Un Refugio Kontra Bientu

TE ARIBA den e serunan alpino na Europa, ta krese un mata resistente ku nan ta yama rosa alpino. Hopi bes e mata enano aki ta krese den grupo di matanan chikitu pegá ku otro, i esaki ta sirbi komo un protekshon kontra e bientunan fuerte di den seru. Bientu duru tin chèns di kaba ku matanan alpino dor ku e ta baha nan temperatura, seka e airu i tera i saka nan kompleto ku nan rais.

Hopi bes rosa alpino ta logra skapa e destrukshon ku bientu ta kousa dor ku e ta krese den burakunan entre baranka. Maske e sitionan aki no tin hopi tera, e burakunan aki ta sirbi komo un protekshon kontra bientu i ta pèrmití e mata konserbá awa. Ounke e rosa alpino aki ta kasi skonde pa bista di hende durante gran parti di aña, durante zomer nan ta dekorá e serunan ku a sirbi komo nan refugio ku flornan kòrá bibu.

Profeta Isaías a splika ku Dios lo nombra “prensnan,” i ku kada un lo sirbi komo “refugio kontra bientu.” (Isaías 32:1, 2) Bou di direkshon di e Rei Kristu Hesus, e prensnan spiritual òf superintendentenan aki, lo ta manera barankanan stabil, firme den tempu di angustia òf aflikshon. Nan ta ofresé refugio konfiabel ora esnan den nesesidat haña nan konfrontá ku atversidat i ta yuda nan protehá nan reserva di awa spiritual ku ta bini for dje Palabra di Dios.

E bientunan di persekushon, desanimashon òf malesa por asotá un kristian, i si e no haña protekshon su fe lo por marchitá. Ansianonan kristian por perkurá protekshon dor di skucha atentamente n’e problema dje ruman, dun’é konseho basá riba Beibel i animashon òf yudansa práktiko. E ansianonan, meskos ku nan Rei nombrá, Kristu Hesus, kier yuda esnan ku a ser “plamá.” (Mateo 9:36) Tambe nan ta deseá di yuda otronan ku a ser maltratá dor di bientunan di siñansa falsu. (Efesionan 4:14) Tal yudansa n’e ora oportuno por resultá di gran importansia.

“Mi a pasa dor di un periodo troumátiko den mi bida ora ku algun di mi amigunan será a bandoná e bèrdat i, na mesun tempu, mi tata a haña un derame selebral,” Miriam ta splika. “Den un intento pa vense mi depreshon, mi a kuminsá sali ku un amigu di mundu. Djis despues, ora ku mi a kuminsá sinti ku mi no ta bal nada, mi a informá e ansianonan di kongregashon ku mi a disidí di bandoná e bèrdat, pasobra mi tabata sigur ku Yehova no por tabata stima mi.

Na e momentu krusial ei, un ansiano kompasivo a rekordá mi dje añanan ku mi a sirbi komo pionero regular. El a bisa mi ku semper el a atmirá mi fieldat, i bondadosamente el a pidi mi pa laga e ansianonan yuda mi rekobrá mi konfiansa den e amor di Yehova. Nan interes amoroso na e momentu desisivo ei tabata manera ‘un refugio’ durante e furia dje tormenta spiritual rondó di mi. Denter di un luna mi a kibra mi relashon ku mi amigu, i desde e tempu ei mi a sigui kana den e kaminda dje bèrdat.”

Ansianonan ta sinti un satisfakshon ora nan mira kompañeronan kristian bona spiritualmente, pa motibu di e protekshon oportuno ku esakinan a risibí. I e ‘refugionan’ aki ta duna nos un muestra adelantá dje yudansa spiritual na abundansia ku nos lo disfrutá di dje durante e Reinado di Mil aña di Kristu.