Kon Bo Por Sobrebibí Fin dje Mundu Aki?

BEIBEL ta deskribí e fin dje sistema aktual di kosnan aki komo “un dia di furia, un dia di problema i angustia, un dia di destrukshon i desolashon, un dia di skuridat i tiniebla, un dia di nubia i skuridat profundo.” (Sofonías 1:15) Esaki sigur lo no ta un dia ku normalmente bo tin gana di mira! Tòg, apòstel Pedro a urgi su kompañeronan kristian pa nan ‘spera i pura e binida di e dia di Dios, pa kual motibu e shelunan lo wòrdu destruí dor di kimamentu, i e elementonan lo dirti di kalor intenso! Ma segun Su promesa nos ta sperando shelunan nobo i un tera nobo, den kual ta biba hustisia.’—2 Pedro 3:12, 13.

Aki Pedro no tabata papia di un destrukshon di shelu i tera literal. E “shelunan” i “tera” ku Pedro a referí na dje den e konteksto aki ta símbolonan di e gobièrnunan humano i sosiedat humano malbado aktual. “E dia di SEÑOR” lo no destruí e tera literal, sino lo “kaba ku e pekadónan ku tin den dje.” (Isaías 13:9) P’esei, pa hende ku ta “suspirá i keha pa motibu di tur e abominashonnan” ku ta sosodé awe den e sosiedat humano, e dia di Yehova lo ta un dia di salbashon.—Ezekiel 9:4.

Kon anto un hende por skapa riba “e dia grandi i temibel di SEÑOR”? “E palabra di SEÑOR” revelá na un di su profetanan ta duna nos kontesta pa e pregunta ei: “I lo sosodé ku ken ku inboká e nòmber di SEÑOR lo wòrdu librá.” (Yoël 1:1; 2:31, 32) Testigunan di Yehova lo ta kontentu pa yuda bo siña kiko ta nifiká inboká e nòmber di Yehova.