Kiko Ta Berdadero Repentimentu?

Loke ta pone ku hende mester arepentí ta piká, esta, keda sin kumpli ku Dios su rekisitonan hustu. (1 Huan 5:17) Dor ku Adam a laga un herensia di piká pa humanidat kompleto, tur su desendientenan tabatin mester di repentimentu. (Salmo 51:5; Romanonan 3:23; 5:12) Repentimentu (siguí pa kombertimentu) ta un rekisito pa un hende por rekonsiliá ku Dios.

Kisas un hende tin ku repentí pa motibu ku el a hiba henter su bida kontrario ku e propósito i boluntat di Dios. El a kumpli mas bien ku e deseo di mundu bou di kòntròl di Dios su Atversario. (1 Pedro 4:3; 1 Huan 2:15-17; 5:19) Òf kisas un hende tin ku repentí pa motibu di un aspekto partikular di su bida, esta, un práktika robes ku a daña i mancha un kurso di bida ku di otro forma lo tabata aseptabel; repentimentu por ta pa un solo malecho òf asta pa un tendensia, inklinashon òf aktitut robes. (Salmo 141:3, 4; Proverbionan 6:16-19; Santiago 2:9; 4:13-17; 1 Huan 2:1) P’esei, fayonan ku hende por kometé ta masha hopi òf basta spesífiko.

Lógikamente tambe, n’e grado ku un persona desviá for dje kaminda di hustisia, sea dor di un fayo grandi òf unu chikitu, n’e mesun grado ei e tin ku arepentí. E israelitanan a ‘rebeldiá hopi kontra Yehova’ i nan tabata “kaba na nada” den nan transgreshonnan. (Isaías 31:6; 64:5, 6; Ezekiel 33:10) Di otro banda, apòstel Pablo ta papia dje “hende [ku] wòrdu sorprendí den kualkier delitu,” i e ta konsehá pa esnan ku tin kualifikashonnan spiritual, purba “restorá un hende asina den un spiritu di mansedumbre.” (Galationan 6:1) Sirbidónan di Dios no tin nodi keda ku remordimentu pa motibu di erornan kometí debí na imperfekshon heredá, pasobra den su miserikòrdia Yehova ta tene kuenta ku nan debilidatnan di karni. (Salmo 103:8-14; 130:3) Nan por ta gososo si konsientemente nan ta kana den e kamindanan di Dios.—Filipensenan 4:4-6; 1 Huan 3:19-22.

Arepentimentu por bini di parti di hende ku ya kaba tabatin un bon relashon ku Dios pero ku a desviá i a pèrdè e aprobashon i bendishon di Dios. (1 Pedro 2:25) Israel tabata den un pakto ku Dios, nan tabata “un pueblo santu” skohí for di entre tur e nashonnan. (Deuteronomio 7:6; Éksodo 19:5, 6) Kristiannan tambe a haña un posishon hustu dilanti Dios via un pakto nobo ku Kristu komo mediador. (1 Korintionan 11:25; 1 Pedro 2:9, 10) Den e kaso di esnan ku a desviá, ora nan a repentí esei a drecha nan relashon ku Dios i a pone ku nan a risibí e benefisio i bendishonnan ku e relashon ei ta trese kuné. (Yeremías 15:19-21; Santiago 4:8-10) Repentimentu ta e paso primordial i importante ku ta hiba na un posishon hustu dilanti Dios ku bida eterno na bista pa esnan ku no tabatin un relashon ku Dios anteriormente. Esakinan por ta hendenan pagano dje nashonnan no-israelita durante e tempu ku Dios su pakto ku Israel tabata na vigor (Efesionan 2:11, 12), i tambe tur e personanan di kualkier rasa òf nashonalidat ku ta pafó dje kongregashon kristian.—Echonan 11:18; 17:30; 20:21.

Repentimentu ta enbolbé tantu mente komo kurason. E persona mester rekonosé ku su kurso òf akto tabata robes, i pa hasi esaki e mester aseptá ku Dios su boluntat i normanan ta hustu. Ta imposibel pa un persona ku ta ignorá òf lubidá Dios su boluntat i normanan, repentí. (2 Reinan 22:10, 11,  18, 19; Yónas 1:1, 2; 4:11; Romanonan 10:2, 3) P’esei, miserikòrdiosamente, Yehova a manda su profeta i predikadónan pa hasi un yamada n’e hendenan pa nan arepentí. (Yeremías 7:13; 25:4-6; Marko 1:14, 15; 6:12; Lukas 24:27) Via e bon nobo ku e kongregashon kristian ta prediká, i foral desde e tempu ku Kornelio a kombertí, Dios ta “deklará na hende ku tur hende na tur kaminda mester repentí.” (Echonan 17:22, 23, 29-31; 13:38, 39) E Palabra di Dios—sea skirbí òf papiá—ta e medio pa ‘konvensé’ nan ku e kaminda di Dios ta rekto i ku ta nan kamindanan ta robes. (Kompará ku Lukas 16:30, 31; 1 Korintionan 14:24, 25; Hebreonan 4:12, 13.) Dios su lei ta “perfekto, e ta restorá alma.”—Salmo 19:7.

Rei David ta papia di ‘siña transgresornan e kamindanan di Dios pa por kombertí na Dje.’ (Salmo 51:13) Aki sin duda e tabata referí na kompañeronan israelita. Timoteo a haña instrukshon pa no pleita ora el a trata ku kristiannan den e kongregashonnan ku el a bishitá. Mas bien, e mester a ‘korigí ku suavedat esnan ku a opon’é’ ya ku kisas Dios por a duna nan ‘repentimentu ku ta hiba na konosementu di e bèrdat, i nan por bin na nan sano huisio i skapa for di e trampa di Diabel.’ (2 Timoteo 2:23-26) P’esei, e yamada pa hende repentí por ser hasí den e kongregashon dje pueblo di Dios i tambe pafó di dje.

E persona mester komprendé ku el a peka kontra Dios. (Salmo 51:3, 4; Yeremías 3:25) Esaki lo por ta klaramente bisto ora ta trata di blasfemia abierto òf direkto, uso inkorekto dje nòmber di Dios òf adorashon di otro diosnan i tambe dor di uso di imágennan di ídolo. (Éksodo 20:2-7) Asta ora ta trata di un “asuntu privá” òf algu entre e persona i un otro, mester konsiderá malechonan komo piká kontra Dios, un falta di rèspèt pa ku Yehova. (Kompará ku 2 Samuel 12:7-14; Salmo 51:4; Lukas 15:21.) Asta kosnan robes ku nos hasi dor di ignoransia òf dor di fayo mester ser rekonosé komo erornan ku ta hasi un persona kulpabel den bista di e Gobernante Soberano, Yehova Dios.—Kompará ku Levítiko 5:17-19; Salmo 51:5, 6; 119:67; 1 Timoteo 1:13-16.