Informe di Proklamadónan di Reino

Mártirnan di Tempu Moderno Ta Duna Testimonio na Suesia

E PALABRA griego pa “testigu” ta mártir. Ta di einan e palabra na papiamentu “mártir”a bini, ku ta nifiká “un hende ku ta duna testimonio dor di muri.” Hopi kristian di promé siglo a duna testimonio di Yehova dor di muri pa nan fe.

Meskos, den siglo 20 míles di Testigu di Yehova a muri na man di Hitler su kompinchinan dor ku nan a mantené nan neutralidat den asuntunan polítiko i nashonalista. E mártirnan aki di tempu moderno tambe ta sirbi komo un ekselente testimonio. Esei ta loke a tuma lugá resientemente na Suesia.

En konekshon ku e di 50 aniversario di fin di Segundo Guera Mundial, gobièrnu di Suesia a kuminsá un kampaña di edukashon na nivel nashonal tokante Holokousto. Nan a yama e proyekto Historia Bibu. Testigunan di Yehova a keda invitá pa partisipá i kompartí nan eksperensianan.

E Testigunan a respondé dor di areglá un ekshibishon titulá E Víktimanan Lubidá di Holokousto. A inougurá e ekshibishon n’e Salon di Asamblea di Testigunan di Yehova na Strängnäs. Tabatin Testigunan sobrebibiente di Holokousto presente pa kompartí nan eksperensianan ku e mas di 8.400 bishitantenan ku a bini riba e promé dia! Pa fin di 1999, e ekshibishon a aparesé na mas ku 100 museo i biblioteka públiko rònt Suesia, i mas o ménos 150.000 hende a mir’é. Entre e bishitantenan tabatin funshonarionan di gobièrnu ku a duna komentarionan positivo tokante loke nan a mira.

Niun otro evento relashoná ku aktividatnan di Testigunan di Yehova na Suesia a yega di haña un kobertura públiko asina ekstenso, ni no a risibí asina tantu publisidat positivo. Hopi dje bishitantenan a puntra: “Dikon nunka promé boso no a konta nos loke boso a pasa aden durante Holokousto?”

Despues ku e ekshibishon a aparesé den nan área, un kongregashon a informá un oumento di 30 porshento den studionan di Beibel na kas! Un Testigu a invitá un kolega di trabou pa bai wak e ekshibishon. E kolega a aseptá ku gustu, i el a bai ku un amiga. Despues, e amiga a bisa ku e no por kaba di komprendé kon hende por tin fe asina fuerte ku nan ta preferá di ser ehekutá na lugá di firma un dokumento pa nenga nan fe. Esei a hiba na mas kòmbersashon, i a kuminsá un studio di Beibel kuné.

Meskos ku e mártirnan di promé siglo, e mártirnan fiel aki di siglo 20 a duna testimonio ku kurashi di ku Yehova ta e úniko Dios berdadero, meresedor di nos fe i lealtat total.—Revelashon 4:11.

[Rekonosementu pa Potrèt na página 13]

Prezu den un kampamentu: Państwowe Muzeum Oświęcim-Brzezinka, kortesia di USHMM Photo Archives