Bo A Risibí “e Spiritu dje Bèrdat”?

‘E Tata lo duna boso un otro yudante pa keda ku boso pa semper, e spiritu dje bèrdat.’—HUAN 14:16, 17, NW.

1. Ki informashon importante Hesus a duna su disipelnan durante su último oranan ku nan den e sala djariba?

“SEÑOR, unda bo ta bai?” Esei ta un dje kosnan ku e apòstelnan di Hesus a puntr’é durante e último oranan ku el a pasa ku nan, den un sala djariba na Yerusalèm. (Huan 13:36) Den transkurso dje reunion, Hesus a laga nan sa ku a yega tempu p’e bai laga nan i bolbe serka su Tata. (Huan 14:28; 16:28) Lo e no ta ku nan físikamente mas pa instruí nan i kontestá nan preguntanan. Pero el a duna nan konfiansa, bisando: “Lo mi pidi e Tata, i e lo duna boso un otro konsoladó [yudante, NW], pa e keda serka boso pa semper.”—Huan 14:16.

2. Kiko Hesus a primintí di manda pa su disipelnan despues ku e bai?

² Hesus a identifiká e yudante ei i a splika nan kon lo e yuda su disipelnan. El a bisa nan: “E kosnan aki mi no a bisa boso for di prinsipio, pasobra mi tabata serka boso. Ma awor mi ta bai serka esun ku a manda mi . . . Ta kumbiní boso ku mi ta bai; pasobra si mi no bai, e konsoladó lo no bin serka boso; ma si mi bai, lo mi mand’é serka boso. . . . Ora ku e, e spiritu di bèrdat, bin, e lo guia boso den tur bèrdat.”—Huan 16:4, 5, 7, 13.

3. (a) Ki dia e promé kristiannan a risibí “e spiritu dje bèrdat”? (b) Den ki manera importante e spiritu tabata un “yudante” pa nan?

³ E promesa aki a kumpli na Pentekòste di aña 33 Era Komun, i apòstel Pedro a duna testimonio di esaki: “E Hesus aki Dios a lanta, di lokual nos tur ta testigu. P’esei, siendo halsá na man drechi di Dios i despues di a risibí for di e Tata e promesa di spiritu santu, el a drama esaki, lokual boso ta mira i tende.” (Echonan 2:32, 33) Manera nos lo sigui mira, e spiritu santu dramá na Pentekòste a logra hopi pa e promé kristiannan. Pero Hesus a primintí ku “e spiritu dje bèrdat” lo a ‘hasi nan rekordá tur loke el a bisa nan.’ (Huan 14:26) E spiritu lo a yuda nan kòrda Hesus su ministerio, su siñansanan, i asta e palabranan eksakto ku el a papia, pa nan por a pone nan por eskrito. Spesialmente pa apòstel Huan, ku ya tabata grandi na fin di promé siglo ora el a kuminsá skirbi su relato di Evangelio, e spiritu aki lo tabata hopi útil. Den su relato nos ta haña e konseho balioso ku Hesus a duna ora el a instituí e Konmemorashon di su morto.—Huan, kapítulo 13-17.

4. Kon “e spiritu dje bèrdat” a yuda e promé kristiannan ungí?

⁴ Tambe Hesus a primintí e promé disipelnan ei ku e spiritu lo a ‘siña nan tur kos’ i  ‘guia nan den tur bèrdat.’ E spiritu lo a yuda nan komprendé e kosnan mas profundo di Beibel, i yuda nan keda uní den pensamentu, komprendementu i propósito. (1 Korintionan 2:10; Efesionan 4:3) Asina spiritu santu a duna e promé kristiannan, komo grupo, poder pa nan aktua manera un “esklabo fiel i diskreto” ku ta duna kristiannan individual “alimento n’e debido tempu.”—Mateo 24:45, NW.

E Spiritu Ta Duna Testimonio

5. (a) Ki speransa nobo Hesus a revelá na su disipelnan riba e anochi di 14 di nísan di 33 E.K.? (b) Ki papel spiritu santu lo a hunga den kumplimentu di Hesus su promesa?

⁵ Riba e anochi di 14 di nísan di aña 33 Era Komun, Hesus a revelá na su disipelnan ku despues e lo a risibí nan, pa nan bai biba serka dje i su Tata den shelu. El a bisa nan: “Den kas di mi Tata tin hopi lugá di biba; si no tabata asina, lo mi a bisa boso; pasobra mi ta bai pa prepará un lugá pa boso. I ora mi bai i prepará un lugá pa boso, lo mi bin atrobe i risibí boso serka mi, pa kaminda ami ta, boso tambe por ta.” (Huan 13:36; 14:2, 3) Nan lo a bai reina kuné den su Reino. (Lukas 22:28-30) Pa nan por tabatin e speransa selestial aki, nan mester a “nase di e spiritu” komo yu spiritual di Dios, i ser ungí pa sirbi komo rei i saserdote ku Kristu den shelu.—Huan 3:5-8; 2 Korintionan 1:21, 22; Tito 3:5-7; 1 Pedro 1:3, 4; Revelashon 20:6.

6. (a) Na ki tempu e yamada pa shelu a kuminsá, i kuantu hende ta risibí e yamada aki? (b) Esnan yamá a ser batisá pa bira parti di kiko?

⁶ E “yamada selestial” aki a kuminsá na Pentekòste di aña 33 Era Komun, i ta parse ku pa meimei di añanan 30 di siglo 20, el a terminá. (Hebreonan 3:1) E kantidat di persona seyá ku spiritu santu pa bira parti di Israel spiritual ta 144.000, “kumprá for di entre hende.” (Revelashon 7:4; 14:1-4) Nan a ser batisá pa bira parti dje kurpa spiritual di Kristu, di su kongregashon, i di su morto. (Romanonan 6:3; 1 Korintionan 12:12, 13, 27; Efesionan 1:22, 23) Despues ku nan a batisá den awa i a ser ungí ku spiritu santu, nan a drenta un proseso di sakrifisio, esta, nan a kuminsá un bida di integridat ku ta dura te ora nan muri.—Romanonan 6:4, 5.

7. Dikon ta kristiannan ungí so por partisipá korektamente dje emblemanan di Memorial?

⁷ Komo israelitanan spiritual, e kristiannan ungí aki ta den e pakto nobo entre Yehova i “e Israel di Dios.” (Galationan 6:16; Yeremías 31:31-34) E pakto nobo aki a drenta na vigor a base di Kristu su sanger dramá. Hesus a menshoná esaki ora el a instituí e Konmemorashon di su morto. Lukas ta konta: “El a kohe pan i a duna gradisimentu, el a kibr’é, i a duna nan esaki, bisando: ‘Esaki ta mi kurpa ku ta duná pa boso; hasi esaki na mi rekuerdo.’ I di e mesun manera el a kohe e kopa despues ku nan a kaba di kome, bisando: ‘E kopa aki, ku a wòrdu dramá pa boso, ta e aliansa nobo den mi sanger.’” (Lukas 22:19, 20) E restu, esta, esnan ku a keda riba tera ainda dje grupo di 144.000, ta esnan ku korektamente por partisipá dje pan i e biña ku ta sirbi komo emblema na e Konmemorashon dje morto di Kristu.

8. Kon e ungínan sa ku nan a risibí e yamada pa shelu?

⁸ Kon kristiannan ungí sa ku nan a risibí e yamada selestial? Spiritu santu ta duna nan un testimonio inekibokabel. Apòstel Pablo a skirbi algun di nan: “Tur esnan ku ta wòrdu guiá dor di e spiritu di Dios, esakinan ta yunan di Dios. . . . E spiritu mes ta duna testimonio huntu ku nos spiritu ku nos ta yu di Dios, i si nos ta yu, nos ta heredero tambe, heredero di Dios i ko-heredero ku Kristu, si di bèrdat nos ta sufri huntu kuné, pa nos wòrdu glorifiká tambe huntu kuné.” (Romanonan 8:14-17) E testimonio ku e spiritu ta duna ta asina poderoso, ku si un hende tin e mínimo duda ku el a risibí e yamada pa shelu, e por  konkluí rasonablemente ku e no a risibié, i p’esei lo no partisipá dje emblemanan di Memorial.

E Spiritu i e Otro Karnénan

9. Kua dos diferente grupo e Evangelionan i e buki di Revelashon ta menshoná?

⁹ Teniendo na mente ku ta un kantidat limitá di kristian ta yamá pa forma parti di Israel spiritual, Hesus a yama nan e “tou chikitu.” Nan ta ser atmití den e “kurá” dje pakto nobo. Ademas di nan, tin e kantidat sin límite di ‘otro karné’ ku tambe Hesus mester rekohé, manera el a bisa. (Lukas 12:32; Huan 10:16) E otro karnénan ku ser rekohé durante e tempu di fin lo forma e “multitut grandi” ku tin ku sobrebibí e “gran tribulashon,” ku speransa di biba pa semper den paradeis riba tera. Ta interesante ku e vishon ku Huan a risibí na fin di promé siglo di Era Komun ta hasi un distinshon entre dos grupo: e multitut grandi aki, i e 144.000 miembronan di Israel spiritual. (Revelashon 7:4, 9, 14) E otro karnénan tambe ta risibí spiritu santu? I si ta asina, ki efekto e tin riba nan bida?

10. Kon e otro karnénan ta batisá “den nòmber di e Tata i di e Yu i di e spiritu santu”?

¹⁰ En bèrdat spiritu santu ta hunga un papel importante den bida dje otro karnénan. Nan ta simbolisá nan dedikashon na Yehova dor di batisá “den nòmber di e Tata i di e Yu i di e spiritu santu.” (Mateo 28:19) Nan ta rekonosé Yehova su soberania, ta someté nan mes na Kristu komo nan Rei i Reskatador, i ta pèrmití Dios su spiritu, su forsa aktivo, obra den nan bida. Tur dia nan ta purba kultivá e “fruta di e spiritu,” esta, “amor, goso, pas, pasenshi, kariño, bondat, fieldat, mansedumbre, dominio propio.”—Galationan 5:22, 23.

11, 12. (a) Den ki sentido spesial e ungínan ta ser santifiká? (b) Kon e otro karnénan ta ser santifiká?

¹¹ Tambe e otro karnénan mester laga e Palabra di Dios i su spiritu santu purifiká nan, santifiká nan. E ungínan ta santifiká kaba den un sentido mashá spesial. Nan a ser deklará hustu i santu komo e brùit di Kristu. (Huan 17:17; 1 Korintionan 6:11; Efesionan 5:23-27) Profeta Daniel ta yama nan “e santunan di e Haltísimo,” ku ta risibí e Reino bou dje “yu di hende” Kristu Hesus. (Daniel 7:13, 14, 18, 27) Mas promé, via Moises ku Aron, Yehova a deklará n’e nashon di Israel: “Ami ta SEÑOR boso Dios. Konsagrá boso mes anto i sea santu, pasobra ami ta santu.”—Levítiko 11:44.

¹² Básikamente e palabra “santifiká” ta nifiká “hasi santu, separá òf apartá pa sirbi Yehova Dios òf ser usá dor di dje; bira santu òf puru.” For di 1938 E Toren di Vigilansia a deklará ku e Yonadabnan, esta, e otro karnénan, “mester siña ku konsagrashon [dedikashon] i santifikashon ta un rekisito pa tur hende ku kier bira parti dje multitut grandi i biba riba tera.” E vishon dje multitut grandi registrá den e buki di Revelashon ta bisa ku nan a “laba nan pañanan i a hasi nan blanku den e sanger di e Lamchi” i ta rindi sirbishi sagrado na Yehova “di dia i anochi den su tèmpel.” (Revelashon 7:9, 14, 15) Ku yudansa di spiritu santu, e otro karnénan ta hasi tur loke nan por pa kumpli ku Yehova su rekisitonan di santidat.—2 Korintionan 7:1.

 Hasi Bon pa e Rumannan di Kristu

13, 14. (a) Segun Hesus su komparashon di karné i kabritu, di kiko salbashon dje otro karnénan ta dependé? (b) Awor den e tempu di fin, kon e otro karnénan a yega di hasi bon pa e rumannan di Kristu?

¹³ Hesus a hala atenshon na e relashon íntimo ku ta eksistí entre e otro karnénan i e tou chikitu den su komparashon di karné i kabritu ku a forma parti di su profesia tokante “e fin.” Den e komparashon ei, Kristu a mustra bon kla ku salbashon dje otro karnénan ta estrechamente ligá ku e manera ku nan ta trata e ungínan, kendenan el a yama ‘rumannan di mi.’ El a bisa: “E rei lo bisa esnan na su man drechi: ‘Bin, boso ku ta bendishoná di mi Tata, heredá e reino ku ta prepará pa boso desde e fundashon di mundu. . . . Di bèrdat mi ta bisa boso, tur loke boso a hasi pa un di esnan di mas chikitu di e rumannan aki di mi, ta pa mi boso a hasié.’”—Mateo 24:3; 25:31-34, 40.

¹⁴ E ekspreshon “tur loke boso a hasi” ta referí na e apoyo amoroso ku nan ta duna e rumannan di Kristu engendrá pa spiritu. E mundu di Satanas a trata nan komo stranhero. Algun di nan asta a ser tirá den prizòn. Nan a yega di falta kuminda, paña apropiado i kuido médiko. (Mateo 25:35, 36, NW, nota na pia di página) Awor den e tempu di fin, for di aña 1914, hopi dje ungínan a yega di haña nan mes den situashonnan asina. Historia moderno di Testigunan di Yehova ta komprobá ku nan kompañeronan leal, e otro karnénan, motivá dor di spiritu santu, a sali na nan yudansa.

15, 16. (a) Prinsipalmente den ki aktividat e otro karnénan a yuda e rumannan ungí di Kristu riba tera? (b) Kon e ungínan a ekspresá nan apresio pa e otro karnénan?

¹⁵ E rumannan ungí di Kristu a risibí apoyo aktivo dje otro karnénan, prinsipalmente pa kumpli ku e enkargo ku Dios a duna nan di ‘prediká e evangelio den henter mundu komo un testimonio na tur nashon.’ (Mateo 24:14; Huan 14:12) Segun ku e kantidat di ungínan riba tera a bin ta baha atraves di añanan, e otro karnénan sí a oumentá na kantidat, te ku awor literalmente tin miónes di nan. Míles di nan a sirbi komo evangelisadó di tempu kompleto—pionero i misionero—plamando e bon nobo di Reino “te na e parti mas alehá di mundu.” (Echonan 1:8) Otronan ta partisipá den e trabou di duna testimonio te kaminda nan por, i ta apoyá e obra importante aki finansieramente.

¹⁶ E rumannan ungí di Kristu tin un gran apresio p’e apoyo leal di nan kompañeronan, e otro karnénan! Nan sintimentunan ta bon ekspresá den e buki Siguridad mundial bao di “Prinz di Paz,” ku e esklabo fiel a perkurá na 1986. E ta bisa: “Desde Guera Mundial II, kumplimentu dje profesia di Hesus p’e ‘konklushon dje sistema di kosnan’ ta debí prinsipalmente n’e papel ku e ‘multitut grandi’ di ‘otro karné’ ta hunga. . . . Pues, mashá danki mes ta ser duná n’e ‘multitut grandi’ internashonal di hopi idioma p’e papel grandi ku nan ta hunga kumpliendo ku e profesia [di Hesus] den Mateo 24:14!”

‘Nan No Ta Wòrdu Hasí Perfekto Sin Nos’

17. Den ki manera esnan fiel di pasado ku lo resusitá riba tera lo “no wòrdu hasí perfekto sin” e ungínan?

¹⁷ Apòstel Pablo, papiando komo un dje  ungínan, a skirbi lo siguiente tokante e hòmber i muhénan fiel ku a biba promé ku Kristu: “Tur esakinan ku a haña aprobashon pa medio di nan fe no a risibí loke a wòrdu primintí, pasobra Dios a proveé algu mihó pa nos [e ungínan], pa nan no wòrdu hasí perfekto sin nos.” (Hebreonan 11:35, 39, 40) Durante e Milenio, Kristu i su 144.000 rumannan ungí den shelu lo aktua komo rei i saserdote, i lo trese e benefisionan di Kristu su sakrifisio di reskate riba tera. Asina, e otro karnénan lo “wòrdu hasí perfekto” den mente i kurpa.—Revelashon 22:1, 2.

18. (a) Kiko echonan bíbliko mester yuda e otro karnénan komprendé? (b) Ku ki speransa e otro karnénan ta warda riba “e revelashon di e yunan di Dios”?

¹⁸ Tur esaki mester pone e otro karnénan mira dikon e Skritura Griego Kristian ta hala asina tantu atenshon na Kristu i su rumannan ungí den e papel sentral ku nan ta hunga den kumplimentu di Yehova su propósito. P’esei, pa e otro karnénan ta un privilegio di por apoyá e klase di kristiannan ungí den tur manera ku nan por, miéntras ku nan ta spera riba “e revelashon di e yunan di Dios” na Armagedon i durante e Milenio. Nan tin e speransa di ‘wòrdu librá for di sklabitut na korupshon pa drenta den e libertat glorioso di e yunan di Dios.’—Romanonan 8:19-21.

Uní den e Spiritu na e Konmemorashon

19. Kiko “e spiritu dje bèrdat” a hasi pa e ungínan i nan kompañeronan, i kon nan lo ta spesialmente uní durante e anochi di 28 di mart?

¹⁹ Den su orashon final riba e anochi di 14 di nísan di aña 33 E.K., Hesus a bisa: “Mi ta hasi petishon . . . pa nan tur por ta un, meskos ku abo, Tata, ta den union ku mi i ami ta den union ku bo, pa nan tambe por ta den union ku nos, pa e mundu por kere ku ta abo a manda mi.” (Huan 17:20, 21, NW) Motivá pa amor, Dios a manda su Yu pa duna su bida pa salbashon dje ungínan i e mundu, esta, humanidat obediente. (1 Huan 2:2) “E spiritu dje bèrdat” a uni e rumannan di Kristu i nan kompañeronan. Dia 28 di mart, despues ku solo baha, tur dos grupo lo reuní huntu pa konmemorá e morto di Kristu i kòrda tur loke Yehova a hasi pa nan, pa medio dje sakrifisio di su Yu stimá, Kristu Hesus. Laga nan presensia n’e okashon importante ei fortalesé nan unidat i renobá nan determinashon pa sigui hasi e boluntat di Dios, i asina mustra ku ta un goso pa nan ta entre esnan ku Yehova ta stima.

Komo Repaso

• Na ki tempu “e spiritu dje bèrdat” a ser mandá riba e promé kristiannan, i kon el a resultá di ta un “yudante”?

• Kon e ungínan por sa ku nan a risibí e yamada pa shelu?

• Den ki maneranan e spiritu di Dios ta obra den e otro karnénan?

• Kon e otro karnénan a hasi bon pa e rumannan di Kristu, i dikon Beibel ta bisa ku nan lo “no wòrdu hasí perfekto sin” e ungínan?

[Preguntanan di Estudio]

[Plachi na página 21]

“E spiritu dje bèrdat” a ser dramá riba e disipelnan na Pentekòste di aña 33 Era Komun.

[Plachinan na página 23]

E otro karnénan a hasi bon pa e rumannan di Kristu dor di apoyá nan pa kumpli ku e komishon di prediká ku Dios a duna nan