Bo Por Vense Soledat

KEN por bisa ku nunka nan a sinti e sufrimentu ku soledat ta kousa? Tin hopi faktor ku por pone nos sinti nos so. Pero foral hende muhé ku no a kasa nunka òf ku ta biuda òf divorsiá, por sinti un soledat hopi intenso.

Por ehèmpel, un señora kristian yòn ku yama Frances ta konta: “Rònt dje tempu ku mi tabatin 23 aña, a parse ku tur mi amiganan a kasa, i mi a keda mi so.” * E sintimentu di soledat por bira mas fuerte segun ku añanan ta pasa i e chènsnan pa haña un kasá ta bira ménos. Sandra ku tin 40 i piku aña ta atmití: “Nunka tabata mi intenshon di keda soltera, i ainda si e oportunidat presentá, lo mi kasá.” Angela, kende tin 50 i piku aña ta deklará: “Mi no a disidí konsientemente di keda soltera, pero esei ta e realidat. Den e área kaminda mi a ser asigná komo pionero spesial tabatin masha tiki ruman hòmber soltero.”

Ta di elogiá ku hopi ruman muhé kristian ta skohe pa keda sin kasa pasobra nan kier kumpli lealmente ku e konseho di Yehova pa kasa “basta ta den Señor.” (1 Korintionan 7:39) Algun di nan ta adaptá nan mes bon na solteria, pero otronan ta sinti ku, segun añanan ta pasa, e deseo pa kasa i haña yu ta bira mas fuerte. Sandra ta konfesá: “Konstant mi ta sinti mi bashí emoshonalmente dor ku mi no tin un kasá.”

Otro faktornan, manera e tarea di kuida mayornan di edat, kisas ta hasi e sintimentu di soledat mas fuerte. Sandra ta bisa: “Dor ku mi no ta kasá, mi famia ta stèns riba mi pa kuida nos mayornan di edat. Pa 20 aña largu mi a karga mayor parti di e responsabilidat aki maske nos ta seis ruman. Bida lo tabata hopi mas fásil si mi tabatin un kasá ku lo a apoyá mi.”

Frances ta menshoná un otro faktor ku ta oumentá su soledat. E ta konta: “Tin hende ta puntra mi flèt: ‘Dikon bo no a kasa?’ E remarkenan ei ta laga mi sinti ku di un manera òf otro, ta mi falta ku mi ta soltera. Na kasi tur kasamentu ku mi bai, un hende ta hasi mi e pregunta ku mi tin masha miedu di dje: ‘Anto, ki dia abo ta kasa?’ I ami ta kuminsá pensa: ‘Si ruman hòmbernan spiritualmente fuerte no ta interesá den mi, kisas ta pasobra mi no tin e kualidatnan kristian nesesario òf gewoon nan no ta haña mi atraktivo.’”

Kon bo por vense sintimentunan di soledat? Si tin manera pa yuda, kon otronan por hasi esei?

Dependé Riba Yehova

E salmista a kanta: “Tira bo karga riba SEÑOR, i e lo sostené bo; nunka lo e no pèrmití  pa e hustu wòrdu moví.” (Salmo 55:22) E palabra pa “karga” den e teksto hebreo ta nifiká literalmente “porshon,” i e ta referí na sintimentunan di insiguridat i ansiedat ku nos por tin debí na nos sirkunstansia di bida. Yehova, mas ku ningun otro persona, ta konsiente di e karganan aki i e por duna nos e forsa nesesario pa trata ku nan. Dor di dependé riba Yehova Dios, Angela por a trata ku sintimentunan di soledat. Pa loke ta su ministerio di tempu kompleto, e ta kòrda: “Ora mi a kuminsá traha pionero, ami ku mi partner tabata biba hopi leu for dje kongregashon mas serka. Nos a siña dependé kompletamente riba Yehova, i e dependensia aki a yuda mi henter mi bida. Ora mi kuminsá bira pesimista, mi ta papia ku Yehova i e ta yuda mi. Salmo 23 semper a konsolá mi hopi, kada bes mi ta les’é.”

Apòstel Pablo tabatin ku soportá un karga remarkabel. Na por lo ménos tres okashon el ‘a roga Señor pa esaki por a kita for di dje.’ Dios no a yuda Pablo milagrosamente, pero sí Dios a primintié ku Su bondat inmeresí lo a sosten’é. (2 Korintionan 12:7-9) Tambe Pablo a deskubrí e sekreto pa keda kontentu. Despues el a skirbi: “Den tur sirkunstansia mi a siña e sekreto di ta barika yen i di pasa hamber, tantu di tin abundansia komo di pasa nesesidat. Tur kos mi por den [esun, NW], kende ta duna mi fortalesa.”—Filipensenan 4:12, 13.

Kon un persona por haña e forsa di Dios ora e ta sintié desanimá òf so? Pablo a skirbi: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprendementu, lo warda boso kurason i boso mente den Kristu Hesus.” (Filipensenan 4:6, 7) Sandra ta pone e konseho aki na práktika. E ta splika: “Dor ku mi ta soltera, mi ta pasa hopi tempu mi so. Esaki ta duna mi oportunidat amplio pa hasi orashon na Yehova. Mi ta sinti ku mi tin un relashon será kuné i mi por papia libremente kuné tokante mi problema i gosonan.” I Frances ta bisa: “Mi tin un lucha konstant ku sintimentunan negativo. Pero loke ta yuda mi masha hopi mes ta di kompartí mi sintimentunan frankamente ku Yehova. Mi ta konvensí ku Yehova ta interesá den tur loke ku por afektá mi bienestar spiritual i emoshonal.”—1 Timoteo 5:5.

“Kada un Karga Peso di Otro”

Den e hermandat kristian, un ruman no tin nodi karga su peso su so. Apòstel Pablo a urgi: “Kada un karga peso di otro, i asina kumpli ku e lei di Kristu.” (Galationan 6:2) Via nos asosiashon ku kompañeronan kristian, nos por haña “un bon palabra” di animashon ku por aliviá e karga di soledat.—Proverbionan 12:25.

Konsiderá tambe loke e Skritura ta bisa tokante e yu muhé dje hues di Israel, Yefte. Promé ku Yefte a vense e forsanan enemigu di Amon, el a primintí ku lo e duna Yehova e promé persona di su kas ku sali bin felisit’é. E persona aki a resultá di ta su yu muhé. (Huesnan 11:30, 31, 34-36) Ounke esaki a nifiká ku e yu muhé di Yefte lo mester a keda soltera i sakrifiká su deseo natural di tin un famia, el a someté su mes di buena gana na e voto di su tata i a sirbi den e santuario na Silo pa e restu di su bida. Hende a pasa por haltu di su sakrifisio? Al kontrario: “Tur aña e yu muhénan di Israel tabata bai pa rekordá yu muhé di Yefte e galadita pa kuater dia.” (Huesnan 11:40) Sí, palabranan di apresio i rekonosementu por animá esnan ku ta risibié. P’esei, laga nos no keda sin elogiá esnan ku meresé esei.

Tambe nos ta hasi bon di konsiderá e ehèmpel di Hesus. Maske no tabata un kustumber hudiu pa hende hòmber kòmbersá ku hende muhé, Hesus a dediká tempu na Maria ku Marta. Probablemente nan tabata sea biuda òf soltera. Hesus tabata kier  pa nan tur dos benefisiá spiritualmente di su amistat. (Lukas 10:38-42) Nos por imitá Hesus su ehèmpel dor di inkluí nos ruman muhénan spiritual ku ta soltera den aktividatnan sosial i dor di hasi areglo pa traha huntu ku nan den e trabou di prediká. (Romanonan 12:13) Nan ta apresiá e atenshon ei? Un ruman muhé a bisa: “Mi sa ku e rumannan ta stima mi i apresiá mi, pero mi ta keda mas kontentu ainda ora nan ta mustra interes personal den mi.”

Sandra ta splika: “Dor ku nos no tin un famia di nos mes, nos tin mas nesesidat pa hende stima nos, di sinti ku nos ta parti dje famia di rumannan spiritual.” Ta opvio ku Yehova ta interesá den rumannan soltera, i nos ta koperá kuné ora nos ta laga nan sinti ku nos ta apresiá nan i stima nan. (1 Pedro 5:6, 7) Yehova lo no keda sin tuma nota dje interes ku nos ta mustra den e rumannan aki, pasobra “esun ku tene miserikòrdia di un hende pober ta fia SEÑOR, i E [Yehova Dios] lo pagu’é bèk pa su bon obra.”—Proverbionan 19:17.

“Kada un Lo Karga Su Mes Karga”

Maske otronan por yuda, i nan apoyo ta masha animante, “kada un lo karga su mes karga.” (Galationan 6:5) Sin embargo, ora di karga e karga di soledat, nos tin ku tene kuidou ku sierto peligernan. Por ehèmpel, soledat lo por vense nos si nos hala sera emoshonalmente. Di otro banda, nos por vense soledat ku amor. (1 Korintionan 13:7, 8) Sin importá nos sirkunstansianan, e mihó manera pa haña felisidat ta dor di duna i kompartí. (Echonan 20:35) Un ruman muhé pionero ku ta traha duru ta bisa: “Mi no tin masha tempu pa para pensa ku mi ta mi so. Ora mi ta sinti ku mi ta útil i okupá, mi no ta sinti soledat.”

Tambe nos tin ku tene kuidou pa soledat no pone nos kuminsá un relashon imprudente. Por ehèmpel, ta masha tristu si nos laga e deseo pa kasa, stroba nos di mira e hopi problemanan ku kasa ku un persona ku no ta kreyente ta trese kuné i foral di mira e sabiduria di e konseho bíbliko pa evitá un yugo asina! (2 Korintionan 6:14) Un señora kristian divorsiá a bisa: “Tin un kos ku ta hopi mas pió ku ser soltera. Esei ta kasa ku e persona robes.”

Si un problema no tin solushon, anto kisas nos tin ku soport’é, a lo ménos tanten. Ku yudansa di Dios nos por soportá e sintimentu di soledat. Segun ku nos ta sigui sirbi Yehova, laga nos tene konfiansa ku lo yega un dia ku lo e satisfasé tur nos nesesidatnan den e mihó manera posibel.—Salmo 145:16.

[Nota]

[Plachinan na página 28]

Por vense soledat dor di duna i kompartí