Bon Liderato Ta un Reto Mundial

E hòmber tabata un eskritor i poëta. Su kurason tabata yen di speransa ku futuro lo trese kos bon pa tur hende. Un 90 aña pasá, el a imaginá un lugá “kaminda e mente no ta sinti miedu i hende ta kana kabes na haltu; kaminda konosementu ta grátis; kaminda barera nashonal no ta parti mundu na pida-pida; kaminda hende ta papia bèrdat; [i] kaminda hende dor di esfuerso vigoroso ta yega mas i mas serka di perfekshon.”

E ESKRITOR aki a ekspresá e speransa ku un dia su pais i tambe e restu di mundu lo bira un lugá asina. Si e poëta aki, ganadó di premio Nobel, tabata na bida awe, lo e tabata hopi desepshoná. Apesar di tur avanse i adelanto inesperá ku mundu a hasi, e ta mas dividí ku nunka. I en general hende ta mira futuro skur.

Ora nan a puntra un kunukero dikon violensia a estayá asina repentinamente entre fakshonnan den su pais, el a indiká loke na su opinion tabata un motibu. E di: “Ta debí na lidernan inkompetente.” Historiadó Jonathan Glover a ekspresá un punto di bista similar den su buki Humanity—A Moral History of the Twentieth Century (Humanidat—Un Historia di Moralidat di Siglo 20), bisando: “E genosidio [den e mesun pais ei] no tabata un erupshon spontáneo di odio entre tribunan, e tabata algu planeá dor di hende ku kier a keda na poder.”

 Ora guera a start entre dos repúblika di eks-Yugoslavia, na prinsipio di añanan ’90 di siglo 20, un reportera a skirbi: “Nos tabata biba felismente huntu pa hopi aña i awor a para bira ku nos ta mata beibi di otro. Ta kiko ta pasando ku nos?”

Míles di kilometer for di Europa nos ta haña India, pais natal di e poëta menshoná na prinsipio. Den un charla titulá “India Por Sobrebibí Komo un Solo Nashon?,” outor Pranay Gupte a remarká: ‘Un 70 porshento di India su inmenso poblashon ta bou di 30 aña di edat, pero no tin lider pa sirbi komo nan role model, un ehèmpel digno pa nan imitá.’

Den algun pais, lidernan tabatin ku baha for di nan puesto debí na akusashonnan di korupshon. Pues, tin vários motibu, pakiko mundu evidentemente ta pasando dor di un krísis pa haña bon lider. E estado di e mundu aki ta duna prueba ku loke un profeta ku a biba un 2.600 aña pasá a bisa ta bèrdat. El a bisa: “E kaminda di hende no ta di dje mes; tampoko no ta keda na hende pa dirigí su pasonan.”—Yeremías 10:23.

Tin un solushon pa e angustia mundial ku tin awor akí? Ken por dirigí humanidat na un mundu kaminda sosiedat humano no ta ser asotá pa konflikto ni no ta yen di miedu? Kaminda berdadero konosementu ta grátis i na abundansia, i kaminda hende ta rumbo pa perfekshon?

[Rekonosementu pa Potrèt na página 3]

Fatmir Boshnjaku