Kiko Limpiesa Ta Nifiká Realmente?

DEBÍ ku durante siglo 18 i 19 e situashon di higiena na Merka i Europa tabata asina teribel, misioneronan dje tempu ei a kuminsá prediká loke nos lo por yama “un doktrina di limpiesa.” Segun e doktrina aki, sushedat ta meskos ku piká, i limpiesa ta trese hende mas serka Dios. Kisas ta p’esei tin un dicho na ingles ku ta bisa ku despues di deboshon, limpiesa ta e kos mas importante.

Na Merka, Salvation Army [Leger des Heils], fundá dor di William ku Catherine Booth, a sigui e mesun pensamentu aki. Segun e buki Health and Medicine in the Evangelical Tradition (Salú i Medisina den Tradishon Evangéliko), un di nan promé lemanan tabata: “Habon, Sòpi i Salbashon.” Despues, ora ku Louis Pasteur i otronan a demostrá sin lugá na duda ku bakteria tin di haber ku malesa, esaki a duna mas motivashon pa bini ku mihó programanan pa salú públiko. El a establesé un base sientífiko tambe pa e programanan aki.

Algun dje medidanan ku nan a tuma mesora ta di no eksigí mas pa un testigu den korte sunchi Beibel, i stòp di usa un solo kùp na skol i stashonnan di trein pa tur hende bebe for di dje. Nan a asta purba di stòp uso di un solo kális di biña durante sirbishinan religioso, i laga kada  ken haña nan mes kùp. Sí, ta parse ku e promé pioneronan ei tabatin basta éksito den kambia hende su aktitut tokante limpiesa. Un eskritor a asta bisa ku, dor di nan trabou, hende a “namorá di limpiesa.”

Pero parse ku e “enamorashon” aki tabata algu superfisial so. Den poko tempu, komersiantenan dinámiko a kohe un simpel habon i hasié un produkto di beyesa. Propagandanan bon pensá a pone e konsumidó kere ku dor di usa sierto produktonan di higiena personal, lo e haña mas status ku otro hende. Televishon ta sigui promové e fantasia aki. Rara bes bo ta mira e hendenan eksitoso i glamoroso na televishon ta limpia kas, limpia kurá, piki sushi di kas òf piki sushi di nan kachó ku pushi.

Ademas, tin hende ta rasoná ku dor di bai trabou bo ta haña plaka, pero ku trabou di kas i otro trabounan di limpiesa nò. I pakiko nan lo preokupá nan mes ku medio ambiente si nan no ta ser pagá p’e? Un dje kosnan ku e manera di pensa aki ta hiba na dje ta ku awendia hende ta kere ku limpiesa ta enserá higiena personal so, i nada mas.

Dios Su Punto di Bista di Limpiesa

No tin duda ku e esfuersonan di ántes ei pa siña hende biba limpi a yuda mehorá nan kondishonnan di bida. I esei ta lógiko tambe, pasobra limpiesa ta un kualidat ku ta pertenesé na e Dios santu i limpi, Yehova. Limpiesa a originá kuné. E ta siña nos benefisiá nos mes dor di bira santu i limpi den tur loke nos hasi.—Isaías 48:17; 1 Pedro 1:15.

Yehova Dios ta ehemplar den tur sentido. Meskos ku t’e kaso ku tur su otro kualidatnan invisibel, bo por mira limpiesa tambe den su kreashon visibel. (Romanonan 1:20) Ta bisto ku kreashon mes no ta kousa ningun polushon permanente. Tera, ku tur su siklonan ekológiko, ta masha bon den tene su mes limpi. E ta diseñá pa nos por biba limpi i salú riba dje. Un kreashon limpi asina mester ta di un Diseñadó ku ta interesá den limpiesa. P’esei nos por konkluí ku adoradónan di Dios mester ta limpi den tur aspekto di nan bida.

Kuater Aspekto di Limpiesa

Beibel ta identifiká kuater aspekto di limpiesa ku adoradónan di Dios mester traha pa kumpli kuné. Laga nos trata kada un di nan.

Limpiesa spiritual. Mester konsiderá esaki e forma mas importante di limpiesa, pasobra hende su speransa di bida eterno ta dependé di dje. Tòg, hopi bes e ta e aspekto di limpiesa ku hende ta neglishá mas. Den poko palabra, ser spiritualmente limpi kier men ku nunka nos no ta krusa e liña ku Dios a hala entre adorashon berdadero i adorashon falsu, pasobra den Dios su bista tur tipo di adorashon falsu ta impuru. Apòstel Pablo a skirbi: “Sali for di meimei di nan i separá boso mes, SEÑOR ta bisa. I no mishi ku loke ta impuru; i lo mi risibí boso.” (2 Korintionan 6:17) Disipel Santiago tambe tabata hopi spesífiko riba e asuntu aki: “Esaki ta e religion puru i sin mancha den bista di nos Dios i Tata: . . . konserbá bo mes liber di mancha di mundu.”—Santiago 1:27.

Dios a mustra bon kla ku e ta desaprobá mesklamentu di adorashon falsu ku su adorashon berdadero. Hopi bes adorashon falsu ta inkluí práktikanan impuru, ídolo i diosnan detestabel. (Yeremías 32:35) P’esei Beibel ta urgi kristiannan berdadero pa nan no tin nada di haber ku adorashon impuru.—1 Korintionan 10:20, 21; Revelashon 18:4.

Limpiesa moral. Aki tambe Dios a hala un liña bon kla entre loke ta limpi i loke ta impuru. En general, mundu a para bira manera loke Efesionan 4:17-19 ta deskribí: “Tapá ku skuridat den nan komprendementu, ekskluí di e bida di Dios . . . Pèrdiendo tur heful, [nan] a entregá nan mes na sensualidat pa, ku golosidat, nan praktiká tur klase di impuresa.” E moda di pensa inmoral ei ta manifestá su mes den hopi manera; tin bes abiertamente, i  tin bes den formanan sutil. P’esei kristiannan mester paga tinu.

Hende ku ta stima Dios sa ku prostitushon, homoseksualidat, sèks promé ku kasa i pornografia ta kosnan ku ta bai kontra Yehova su norma di limpiesa moral. Sin embargo, den mundu di entretenimentu i moda, e práktikanan aki ta kos di tur dia. P’esei, kristiannan mester paga tinu kontra e tipo di tendensianan ei. Si un hende bai un reunion kristian òf un enkuentro sosial bistí ku paña kòrtiku òf ku ta saka muchu di su kurpa, e ta hala muchu atenshon na su kurpa, i e ta un falta di desensia. Bisti asina ta trese pensamentu mundano den e asosiashon kristian, i e por lanta pensamentu impuru den otro hende tambe. Riba e área aki kristiannan tin ku traha duru pa mustra “e sabiduria di ariba.”—Santiago 3:17.

Limpiesa mental. Nos mente no mester ta manera un kashi di pensamentu impuru. Hesus a spièrta nos tokante pensamentu impuru ora el a bisa: “Ken ku wak un muhé pa dese’é, ya kaba el a kometé adulterio kuné den su kurason.” (Mateo 5:28; Marko 7:20-23) Meskos ta konta pa wakmentu di potrèt i pelíkula pornográfiko, lesa relato di aktividatnan seksual indesente i skucha kantika ku letra inmoral òf dòbel sentido. Pues, kristiannan mester evitá di kontaminá nan mes dor di pensa riba kos impuru ku por produsí palabra i akshon impuru den nan.—Mateo 12:34; 15:18.

Limpiesa físiko. Den Beibel, santidat i limpiesa físiko tin hopi di haber ku otro. Por ehèmpel, Pablo a skirbi: “Stimánan, laga nos purifiká nos mes di tur impuresa di karni i spiritu, i asina perfekshoná nos santidat den e temor di Dios.” (2 Korintionan 7:1) P’esei, kristiannan berdadero mester hasi nan bèst pa tene nan kurpa, nan kas i nan ambiente di biba limpi i na òrdu, te kaminda ku sirkunstansia ta permití. Asta kaminda ku awa pa laba kos i pa baña kuné ta skars, kristiannan mester hasi nan bèst pa ta limpi i representabel.

Ademas, limpiesa físiko no ta pas ku niun forma di uso di tabako, ni bebementu di mas, ni uso di droga, pasobra e kosnan aki ta susha i daña nos kurpa. E wardadó di karné deskribí den Kantika di Sálomon a apresiá e dushi fragansia dje bistí di e mucha muhé sulamita. (Kantika di Sálomon 4:11) Ta amoroso di nos parti pa presta atenshon na nos higiena personal, pasobra nos ke evitá di manda holó desagradabel riba hende rònt di nos. Perfume i kolonia por ta agradabel, pero nan no por tuma e lugá di baño regular i paña limpi.

Tene un Punto di Bista Balansá

Den loke ta toka limpiesa físiko, hende sa bai na ekstremo. Di un banda, ser fanátiko  tokante limpiesa por stroba nos di gosa di bida. Ademas e por eksigí hopi tempu balioso. Di otro banda, un kas sushi i mal tení por sali karu pa drecha. Meimei dje dos ekstremonan aki tin e manera práktiko i balansá di tene nos kas limpi i representabel.

Tene kos simpel. Un kas òf kamber yen di potoshi ta difísil pa limpia, i por ta mas difísil pa detektá sushedat ora tin yen di kos tur kaminda. Un kas simpel i na òrdu ta mas fásil pa limpia. Beibel ta rekomendá nos mashá pa hiba un estilo di bida simpel: “Teniendo kuminda, paña i dak, nos lo keda kontentu ku esakinan.”—1 Timoteo 6:8; NW.

Tene kos na òrdu. Un kas limpi ta responsabilidat di tur hende ku ta biba aden. Hopi bes un kas ta bira bruhá debí ku e kambernan ta bruhá. Den un kas na òrdu, tur kos ta na nan lugá. Por ehèmpel, paña sushi no mester ta riba flur di kamber. Pió ainda, ko’i hunga i hèrmènt ku keda bentá abou por ta peligroso. Hopi aksidente na kas ta bini dor dje mal kustumber di no pone kos na nan lugá.

Klaramente, limpiesa i bida kristian ta dos kos inseparabel. Profeta Isaías a yama bida deboto “e Kaminda Grandi di Santidat.” I e ta menshoná un asuntu serio tambe: “Hende impuru lo no pasa riba dje.” (Isaías 35:8) Sí, dor di kria bon kustumber di limpiesa awor, nos ta duna evidensia fuerte di ku nos tin fe den Dios su promesa ku pronto lo e hasi tera bira un paradeis limpi. E ora ei, tur kaminda riba e bunita planeta aki, tur hende lo glorifiká Yehova Dios dor di kumpli kompletamente ku su normanan perfekto di limpiesa.—Revelashon 7:9.

[Plachi na página 6]

Un kas limpi ta responsabilidat di tur hende ku ta biba aden

[Plachi na página 6]

Tera ta masha bon den tene su mes limpi