Prinsipionan di Dios Por Benefisiá Bo

SIN duda bo ta na altura ku bestia tin un instinto ku ta dirigí nan. Hopi mashin a ser trahá pa sigui instrukshon i funshoná na un sierto manera. Pero hende a ser kreá pa sigui prinsipio. Kon bo por ta sigur di esei? Wèl, ora Yehova, e Originador di tur prinsipio hustu, a krea e promé hendenan, el a anunsiá: “Laga nos traha hende segun nos imágen, konforme nos semehansa.” E Kreador ta un spiritu; e no tin un kurpa físiko manera nos. Pues nos ta den su “imágen” den sentido ku nos por reflehá su personalidat i manifestá su ekselente kualidatnan te na sierto grado. Hende tin e kapasidat pa laga prinsipio guia nan bida, esta, biba segun loke nan ta kere ta regla di bon kondukta. Yehova a laga registrá hopi dje prinsipionan aki den su Palabra.—Génesis 1:26; Huan 4:24; 17:17.

Un hende lo por bisa: ‘Pero Beibel ta kontené sientos di prinsipio. Ta kon mi ta hasi konosé nan tur?’ E por tin rason, pero pensa riba esaki: Ounke tur prinsipio di Dios ta benefisioso,  algun ta hopi mas importante ku otro. Bo por mira esei for di Mateo 22:37-39, kaminda Hesus a mustra ku entre e mandamentunan den e Lei di Moises i e prinsipionan ku tabatin tras di esakinan, algun tabata mas importante ku otro.

Kua ta e prinsipionan ku tin mas peso? E prinsipionan klave di Beibel ta esnan ku tin di haber direktamente ku nos relashon ku Yehova. Si nos tuma esakinan na pechu, e Kreador ta bira e influensia prinsipal riba nos kompas moral. Ademas di eseinan, tin prinsipionan ku ta mustra kon nos tin ku trata ku otro hende. Si nos apliká esakinan, nan lo yuda nos resistí e spiritu di ami-promé, òf kon ku bo kier yam’é.

Laga nos kuminsá ku un di e bèrdatnan mas importante den Beibel. Kiko e bèrdat ei ta, i ki influensia e tin riba nos?

“E Haltísimo Riba Henter Tera”

E Skritura Santu ta mustra bon kla ku Yehova ta nos Magnífiko Kreador, Dios Todopoderoso. Hamas e por ser igualá òf remplasá. Esaki ta un bèrdat klave registrá den Beibel.—Génesis 17:1; Eklesiástes 12:1.

Un dje eskritornan dje buki di Salmo a bisa di Yehova: “Abo so . . . ta e Haltísimo riba henter tera.” Rei David di antigwedat a bisa: “E dominio ta di bo, o SEÑOR, i abo ta halsa bo mes komo kabes riba tur kos.” I e profeta renombrá Yeremías a sinti su mes konmoví pa skirbi: “No tin ningun manera bo, o SEÑOR; grandi bo ta, i bo nòmber ta grandi den poder.”—Salmo 83:18; 1 Krónikanan 29:11; Yeremías 10:6.

Kon nos mester apliká e bèrdatnan ei tokante Dios den nos bida di tur dia?

No tin duda ken realmente mester ta esun mas importante den nos bida: nos Kreador i Dunador-di-Bida. P’esei anto, no ta na su lugá pa resistí kualkier tendensia pa hala atenshon na nos mes, un tendensia ku kisas ta mas fuerte den algun hende ku den otro? Un prinsipio sabí ku por guia nos ta pa “hasi tur [kos] pa e gloria di Dios.” (1 Korintionan 10:31) Profeta Daniel a pone un ehèmpel ekselente relashoná ku esaki.

Historia ta mustra nos ku un biaha Rei Nabukodonosor di Babilonia a haña un soño ku a molesti’é i el a eksigí p’e haña sa su nifikashon. Ounke tur otro hende a keda konfundí, Daniel sí por a konta e rei eksaktamente loke e kier a sa. Daniel a tuma e mérito pa esaki? Nò, el a duna gloria na “Dios den shelu ku ta revelá misterio.” Daniel a sigui bisa: “E misterio aki no a wòrdu revelá na mi pa motibu ku tin mas sabiduria den mi ku den kualkier otro hende bibu.” Daniel tabata un hòmber di prinsipio. Nada straño ku den e buki di Daniel, e ta ser deskribí tres bes komo “masha stimá” den bista di Dios.—Daniel 2:28, 30; 9:23; 10:11, 19.

Si bo imitá Daniel, esei lo benefisiá bo. Pa sigui Daniel su ehèmpel, e faktor desisivo ta motivashon. Ken mester haña e onor pa loke bo ta hasi? Sea kual sea bo situashon, bo ta den e posishon pa aktua na armonia ku e prinsipio bíbliko di vital importansia aki: Yehova ta e Soberano Señor. Si bo hasi esei, lo bo bira “masha stimá” den su bista.

 Awor, laga nos konsiderá dos prinsipio básiko ku por guia nos riba e tereno di relashonnan humano. Apesar dje hopi énfasis ku hende ta pone riba nan mes, e área di bida aki ta spesialmente difísil.

‘Ku Humildat di Mente’

Masha poko bes hende ku ta pone nan mes na promé lugá ta sinti nan satisfecho. Mayoria kier un mihó bida, i nan kier e awor. Pa nan, modestia ta un indikashon di debilidat. Nan ta haña ku ta otro hende so mester tin pasenshi. Ora ta toka nan aktitut di ami-promé, tur kos ta pèrmití. Bo ta kere ku abo sí por tin un otro punto di bista i tambe komportá bo na un manera diferente?

Sirbidónan di Dios ta haña nan tur dia ku e aktitut ei, pero e no mester afektá nan. Kristiannan maduro ta aseptá e prinsipio ku “no ta esun ku ta rekomendá su mes ta keda aprobá, ma esun ku Señor ta rekomendá.”—2 Korintionan 10:18.

Ta bon pa apliká e prinsipio na Filipensenan 2:3 i 4. E ta yuda sigur. E teksto ei ta animá bo pa “no hasi nada ku un aktitut di egoismo òf orguyo, ma ku humildat [di mente, NW] laga kada un di boso konsiderá e otro mas importante ku e mes.” Asina lo bo ‘no buska bo interes personal so, ma . . . tambe interes di otronan.’

Un hende ku tabatin un bon aktitut i ku no tabatin un opinion eksagerá di su balor komo persona, tabata Gídeon, un hues di e hebreonan di antigwedat. E no a buska pa ta lider di Israel. Sin embargo, ora el a ser nombrá pa  kumpli ku e papel ei, Gídeon a mustra ku e no ta sinti su mes digno pa esei. El a splika: “Mi famia ta esun di mas ménos den Manases, i ami ta esun di mas chikitu den e kas di mi tata.”—Huesnan 6:12-16.

Ademas, despues ku Yehova a duna Gídeon viktoria, hòmbernan di Efraim a kuminsá pleita kuné. Kon Gídeon a reakshoná? E triunfo a pon’é sinti su mes mas importante ku otro hende? Nò. El a evitá desaster dor di duna un kontesta suave. “Kiko mi por a hasi kompará ku boso?” Gídeon tabata humilde.—Huesnan 8:1-3.

Ta bèrdat ku e susesonan ku a enbolbé Gídeon a tuma lugá hopi tempu pasá. Tòg, ta importante pa konsiderá e relato aki. Bo por mira ku Gídeon tabatin un aktitut basta diferente for di loke ta asina komun awe, i el a biba na armonia ku esei, pa su benefisio.

E aktitut prevalente di kòrda riba bo so por laga bo kere ku bo ta mas ku otro hende. Prinsipionan di Beibel ta korigí e pensamentu inkorekto ei. Esakinan ta mustra bo kiko ta bo berdadero balor en relashon ku e Kreador i otro personanan.

Dor di tuma prinsipionan di Beibel na pechu, nos ta halsa nos mes riba e aktitut di ami-promé ku ta na moda. Nos no ta laga sintimentu òf personalidat dirigí nos mas. Mas nos siña tokante prinsipionan hustu, mihó nos ta siña konosé Esun ku a establesé nan. Sí, ta bale la pena pa nos tuma nota spesial di prinsipionan di Dios ora nos ta lesa Beibel.—Mira e kuadro.

Yehova a traha hende mas haltu ku bestia. Bestia ta move prinsipalmente riba instinto. Pa nos por kumpli ku Dios su boluntat, nos tin ku apliká prinsipionan divino. Asina nos por mantené nos kompas moral den bon kondishon, un kompas ku lo dirigí nos den un sistema nobo ku Dios lo traha. Beibel ta duna nos motibu pa spera masha pronto un sistema nobo rònt mundu den kua ‘hustisia ta biba.’—2 Pedro 3:13.

[Kuadro/Plachi na página 6]

Algun Prinsipio Bíbliko Probechoso

Den famia:

“No laga ningun hende buska su mes interes, sino esun di su próhimo.”—1 Korintionan 10:24.

“Amor . . . no ta buska su propio interes.”—1 Korintionan 13:4, 5.

“Laga kada un di boso tambe stima su esposa manera su mes.”—Efesionan 5:33.

“Esposanan, sea sumiso na boso esposonan.”—Kolosensenan 3:18.

“Skucha na bo tata ku a engendrá bo, i no despresiá bo mama ora ku e bira bieu.”—Proverbionan 23:22.

Na skol, na trabou òf den negoshi:

“Un balansa engañoso ta abominashon . . . E malbado ta risibí pago engañoso.”—Proverbionan 11:1, 18.

“Laga esun ku ta hòrta, no hòrta mas; ma mas bien, lagu’é traha.”—Efesionan 4:28.

“Si un hende no kier traha, no lagu’é kome tampoko.”—2 Tesalonisensenan 3:10.

“Tur loke boso hasi, hasi boso trabou di kurason, komo pa SEÑOR i no pa hende.”—Kolosensenan 3:23.

“Ku deseo pa komportá nos mes den tur kos na un manera onorabel.”—Hebreonan 13:18.

Aktitut pa ku rikesa:

“Esun ku ta purá pa bira riku lo no keda sin kastigu.”—Proverbionan 28:20.

“Esun ku ta stima plaka lo no keda satisfecho ku plaka.”—Eklesiástes 5:10.

Kon bo ta mira bo mes:

“Ora hende ta kana buska nan mes gloria, esei ta gloria?”—Proverbionan 25:27, NW.

“Laga un otro gaba bo, i no bo mes boka.”—Proverbionan 27:2.

“Mi ta bisa kada un di boso pa no pensa mas haltu di su mes ku e mester pensa.”—Romanonan 12:3.

“Si un hende pensa ku e ta algu, siendo ku e no ta nada, e ta gaña su mes.”—Galationan 6:3.

[Plachi na página 5]

Daniel a duna e mérito na Dios

[Plachi na página 7]

Ora bo ta trata otro hende na armonia ku e prinsipionan di Dios, esei ta kontribuí na felisidat i relashonnan plasentero

[Rekonosementu pa Potrèt na página 7]

U.S. Fish & Wildlife Service, Washington, D.C./Robert Bridges