Nan A Lucha ku Sumpiña den Karni

“A wòrdu duná na mi un sumpiña den karni, un mensahero di Satanas pa bòfta mi.”—2 KORINTIONAN 12:7.

1. Kiko ta algun problema ku hende ta enfrentá awe?

BO TA luchando ku un òf otro prueba kontinuo? Si ta asina, bo no ta bo so. Den e “tempunan trabahoso” aki, kristiannan fiel ta enfrentá oposishon intenso, problema di famia, enfermedat, ansiedat finansiero, angustia emoshonal, morto di ser kerí i otro situashonnan difísil. (2 Timoteo 3:1-5) Den algun pais, guera i skarsedat di kuminda ta menasá di kaba ku bida di hopi hende.

2, 3. Ki aktitut negativo e problemanan manera sumpiña ku nos ta enfrentá por kousa, i kon peligroso esei por ta?

² Problemanan asina por kibra un hende kompletamente, foral ora e kontratempunan presentá pareu. Tuma nota di loke Proverbionan 24:10 ta bisa: “Si bo desmayá [desanimá, NW] den e dia di angustia, bo forsa ta keda limitá.” Sí, e desanimashon ku nos pruebanan ta kousa por kita hopi dje forsa ku nos tin mester, i debilitá nos determinashon pa wanta te na fin. Kon asina?

³ Wèl, desanimashon por pone nos pèrdè realidatnan for di bista. Por ehèmpel, ta fásil pa nos eksagerá nos difikultatnan i kuminsá haña duele di nos mes. Algun hende por bai asina leu di asta reklamá Dios: “Pakiko bo ta laga e kos aki pasa ku mi?” Si tal aktitut negativo saka rais den kurason di un persona, esei por kaba ku su goso i konfiansa. Un sirbidó di Dios por bira asina desanimá ku e por asta stòp di lucha “e bon lucha di fe.”—1 Timoteo 6:12.

4, 5. Den algun kaso, kiko Satanas tin di haber ku nos problemanan, i tòg ki konfiansa nos por tin?

⁴ Yehova Dios sigur no ta e kousante di nos pruebanan. (Santiago 1:13) Algun prueba por presentá simplemente pasobra nos ta purba di ta fiel na dje. De echo, tur hende ku ta sirbi Yehova ta bira un blanko di su enemigu prinsipal, Satanas e Diabel. Den e poko tempu ku a ked’é, “e dios [malbado] di e mundu aki” ta purba stroba ken ku ta stima Yehova di hasi Su boluntat. (2 Korintionan 4:4) Satanas ta kousa mas tantu sufrimentu posibel pa henter e asosiashon di nos rumannan rònt mundu. (1 Pedro 5:9) Ta bèrdat ku no ta Satanas ta e kousante di tur nos problemanan direktamente, pero e por probechá sí dje problemanan ku nos ta enfrentá pa debilitá nos asta mas.

⁵ Pero maske kon poderoso Satanas òf su armanan por ta, nos por vens’é! Kon nos por ta sigur di esei? Esei ta pasobra Yehova Dios ta bringa na nos fabor. El a perkurá pa su sirbidónan ta na altura di Satanas su trikinan. (2 Korintionan 2:11) En realidat, e Palabra di Dios ta konta nos hopi tokante e pruebanan ku ta kousa problema pa kristiannan berdadero. Den e kaso di apòstel Pablo, Beibel a usa e ekspreshon “sumpiña den karni.” Pakiko? Laga nos wak kon e Palabra di Dios ta splika e frase ei. Despues nos lo mira ku bèrdat no ta nos so mester di Yehova su yudansa pa vense prueba.

Pakiko Tèst di Fe Ta Manera Sumpiña

6. Kiko Pablo tabata kier men ku “un sumpiña den karni,” i kiko e sumpiña ei por tabata?

⁶ Despues ku Pablo mes a pasa den  pruebanan ekstremo, el a skirbi bou di inspirashon: “A wòrdu duná na mi un sumpiña den karni, un mensahero di Satanas pa [sigui, NW] bòfta mi—pa warda mi di no halsa mi mes!” (2 Korintionan 12:7) Kiko Pablo tabata kier men ku e sumpiña den karni aki? Wèl, un sumpiña hinká hundu bou di kueru sigur ta hasi doló. Pues e komparashon ta indiká algu ku a kousa Pablo doló; sea doló físiko, emoshonal, òf ámbos. Podisé Pablo tabatin problema ku bista òf un ke otro enfermedat. Tambe e sumpiña por tabatin di haber ku e personanan ku a kuestioná Pablo su kredensialnan komo apòstel i ku no a duna muchu balor na su trabou di prediká i siña. (2 Korintionan 10:10-12; 11:5, 6, 13) Loke sea tabata e kaso, Pablo a keda ku e sumpiña sin por a libra su mes di dje.

7, 8. (a) Kiko e ekspreshon ‘sigui bòfta’ ta indiká? (b) Pakiko ta vital pa nos lucha ku kualkier sumpiña ku ta molestiá nos awor?

⁷ Ripará ku e sumpiña a sigui bòfta Pablo. Ta interesante pa nota ku e verbo griego ku Pablo a usa aki ta derivá for dje palabra pa “kònòshi di dede.” E palabra ei ta ser usá literalmente na Mateo 26:67 i figurativamente na 1 Korintionan 4:11. Den e versíkulonan ei, e ta transmití e idea di ser batí ku moketa. En bista di Satanas su odio intenso kontra Yehova i Su sirbidónan, nos por ta sigur ku Diabel a gosa mashá ku un sumpiña a sigui bòfta Pablo. Awe tambe Satanas ta gosa mashá ora un sumpiña den karni ta molestiá nos.

⁸ P’esei, meskos ku Pablo, nos tin ku sa kon pa lucha ku e sumpiñanan ei. Nos bida ta dependé di esei! Kòrda, Yehova kier pa nos biba pa semper den su mundu nobo, kaminda problemanan ku ta hinka manera sumpiña lo no molestiá nos mas. Pa yuda nos gana e premio maravioso aki, Dios a duna nos hopi ehèmpel den su Palabra santu, Beibel, ku ta mustra kon su fiel sirbidónan a hiba un lucha eksitoso ku sumpiña den karni. Nan tabata hende gewoon i imperfekto, meskos ku nos. Ora nos para ketu un ratu na algun dje personanan aki ku ta forma parti dje ‘nubia grandi di testigunan,’ esei por yuda nos ‘kore e kareda ku ta poné nos dilanti ku perseveransia.’ (Hebreonan 12:1) Ora nos meditá riba loke nan a wanta, esei por edifiká nos konfiansa ku nos tambe por lucha ku kualkier sumpiña ku Satanas usa kontra nos.

E Sumpiñanan Ku A Molestiá Mefíboset

9, 10. (a) Di ki manera Mefíboset a haña un sumpiña den karni? (b) Ki bondat Rei David a mustra na Mefíboset, i kon nos por imitá David?

⁹ Tuma por ehèmpel Mefíboset, yu di David su amigu Yonatan. Tempu ku Mefíboset tabatin sinku aña di edat, nan a haña notisia ku su tata, Yonatan, i su tawela, Rei Saul, a ser matá. Yaya dje mucha a drenta pániko. El “a koh’é i a hui bai kuné. I a sosodé ku den su purá pa hui e mucha a kai i a bira lam.” (2 Samuel 4:4) E desabilidat aki lo mester tabata un sumpiña basta ferfelu pa Mefíboset soportá segun ku e tabata krese.

¹⁰ Algun aña despues, Rei David, pa motibu di su gran amor pa Yonatan, a mustra bondat amoroso na Mefíboset. David a dun’é tur tereno di Saul i a asigná Ziba, asistènt di Saul, pa kuida e tereno aki. Tambe David a bisa Mefíboset: “Lo [bo] kome na mi mesa regularmente.” (2 Samuel 9:6-10) Sin duda, e bondat amoroso di David tabata un konsuelo pa Mefíboset i a yuda kalma e doló di su desabilidat. Un bunita lès pa nos! Nos tambe mester mustra bondat na esnan ku ta lucha ku un sumpiña den karni.

11. Kiko Ziba a pretendé tokante Mefíboset, pero kon nos por sa ku su pretenshon tabata un mentira? (Mira nota na pia di página.)

¹¹ Mas despues, Mefíboset tabatin ku lucha ku un otro sumpiña den karni. Su sirbidó Ziba a lanta kalumnia kontra dje dilanti Rei David, kende tabata huyendo pa Yerusalèm pa motibu dje rebelion di Apsalom, yu di David. Ziba a bisa David ku Mefíboset no tabata leal na dje pa motibu ku el a keda atras na Yerusalèm  ku e speransa di por haña e reinado e mes. * David a kere e kalumnia di Ziba i a pasa tur Mefíboset su propiedat pa e mentiroso ei!—2 Samuel 16:1-4.

12. Kon Mefíboset a reakshoná riba su situashon, i kon esaki ta un bon ehèmpel pa nos?

¹² Sin embargo, ora Mefíboset a topa David finalmente, el a konta e rei kiko a sosodé realmente. E tabata preparando pa djòin David ora Ziba a engañ’é i a ofresé pa bai na su lugá. David a korigí e eror? Parsialmente. El a parti e tereno entre e dos hòmbernan ei. Aki atrobe tabatin un otro posibel sumpiña den karni di Mefíboset. El a keda profundamente desapuntá? El a protestá kontra David su desishon, kehando ku esei tabata inhustu? Nò, humildemente el a bai di akuerdo ku e deseonan dje rei. El a enfoká mas bien riba e aspekto positivo, alegrando ku esun ku tabatin derecho di ta rei di Israel a regresá sano i salvo. En bèrdat Mefíboset a pone un ehèmpel ekselente dor di wanta desabilidat, kalumnia i desepshon.—2 Samuel 19:24-30.

Nehemías A Lucha ku Su Pruebanan

13, 14. Ki sumpiñanan Nehemías tabatin ku soportá ora el a regresá pa rekonstruí e murayanan di Yerusalèm?

¹³ Pensa riba e sumpiñanan figurativo ku Nehemías tabatin ku soportá ora el a regresá e stat sin muraya di Yerusalèm den siglo sinku promé ku Era Komun. El a haña un stat práktikamente sin defensa, i e hudiunan ku a repatriá tabata desorganisá, desanimá i impuru den bista di Yehova. Ounke Rei Artahérhes a outorisá e hudiunan pa rekonstruí e murayanan di Yerusalèm, pronto Nehemías a haña sa ku su mishon a lanta e repudio dje gobernantenan dje paisnan den bisindario. “A desagradá nan mashá ku un hende a bin pa buska e bienestar di e yunan di Israel.”—Nehemías 2:10.

¹⁴ E opositornan stranhero ei a hasi tur loke tabata den nan poder pa para e trabou di Nehemías. Nan menasanan, engañonan, kalumnia, intimidashon—inkluso spion mandá pa deskurashá Nehemías—lo mester tabata manera sumpiña persistente den karni. El a sukumbí n’e intriga di su enemigunan? Nò! El a pone pleno konfiansa den Dios. E no a hala atras. Pues ora nan a kaba di rekonstruí e murayanan di Yerusalèm finalmente, esakinan a duna un testimonio duradero dje sosten amoroso ku Yehova a duna Nehemías.—Nehemías 4:1-12; 6:1-19.

15. Ki problemanan entre e hudiunan a afligí Nehemías profundamente?

¹⁵ Komo gobernante tambe Nehemías  tabatin ku lucha ku hopi problema entre e pueblo di Dios. E difikultatnan aki tabata manera sumpiña ku a hink’é profundamente pasobra nan a afektá e pueblo su relashon ku Yehova. Hende riku tabata eksigí interes haltu, i pa nan rumannan mas pober por a paga debe i tambe e belasting di Persia, nan tabatin ku entregá nan tera i asta bende nan yunan den sklabitut. (Nehemías 5:1-10) Hopi hudiu no tabata warda sabat ni no tabata sostené e levitanan ni e tèmpel. Tambe, algun a kasa ku “muhénan di Asdot, Amon i Moap.” Esei lo a kousa Nehemías hopi doló! Pero ningun dje sumpiñanan aki a pon’é entregá. Bes tras bes el a demostrá di ta un apoyadó seloso dje leinan hustu di Dios. Meskos ku Nehemías, laga nos no pèrmití e kondukta infiel di otro hende stroba nos di rindi sirbishi leal na Yehova.—Nehemías 13:10-13, 23-27.

Hopi Otro Personanan Fiel A Lucha

16-18. Kon problema di famia a kansa Isak, Rebeka, Hana, David i Oséas?

¹⁶ Beibel ta kontené hopi otro ehèmpel di hende ku a lucha ku situashonnan difísil ku tabata manera sumpiña. Un sumpiña komun tabata problemanan di famia. Esau su dos esposanan “a trese amargura den bida di Isak i Rebeka,” mayornan di Esau. Rebeka a bisa asta ku e tabata fadá ku e dos esposanan ei. (Génesis 26:34, 35; 27:46) Pensa tambe riba Hana i kon su rival Penina, e otro esposa di su kasá, “tabata provok’é sin miserikòrdia” dor ku Hana tabata steril. Kisas Penina a tormentá Hana basta biaha ora nan tabata so na kas. Tambe Penina a provok’é públikamente—sin duda den presensia di famia i amigu—ora e famia tabata asistí n’e fiesta na Silo. Na moda di papia, esaki a manda e sumpiña mas hundu den karni di Hana.—1 Samuel 1:4-7.

¹⁷ Mira kiko David a pasa aden pa motibu dje yalusí apsurdo di su suegro, Rei Saul. Pa skapa su bida, David a hañ’é fòrsá ta bai biba den kueba den e desierto di Engedi, kaminda e tabatin ku subi pasa riba barankanan steil i peligroso. E inhustisia lo mester a molesti’é bastante pasobra e no a hasi Saul nada malu. Tòg, pa añanan largu David tabatin ku biba na kareda. I tur esei pa motibu ku Saul tabata yalurs.—1 Samuel 24:14, 15; Proverbionan 27:4.

¹⁸ Imaginá e problemanan di famia ku a kansa profeta Oséas. Su esposa tabata un muhé adúltero. Esaki su inmoralidat lo mester tabata manera sumpiña hinká den su kurason. I kuantu mas angustia lo e mester a sufri ora su esposa a haña dos yu ilegítimo komo resultado di su fornikashon!—Oséas 1:2-9.

19. Ki persekushon profeta Mikaya tabatin ku soportá?

¹⁹ Un otro sumpiña den karni ta persekushon. Tuma por ehèmpel e eksperensia di  profeta Mikaya. Ora Mikaya a mira e rei malbado Akap rondoná su mes ku profeta falsu i kere nan mentiranan flagrante, esei lo mester a tormentá su alma hustu. Anto, ora Mikaya a bisa Akap ku tur e profetanan ei tabata papia pa medio di “un spiritu di mentira,” kiko e lider dje gañadónan ei a hasi? Imaginá bo, el a “dal Mikaya na su banda di kara”! Ora Yehova a spièrta Akap ku e kampaña pa rekobrá Ramot-galat tabata destiná pa frakasá, Akap su reakshon tabata pió ainda. El a laga sera Mikaya den prizòn i a dun’é masha poko di kome. (1 Reinan 22:6, 9, 15-17, 23-28) Kòrda tambe riba Yeremías i e manera ku su persiguidónan asesino a trat’é.—Yeremías 20:1-9.

20. Ki sumpiñanan Noemí tabatin ku wanta, i den ki manera el a ser rekompensá?

²⁰ Morto di un ser kerí ta otro situashon difísil ku por ta manera un sumpiña den karni. Noemí tabatin ku wanta e pèrdida penoso di su kasá i su dos yu hòmbernan. Ora el a regresá Bètlehèm, ainda e gòlpinan devastador ei tabata hasi doló. El a bisa su amigunan pa no yam’é Noemí sino Mara, un nòmber ku a reflehá e amargura di su eksperensianan. Pero finalmente, Yehova a rekompens’é pa su awante ku un nietu ku a bira parti di e liña di desendensia ku a hiba na Mesías.—Rut 1:3-5, 19-21; 4:13-17; Mateo 1:1, 5.

21, 22. Kuantu pèrdida Job a sufri, i kon el a reakshoná?

²¹ Pensa kon di shòk Job lo mester a keda ora el a tende dje morto repentino i violento di su dies yunan stimá, i riba dje, e pèrdida di tur su krio di bestia i su sirbidónan. Di un ora pa otro, henter su mundu a parse di basha den otro! Anto, miéntras Job tabata zonzá ainda dje gòlpinan aki, Satanas a dal e ku enfermedat. Kasi sigur Job a pensa ku e enfermedat maligno aki lo a mat’é. Su doló a bira asina insoportabel ku el a pensa ku morto lo tabata un alivio.—Job 1:13-20; 2:7, 8.

²² Komo si fuera tur esaki no tabata basta, su esposa, den su tristesa i angustia, a bini serka dje i grit’é: “Maldishoná Dios i muri!” Esei sí tabata un sumpiña den su karni yen di doló! Despues, en bes di Job su tres kompañeronan konsol’é, nan a atak’é ku rasonamentu falsu, akusand’e di a kometé piká den sekreto i insinuando ku esei tabata e motibu di su kalamidat. Nan argumentunan eróneo a manda e sumpiñanan, na manera di papia, mas i mas hundu den su karni. Kòrda tambe ku Job no tabata sa pakiko e tabata pasa den e kosnan teribel aki; ni e no tabata sa si lo el a keda na bida òf nò. Tòg, “den tur esaki Job no a peka ni e no a kulpa Dios.” (Job 1:22; 2:9, 10; 3:3; 14:13; 30:17) Ounke hopi sumpiña a hink’é pareu, nunka el a bandoná su kaminda di integridat. Ki un animashon pa nos!

23. Kon bin e personanan fiel ku nos a kaba di konsiderá por a soportá vários sumpiña den karni?

²³ Esakinan tabata djis algun ehèmpel. Beibel ta kontené hopi mas ehèmpel. Kada un dje fiel sirbidónan aki tabatin ku lucha ku nan propio sumpiñanan figurativo. I ta un gran variedat di problema nan a enfrentá! Tòg, nan tabatin algu en komun. Ningun di nan a bandoná nan sirbishi na Yehova. Apesar di nan pruebanan angustioso, nan a vense Satanas ku e forsa ku Yehova a duna nan. Kon asina? E siguiente artíkulo lo kontestá e pregunta aki i mustra kon nos tambe por enfrentá tur loke ta manera un sumpiña den nos karni.

[Nota]

Kon Lo Bo Kontestá?

• Pakiko nos por kompará e problemanan ku nos ta enfrentá ku sumpiña den karni?

• Kiko tabata algun dje sumpiñanan ku Mefíboset i Nehemías mester a wanta?

• Den e ehèmpelnan bíbliko di hòmber i muhénan ku a wanta vários sumpiña den karni, kua di nan bo ta haña spesialmente konmovedor i pakiko?

[Preguntanan di Estudio]

[Plachinan na página 15]

Mefíboset tabatin ku lucha ku desabilidat, kalumnia i desepshon

[Plachi na página 16]

Nehemías a perseverá apesar di oposishon