Sabí na Nan Manera

UN PROVERBIO nigeriano ta bisa: “Hende grandi tin sabiduria, pero mucha ta sabí na nan manera.” I Edwin, un ansiano kristian na Nigeria, a deskubrí ku esaki ta bèrdat.

Un dia Edwin a haña un kaha di metal bou di su lèsenar na kas.

“Di ken e kos aki ta?” Edwin a puntra su tres yunan.

“Di mi,” Emmanuel di ocho aña a kontestá. Mesora el a agregá ku e kaha di heru tur na frus aki di 12 sentimeter ku un gleuf fini ariba tabata pa kontribushon p’e obra mundial di Testigunan di Yehova. El a splika: “Dor ku no ta tur dia mi ta bai Salon di Reino, m’a disidí di traha un kaha pa ora mi no usa mi sèn di kuminda, mi por tir’é den e kaha.”

Na kas e tata di Emmanuel tabatin un sparpòt den kua nan tabata spar pa bai kongreso di distrito. Pero dor ku e famia a haña nan den pèrtá, nan a usa e plaka aki. Pa hasi sigur ku no ta usa e plaka ku e ta spar pa kontribushon pa nada otro, Emmanuel a koge un bleki bieu i a hib’é pa un lasdó sey’é. Ora e lasdó a haña sa kiko Emmanuel kier a hasi ku e bleki, el a usa heru bieu pa traha un kaha pa Emmanuel. Su ruman hòmber di sinku aña, Michael, tambe a pidi un kaha.

Sorprendí pa loke e muchanan a hasi, Edwin a puntra nan dikon nan a laga traha e kahanan. Michael a kontestá: “Mi kier kontribuí!”

Sin ku nan mayornan tabata sa, Emmanuel, Michael i Uchei, nan ruman muhé di nuebe aña, tabata spar parti di nan sèn pa kumpra kuminda i tir’é den e kahanan. Di unda nan a haña e idea? Asina ku e muchanan tabata sufisiente grandi pa tene plaka den nan man, nan mayornan a siña nan pa tira algu den kaha di kontribushon na Salon di Reino. Sin duda, e muchanan a siña nan lès bon.

Ora e kahanan a yena, nan a habri nan. Na tur nan a spar un montante di 5,63 florin. Esei no ta un suma chikí pa e chikitinnan aki ku ta biba den un pais kaminda e entrada anual ta djis un par di shen florin. Donashonnan boluntario asina ta sostené e obra di prediká ku Testigunan di Yehova ta hasi awor den 235 pais rònt mundu.