“Bini Serka Mi, . . . i Lo Mi Refreská Boso”

Ta Refreskante pa “Prediká e Palabra”

E TABATA un hòmber perfekto riba un mishon importante. Su métodonan di duna instrukshon tabata asina efektivo ku “e multitutnan a keda asombrá di su siñansa.” (Mateo 7:28) Tambe e tabata un predikadó inkansabel. El a dediká su tempu, energia i rekursonan prinsipalmente na prediká tokante e Reino di Dios. Sí, Hesukristu a biaha rònt su pais natal komo un predikadó i maestro inkomparabel.—Mateo 9:35.

Hesus su mishon urgente tabata pa prediká “e evangelio di reino” n’e hendenan di su tempu, i entrená su disipelnan pa hasi e mesun trabou na un eskala mundial. (Mateo 4:23; 24:14; 28:19, 20) E gran responsabilidat dje enkargo di prediká, e urgensia i tambe e magnitut di tal aktividat lo a desanimá Hesus su siguidónan imperfekto, kendenan tabatin nan limitashonnan?

Apsolutamente ku no! Despues di instruí su disipelnan pa resa pidi Yehova Dios, e “Señor di kosecha,” pa mas trahadó, Hesus a manda nan sali bai eduká e pueblo. (Mateo 9:38; 10:1) Anto el a sigurá nan ku e responsabilidat di ser su siguidó—inkluso e enkargo di prediká—lo trese berdadero alivio i konsuelo. Hesus a bisa: “Bini serka mi, . . . i lo mi refreská boso.”—Mateo 11:28, NW.

Un Fuente di Goso

Esta un invitashon kompasivo, amoroso i bondadoso esei ta! E invitashon ta mustra ku Hesus ta masha interesá den su siguidónan. Su disipelnan ta ser refreská dor di kumpli ku nan responsabilidat di prediká “e evangelio,” esta, e bon notisia dje Reino di Dios. Esaki ta duna nan berdadero goso i satisfakshon.—Huan 4:36.

Hopi promé ku Hesus a bini na mundu, e Skritura a enfatisá ku goso mester ta un karakterístika di sirbishi sagrado na Dios. Esaki a sali na kla ora e salmista a kanta: “Grita di alegria na SEÑOR, mundu henter. Sirbi SEÑOR ku goso; bin den su presensia ku kantamentu gososo.” (Salmo 100:1, 2) Awe, hende di tur nashon ta alegrá den Yehova, i nan ekspreshonnan di alabansa ta manera e gritu triunfante di un ehérsito viktorioso. Hende ku ta realmente fiel na Dios ta bin den su presensia “ku kantamentu gososo.” I esei ta na su lugá, pasobra Yehova ta e “Dios felis,” ku kier pa su sirbidónan haña goso ora nan ta kumpli ku nan dedikashon na dje.—1 Timoteo 1:11, NW.

Esnan Ku Ta Prediká Ta Sinti Nan Refreská

Kon ta posibel ku trabou duru den sirbishi di fèlt no ta agotá nos sino mas bien refreská nos? Wèl, e trabou ku Yehova a manda Hesus hasi tabata manera kuminda p’e, algu ku a dun’é energia. El a bisa: “Mi kuminda ta pa hasi e boluntat di esun ku a manda mi, i pa kumpli ku su trabou.”—Huan 4:34.

Asina tambe predikadónan kristian seloso djawe ta haña goso segun ku nan ta “prediká e palabra.” (2 Timoteo 4:2) Connie, un señora kristian riba 40 aña, ta dediká mas ku 70 ora pa luna na e trabou di prediká, i ta bisa: “Despues di traha den sirbishi di fèlt, mi ta sinti un satisfakshon i un kontentu, maske mi ta kansá na final dje dia.”

Pero kiko si hende no ta reakshoná positivo riba e mensahe di Reino? Connie ta sigui bisa: “Maske kon e reakshon por tabata, nunka a yega di duel mi ku mi a partisipá den e sirbishi di fèlt. Fuera di sa ku mi ta hasiendo loke ta agradá Yehova, pa mi ta un plaser di por papia tokante e bèrdat, pasobra  segun ku mi ta hasi esei e maravioso speransa di Beibel ta bira mas firme den mi kurason.”

Otro kristiannan ta haña ku dor di yuda hende gana un konosementu eksakto di Dios nan propio bida ta haña un propósito. Meloney, un mucha muhé ku regularmente ta pasa mas ku 50 ora pa luna den e trabou di prediká, ta bisa: “E ministerio ta refreskante pasobra e ta duna mi bida un enfoke i propósito. Problemanan personal i tenshonnan di tur dia ta bira ménos importante ora mi ta den sirbishi.”

Millicent, un otro seloso predikadó Testigu di Yehova, ta komentá: “E ministerio ta duna mas realse na kada dia ku mi pasa papiando ku otro hende tokante Dios su propósito pa humanidat i splikando nan kon Paradeis lo ser restorá riba tera. E ta hasi Yehova un persona real pa mi riba un base diario, i ta duna mi pas i un grado di felisidat interno ku mi no por haña via ningun otro medio.”

Esnan Ku Ta Risibí e Mensahe Ta Sinti Nan Refreská

E ministerio kristian sigur-sigur ta refreská predikadónan di Reino, pero tambe e ta duna konsuelo na hende ku ta aseptá e mensahe ku ta duna bida. Un yùfrou di skol na Portugal a haña lès serka sùr ku pastor, pero tòg el a sinti ku iglesia no a satisfasé su nesesidatnan spiritual. E no tabata haña kontesta riba su preguntanan tokante Beibel. Un studio di Beibel regular ku un Testigu di Yehova a dun’é un komprendementu progresivo dje Skritura. E yùfrou di skol a keda enkantá. El a bisa: “Tur djarason mi tabata spera ansiosamente pa mi ora di studio, ya ku tur mi preguntanan tabata ser kontestá ku prueba konvinsente basá riba Beibel.” Awe, e señora aki ta un sirbidó di Yehova dediká, i e tambe ta refreská otro hende ku bèrdat bíbliko.

Pues ta opvio ku Testigunan di Yehova no ta sinti nan desanimá dor dje seriedat di nan enkargo di prediká ni dor dje magnitut di nan teritorio mundial. Ni indiferensia ni oposishon no ta deskurashá nan. Nan a dediká nan mes vigorosamente na kumpli ku nan enkargo di prediká e Reino. Nan ta kompartí e bon nobo tur kaminda ku nan por haña hende: sea ta na un parada di trùk na Merka (1), na un aeropuerto na Korea (2), den serunan di Ándes (3) òf den un pakus na Lònden (4). Ku goso Hesus su siguidónan di tempu aktual ta efektuá rònt mundu nan trabou rekompensador. I manera Hesus a primintí, el a refreská nan i a usa nan pa refreská hopi otro hende.—Revelashon 22:17.