Kiko Ta Bo Prinsipionan?

ABO ta un hende di prinsipio? Òf bo ta haña ku norma i balornan a bai un poko for di moda? Echo ta ku tur hende ta sigui un òf otro prinsipio ku é ta kere ta importante. Un dikshonario ingles ta definí prinsipio komo “regla di bon kondukta.” Prinsipionan ta influensiá nos desishonnan i determiná e kurso di nos bida. Prinsipionan por aktua manera un kompas.

Por ehèmpel, Hesus a urgi su disipelnan pa sigui e Regla di Oro na Mateo 7:12: “P’esei, tur loke boso kier pa hende hasi pa boso, hasi meskos pa nan.” Siguidónan di Confucio ta sigui e prinsipionan di li i jen, ku tin di haber ku kualidatnan manera bondat, humildat, rèspèt i lealtat. Asta hende ku no ta religioso tin algun prioridat òf guia ku ta determiná nan kondukta.

Ki Tipo di Prinsipio?

Sin embargo, nos mester kòrda ku prinsipio por ta sea bon òf malu. Por ehèmpel, den e último dies piku añanan aki, mas i mas hende tin e spiritu ku a ser identifiká komo e spiritu di ami-promé. Ounke hopi hende kisas no konosé e ekspreshon ei òf ta haña ku e no ta konta pa nan, vários ta esnan ku ta bira lomba pa norma elevá di kondukta i ta rekurí na e prinsipio di ami-promé. Sea ku e ta ser definí asina òf no, e aktitut di ami-promé ta un manifestashon di egoismo, hopi bes kompañá pa un materialismo sin sentido. “Ta dos prinsipio so nos tin,” un ehekutivo di televishon na China a bisa. “Unu ta, satisfasé e demanda. E otro ta, traha plaka.”

E spiritu di ami-promé por aktua manera un magnet. I kon un magnet ta afektá un kompas? Ora nan ta banda di otro, e angua dje kompas ta bruha. Meskos tambe, e spiritu di ami-promé por bruha òf konfundí un persona su kompas moral, òf regla di bon kondukta, dor di laga e persona kere ku ta su deseonan ta mas importante ku tur otro kos.

Lo bo keda sorprendí si bo haña sa ku e spiritu di ami-promé no ta un fenómeno moderno? E fenómeno aki a kuminsá den e hòfi di Eden tempu ku nos promé mayornan a bandoná e norma di kondukta ku nos Kreador a establesé. Esei a bruha nan kompas moral. Komo desendiente di Adam ku Eva, hende tin e mesun aktitut aki. Solamente awor e yama ami-promé.—Génesis 3:6-8, 12.

E aktitut ei a plama notablemente foral durante e tempu ku profesia di Beibel ta yama “e último dianan,” marká pa “tempunan trabahoso.” Hopi hende ta “stimadó di nan mes.” Nada straño anto ku nos tambe ta sinti e preshon  pa imitá e aktitut di ami-promé.—2 Timoteo 3:1-5.

Tal bes bo ta di akuerdo ku un hóben ku yama Olaf, kende a skirbi un sukursal di Testigunan di Yehova na Europa: “Ta masha difísil pa keda moralmente limpi, spesialmente pa nos ku ta hóben. Por fabor, sigui kòrda nos ku nos mester pega na prinsipionan di Beibel.”

E punto di bista di Olaf ta reflehá bon disernimentu. Prinsipionan di Dios por yuda nos—hóben i bieu—pega na normanan haltu di kondukta. Tambe nan por yuda nos resistí e aktitut di ami-promé, sea ku e yama asina òf no. Si bo kier siña mas tokante kon prinsipio di Beibel por ègt yuda bo, sea asina bon di analisá e siguiente artíkulo.

[Plachinan na página 4]

Awe masha poko hende ta tene kuenta ku nesesidat di otro