Kon Presioso e Bèrdat Ta pa Abo?
Kon Presioso e Bèrdat Ta pa Abo?
“Boso lo konosé e bèrdat, i e bèrdat lo hasi boso liber.”—HUAN 8:32.
1. Aparentemente, kon Pilato a usa e palabra “bèrdat” diferente for dje manera ku Hesus a us’é?
“KIKO ta bèrdat?” Parse ku ora Pilato a hasi e pregunta aki, e tabata kier men bèrdat en general. Pero di otro banda, Hesus a kaba di bisa: “Pa esaki mi a nase i pa esaki mi a bini den mundu, pa duna testimonio di e bèrdat.” (Huan 18:37, 38) Kontrali ku Pilato, Hesus sí a usa e artíkulo definí. El a bisa “e bèrdat.” E tabata papia di e bèrdat di Dios.
E Aktitut Ku Mundu Tin p’e Bèrdat
2. Kua ekspreshon di Hesus ta mustra kuantu balor e bèrdat tin?
2 Pablo a bisa: “No ta tur [hende] tin fe.” (2 Tesalonisensenan 3:2) Meskos nos lo por bisa tokante e bèrdat. Tin hopi hende ku ta ignorá e bèrdat basá riba Beibel asta ora nan haña chèns di siñ’é. I sin embargo, e ta algu asina presioso! Hesus a bisa: “Boso lo konosé e bèrdat, i e bèrdat lo hasi boso liber.”—Huan 8:32.
3. Ki spièrtamentu tokante siñansa falsu nos tin ku tuma na pechu?
3 Apòstel Pablo a bisa ku bo no por haña e bèrdat den filosofia i tradishon di hende. (Kolosensenan 2:8) I esei ta bèrdat, pasobra e tipo di siñansanan ei ta gaña hende. Pablo a spièrta e kristiannan di Efeso ku si nan a pone fe den e kosnan ei, nan lo tabata manera beibi spiritual “tirá p’aki p’aya dor di olanan, i hibá dor di tur bientu di doktrina, dor di triki di hende, dor di astusia den trahamentu di plan engañoso.” (Efesionan 4:14) Awendia, hende ku ta oponé e bèrdat di Dios ta promové e ‘trikinan di hende’ aki. Nan ta bon den trose bèrdat i promové mentira bou di kapa di bèrdat. Pa nos por haña e bèrdat apesar dje preshonnan sutil ei, nos tin ku investigá Beibel diligentemente.
Kristiannan i Mundu
4. Pa ken e bèrdat ta disponibel, i ki obligashon esnan ku risibié tin?
4 Den orashon, Hesukristu a referí na esnan ku a bira su disipelnan i a pidi Yehova: “Santifiká nan den e bèrdat; Bo palabra ta bèrdat.” (Huan 17:17) Nan mester a ser santifiká, esta, apartá, pa sirbi Yehova i siña hende tokante su nòmber i su Reino. (Mateo 6:9, 10; 24:14) Ounke no ta tur hende tin e bèrdat di Yehova, e ta disponibel sí komo un regalo grátis na tur hende ku busk’é, sin importá nan nashonalidat, nan rasa òf nan kultura. Apòstel Pedro a bisa: “Mi ta komprendé awor ku Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echonan 10:34, 35.
5. Dikon hopi bes hende ta persiguí kristiannan?
5 Kristiannan ta kompartí e bèrdat di Beibel ku otro hende, pero no ta tur kaminda nan ta bon biní. Hesus a spièrta nan: “Nan lo entregá boso na tribulashon i lo mata boso, i tur nashon lo odia boso pa kousa di mi nòmber.” (Mateo 24:9) Komentando riba e versíkulo aki, John R. Cotter, un religioso irlandes, a skirbi na 1817: “Na lugá di gradisí [kristiannan] pa e esfuersonan ku nan ta hasi pa drecha bida di hende pa medio di nan predikashon, hende lo a odia i persiguí e disipelnan dor ku nan ta eksponé nan mal kustumbernan.” E persiguidónan ei no ta “aseptá e amor pa e bèrdat, pa nan por wòrdu salbá.” P’esei “Dios lo manda riba nan un influensia di eror, pa nan kere mentira, pa nan tur wòrdu husgá, kendenan no a kere e bèrdat, ma a hiba gustu den maldat.”—2 Tesalonisensenan 2:10-12.
6. Ki deseo kristiannan no mag kultivá?
6 Komo ku kristiannan ta biba den un mundu enemigu, apòstel Huan ta spièrta nan: “No stima mundu, ni e kosnan ku tin den mundu. . . . Tur loke ku tin den mundu, e deseo di karni i e deseo di wowo i e orguyo di bida, no ta bin di e Tata, sino di e mundu.” (1 Huan 2:15, 16) Huan ta papia di “tur loke tin den mundu.” E no ta laga nada afó. P’esei nos lo no mag kultivá un deseo pa nada ku e mundu aki tin di ofresé, ku por kita nos atenshon for dje bèrdat. Huan su konseho lo ta un influensia poderoso den nos bida si nos skuch’é. Kiko e influensia aki lo ta?
7. Kon konosementu dje bèrdat ta motivá hende ku tin e aktitut di kurason korekto?
7 Durante aña 2001, Testigunan di Yehova rònt mundu a kondusí mas ku kuater mion i mei studio di Beibel pa luna, instruyendo hende individual i gruponan tokante e manera ku Dios ta spera pa nos hiba nos bida. E resultado tabata ku 263.431 hende a batisá. E lus dje bèrdat a bira presioso pa e disipelnan nobo aki, i nan a rechasá mal asosiashon i e kustumbernan inmoral asina komun den mundu, i ku ta desonrá Dios. For di dia ku nan a batisá, nan a keda kumpli ku e normanan ku Yehova ta pone pa tur kristian. (Efesionan 5:5) E bèrdat ta asina presioso pa bo?
Yehova Ta Kuida Nos
8. Kon Yehova ta respondé na nos dedikashon, i pakiko ta sabí pa “buska promé e reino”?
8 Apesar di nos imperfekshonnan, den su miserikòrdia Yehova ta aseptá nos dedikashon. Ta komo si fuera e ta baha na nos nivel p’e atraé nos na dje. E ta siña nos elevá nos metanan i nos deseonan. (Salmo 113:6-8) Na mes momentu Yehova ta pèrmití nos tin un relashon personal kuné, i e ta primintí di kuida nos si nos “buska promé e reino di Dios i su hustisia.” E ta primintí ku si nos hasi esaki i kuida nos spiritualidat, ‘tur e kosnan aki lo wòrdu añadí na nos.’—Mateo 6:33.
9. Ken ta “e esklabo fiel i diskreto,” i kon Yehova ta kuida nos pa medio dje “esklabo” aki?
9 Hesukristu a skohe su 12 apòstelnan, i a pone e fundeshi pa e kongregashon di kristiannan ungí ku a haña e nòmber: “e Israel di Dios.” (Galationan 6:16; Revelashon 21:9, 14) Despues e kongregashon aki a ser deskribí komo “e iglesia di e Dios bibu, e pilar i sosten di e bèrdat.” (1 Timoteo 3:15) Hesus a bisa ku miembronan dje kongregashon ei ta “e esklabo fiel i diskreto” i “e fiel mayordomo, esun diskreto.” Hesus a bisa ku e sirbidó fiel ei lo tin e responsabilidat di duna kristiannan nan “alimento n’e debido tempu.” (Mateo 24:3, 45-47; Lukas 12:42, NW) Si nos no tin kuminda, nos ta muri di hamber. Meskos, si nos no tuma alimento spiritual, nos ta bira suak i muri den sentido spiritual. P’esei, e echo ku tin un “esklabo fiel i diskreto” ta otro prueba mas di ku Yehova ta kuida nos. Laga nos semper sinti un gran apresio pa e perkurashonnan spiritual presioso ku nos ta risibí pa medio dje “esklabo” ei.—Mateo 5:3.
10. Pakiko ta vital pa nos t’ei presente na nos reunionnan regularmente?
10 Pa nos alimentá nos mes den sentido spiritual nos mester tin un studio personal. Ademas nos tin ku asosiá ku otro kristiannan i asistí na reunionnan di kongregashon. Bo por kòrda presis kiko bo a kome seis luna pasá, òf asta seis siman pasá? Kasi sigur ku nò. Tòg, loke sea ku bo a kome a duna bo e nutrishon ku bo tabatin mester. I kasi sigur, entre tantu bo a bolbe kome e mesun tipo di kuminda ei. Meskos ta ku e alimento spiritual ku nos ta risibí na nos reunionnan kristian. Nos por laga di kòrda delaster un detaye di loke nos ta tende n’e reunionnan. I kasi sigur nos a tende informashon similar na mas ku un okashon. Sin embargo, ta alimento spiritual e ta; vital pa nos bienestar. Semper nos reunionnan ta duna nos bon nutrishon spiritual n’e debido tempu.
11. Ki obligashonnan nos tin ora nos asistí na reunionnan kristian?
11 Asistí na reunion kristian ta pone un responsabilidat tambe riba nos. Kristiannan ta ser animá pa nan “enkurashá otro,” i stimulá otro miembronan di kongregashon “pa stima i hasi bon obra.” Dor di prepará, asistí i partisipá na tur reunion kristian, nos ta fortalesé nos propio fe, i nos ta animá otronan. (Hebreonan 10:23-25) Algun di nos por tin mester di animashon konstante pa keda kome spiritualmente, meskos ku mucha ku no gusta kome tur kos. (Efesionan 4:13) Ta amoroso di nos parti pa duna e animashon ei ora ta nesesario, pa hende asina por desaroyá bira kristian maduro, manera esnan ku apòstel Pablo a papia di dje ora el a skirbi: “Kuminda sólido ta pa hende madurá, kendenan, pa motibu di práktika, tin nan mente entrená pa diserní loke ta bon i loke ta malu.”—Hebreonan 5:14.
Kuida Nos Mes den Sentido Spiritual
12. Na fin di kuenta, ta ken ta responsabel pa nos keda den e bèrdat? Splika.
12 Nos kasá òf nos mayornan por stimulá nos riba e kaminda dje bèrdat. Ansianonan di kongregashon tambe por pastoriá nos komo parti dje tou den nan kuido. (Echonan 20:28) Pero na fin di kuenta, ta ken ta responsabel pa nos perseverá i sigui biba na armonia ku e bèrdat? Ta kada un di nos mes ta karga e responsabilidat ei, i ta asina, tantu den tempu bon komo den tempu difísil. Tuma e siguiente suseso komo ehèmpel.
13, 14. Manera loke a pasa ku e lamchi ta mustra, kon nos por haña e yudansa spiritual nesesario?
13 Na Eskosia un par di lamchi tabata kome yerba riba un vèlt na haltu. Un di nan a dual bai na rant dje seru i lora bai kai riba un rant dje seru un poko mas abou. Nada no a pas’é, pero e tabatin miedu, i e no por a subi bèk. El a kuminsá grita pa yudansa. Su mama a tend’é, i e tambe a kuminsá grita te ora e wardadó di karné a bin skapa e lamchi.
14 Paga tinu kon e kos a desaroyá. E lamchi a grita pa yudansa, e mama tambe a kuminsá grita huntu kuné, i ora e wardadó a tende, el a drenta akshon mesora pa skapa e lamchi. Si un bestia asina chikitu i su mama mes por rekonosé peliger i pidi yudansa mesora, nos no mester hasi meskos ora nos trompeká spiritualmente òf enfrentá peliger inesperá dje mundu di Satanas? (Santiago 5:14, 15; 1 Pedro 5:8) Esei ta loke nos mester hasi, i mas ainda si nos falta eksperensia, sea pasobra nos ta hóben òf pasobra nos ta relativamente nobo den e bèrdat.
Sigui Dios Su Guia Ta Trese Bendishon
15. Kon un señora a sinti ora el a kuminsá asosiá ku e kongregashon kristian?
15 Komprendementu di Beibel i e pas mental ku e ta trese pa hende ku ta sirbi e Dios dje bèrdat tin gran balor. Wak un ehèmpel aki: Un señora di 70 aña ku a bai Iglesia Anglikano henter su bida a aseptá un studio di Beibel ku un Testigu di Yehova. Den poko tempu el a siña ku Dios su nòmber ta Yehova, i e tambe a kuminsá bisa “amèn” na final di e orashonnan públiko sinsero na e Salon di Reino lokal. Yen di emoshon el a bisa: “Na lugá di hasi komo si fuera Dios ta inalkansablemente haltu pa hende, ta manera kos ku boso ta tres’é te meimei di nos manera un amigu stimá. Nunka mi a yega di mira algu asina.” Probablemente nunka e kerido señora interesá ei lo lubidá e promé impreshon ku e bèrdat a hasi riba dje. Laga nos tampoko no lubidá nunka kiko e bèrdat a nifiká pa nos ora nos a asept’é inisialmente.
16. (a) Kiko por sosodé si nos hasi ganamentu di plaka nos meta prinsipal? (b) Kon nos por haña berdadero felisidat?
16 Hopi hende ta pensa ku si nan tabatin mas plaka nan lo tabata mas felis. Pero si nos hasi ganamentu di plaka nos meta prinsipal den bida, nos lo por ‘kousa nos mes tur sorto di doló di kurason.’ (1 Timoteo 6:10, Beibel na papiamentu koriente) Pensa kuantu hende ta kumpra brièchi, gasta plaka den kasino, òf spekulá pa loko riba bolsa di balor, soñando ku gana un fortuna. Masha masha poko di nan ta logra e fortuna ku nan ta spera. I hopi bes, asta esnan ku logra ta mira ku e rikesa ku nan a haña di ripiente no a duna nan felisidat. Mas bien, felisidat duradero ta bini dor di hasi Yehova su boluntat, traha ku e kongregashon kristian ku guia dje spiritu santu di Yehova i yudansa di su angelnan. (Salmo 1:1-3; 84:4, 5; 89:15) Ora nos hasi esaki, nos por haña bendishonnan ku nos no ta ni spera. E bèrdat ta sufisiente presioso pa bo p’e trese bendishonnan asina den bo bida?
17. E echo ku Pedro a keda serka Simon, un kurtidó di kueru, ta revelá kiko tokante e aktitut dje apòstel?
17 Pensa riba e eksperensia di apòstel Pedro. Na aña 36 Era Komun el a biaha bai yanura di Saron komo misionero. El a hasi un parada na Lida i a kura Eneas, ku tabata lam. Despues el a sigui pa e haf di Yope. Ei el a resusitá Dorkas. Echonan 9:43 ta konta nos: “El a keda hopi dia na Yope serka un tal Simon, kurtidó di kueru.” E referensia kasual aki ta mustra ku Pedro no tabatin prehuisio kontra e hendenan dje stat kaminda e tabata prediká. Kon asina? Un erudito di Beibel, Frederic W. Farrar ta skirbi: “Ningun siguidó estrikto i infleksibel dje Lei Oral [di Moises] lo kier a bai keda na kas di un kurtidó di kueru. Dor ku e fishi a impliká kontakto diario ku kueru i kadaver di vários bestia, i dor dje materialnan ku tabata nesesario pa e trabou, tur legalista estrikto tabata hañ’é algu impuru i fis.” Ni maske Simon su kas “pegá ku laman” no tabata serka di su tayer, tòg Simon tabatin ‘un fishi despresiabel ku lo por baha e rèspèt propio di tur hende ku tabatin un fishi asina,’ segun Farrar.—Echonan 10:6.
18, 19. (a) Dikon e vishon ku Pedro a risibí a lagu’é konfundí? (b) Ki bendishon inesperá a toka Pedro?
18 Sin prehuisio, Pedro a aseptá Simon su hospitalidat, i ei, sin ku el a spera, Dios a duna Pedro un guia. El a mira un vishon kaminda Dios a mand’é kome bestia impuru segun lei hudiu. Pedro a protestá ku nunka el a “kome nada profano ni impuru.” Pero Dios a bis’é tres bes: “Loke Dios a hasi limpi, no konsiderá esei profano.” Manera ta di komprendé, “Pedro tabata mashá konfundí tokante di kiko e vishon ku el a mira por ta nifiká.”—Echonan 10:5-17; 11:7-10.
19 Pedro no tabata sa ku e dia promé na Sesarea, un 50 kilometer leu, un hòmber gentil yamá Kornelio tambe a haña un vishon. E angel di Yehova a bisa Kornelio manda algun sirbidó pa buska Pedro den kas di Simon e kurtidó di kueru. Kornelio a manda su sirbidónan na kas di Simon, i Pedro a bini ku nan bèk Sesarea. Despues ku el a yega el a prediká na Kornelio, su famia i su amigunan. Komo resultado nan a bira e promé kreyentenan gentil no-sirkunsidá ku a risibí spiritu santu komo heredero dje Reino. Apesar ku e hòmbernan no tabata sirkunsidá, tur esnan ku a tende Pedro su mensahe a batisá. Esaki a habri e posibilidat pa hende dje nashonnan—ku for dje punto di bista hudiu tabata impuru—por a bira miembro dje kongregashon kristian. (Echonan 10:1-48; 11:18) Pedro tabatin un privilegio masha grandi, i el a hañ’é debí ku e bèrdat tabata presioso p’e i a pon’é sigui Yehova su guia i aktua ku fe!
20. Ki yudansa nos ta risibí di Dios ora nos pone e bèrdat na promé lugá den nos bida?
20 Pablo ta urgi nos: “Papiando e bèrdat den amor, nos tin di krese den tur aspekto den dje, kende ta e kabes, esta, Kristu.” (Efesionan 4:15) Sí, e bèrdat lo duna nos felisidat inkomparabel for di awor si nos pon’é na promé lugá den nos bida i pèrmití Yehova guia nos pasonan ku su spiritu santu. Kòrda tambe ku nos ta konta ku apoyo di spiritu santu i angel den nos trabou di evangelisá. (Revelashon 14:6, 7; 22:6) Nos ta hopi privilegiá di por tin tal apoyo p’e trabou ku Yehova a enkargá nos kuné! Dor di keda íntegro nos lo por alabá Yehova, e Dios dje bèrdat, pa henter eternidat. Kiko por ta mas presioso ku esei?—Huan 17:3.
Kiko Nos A Siña?
• Dikon hopi hende no ta aseptá e bèrdat?
• Kon kristiannan mester konsiderá kosnan dje mundu di Satanas?
• Ki aktitut nos mester tin tokante nos reunionnan, i pakiko?
• Ki responsabilidat nos tin pa loke ta trata nos bienestar spiritual?
[Preguntanan di Estudio]
[Mapa/Plachi na página 18]
(Pa e teksto den su formato kompleto, wak e publikashon)
LAMAN GRANDI
Sesarea
YANURA DI SARON
Yope
Lida
Yerusalèm
[Plachi]
Pedro a sigui Dios su guia i a haña bendishon inesperá
[Rekonosementu]
Mapa: Mountain High Maps® Copyright © 1997 Digital Wisdom, Inc.
[Plachi na página 13]
Hesus a duna testimonio dje bèrdat
[Plachi na página 15]
Meskos ku alimento físiko, alimento spiritual ta esensial pa nos bienestar