Pregunta di Lektor

Kiko ta nifikashon dje komentario na Hebreonan 12:4 ku ta bisa: “Boso no a resistí ainda te na e punto di drama sanger”?

E ekspreshon ‘resistí te na e punto di drama sanger’ ta indiká bai te n’e ekstremo di muri, literalmente dramando bo sanger ku ta vital pa bida.

Apòstel Pablo tabata sa ku debí na nan fe, tabatin algun kristian hebreo ku ya kaba “a soportá un gran lucha di sufrimentu.” (Hebreonan 10:32, 33) Ora Pablo a indiká esaki, ta parse ku el a usa un komparashon di un lucha den un kompetensia atlétiko griego den kua tabatin korementu, lucha libre, bòkseo i tiramentu di disko i sper. Di akuerdo ku Hebreonan 12:1, el a urgi kompañeronan kristian: “Laga nos tambe pone un banda tur strobashon, i e piká ku ta mara nos asina fásil, i ku perseveransia laga nos kore e kareda ku ta poní nos dilanti.”

Tres versíkulo mas despues, na Hebreonan 12:4, kisas Pablo a pasa for dje ilustrashon di un kareda di korementu pa un kompetensia di bòkseo. (1 Korintionan 9:26 ta menshoná tantu e bòksdó komo e koredó.) Bòksdónan di antigwedat tabata lora nan moketa i pòls den banchinan di kueru. Podisé tabatin asta algun ku tabata hasi e banchinan aki mas pisá ku “pidanan di chumbu, heru òf metal. I esakinan a heridá e bòksdónan gravemente.” E weganan brutu ei tabata kousa sangramentu, i tin bes asta morto.

En todo kaso, e kristiannan hebreo tabatin bon ehèmpel di sirbidónan fiel di Dios ku a sufri persekushon i maltrato serio, asta te na morto, “te na punto di drama sanger.” Tuma nota dje konteksto den kua Pablo a hala atenshon na loke fiel sirbidónan di antigwedat a eksperensiá:

“Nan a wòrdu piedrá, nan a wòrdu di zag na dos, nan a wòrdu tentá, nan a wòrdu matá ku spada; nan a kana rònt, bistí na kueru di karné, na kueru di kabritu, siendo bashí, afligí, maltratá.” Despues di esei, Pablo a resaltá e Perfekshonador di nos fe, Hesus: “[El] a soportá e sufrimentu di [staka, NW], sin hasi kaso di bèrgwensa, i a sinta na man drechi di e trono di Dios.”—Hebreonan 11:37; 12:2.

Sí, hopi kristian a ‘resistí te na e punto di drama sanger,’ esta, te na morto. Nan resistensia tabata mas ku un lucha interno kontra e piká di falta di fe. Nan tabata leal bou di maltrato físiko brutal, i a mantené nan fieldat te na morto.

Esnan mas resien den e kongregashon na Yerusalèm kisas a bira kristian despues ku e persekushon severo di pasado a kaba na nada, i nunka no a enfrentá e pruebanan ekstremo ei. (Echonan 7:54-60; 12:1, 2; Hebreonan 13:7) Tòg, asta pruebanan ménos severo tabata desanimá algun di nan pa sigui den e lucha; nan a “kansa i pèrdè ánimo.” (Hebreonan 12:3) Nan mester a progresá pa alkansá madures. Esaki lo a oumentá nan resistensia pa wanta kiko ku lo a bini, asta si esei lo a enserá maltrato físiko te n’e punto ku nan mester a drama nan sanger.—Hebreonan 6:1; 12:7-11.

Hopi kristian di tempu moderno a ‘resistí te na e punto di drama sanger,’ dor ku nan a ser ehekutá pasobra na no kier a komprometé nan prinsipionan kristian. En bes di laga e palabranan di Pablo na Hebreonan 12:4 terorisá nos, nos por konsiderá nan komo un indikashon di te kon leu nos ta desididu pa keda leal na Dios. Mas despues den e mesun karta n’e hebreonan, Pablo a skirbi: “Laga nos mustra gratitut, pa medio di kual nos por ofresé na Dios un sirbishi aseptabel ku reverensia i temor.”—Hebreonan 12:28.