yen di grasia, òf komprenshon, nos ta ser impulsá pa ta komprensivo i plasentero den e manera ku nos ta trata otro hende, inkluso esnan na ken nos ta prediká. Esaki ta na armonia ku Pablo su konseho: “Laga boso ekspreshon semper sea ku grasia, sasoná ku salu, pa boso por sa kon boso mester duna un kontesta na kada un.”—Kolosensenan 4:6.

12. (a) Siendo ku Dios ta tarda pa rabia, kon nos mester trata otro hende? (b) Yehova su bondat amoroso ta motivá nos pa hasi kiko?

¹² Siendo ku Dios ta tarda pa rabia, nos deseo pa “sigui hasi bon” ta impulsá nos pa soportá e fayonan chikí di nos kompañeronan di kreensia i konsentrá riba nan bon kualidatnan. (Mateo 7:5; Santiago 1:19) Yehova su bondat amoroso ta motivá nos pa desplegá amor leal, asta bou di e sirkunstansianan di mas difísil. Esaki sigur ta algu hopi deseabel.—Proverbionan 19:22.

13. Kon nos mester aktua pa reflehá ku Yehova ta ‘abundante den bèrdat’?

¹³ Komo ku nos Tata selestial ta ‘abundante den bèrdat,’ nos ta trata na ‘rekomendá nos mes komo ministernan di Dios dor di papia e bèrdat.’ (2 Korintionan 6:3-7) Dos dje shete kosnan ku Yehova ta odia ta “un lenga falsu” i “un testigu falsu ku ta lansa mentira.” (Proverbionan 6:16-19) Pues nos deseo pa agradá Dios ta motivá nos pa ‘kita falsedat i papia bèrdat.’ (Efesionan 4:25) Laga nos nunka keda sin manifestá bondat den e manera vital aki.

14. Dikon nos mester ta pordonadó?

¹⁴ Loke Dios a deklará na Moises mester motivá nos tambe pa ta pordonadó, pasobra Yehova ta kla pa pordoná. (Mateo 6:14, 15) Klaro ku Yehova ta kastigá pekadornan ku no arepentí. P’esei nos tin ku apoyá su normanan di bondat pa loke ta trata mantené e limpiesa spiritual dje kongregashon.—Levítiko 5:1; 1 Korintionan 5:11, 12; 1 Timoteo 5:22.

“Vigilá Kuidadosamente”

15, 16. Kon Pablo su konseho registrá na Efesionan 5:15-19 ta yuda nos sigui praktiká bondat?

¹⁵ Pa sigui mustra bondat apesar dje maldat ku tin rònt di nos, nos mester ta yen di Dios su spiritu i vigilá kon nos ta kana. P’esei Pablo a animá kristiannan na Efeso: “Vigilá kuidadosamente p’e manera ku boso ta kana no ta manera hende imprudente sino manera hende sabí, kumprando e tempu oportuno pa boso  mes, pasobra e dianan ta malu. P’e motibu aki, stòp di bira irazonabel, sino sigui persibí loke ta e boluntat di Yehova. Tambe, no bira burachi ku biña, den kua tin korupshon, sino sigui yena boso ku spiritu, papiando ku boso mes ku salmo i alabansa pa Dios i kantikanan spiritual, kantando i kompañando boso mes ku músika den boso kurason na Yehova.” (Efesionan 5:15-19) E konseho aki sigur ta na su lugá den e último dianan trabahoso aki.—2 Timoteo 3:1.

¹⁶ Pa nos por sigui praktiká bondat, nos tin ku vigilá bon pa nos kana manera hende ku ta ehersé sabiduria divino. (Santiago 3:17) Nos tin ku evitá pikánan serio, tambe yena nos mes ku spiritu santu i laga e forsa aki guia nos. (Galationan 5:19-25) Dor di apliká e instrukshon spiritual duná na reunionnan kristian, asambleanan i kongresonan, nos por sigui hasi loke ta bon. Tambe e palabranan di Pablo n’e efesionan ta kòrda nos ku na mayoria di nos reunionnan di adorashon, nos ta benefisiá di nos kantamentu sinsero di “kantikanan spiritual,” ya ku hopi di nan ta trata di kualidatnan spiritual, manera por ehèmpel bondat.

17. Kristiannan ku tin un malesa grave ku ta stroba nan di asistí regularmente na reunion, por ta sigur di kiko?

¹⁷ Kiko di nos kompañeronan di kreensia ku no por asistí na reunionnan kristian regularmente pa motibu di un malesa grave? Podisé nan ta sinti nan mes desanimá pasobra no ta tur biaha nan por adorá Yehova den kompania di nan rumannan spiritual. Pero nan por tin sigur ku Yehova ta komprendé nan situashon, ku lo e mantené nan den e lus, lo duna nan su spiritu santu i lo yuda nan sigui hasi loke ta bon.—Isaías 57:15.

18. Kiko lo yuda nos sigui e kaminda di bondat?

¹⁸ Pa sigui e kaminda di bondat nos mester vigilá ku ken nos ta anda i apartá for di hende ku no tin “amor pa bondat.” (2 Timoteo 3:2-5; 1 Korintionan 15:33) Aplikando tal konseho nos ta evitá di “afligí e spiritu santu di Dios” dor di bai kontra su guia. (Efesionan 4:30) Ademas, nos ta haña yudansa pa hasi loke ta bon si nos desaroyá amistat será ku esnan kende nan bida ta duna evidensia ku nan stima bondat i ku nan ta laga e spiritu santu di Yehova guia nan.—Ámos 5:15; Romanonan 8:14; Galationan 5:18.

Bondat Ta Produsí Bon Resultado

19-21. Konta eksperensianan ku ta mustra e efekto di demostrá bondat.

¹⁹ Si nos kana den e lus spiritual, someté nos mes n’e guia di Dios su spiritu i vigilá kon nos ta kana, nos lo por evitá loke ta malu i “sigui hasi bon.” Esaki na su turno por produsí bon resultado. Konsiderá e eksperensia di Zongezile, un Testigu di Yehova na Sur Áfrika. Un mainta riba kaminda pa skol, el a pasa chèk e saldo di su pida kuenta di spar. E papel di bankomátiko a mustra ekibokadamente ku e tabatin mas di 42.000 rant (11.000 florin). Un bewaker dje banko i otro hende a anim’é p’e lanta e plaka i deposit’é na un otro banko. Ta e pareha Testigu ku e tabata biba serka dje so a felisit’é pasobra e no a lanta e plaka.

²⁰ E siguiente dia di trabou, Zongezile a notifiká banko dje eror. Nan a deskubrí ku e number di su kuenta di spar tabata kasi meskos ku esun di un komersiante riku, kende pa ekibokashon a depositá plaka riba su kuenta. Asombrá ku Zongezile no a gasta niun sèn pretu dje plaka aki, e komersiante a puntr’é: “Di kua religion bo ta?” Zongezile a splika ku e ta un Testigu di Yehova. E funshonarionan di banko a felisit’é kalurosamente, i a bisa: “Mare tur hende tabata onrado manera Testigunan di Yehova.” Pues en bèrdat aktonan di onrades i bondat por pone otro hende glorifiká Yehova.—Hebreonan 13:18.

²¹ Aktonan di bondat no mester ta dramátiko pa nan tin un bon efekto. Un ehèmpel: Un Testigu hóben ku ta sirbi komo un evangelisadó di tempu kompleto riba un dje islanan di  Samoa tabatin ku bai e hospital lokal. Tabatin hopi hende ta warda riba e dòkter, i e Testigu a ripará banda di dje un señora hende grandi ku tabata hopi malu. El a duna e señora un chèns di bai na su lugá ya asina e por a haña atenshon médiko mas lihé posibel. Despues di poko tempu, e Testigu a topa e señora aki na marshe. E señora a kòrd’é i tambe su bon obra na hospital. E di: “Awor mi sa ku Testigunan di Yehova di bèrdat stima nan próhimo.” Ántes e señora no tabata skucha e mensahe di Reino, pero e bondat ku e Testigu a mustra na dje tabatin un bon efekto. El a aseptá un studio di Beibel na kas i a kuminsá gana konosementu dje Palabra di Dios.

22. Kua ta un manera importante pa “sigui hasi bon”?

²² Muy probablemente, bo por konta un eksperensia ku ta demostrá e balor di mustra bondat. Un manera hopi importante di “sigui hasi bon” ta dor di partisipá regularmente den proklamá e bon notisia dje Reino di Dios. (Mateo 24:14) Laga nos sigui partisipá den e aktividat presioso aki, realisando ku esaki ta un manera pa hasi bon, foral na esnan ku reakshoná positivo. Mas importante ainda, nos ministerio i bon kondukta ta glorifiká Yehova, e fuente prinsipal di bondat.—Mateo 19:16, 17.

Sigui “Obra Loke Ta Bon”

23. Dikon e ministerio kristian ta un bon obra?

²³ Nos ministerio sin duda ta un bon obra. E por resultá den salbashon pa nos i pa esnan ku skucha e mensahe di Beibel i subi e kaminda ku ta hiba na bida eterno. (Mateo 7:13, 14; 1 Timoteo 4:16) Ora nos ta konfrontá desishonnan, e deseo di hasi loke ta bon probablemente ta pone nos puntra nos mes: ‘Ki efekto e desishon aki lo tin riba mi aktividat di prediká e Reino? Loke mi tin pensá di hasi di bèrdat ta bon? Lo e yuda mi duna otronan un man pa aseptá e “bon nobo eterno” i haña un bon relashon ku Yehova Dios?’ (Revelashon 14:6) Nos lo haña gran felisidat si nos tuma un desishon ku ta pèrmití nos hasi mas pa e Reino.—Mateo 6:33; Echonan 20:35.

24, 25. Kua ta algun manera pa hasi bon den kongregashon, i di kiko nos por tin sigur si nos sigui mustra bondat?

²⁴ Laga nos nunka balotá e efektonan probechoso di bondat. Nos por sigui desplegá e kualidat aki dor di apoyá e kongregashon kristian i dor di hasi loke nos por pa kontribuí na su bienestar. Un kos ta sigur, nos ta hasi bon ora nos ta asistí i partisipá ku regularidat na reunionnan kristian. Nos presensia so ya ta animá kompañeronan di adorashon, i nos komentarionan bon prepará ta edifiká nan spiritualmente. Tambe nos ta hasi bon ora nos usa nos rekursonan pa mantené e Salon di Reino i ora nos ta yuda kuid’é bon. (2 Reinan 22:3-7; 2 Korintionan 9:6, 7) Sí, “miéntras ku nos tin tempu faborabel p’e, laga nos obra loke ta bon pa ku tur, pero spesialmente pa ku esnan relashoná ku nos den e fe.”—Galationan 6:10.

²⁵ Nos no por mira di antemano kua ta tur e situashonnan den kua nos mester mustra bondat. P’esei segun ku nos ta enfrentá retonan nobo, laga nos buska iluminashon for dje Skritura, resa pidi Yehova pa su spiritu santu, i hasi nos bèst pa kumpli ku su bon boluntat perfekto. (Romanonan 2:9, 10; 12:2) Nos por tin sigur ku Yehova lo bendishoná nos abundantemente miéntras nos ta sigui mustra bondat.

Kon Lo Bo Kontestá?

• Kiko ta e mihó kos ku nos por hasi, i kon nos por logr’é?

• Dikon bondat ta ser yamá un “fruta di lus”?

• Dikon bondat ta ser yamá un “fruta di spiritu”?

• Ki efekto nos bon kondukta tin?

[Preguntanan di Estudio]

[Plachi na página 17]

Dios su Palabra i su spiritu santu por yuda nos mustra bondat

[Plachi na página 18]

Mustra bondat ta produsí bon resultado