Iglesia i Estado na Bizansio
Iglesia i Estado na Bizansio
EFUNDADÓ di kristianismo a mustra bon kla e kontraste skèrpi ku mester eksistí entre su siguidónan i e mundu di humanidat alehá for di Dios. Hesus a bisa su siguidónan: “Si boso tabata di mundu, mundu lo a stima loke ta di dje; ma pasobra boso no ta di mundu, ma ami a skohe boso for di den mundu, p’esei mundu ta odia boso.” (Huan 15:19) Hesus a bisa Pilato, un representante dje poder polítiko di su tempu: “Mi reino no ta di e mundu aki.”—Huan 18:36.
Pa por kumpli ku nan responsabilidat di prediká “te na e parti mas alehá di mundu,” kristiannan mester a evitá di laga kosnan di mundu desviá nan. (Echo. 1:8) Meskos ku Hesus, e promé kristiannan no mester a mete ku polítika. (Huan 6:15) Tabata notabel ku kristiannan fiel no a buska pa okupá kargonan públiko òf posishonnan den gobièrnu. Ku tempu esaki a bin kambia.
“Parti di Mundu”
Algun tempu despues di morto di e último apòstel, di nan mes, e lidernan religioso a kuminsá kambia nan punto di bista relashoná ku nan mes i ku mundu. Nan a kuminsá imaginá nan un “reino” ku no solamente tabata na mundu sino tambe tabata parti di dje. Nos lo komprendé esei mihó ora nos mira kon religion i polítika a meskla den otro den e Imperio Bizantino—e Imperio Romano Oriental, ku su kapital na Bizansio (awor Istanbul).
Den un sosiedat unda religion tradishonalmente a hunga un papel importante, Iglesia Bizantino, ku su sentro na Bizansio, tabatin bastante poder. Historiadó di iglesia Panayotis Christou a remarká un biaha: “E bizantinonan a mira nan imperio terenal komo un refleho dje Reino di Dios.” Pero no ta tur ora e emperador a kompartí e punto di bista ei. Komo resultado, tabatin biaha ku e relashon entre Iglesia i Estado a bira turbulento. The Oxford Dictionary of Byzantium ta bisa: “Kada un dje obispunan di Constantinopla [òf Bizansio] a komportá nan na un manera diferente. Tabatin bes ku kobardia a pone nan keda supordiná na un gobernante poderoso . . . , otro biaha nan a kolaborá na un manera fruktífero ku emperador . . . , i tabatin bes ku nan tabatin e kurashi di bai kontra e boluntat dje emperador.”
E patriarka di Constantinopla, kabes dje Iglesia Oriental, a bira un figura ku
hopi influensia. Ta é tabata koroná e emperador, i p’esei el a verwagt p’e emperador ta un fiel defensor di kreensianan òrtodòks. Tambe e patriarka tabata un hòmber masha riku, siendo ku e tabata kontrolá e inmenso rekursonan dje iglesia. Su poder a sinta den e outoridat ku e tabatin riba e numeroso mòniknan i tambe e influensia ku e tabatin riba e laikonan.Hopi bes e patriarka tabata den un posishon ku e por a pasa riba kabes dje emperador. E por a menas’é ku ekspulshon—imponiendo su boluntat den nòmber di Dios—òf rekurí na otro métodonan ku kua e por a eliminá un emperador.
Ku e redukshon gradual di gobernashonnan sivil pafó dje kapital, hopi bes ta e obispunan a bira e hòmbernan mas poderoso den nan statnan, mes poderoso ku e gobernadónan di provinsia, kende nan a yuda selektá. Obispunan tabatin hopi interes den kasonan di korte i asuntunan seglar ki ora ku iglesia tabata enbolbí—i asta ora iglesia no tabata enbolbí.
Un faktor ku a kontribuí na esei ta ku tabatin míles i míles di pastor i mònik, i tur tabata kai bou di nan obispunan lokal.Polítika i Simonia
Manera a ser menshoná anteriormente, e funshon pastoral a bira estrechamente ligá ku polítika. Ademas, e gran kantidat di pastor i nan aktividatnan religioso a kosta sumanan grandi di plaka. Mayoria miembro di klero di alto rango a biba den luho. Segun ku e poder i rikesa di iglesia tabata krese, pobresa apostóliko i bida di santidat a disparsé. Algun pastor i obispu a paga pa nan ser nombrá. Simonia, esta, kumpramentu di fabor, tabata na òrdu di dia te den e rangonan mas haltu dje herarkia. Miembronan di klero apoyá pa gruponan di preshon di e klase riku a lucha pa haña kargonan eklesiástiko dilanti e emperador.
Soborno tambe tabata un medio pa influensiá lidernan religioso di rango haltu. Ora e emperatris Zoe (rònt di 978-1050 E.K.) a laga mata su esposo Romano III i kier a kasa ku su amante i futuro emperador Miguel IV, purá-purá el a manda yama e Patriarka Alehio pa bini n’e palasio. Ei e patriarka a haña sa dje morto di Romano i e sirbishi ku lo e mester a efektuá p’e seremonia di kasamentu. E echo ku iglesia tabata selebrando Bièrnèsantu e anochi ei a hinka Alehio den un situashon asta mas difísil. Apesar di esei, tòg el a aseptá e regalonan generoso dje emperatris i a kumpli ku su petishon.
Supordiná n’e Emperador
A yega di sosodé durante e historia dje Imperio Bizantino ku e emperador tabata hasi uso dje derecho ku de fakto e tabatin pa hasi e nombramentu, ora mester a skohe e patriarka di Constantinopla. Durante e periodonan ei, ningun hende por a bira patriarka kontra e boluntat dje emperador ni keda den e puesto ei pa hopi tempu.
Emperador Andronico II (1260-1332) a haña ta bon di kambia patriarka nuebe biaha. Den mayoria dje kasonan ei, e ophetivo tabata pa pone e kandidato mas komplasiente posibel riba e trono di patriarka. Segun e buki The Byzantines, un patriarka a asta primintí e emperador por eskrito “di hasi tur loke e eksigí, maske kon ilegal e kos ta, i di no hasi nada ku e [emperador] no ta gusta.” Dos bes emperadornan a purba imponé nan boluntat riba iglesia dor di konsagrá un prens dje famia real komo patriarka. Emperador Romano I a nombra su yu Teofilakto, un mucha di apénas 16 aña, n’e puesto di patriarka.
Si un patriarka no a kai na agrado di un emperador, esaki lo por a obligá e patriarka di renunsiá òf ordená un sinodo pa bah’é. E buki Byzantium ta remarká: “Den transkurso dje historia di Bizantino, outoridat haltu i asta e influensia direkto dje Emperador [a bin] ta hunga un papel mas i mas dominante den e skohementu di obispu.”
Tambe e emperador tabata presidí na konsilionan eklesiástiko, anto ku e patriarka banda di dje. E tabata guia e debatenan, formulá artíkulonan di fe, i diskutí ku tantu obispu komo disidente (herehe). Pa disidentenan e tabatin e último palabra: morto na staka. Tambe e emperador tabata konfirmá i implementá e doktrinanan adoptá den e konsilionan. El a akusá esnan ku a opon’é di a kometé un krímen kontra un outoridat i tambe di a bira enemigu dje
iglesia i di Dios. Un patriarka di siglo seis a bisa ku “den Iglesia no mag hasi nada ku ta bai kontra e boluntat i mandatonan dje Emperador.” E obispunan ku tabatin konekshon ku e palasio tabata hòmbernan suave, komplasiente, fásil pa influensiá ku muestranan diskreto di fabor òf negosiashon sabí. Pa regla, nan no sa protestá mes.Por ehèmpel, ora Patriarka Ignacio (rònt di 799-878 E.K.) a nenga di duna komunion n’e Minister Prinsipal Bardas, e minister a dal bèk. Bardas a inkriminá Ignacio den un supuesto kòmplòt i akto di traishon. E patriarka a ser arestá i deportá. Na su lugá, e minister a sòru pa nan a skohe Fotius, un laiko ku den seis dia a subi e trapi di herarkia eklesiástiko pa finalmente alkansá e rango di patriarka. Fotius tabatin e kualifikashon p’e puesto ei? Nan a deskribié komo un hòmber “sumamente ambisioso, ku un arogansia ekstraordinario i ku abilidatnan polítiko inkomparabel.”
Doktrina na Servisio di Polítika
Debatenan riba loke ta òrtodòks i herehia (baimentu kontra doktrina di religion) hopi bes a sirbi komo kapa pa oposishon polítiko. I ta faktornan polítiko a influensiá hopi emperador, i no un deseo pa introdusí doktrina nobo. Por lo general, e emperador a reservá e derechi pa emití doktrina i pa eksigí iglesia pa kumpli ku su boluntat.
Por ehèmpel, Emperador Heraclio (575-641 E.K.) a lucha duru pa sana e divishon relashoná ku e naturalesa di Kristu ku a menasá di desintegrá su imperio debilitá. Pa purba resolvé e asuntu, el a introdusí un doktrina nobo ku yama monotelitismo. * Anto, pa garantisá ku e provinsianan sur lo keda leal na su imperio, Heraclio a skohe un patriarka nobo di Alehandria, Ciro di Fasis, kende a respaldá e doktrina ku e emperador a boga p’e. E emperador a hasi Ciro no solamente patriarka sino tambe prefekto di Egipto, dunand’e outoridat riba gobernantenan lokal. Ku e preshon di un tiki persekushon, Ciro a logra gana e bendishon di mayoria hende di Iglesia Egipsio.
Un Kosecha Amargo
Kon e desaroyonan i susesonan aki por reflehá e palabra i spiritu di Hesus su orashon kaminda el a bisa ku su siguidónan lo “no ta di mundu”?—Huan 17:14-16.
E supuesto lidernan kristian den e tempu bizantino i mas despues a paga karu pa nan enbolbimentu den asuntunan polítiko i militar di mundu. Kiko e análisis breve aki di historia ta bisa bo? E lidernan di Iglesia Bizantino a gana e aprobashon di Dios i di Hesukristu?—Santiago 4:4.
E lidernan religioso ambisioso ei huntu ku nan amantenan polítiko sigur no a kontribuí n’e kousa di berdadero kristianismo. E union bergonsoso aki di religion i polítika a duna e religion puru ku Hesus a instruí un mal nòmber. Laga nos saka un lès for di historia i ‘no bira parti di mundu.’
[Nota]
^ par. 21 Monotelitismo ta e siñansa di ku ounke Kristu tin dos naturalesa, unu komo Dios i otro komo hende, e tin un solo boluntat.
[Kuadro/Plachi na página 10]
“MANERA UN DIOS KU TA KRUSA SHELU MAHESTUOSAMENTE”
E susesonan rondó di Patriarka Miguel Cerulario (rònt di 1000-1059) ta tipifiká e papel ku e kabesante di iglesia por a hunga den asuntunan di estado, i e ambishonnan ku esei a enserá. Despues ku Cerulario a alkansá e posishon di patriarka, e kier a logra mas. El a ser deskribí komo un hòmber arogante, presuntuoso i infleksibel, i “su komportashon ta manera di un dios ku ta krusa shelu mahestuosamente.”
Motivá pa e deseo di promové su mes, Cerulario a provoká e kiebro ku papa di Roma na 1054, i a obligá e emperador pa aseptá e divishon. Enkantá ku e viktoria aki, Cerulario a hasi areglo pa pone Miguel VI riba e trono i a yud’é konsolidá su poder. Un aña despues, Cerulario a fòrsa e emperador ei pa baha, i a instalá Isak Comneno (rònt di 1005-1061) riba e trono.
E konflikto entre patriarka i imperio a eskalá. Cerulario—sigur di sosten públiko—a menasá, eksigí i rekurí na violensia. Un historiadó kontemporáneo a remarká: “El a pronostiká e kaida dje Emperador den idioma komun i vulgar, bisando: ‘Idiot, ta mi mes a pone bo kaminda bo ta; pero lo mi kaba bo.’” Sin embargo, Isak Comneno a laga arest’é, enkarsel’é i deport’é pa Imbros.
Ehèmpelnan asina ta mustra kuantu problema e patriarka di Constantinopla por a kousa i kuantu kurashi e por tabatin pa resistí e emperador. Hopi bes e emperador tabatin ku trata ku hende asina, esta, polítikonan ábil i kapas pa desafiá tantu e emperador komo e ehérsito.
[Mapa/Plachi na página 9]
(Pa e teksto den su formato kompleto, wak e publikashon)
Máksimo Alkanse di e Imperio Bizantino
Ravena
Roma
MASEDONIA
Constantinopla
Laman Pretu
Nicea
Efeso
Antiokia
Yerusalèm
Alehandria
Laman Mediteráneo
[Rekonosementu]
Mapa: Mountain High Maps® Copyright © 1997 Digital Wisdom, Inc.
[Plachinan na página 10, 11]
Comneno
Romano III (banda robes)
Miguel IV
Emperatris Zoe
Romano I (banda robes)
[Rekonosementu]
Comneno, Romano III, i Miguel IV: Pa kortesia di Classical Numismatic Group, Inc.; Emperatris Zoe: Hagia Sofia; Romano I: Potrèt pa kortesia di Harlan J. Berk, Ltd.
[Plachi na página 12]
Fotius
[Plachi na página 12]
Heraclio ku su yu
[Rekonosementu]
Heraclio ku su yu: Potrèt pa kortesia di Harlan J. Berk, Ltd.; tur diseño, página 8-12: For dje buki L’Art Byzantin III Ravenne Et Pompose