‘Nos Amor A Bira Mas Profundo’

DJABIÈRNÈ, 31 di mart 2000, tabatin un erupshon n’e volkan Usu na Hokaido, Hapon, despues ku e tabatin 23 aña inaktivo. Míles di habitante a haña nan obligá di hui for dje zona di peliger. Hopi di nan a pèrdè kas i trabou, pero afortunadamente no tabatin morto. Entre e hendenan ku mester a hui tabatin 46 Testigu di Yehova. Pero nan no a ser lagá pa nan kuenta.

Ku yudansa di un minister kristian biahero ku ta sirbi den e área, e mesun dia ku e erupshon a tuma lugá a hasi areglo pa duna yudansa. No a dura mashá ku suministro pa alivio a kuminsá bini for di kongregashonnan den bisindario. Bou di supervishon dje sukursal di Hapon, mesora a forma un komité di alivio, i donashonnan abundante di Testigunan di Yehova p’e fondo di alivio a bini for di tur parti di Hapon. Pa apoyá aktividatnan spiritual, a manda sirbidónan di tempu kompleto di Testigunan di Yehova n’e kongregashon mas afektá, i bes tras bes e superintendente di sirkuito a bishitá e área pa duna e rumannan sosten emoshonal i spiritual.

E Testigunan den e área afektá a sigui tene nan reunionnan kristian durante e periodo difikultoso ei dor di usa kasnan privá den un área mas safe. Despues ku e òrdu pa evakuá e área di e Salon di Reino e ser revoká, e rumannan a bolbe i a topa un edifisio pará di banda, kibrá i destruí. No muchu leu for dje Salon di Reino, e krater ku a kaba di forma tabata saka huma diki ainda. E Testigunan a puntra nan mes: ‘Ta sabí pa sigui tene reunion na e sitio aki? Por drecha e Salon di Reino?’

Desishon a kai pa konstruí un Salon di Reino nobo na un lugá mas safe den bisindario. E Komité di Konstrukshon Regional a duna e yudansa nesesario. Pa konstruí e edifisio aki, nan a hasi uso dje donashonnan ku Testigunan di henter e pais a manda. Nan a buska i haña tereno lihé, i danki n’e yudansa di sientos di boluntario, den un periodo di tempu kòrtiku e Salon di Reino nobo tabata kla. Djadumingu, 23 di yüli 2000 a tene e promé reunion den e Salon di Reino nobo aki. Tabatin 75 hende presente. Hopi di esnan ku a asistí a yora di alegria. Durante dedikashon di e Salon di Reino na òktober di e mesun aña ei, un ansiano di e kongregashon lokal a bisa: “E erupshon a kousa problema i sufrimentu. Pero e konstrukshon aki a transformá nos miedu den goso. Nos amor pa Yehova i pa nos rumannan kristian stimá a bira mas profundo!”

[Rekonosementu pa Potrèt na página 19]

Erupshon di volkan Usu: AP Photo/Koji Sasahara