Yehova A Siña Nos Awante i Perseveransia
Historia di Bida
Yehova A Siña Nos Awante i Perseveransia
SEGUN E RELATO DI ARISTOTELIS APOSTOLIDIS
E stat ruso Pyatigorsk ta situá na pia dje serunan di Caucasus. E ta famoso pa su fuentenan di mineral i klima suave. Mi a nase einan na 1929. Mi mayornan tabata refugiadonan griego. Dies aña despues dje teribel eksperensia di limpiesa, teror i purifikashon étniko bou dje sistema di Stalin, nan a obligá nos muda bai Gresia. Asina nos a bira refugiado atrobe.
DESPUES ku nos a muda bai Piraiévs, Gresia, e palabra “refugiado” a haña henteramente un otro nifikashon pa nos. Nos a sinti nos kompletamente manera stranhero. Maske ami ku mi ruman hòmber tabatin nòmber di dos filósofo griego famoso, esta, Sócrates i Aristóteles, kasi niun hende no tabata usa nos nòmber. Tur hende tabata yama nos ruso chikí.
Djis despues ku Segundo Guera Mundial a dal aden, mi mama stimá a muri. E tabata kurason di nos famia, pues su morto tabata un gòlpi devastador. Dor ku e tabatin un par di tempu malu, el a siñá mi hasi hopi trabou di kas. E entrenamentu aki a resultá útil pa mi mas despues.
Guera i Liberashon
Debí na guera, okupashon dor di nazinan i e bombardeo sin miserikòrdia dor di forsanan aliá, kada dia a parse di ta e último. Tabatin hopi pobresa, hamber i morto. For di mi 11 aña mi mester a traha duru huntu ku mi tata pa perkurá pa nos tres. Guera huntu ku su efektonan i tambe mi poko konosementu di griego a strobá mi di haña edukashon na skol.
Salmo 37:29) Dios su promesanan di bida sin fin bou di kondishonnan pasífiko aki riba tera tabata un berdadero remedi pa mi heridanan. (Isaías 9:7) Na 1946 ami ku mi tata a batisá komo símbolo di nos dedikashon na Yehova.
E okupashon aleman riba Gresia a terminá na òktober 1944. Djis despues di esei, mi a haña kontakto ku Testigunan di Yehova. Meimei dje desesperashon i miseria dje tempu ei, e speransa ku Beibel ta duna di un futuro briante bou dje Reino di Dios a konmové mi kurason. (E siguiente aña mi tabatin e goso di risibí mi promé asignashon komo e sirbidó di publisidat (yamá despues sirbidó di revista) den e di dos kongregashon ku a ser formá na Piraiévs. Nos teritorio tabata di Piraiévs te ku Eleusis, un distansia di mas o ménos 50 kilometer. E tempu ei tabatin hopi kristian ungí den e kongregashon. Mi tabatin e privilegio di traha huntu ku nan i siña for di nan. Mi a gusta asosiá ku nan pasobra nan tabatin masha hopi eksperensia pa konta di esfuersonan tenas ku nan mester a hasi pa kumpli ku e trabou di prediká. E manera ku nan a hiba nan bida a mustra bon kla ku pa un hende sirbi Yehova fielmente e tin mester di hopi pasenshi i perseveransia. (Echonan 14:22) Mi ta masha kontentu ku awendia tin mas ku 50 kongregashon di Testigunan di Yehova den e área ei!
Un Problema Inesperá
Algun tempu despues mi a bin konosé Eleni, un lif mucha muhé kristian yen di selo den e stat di Patras. Nos a komprometé na fin di aña 1952. Sin embargo, despues di un par di luna, Eleni a bira hopi malu. Dòkternan a deskubrí ku e tabatin un tumor selebral, i su kondishon tabata krítiko. Mester a oper’é mesora. Despues di hopi esfuerso nos a logra haña un dòkter na Aténas ku—apesar dje echo ku e tempu ei no tabatin e medionan adekuá disponibel—tabata dispuesto pa tene kuenta ku nos kreensianan religioso i hasi e operashon sin sanger. (Levítiko 17:10-14; Echonan 15:28, 29) Despues dje operashon e dòkternan tabata optimista tokante e rekuperashon di mi komprometida, pero tòg kouteloso i nan no a ekskluí e posibilidat ku e tumor por a bini bek.
Kiko lo mi mester a hasi den e situashon aki? En bista dje sirkunstansianan ku a kambia, lo mi no mester a kibra e kompromiso i libra mi mes di problema? Nò! Ora mi a komprometé mi mes, mi a hasi un promesa i mi tabata kier pa mi sí keda sí. (Mateo 5:37) Niun ratu so mi no a pèrmití mi mes pensa otro. Despues ku Eleni a rekuperá parsialmente bou di kuido di su ruman muhé mas grandi, nos a kasa na desèmber 1954.
Tres aña despues Eleni a haña un rekaida, i e mesun dòkter a bolbe oper’é. E biaha aki e dòkter a bai mas profundo den e selebro p’e por a saka e tumor kompleto. Resultado di esei tabata ku mi kasá a keda parsialmente paralisá i e parti dje selebro ku ta kordiná su abla a keda gravemente afektá. Awor nos tur dos a haña nos ku un seri nobo di problema kompliká. Asta e tarea di mas simpel a bira un opstákulo grandi pa mi kasá stimá. Su
situashon ku a keda bai atras a pone ku nos mester a hasi kambionan drástiko den nos rutina diario. I mas ku tur kos e situashon a rekerí hopi awante i perseveransia.Ta e ora ei e entrenamentu ku mi a risibí di mi mama a resultá di balor inkalkulabel. Tur mainta trempan, mi tabata prepará tur e ingredientenan pa kushiná i Eleni tabata kushiná. Hopi bes nos tabata invitá hende na kas. Entre nos bishitanan tabatin ministernan di tempu kompleto, hende ku nos a studia Beibel kuné i kompañeronan kristian di nos kongregashon den nesesidat. Nan tur tabata haña ku e kumindanan aki tabata masha dushi mes! Ami ku Eleni tambe a koperá pa hasi otro trabounan di kas di tal forma ku nos kas tabata limpi-limpi. E situashon aki ku a eksigí masha hopi di nos a dura 30 aña largu.
Selo Apesar di Enfermedat
Pa ami i otro hende tabata masha emoshonante pa mira ku nada no por a mengua mi kasá su amor pa Yehova ni su selo pa su sirbishi. Ku tempu i esfuerso persistente, Eleni a logra siña papia usando masha poko palabra. E tabata gusta aserká hende riba kaya ku e bon nobo di Beibel. Ora mi mester a sali pa hasi negoshi, mi tabata bai kuné i mi tabata parker e outo serka di un asera drùk. E tabata habri e bentana di outo i ofresé e peatonnan E Toren di Vigilansia i Spièrta! Un dia el a laga 80 revista den dos ora. Hopi bes e tabata kaba ku tur e revistanan mas bieu dje kongregashon. Eleni tabata regular den e otro formanan di predikashon tambe.
Durante tur e añanan ku mi kasá tabata desabilitá, semper e tabata huntu ku mi n’e reunionnan. Nunka e no a falta un kongreso ni asamblea, ni sikiera ora nos mester a biaha bai den eksterior pa motibu di persekushon kontra Testigunan di Yehova na Gresia. Apesar di su limitashonnan, kontentu di dje el a asistí na kongresonan na Oustria, Alemania, Chipre i otro paisnan. Nunka Eleni no a keha ni bira eksigente, ni ora mi a haña mas responsabilidat den e sirbishi di Yehova ku de bes en kuando a hasi e situashon ferfelu p’e.
Pa loke ta ami, e situashon aki a sirbi komo un entrenamentu largu den awante i perseveransia. Hopi bes mi a eksperensiá Yehova su man di yudansa. Rumannan a hasi berdadero sakrifisio pa yuda nos den tur manera posibel, i e dòkternan a apoyá nos bondadosamente. Maske nos sirkunstansia ku a eksigí hopi di nos no a pèrmití mi traha full time, nunka durante tur e añanan difísil aki, nos no a falta e kosnan nesesario pa bida. Semper nos a duna máksimo prioridat n’e interesnan i sirbishi di Yehova.—Mateo 6:33.
Hopi hende a puntra nan mes kiko a sostené nos durante e añanan difísil ei. Segun ku mi ta wak atras awor, mi ta realisá ku loke a fortalesé nos awante i perseveransia ta studio personal di Beibel, orashon sinsero na Dios, asistensia regular na reunionnan kristian i partisipashon seloso den e trabou di prediká. Salmo 37:3-5 a kòrda nos: “Konfia den SEÑOR i hasi loke ta bon; . . . Deleitá bo mes den SEÑOR, . . . Enkomendá bo kaminda na SEÑOR, konfia tambe den dje, i e lo hasié.” Un otro versíkulo ku tabatin balor pa nos tabata Salmo 55:22: “Tira bo karga riba SEÑOR, i e lo sostené bo.” Manera un yu ku tin pleno konfiansa den su tata, nos no solamente a tira nos karga riba Yehova, sino tambe a lagu’é kuné.—Santiago 1:6.
Semper e palabranan animante diDia 12 di aprel 1987, ora mi kasá tabata prediká dilanti nos kas, un porta di heru pisá a dal sera su tras, i a bent’é riba asera i herid’é gravemente. Esei a pone ku el a bai den koma i keda den e kondishon ei pa tres aña largu. I na prinsipio di 1990, el a muri.
Sirbiendo Yehova Lo Mihó Ku Mi Por
Na 1960 mi a ser nombrá komo sirbidó di kongregashon na Nikaia, Piraiévs. Desde e tempu ei mi tabatin e privilegio di sirbi den un kantidat di otro kongregashon na Piraiévs. Maske nunka mi mes no tabatin yu, mi tabatin e goso di yuda hopi yu spiritual bira stabil den e bèrdat. Algun di nan ta sirbi awor komo ansiano di kongregashon, sirbidó ministerial, pionero i miembro dje famia di Bètel.
Despues ku Gresia a bira un pais demokrátiko atrobe na 1975, Testigunan di Yehova por a tene nan kongresonan libremente sin ku nan tabatin ku sigui skonde den mondi. E eksperensia ku algun di nos a haña dor di a organisá kongreso den eksterior a resultá di gran balor. P’esei, mi tabatin e goso i privilegio di sirbi pa hopi aña den vários komité di kongreso.
Anto na 1979 a traha plan pa konstruí e promé Salon di Asamblea na Gresia, parti pafó di Aténas. Mi a haña e asignashon pa organisá i ehekutá e proyekto di konstrukshon inmenso aki. E trabou aki tambe a eksigí hopi awante i perseveransia. Traha tres aña huntu ku sientos di ruman hòmber i muhé ku tabatin un spiritu di sakrifisio propio a krea un banchi fuerte di amor i unidat entre nos. E rekuerdonan di e proyekto aki lo keda grabá den mi kurason pa semper.
Satisfasiendo e Nesesidat Spiritual di Prezunan
Un par di aña despues un porta nobo di oportunidat a habri. Un di e prizònnan di mas grandi di Gresia ta situá banda di e teritorio di mi kongregashon na Korydallos. Desde aprel 1991, mi a haña asignashon pa bishitá e prizòn aki tur siman komo un minister di Testigunan di Yehova. Einan mi tin pèrmit pa kondusí studio di Beibel i reunionnan kristian ku e prezunan ku ta interesá. Hopi di nan a hasi kambio grandi, i esei ta duna prueba di e poder inmenso ku e Palabra di Dios tin. (Hebreonan 4:12) Esaki a impreshoná tantu e staf di prizòn komo e otro prezunan. Algun dje prezunan ku mi a studia Beibel kuné a haña nan libertat i awor nan ta publikadó dje bon nobo.
Pa algun tempu mi a studia ku tres notorio trafikante di droga. Ora nan a progresá spiritualmente, nan tabata asistí na nan studio di Beibel, feitá, kabei nèchi peñá, bistí ku kamisa i dashi den ougùstùs, un dje lunanan mas kayente na Gresia! E direktor di prizòn, e hefe di wardadó di prezu i algun trahadó a kore sali for di nan ofisina pa mira e fenómeno aki. Nan no por a kere nan wowo!
Un otro eksperensia animante a tuma lugá den e departamento di hende muhé den prizòn. Mi a kuminsá un studio di Beibel ku un señora ku tabata sinta un kastigu di bida largu pa motibu di asesinato. E tabata konosí pa su kondukta rebelde. Sin embargo, no a dura mashá ku e bèrdat bíbliko ku e tabata siñando a kuminsá hasi kambionan asina notabel den dje ku algun hende a bisa ku e ta manera un leon ku ta birando un lamchi! (Isaías 11:6, 7) Denter di poko tempu el a gana rèspèt i konfiansa dje direktor di prizòn. Mir’é progresá bon spiritualmente i alkansá e punto di dediká su mes na Yehova a hasi mi felis.
Yudando Hende Enfermo i di Edat
Dor ku mi a mira mi esposa su lucha largu kontra malesa, esaki a hasi mi mas sensibel pa nesesidat di hende malu i di edat entre nos. Kada bes ku nos publikashonnan tabata trata artíkulonan ku a animá nos pa hasi esfuerso i duna yudansa amoroso na e personanan ei, mi interes tabata lanta. Mi tabata apresiá i kolekshoná e artíkulonan ei. Despues di algun aña, mi tabatin un map di mas ku shen página. E promé artíkulo tabata “Konsiderashon ku Personanan di Edat i Esnan Afligí,” ku a aparesé den E Toren di Vigilansia na ingles di 15 di yüli 1962. Hopi dje artíkulonan aki a mustra ku ta bon pa kada kongregashon duna yudansa di un manera organisá na hende malu i di edat.—1 Huan 3:17, 18.
E ansianonan a forma un grupo di ruman hòmber i muhé ku a pone nan mes disponibel pa perkurá p’e nesesidatnan di hende malu i di edat den nos kongregashon. Nos a organisá e boluntarionan den vários tim. Tabatin tim di esnan ku por a yuda durante dia, otronan ku por a yuda durante anochi, esnan ku por a perkurá pa transporte i esnan ku tabata disponibel 24 ora pa dia. E últimonan aki ta forma un grupo ku ta semper kla pa tuma akshon.
E resultadonan dje esfuersonan ei tabata animante. Por ehèmpel, durante un dje bishitanan diario serka un ruman muhé ku tabata malu i tabata biba su so, nan a hañ’é inkonsiente riba flur. Nos a avisá un ruman muhé ku ta biba eibanda i ku tabatin outo. El a hiba e ruman muhé malu e hospital mas serka eibanda den un tempu rèkòrt: solamente dies minüt! Dòkternan a bisa ku esei a salba e ruman su bida.
E gratitut ku e hendenan malu i di edat ta mustra na e miembronan dje grupo ta duna nan hopi satisfakshon. E echo ku nos tin speransa pa biba ku e rumannan ei den e sistema nobo di Dios bou di sirkunstansianan diferente ta masha emoshonante. I sabiendo ku e apoyo ku nan a risibí durante nan sufrimentu a yuda nan wanta, ta un otro rekompensa.
Perseveransia A Trese Rekompensa
Awor mi ta sirbi komo ansiano den un dje kongregashonnan di Piraiévs. Apesar di mi edat avansá i problemanan ku salú, mi ta kontentu ku ainda mi por partisipá aktivamente den e aktividatnan di kongregashon.
Pa trata ku sirkunstansianan difísil, desafionan grandi i susesonan imprevisto atraves di añanan, mi tabatin mester di un kantidat ekstraordinario di determinashon i perseveransia. Sin embargo, semper Yehova a duna mi e fortalesa nesesario pa vense e problemanan aki. Bes tras bes mi a eksperensiá e verasidat dje palabranan dje salmista: “Si mi lo a bisa: ‘Mi pia ta slep,’ bo miserikòrdia, o SEÑOR, lo sostené mi. Den e multitut di mi preokupashonnan den mi, bo konsuelonan ta alegrá mi alma.”—Salmo 94:18, 19.
[Plachi na página 25]
Huntu ku mi kasá, Eleni, despues di su segundo operashon na 1957
[Plachi na página 26]
Na un kongreso na Nuremberg, Alemania, na 1969
[Plachi na página 28]
E grupo di rumannan ku a yuda esnan enfermo i di edat