Bo Ta Entre Esnan Ku Dios Ta Stima?

“Esun ku tin mi mandamentunan i ta warda nan, esei ta esun ku ta stima mi; i esun ku ta stima mi lo wòrdu stimá dor di mi Tata.” —HUAN 14:21.

1, 2. (a) Kon Yehova a mustra su amor pa humanidat? (b) Kiko Hesus a instituí riba e anochi di 14 di nísan di aña 33 Era Komun?

YEHOVA ta stima su kreashon humano. De echo, e ta stima mundu di humanidat “asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Huan 3:16) Segun ku e tempu ta aserká pa nos opservá e Konmemorashon dje morto di Kristu, kristiannan berdadero lo mester ta mas konsiente ku nunka ku Yehova “a stima nos i a manda Su Yu pa ta e propisiashon pa nos pikánan.”—1 Huan 4:10.

² Riba e anochi di 14 di nísan di aña 33 Era Komun, Hesus i su 12 apòstelnan a reuní den un sala djariba na Yerusalèm pa nan selebrá Pasku hudiu, konmemorando asina e liberashon dje israelitanan for di Egipto. (Mateo 26:17-20) Ora nan a kaba di selebrá e okashon aki, Hesus a laga Hudas Iskariote bai, anto el a instituí un sena konmemorativo ku despues a bira e Konmemorashon kristian dje morto di Kristu. * Hesus a usa pan no-fermentá i biña kòrá komo emblema—esta, komo símbolo—di su kurpa i su sanger, i a laga e 11 otro apòstelnan partisipá den e sena di grupo aki. Den Mateo, Marko i Lukas, ku sa ser yamá e Evangelionan Sinóptiko (dor ku nan ta presentá e relato for di un punto di bista similar), nos ta haña detaye di loke el a hasi durante e okashon ei. Apòstel Pablo tambe a skirbi tokante dje, i a yam’é “e Sena di Señor.”—1 Korintionan 11:20; Mateo 26:26-28; Marko 14:22-25; Lukas 22:19, 20.

3. Den ki sentido importante e relato di apòstel Huan tokante Hesus su último oranan ku su disipelnan den e sala djariba ta diferente for dje otro relatonan?

³ Ta interesante ku apòstel Huan no a menshoná nada tokante e pasamentu di pan ku biña. Kisas esaki ta debí n’e echo ku pa tempu ku el a skirbi su relato di Evangelio (rònt di aña 98 E.K.), e prosedura tabata bon establesí kaba entre e promé kristiannan. (1 Korintionan 11:23-26) Sin embargo, bou di inspirashon, ta Huan so a duna nos informashon vital tokante loke Hesus a bisa i hasi nèt promé i nèt despues ku El a instituí e Konmemorashon di Su morto. E detayenan emoshonante aki ta kubri no ménos ku sinku kapítulo dje Evangelio di Huan. Nan no ta laga niun duda tokante ki tipo di hende Dios ta stima. Laga nos eksaminá Huan kapítulo 13 te ku 17.

Siña for di Hesus Su Ehèmpel di Amor

4. (a) Kon Huan a enfatisá e tema mas prominente di Hesus su reunion ku su disipelnan ora el a instituí e Konmemorashon? (b) Kua ta un motibu importante ku Yehova tin pa stima Hesus?

⁴ Den e kapítulonan kaminda Hesus ta duna su siguidónan e último konsehonan promé ku e bai, amor ta un tema prinsipal. De echo, e palabra “amor,” den su vários formanan, ta aparesé 31 bes den e kapítulonan  aki. Niun otro kaminda Hesus su amor profundo pa su Tata i pa su disipelnan ta keda asina bisto. Tur e Evangelionan tokante Hesus su bida ta mustra ku e ta stima Yehova. Pero ta Huan so a skirbi ku Hesus a bisa spesífikamente: “Mi ta stima e Tata.” (Huan 14:31) Hesus a bisa tambe ku Yehova ta stim’é, i el a splika pakiko. El a bisa: “Meskos ku e Tata a stima mi, ami tambe a stima boso; keda den mi amor. Si boso warda mi mandamentunan, boso lo keda den mi amor; meskos ku mi a warda e mandamentunan di mi Tata, i ta keda den su amor.” (Huan 15:9, 10) Sí, Yehova ta stima su Yu dor ku e ta obedes’é den tur kos. Esaki ta un hopi bon lès pa tur siguidó di Hesukristu!

5. Kon Hesus a demostrá su amor pa su disipelnan?

⁵ For di komienso di Huan su relato tokante Hesus su último reunion ku su apòstelnan, e amor profundo ku e tin pa su siguidónan ta ser enfatisá. Huan ta konta: “Awor promé ku e Fiesta di Pasku, Hesus, sabiendo ku su ora a yega ku e mester a laga e mundu aki i bai serka e Tata, a mustra esnan di dje ku tabata den mundu ku el a stima nan te na fin.” (Huan 13:1) Riba e anochi memorabel ei el a duna nan un lès inolvidabel di sirbi otro ku amor. El a laba nan pia. Esaki ta algu ku nan tur lo mester tabata dispuesto di hasi pa Hesus òf pa un di nan rumannan, pero nan a keda sin hasié. Hesus a hasi e trabou humilde aki, i despues el a bisa su disipelnan: “Si ami anto, e Señor i Maestro, a laba boso pia, boso tambe mester laba pia di otro. Pasobra mi a duna boso un ehèmpel, pa boso tambe hasi manera ami a hasi ku boso.” (Huan 13:14, 15) Kristiannan berdadero mester ta dispuesto i kontentu di sirbi nan rumannan.—Mateo 20:26, 27; Huan 13:17.

Warda e Mandamentu Nobo

6, 7. (a) Ki detaye importante Huan ta duna nos tokante institushon dje Konmemorashon? (b) Ki mandamentu nobo Hesus a duna su disipelnan, i den ki sentido e tabata nobo?

⁶ Huan su relato tokante loke a tuma lugá den e sala djariba durante e anochi di 14 di nísan ta e úniko relato ku ta menshoná spesífikamente ku Hudas Iskariote a sali bai. (Huan 13:21-30) Ora nos kompará e relatonan di Evangelio, nos ta komprendé ku ta te despues ku e traidó aki a bai, Hesus a instituí e Konmemorashon di Su morto. Despues el a papia basta ratu ku su fiel apòstelnan i a duna nan algun último konseho i instrukshon promé ku e bai. Segun ku nos ta prepará nos mes pa asistí na e Konmemorashon, nos mester ta mashá interesá den loke Hesus a bisa n’e okashon ei, i mas ainda dor ku, sin duda, nos ke ta entre esnan ku Dios ta stima.

⁷ E promé instrukshon ku Hesus a duna su disipelnan despues ku el a instituí e Konmemorashon di su morto tabata algu nobo. El a deklará: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.” (Huan 13:34, 35) Den ki sentido e mandamentu aki tabata nobo? Un poko mas lat durante e anochi, Hesus a aklará e asuntu dor di bisa: “Esaki ta mi mandamentu, ku boso stima otro meskos ku ami a stima boso. Ni un hende no tin amor mas grandi ku esaki, ku un hende ta duna su bida pa su amigunan.” (Huan 15:12, 13) E Lei di Moises a manda e israelitanan ‘stima nan próhimo manera nan mes.’ (Levítiko 19:18) Pero Hesus su mandamentu a bai mas leu. Kristiannan mester a stima otro manera Kristu a stima nan, i ser dispuesto di sakrifiká nan bida mes pa nan rumannan.

8. (a) Kiko amor di sakrifisio propio ta enserá? (b) Kon Testigunan di Yehova ta mustra amor di sakrifisio propio awe?

 ⁸ E temporada di Konmemorashon ta un bon tempu pa nos eksaminá nos mes individualmente i komo kongregashon, pa mira si di bèrdat nos tin e karakterístika aki ku ta identifiká kristiannan berdadero, esta, amor manera esun di Kristu. Por tin bes ku tal amor di sakrifisio propio lo pone un kristian riska su bida p’e no traishoná su rumannan. Esei ta loke a yega di sosodé tambe. Pero mayoria bes, loke e ta enserá ta ku nos ta dispuesto di sakrifiká nos interesnan personal pa yuda i sirbi nos rumannan i otronan. Apòstel Pablo a pone un ekselente ehèmpel den esaki. (2 Korintionan 12:15; Filipensenan 2:17) Testigunan di Yehova ta konosí rònt mundu pa e spiritu di sakrifisio propio ku nan ta mustra, yudando nan rumannan i otronan, i dedikando nan mes na komuniká e bèrdat di Beibel na nan próhimo. *—Galationan 6:10.

Relashonnan Ku Nos Mester Balorá

9. Pa nos mantené nos relashon presioso ku Dios i ku su Yu, kiko nos ta keda kontentu di hasi?

⁹ Nada por ta mas presioso pa nos ku ser stimá dor di Yehova i su Yu Kristu Hesus. Pero pa nos tin e amor aki i sintié, nos tin ku hasi algu. Riba su último anochi ku su disipelnan, Hesus a bisa: “Esun ku tin mi mandamentunan i ta warda nan, esei ta esun ku ta stima mi; i esun ku ta stima mi lo wòrdu stimá dor di mi Tata, i ami lo stim’é i lo manifestá mi mes na dje.” (Huan 14:21) Ya ku nos ta balorá nos relashon ku Dios i ku su Yu, nos ta obedesé nan mandamentunan ku goso. Entre otro, nos lo obedesé e mandamentu nobo di mustra amor di sakrifisio propio. Tambe nos lo obedesé e òrdu ku Kristu a duna despues ku el a resusitá, pa “prediká pa e pueblo i pa duna testimonio,” i traha pa ‘hasi disipel’ di tur esnan ku aseptá e bon nobo.—Echonan 10:42; Mateo 28:19, 20.

10. Ku ken e ungínan i e “otro karnénan” por tin un relashon presioso?

¹⁰ Mas lat durante e anochi, kontestando un pregunta di e apòstel fiel Hudas (Tadeo), Hesus a bisa: “Si un hende ta stima mi, e lo warda mi palabra; i mi Tata lo stim’é, i nos lo bin serka dje i biba serka dje.” (Huan 14:22, 23) For di promé ku nan bai shelu, kristiannan ungí, yamá pa bai reina ku Kristu den shelu, tin un relashon spesialmente será ku Yehova i su Yu. (Huan 15:15; 16:27; 17:22; Hebreonan 3:1; 1 Huan 3:2, 24) Pero nan kompañeronan, e “otro karnénan” ku tin speransa di biba pa semper riba tera, tambe tin un relashon presioso ku e solo “wardadó” Hesukristu i ku nan Dios Yehova, basta nan mustra obedensia.—Huan 10:16; Salmo 15:1-5; 25:14.

“Boso No Ta di Mundu”

11. Ki spièrtamentu serio Hesus a duna su disipelnan?

¹¹ Durante e último reunion aki ku su disipelnan  fiel promé ku su morto, Hesus a duna nan un spièrtamentu serio: Si un hende tin e amor di Dios, mundu lo odi’é. El a deklará: “Si mundu odia boso, sa anto ku el a odia ami promé ku boso. Si boso tabata di mundu, mundu lo a stima loke ta di dje; ma pasobra boso no ta di mundu, ma ami a skohe boso for di den mundu, p’esei mundu ta odia boso. Kòrda riba e palabra ku mi a bisa boso: ‘Un esklabo no ta mas ku su shon.’ Si nan a persiguí mi, boso tambe nan lo persiguí; si nan a warda mi palabra, nan lo warda di boso tambe.”—Huan 15:18-20.

12. (a) Pakiko Hesus a spièrta su disipelnan ku mundu lo odia nan? (b) Kiko lo ta bon pa nos tur pensa ariba segun ku e Konmemorashon ta yega serka?

¹² Hesus a duna e spièrtamentu aki, pa e 11 apòstelnan aki i tur kristian berdadero ku bini despues di nan no deskurashá i entregá dor ku mundu ta odia nan. El a bisa aserka: “E kosnan aki mi a papia ku boso, pa boso no trompeká. Nan lo saka boso for di snoa, ma e ora ta bin ku ken ku mata boso lo kere ku e ta ofresé sirbishi na Dios. I e kosnan aki nan lo hasi, pasobra nan no a konosé e Tata, ni ami.” (Huan 16:1-3) Un dikshonario di Beibel ta splika ku un forma dje verbo tradusí aki komo “trompeká” ta nifiká “pone un hende kuminsá deskonfiá i bandoná un persona ku lo e mester konfia i obedesé; hasi un hende renunsiá su fe.” Segun ku e tempu pa opservá e Konmemorashon ta aserká, ta bon pa nos tur reflekshoná riba bida di hende fiel di pasado i di presente, anto imitá nan ehèmpel di firmesa bou di prueba. No laga oposishon ni persekushon pone bo bandoná Yehova i Hesus. Keda determiná di konfia den nan i obedesé nan.

13. Kiko Hesus a resa pidi su Tata pa su siguidónan?

¹³ Den Hesus su orashon final, promé ku el a bai for dje sala djariba na Yerusalèm, el a bisa su Tata: “Mi a duna nan bo palabra; i mundu a odia nan, pasobra nan no ta di mundu, meskos ku ami no ta di mundu. Mi no ta pidi bo pa saka nan for di mundu, ma pa bo warda nan di e malbado. Nan no ta di mundu, meskos ku ami no ta di mundu.” (Huan 17:14-16) Nos por tin sigur ku Yehova ta vigilá esnan ku e ta stima, p’e duna nan forsa pa keda separá for di mundu.—Isaías 40:29-31.

Keda den Amor dje Tata i dje Yu

14, 15. (a) Komo kiko Hesus a papia di su mes? Na kontraste, ken tabata manera un ‘mata di wendrùif degenerá’? (b) Ken ta “e ramanan” dje “berdadero mata di wendrùif”?

¹⁴ Durante e kòmbersashon íntimo ku Hesus tabatin ku su disipelnan fiel riba e anochi di 14 di nísan, el a papia di su mes komo “e berdadero mata di wendrùif” ku ta na kontraste ku e ‘mata di wendrùif degenerá,’ esta, Israel infiel. El a bisa: “Ami ta e berdadero mata di wendrùif, i mi Tata ta e kunukero.” (Huan 15:1) Vários siglo promé, profeta Yeremías a registrá e palabranan aki di Yehova na su pueblo rebelde: “Mi a planta bo manera un mata di wendrùif skohí . . . Kon anto bo por a kambia bo mes mi dilanti i bira sprùitnan degenerá  di un mata di wendrùif shimaron?” (Yeremías 2:21) I profeta Oséas a skirbi: “Israel ta un mata di wendrùif ku ta degenerando. E ta keda produsí fruta pa su mes. . . . Nan kurason a bira hipókrita.”—Oséas 10:1, 2, NW.

¹⁵ Na lugá di produsí fruta di adorashon berdadero, Israel a kai den apostasia i a produsí fruta pa su mes. Tres dia promé ku Hesus a reuní pa último bes ku su disipelnan fiel, el a bisa e lidernan religioso hudiu hipókrita: “Mi ta bisa boso, e reino di Dios lo wòrdu kitá for di boso, i duná na un nashon ku sí ta hasié produsí fruta.” (Mateo 21:43) E nashon nobo ei ta “e Israel di Dios” ku ta konsistí di 144.000 kristian ungí, i ta ser deskribí komo “e ramanan” dje “berdadero mata di wendrùif,” Kristu Hesus.—Galationan 6:16; Huan 15:5; Revelashon 14:1, 3.

16. Kiko Hesus a urgi e 11 apòstelnan fiel pa nan hasi, i kiko nos por bisa tokante e resto fiel den e tempu di fin aki?

¹⁶ Hesus a bisa e 11 apòstelnan ku tabata kuné den e sala djariba: “Tur rama den mi ku no ta karga fruta e ta kita, i kada un ku ta karga fruta e ta hasi limpi, p’e por karga mas fruta. Permanesé den union ku mi, i ami den union ku boso. Meskos ku e rama no por karga fruta di su mes a ménos ku e permanesé den e mata, meskos boso no por tampoko, a ménos ku boso keda den union ku mi.” (Huan 15:2, 4, NW) E historia moderno di Yehova su pueblo ta mustra ku e restu fiel di kristian ungí a keda den union ku nan Kabes, Kristu Hesus. (Efesionan 5:23) Nan a pèrmití Dios purifiká nan i snui nan. (Malakías 3:2, 3) For di aña 1919, nan a produsí fruta di Reino na abundansia; promé nan a produsí otro kristiannan ungí, i for di 1935 nan a produsí un “multitut grandi” di kompañeronan ku ta bira kada bes mas grandi.—Revelashon 7:9; Isaías 60:4, 8-11.

17, 18. (a) Ki palabranan di Hesus ta yuda e ungínan i e otro karnénan keda den Yehova su amor? (b) Kon nos lo benefisiá di asistí n’e Konmemorashon?

¹⁷ E siguiente palabranan di Hesus ta relevante pa tur kristian ungí i nan kompañeronan: “Den esaki mi Tata ta wòrdu glorifiká, ku boso ta karga hopi fruta i asina ta demostrá di ta mi disipelnan. Meskos ku e Tata a stima mi, ami tambe a stima boso; keda den mi amor. Si boso warda mi mandamentunan, boso lo keda den mi amor; meskos ku mi a warda e mandamentunan di mi Tata, i ta keda den su amor.”—Huan 15:8-10.

¹⁸ Nos tur ke keda den Dios su amor, i p’esei nos ta purba ser kristiannan fruktífero. Nos por logra esei dor di probechá kada chèns ku nos haña pa prediká e “evangelio,” esta, e bon nobo dje reino. (Mateo 24:14) Ademas nos ta hasi tur nos posibel pa manifestá e “fruta di e spiritu” den nos bida personal. (Galationan 5:22, 23) Dor di asistí na e Konmemorashon dje morto di Kristu, nos lo fortalesé nos determinashon pa hasi esaki, pasobra e lo hasi nos kòrda e gran amor ku Dios i Kristu tin pa nos.—2 Korintionan 5:14, 15.

19. Di ki otro yudansa nos lo papia den e siguiente artíkulo?

¹⁹ Despues di instituí e Konmemorashon, Hesus a primintí ku su Tata lo a manda un “yudante, e spiritu santu” pa su siguidónan fiel. (Huan 14:26, NW) Den e siguiente artíkulo nos lo eksaminá kon e spiritu aki ta yuda e ungínan i e otro karnénan keda den Yehova su amor.

[Nota]

Preguntanan di Repaso

• Ki lès práktiko di sirbishi ku amor Hesus a duna su disipelnan?

• E temporada di Konmemorashon ta un tempu apropiado pa nos eksaminá nos mes den ki sentido?

• Pakiko nos no mester trompeká dor ku Hesus a atvertí nos ku mundu lo odia i persiguí nos?

• Ken ta “e berdadero mata di wendrùif”? Ken ta su “ramanan,” i kiko ta ser sperá di nan?

[Preguntanan di Estudio]

[Plachi na página 15]

Hesus a duna su apòstelnan un lès inolvidabel di sirbi otro ku amor

[Plachinan na página 16, 17]

Kristu su disipelnan ta obedesé su mandamentu pa mustra amor di sakrifisio propio