E Echo Ku Kristu Ta Nos Lider Ta un Realidat pa Bo?

“Tampoko sea yamá ‘lider,’ pasobra un so ta boso Lider, e Kristu.”—MATEO 23:10, NW.

1. Ken ta e úniko Lider di kristiannan berdadero?

TABATA djamars, 11 di nísan. Tres dia despues nan lo a mata Hesukristu. Esaki tabata su último bishita na e tèmpel. Riba e dia aki, Hesus a siña e multitut presente i su disipelnan algu importante. El a bisa: “No laga hende yama boso Rabi, pasobra un so ta boso maestro, miéntras ku boso tur ta ruman. Ademas, no yama ningun hende boso tata riba tera, pasobra un so ta boso Tata, Esun selestial. Tampoko sea yamá ‘lider,’ pasobra un so ta boso Lider, e Kristu.” (Mateo 23:8-10, NW) Klaramente, Hesukristu ta e Lider di kristiannan berdadero.

2, 3. Ki efekto skucha Yehova i aseptá e Lider ku el a nombra por tin riba nos bida?

² Hesus su liderato tin efekto masha probechoso riba nos bida ora nos asept’é! Profetisando e binida di e Lider aki, Yehova Dios a deklará via profeta Isaías: “Bin, tur esnan ku tin set, bin na e awanan; i boso ku no tin plaka, bin kumpra i kome. Bin kumpra biña i lechi sin plaka i sin preis. . . . Skucha mi bon i kome loke ta bon, i laga boso alma gosa den abundansia. . . . Mira, mi a hasié un testigu pa e pueblonan, un lider i komandante pa e pueblonan.”—Isaías 55:1-4.

³ Isaías a usa líkidonan komun—awa, lechi i biña—pa ilustrá ki efekto skucha Yehova i sigui e Lider i Komandante ku el a duna nos, por tin riba nos bida. E resultado ta refreskante, manera ora nos bebe un glas di awa friu riba un dia kayente. E ta kalma nos set pa bèrdat i hustisia. Meskos ku lechi ta hasi beibi fuerte i ta yuda nan krese, asina tambe ‘e lechi di e palabra’ ta hasi nos fuerte i ta yuda nos krese spiritualmente den nos relashon ku Dios. (1 Pedro 2:1-3) I ken por nenga ku biña ta duna goso na okashonnan festivo? Di igual manera, adorá e Dios berdadero i sigui e pasonan di su Lider nombrá ta duna nos un bida “berdaderamente yen di goso.” (Deuteronomio 16:15) Pues anto, ta vital pa nos tur—hóben i bieu, hòmber i muhé—mustra ku pa nos ta un realidat ku Kristu ta nos Lider. Pero kon nos por demostrá den nos bida diario ku e Mesías ta nos Lider?

Hóbennan—Sigui “Krese den Sabiduria”

4. (a) Kiko a tuma lugá ora Hesus tabatin 12 aña i a bishitá Yerusalèm durante Pasku hudiu? (b) Kon bon informá Hesus tabata ora e tabatin apénas 12 aña?

⁴ Konsiderá e ehèmpel ku nos Lider a pone pa hóbennan. Ounke nos no sa mashá di Hesus su infansia, nos sa di un suseso hopi revelador. Ora Hesus tabatin 12 aña, su mayornan a bai Yerusalèm kuné pa nan bishita anual di Pasku hudiu. Na e okashon ei Hesus tabata asina apsorbá den un kòmbersashon bíbliko, ku su famia a bai lagu’é sin ku nan a ripará. Tres dia despues su mayornan tur preokupá, Hosé ku Maria, a hañ’é den tèmpel, “sintá meimei di e siñadónan, ta skucha nan i ta hasi nan pregunta.” Ademas, “tur esnan ku a tend’é a keda strañá di su komprendementu i su kontestanan.” Imaginá bo, ku apénas 12 aña, Hesus no solamente por a hasi pregunta ku ta stimulá pensamentu  serio i basá riba kosnan spiritual, sino tambe e por a duna kontesta sabí! Sin duda, ta e entrenamentu di su mayornan a yud’é.—Lukas 2:41-50.

5. Kon hóbennan por evaluá nan aktitut pa ku e studio di Beibel di famia?

⁵ Kisas abo ta un hóben. Si bo mayornan ta fiel sirbidó di Dios, boso probablemente tin un programa regular di studio di Beibel komo famia. Ki aktitut bo tin pa ku e studio di famia? Ta bon pa bo pensa seriamente riba e siguiente preguntanan: ‘Mi ta apoyá ku entusiasmo e areglo di studio di Beibel den mi famia? Mi ta koperá kuné, i no ta hasi nada pa stroba e rutina?’ (Filipensenan 3:16, NW) ‘Mi ta partisipá aktivamente den e studio? Ora ta apropiado, mi ta hasi pregunta relashoná ku e informashon di e studio i ta komentá riba kon e ta apliká? Segun ku mi ta hasi progreso spiritual, mi ta kultivá un smak pa “kuminda sólido [ku] ta pa hende madurá”?’—Hebreonan 5:13, 14.

6, 7. Di ki balor un programa di lesa Beibel tur dia por ta pa hóbennan?

⁶ Tambe ta bon pa bo tin un programa pa lesa Beibel tur dia. E salmista a kanta: “Bendishoná ta e hende ku no ta kana den e konseho di malbadonan, . . . ma su delisia ta den e lei di SEÑOR, i den Su lei e ta meditá di dia i anochi.” (Salmo 1:1, 2) Hosué, e susesor di Moises, ‘a meditá den e buki di lei, di dia i anochi.’ Esaki a yud’é aktua sabí i a pone ku e tabatin éksito den kumpli ku e asignashon ku Dios a dun’é. (Hosué 1:8) Nos Lider Hesukristu a bisa: “Ta pará skirbí: ‘Hende lo no biba di pan so, ma di tur palabra ku ta sali for di boka di Dios.’” (Mateo 4:4) Si nos tin mester di kuminda físiko tur dia, anto nos tin hopi mas mester di kuminda spiritual riba un base regular!

⁷ Realisando ku e tin un nesesidat spiritual, Nicole di 13 aña a kuminsá lesa Beibel tur dia. * Awor, na edat di 16 aña, el a lesa henter e Beibel un biaha i e falta mitar p’e les’é kompleto pa di dos biaha. Su método ta simpel. E ta bisa: “Mi ta hasi sigur di lesa por lo ménos un kapítulo pa dia.” Kon su lesamentu di Beibel tur dia a yud’é? E ta kontestá: “Awe tin masha hopi mal influensia. Tur dia mi ta haña mi ku preshon na skol i otro kaminda; preshonnan ku ta bai kontra mi fe. Dor ku mi ta lesa Beibel tur dia, esei ta yuda mi kòrda lihé riba prinsipio i mandamentunan bíbliko ku ta animá mi pa resistí e preshonnan aki. Komo resultado, mi ta sinti mi mas pegá ku Yehova i Hesus.”

8. Ki kustumber Hesus tabatin relashoná ku snoa, i kon hóbennan por imit’é?

 ⁸ Hesus tabatin e kustumber di skucha i partisipá den lesamentu di e Skritura na snoa. (Lukas 4:16; Echonan 15:21) Ta bon pa hóbennan sigui e ehèmpel ei dor di asistí regularmente na reunionnan kristian, kaminda nos ta lesa i studia Beibel! Richard di 14 aña a ekspresá apresio pa e reunionnan ei, bisando: “E reunionnan tin hopi balor pa mi. Einan mi ta ser rekordá konstantemente di loke ta bon i malu, loke ta moral i inmoral, kiko ta kuadra ku e personalidat di Kristu i kiko nò. Mi no tin nodi haña sa e kosnan ei dor di eksperensia amargo.” Sí, “e testimonio di SEÑOR ta fiel, e ta hasi hende simpel bira sabí.” (Salmo 19:7) Nicole tambe ta hasi esfuerso pa asistí na tur sinku reunion di kongregashon tur siman. Tambe e ta dediká dos pa tres ora preparando pa reunion.—Efesionan 5:15, 16.

9. Kon hóbennan por sigui “krese den sabiduria”?

⁹ Ora bo ta yòn, ta un bon tempu pa siña ‘konosé e úniko Dios berdadero, i Hesukristu, kende el a manda.’ (Huan 17:3) Podisé bo sa di hóbennan ku ta dediká hopi tempu na lesa ‘comics,’ wak televishon, hunga weganan di vidio òf sùrf riba Internet. Pakiko lo bo imitá nan si bo por sigui e ehèmpel perfekto di nos Lider? Na mucha, el a gusta siña mas tokante Yehova. I ku ki resultado? Debí na su amor pa kosnan spiritual, “Hesus tabata krese den sabiduria.” (Lukas 2:52) Bo tambe por.

“Sea Sumiso na Otro”

10. Kiko lo yuda bida di famia ser un fuente di pas i felisidat?

¹⁰ Nos kas por ta un refugio di pas i kontentamentu òf un kampo di bataya kaminda tin konflikto i pleitu. (Proverbionan 21:19; 26:21) Aseptá Kristu komo nos Lider ta yuda oumentá pas i felisidat den famia. De echo, Hesus su ehèmpel ta e modelo pa relashonnan den famia. E Skritura ta bisa: “Sea sumiso na otro den e temor di Kristu. Esposanan, sea sumiso na boso mes esposo, manera na Señor. Pasobra e esposo ta kabes di e esposa, meskos ku Kristu tambe ta kabes di e iglesia, e mes siendo salbador di e kurpa. . . . Esposonan, stima boso esposa, meskos ku Kristu tambe a stima e iglesia i a entregá su mes p’e.” (Efesionan 5:21-25) Pablo a skirbi e kongregashon na Kolósas: “Yunan, sea obedesidu na boso mayornan den tur kos, pasobra esaki ta agradabel na Señor.”—Kolosensenan 3:18-20.

11. Kon un esposo por mustra ku realmente e ta mira Kristu komo su Lider?

¹¹ Si e famia sigui e konseho aki, esei kier men ku e esposo ta hiba delantera den famia, su esposa ta yud’é fielmente, i e yunan ta obedesé nan mayornan. Sin embargo, e hòmber su papel komo kabes ta resultá den felisidat solamente ora e kumpli kuné apropiadamente. Un esposo sabí tin ku siña aktua komo kabes dor di imitá su propio Kabes i Lider, Kristu Hesus. (1 Korintionan 11:3) Maske despues Hesus a bira “kabes riba tur kos na e iglesia,” ora el a bini na tera e “no a bin pa wòrdu sirbí, ma pa sirbi.” (Efesionan 1:22; Mateo 20:28) Den un manera  similar, un esposo kristian ta aktua komo kabes, no pa probecho egoista, sino pa atendé e interesnan di su kasá i yunan—sí, di henter e famia. (1 Korintionan 13:4, 5) E ta trata na imitá e kualidatnan ku su kabes, Hesukristu, a desplegá; kualidatnan ku ta agradá Dios. Meskos ku Hesus, e esposo ta mansu i di kurason humilde. (Mateo 11:28-30) Ora e ta robes, no ta difísil p’e bisa palabranan manera “dispensá mi” òf “bo tin rason.” Su ehèmpel ekselente ta hasi ku ta mas fásil pa su esposa ta un ‘yudadó ku ta pas kuné,’ i un “kompañera” p’e, ku ta siña for di dje i ta traha lado a lado kuné.—Génesis 2:20; Malakías 2:14.

12. Kiko lo yuda un esposa aseptá e areglo ku hòmber ta kabes?

¹² E esposa, di su parti, mester ta sumiso na su esposo. Sin embargo, si e aktitut di mundu a afektá e esposa, esei por kuminsá kambia su opinion di e areglo ku hòmber ta kabes, i e esposa lo no gusta e idea di ta sumiso na un hòmber. E Skritura no ta sugerí ku hòmber mester ta dominante, pero sí e ta rekerí pa esposa ta sumiso na nan esposo. (Efesionan 5:24) Tambe Beibel ta tene e esposo òf tata responsabel pa e famia, i ora nan apliká Beibel su konseho, esaki ta kontribuí na pas i òrdu den e famia.—Filipensenan 2:5.

13. Ki ehèmpel di sumishon Hesus a pone pa yunan?

¹³ Yunan mester ta obedesidu na nan mayornan. Hesus a pone un ekselente ehèmpel relashoná ku esaki. Despues di loke a pasa na e tèmpel ora Hesus tabatin 12 aña i el a keda atras tres dia, “el a bai ku [su mayornan] i a yega Názarèt; i el a keda sometí na nan.” (Lukas 2:51) Ora yu ta sumiso na nan mayornan esei ta yuda oumentá pas i armonia den e famia. Ora tur hende den kas ta aseptá Kristu komo e Lider, e resultado ta un famia felis.

14, 15. Kiko lo yuda nos tin éksito ora nos ta konfrontá situashonnan difísil na kas? Duna un ehèmpel.

¹⁴ Asta ora situashonnan difísil surgi den kas, e klave pa éksito ta: imitá Hesus i aseptá su guia. Por ehèmpel, ora Jerry di 35 aña a kasa ku Lana, mama di un yu muhé tiner, esei a krea un problema ku niun di nan dos no a imaginá. Jerry ta splika: “Mi tabata sa ku pa mi ta un bon kabes di kas, mi tabatin ku apliká e mesun prinsipionan bíbliko ku ta duna éksito den otro famia. Pero pronto mi a deskubrí ku mi tabatin ku apliká nan ku mas sabiduria i komprendementu.” Su yu muhé di kriansa a konsider’é komo e persona ku a alehá su mama for di dje i no tabatin lei kuné. Jerry tabatin mester di komprendementu penetrante pa mira ku e aktitut aki a afektá loke e mucha tabata bisa i hasi. Kon el a atendé e situashon? Jerry ta kontestá: “Ami ku Lana a palabrá ku por lo ménos pa awor akí, Lana lo a sòru pa loke ta e aspekto di duna disiplina miéntras ku ami a konsentrá riba desaroyá un bon relashon ku mi yu muhé di kriansa. Ku tempu, esaki a duna bon resultado.”

¹⁵ Ora nos ta konfrontá situashonnan difísil na kas, nos mester di komprendementu penetrante pa saka afó dikon miembronan di famia ta papia i aktua na un sierto manera. Tambe nos mester di sabiduria pa apliká Dios su prinsipionan debidamente. Por ehèmpel, Hesus a distinguí bon kla e motibu pakiko e muhé ku tabata sufri di un derame di sanger a mishi kuné, i p’esei el a trat’é ku kompashon i na un manera sabí. (Levítiko 15:25-27; Marko 5:30-34) Sabiduria i komprendementu penetrante ta karakterístikanan di nos Lider. (Proverbionan 8:12) Nos lo ta felis si nos aktua manera é lo a aktua.

Sigui “Buska Promé e Reino”

16. Kiko mester okupá e lugá sentral den nos bida, i kon Hesus su ehèmpel a mustra esaki?

¹⁶ Hesus a mustra bon kla kiko mester okupá e lugá sentral den bida di esnan ku asept’é komo Lider. El a bisa: “Ma buska promé e reino di Dios i Su hustisia, i tur e kosnan aki lo  wòrdu añadí na boso.” (Mateo 6:33) I ku su ehèmpel, el a mustra nos kon pa hasi esaki. Despues ku Hesus a batisá, el a pasa 40 dia na yuna, meditando i hasiendo orashon. Na fin di e periodo ei, el a hañ’é ku un tentashon. Satanas e Diabel a ofres’é gobernashon riba “tur e reinonan di mundu.” Imaginá bo e bida ku Hesus por tabatin si el a aseptá Diabel su oferta! Sin embargo, Kristu tabata konsentrá riba hasi e boluntat di su Tata. Tambe el a realisá ku un bida asina den e mundu di Satanas lo no a dura mashá. Mesora el a rechasá Diabel su oferta, bisando: “Ta pará skirbí: ‘Adorá SEÑOR bo Dios, i sirbi e so.’” Djis despues, Hesus “a kuminsá prediká i bisa: ‘Repentí, pasobra e reino di shelu ta serka.’” (Mateo 4:2, 8-10, 17) Pa e restu di su bida riba tera, Kristu tabata un proklamadó di tempu kompleto di e Reino di Dios.

17. Kon nos por mustra ku asuntunan relashoná ku e Reino ta na promé lugá den nos bida?

¹⁷ Nos ta hasi bon di imitá nos Lider i no pèrmití e mundu di Satanas tenta nos pa hasi un karera i empleo ku ta paga bon, nos meta prinsipal den bida. (Marko 1:17-21) Si nos bira asina enbolbí den e trampa di aktividatnan mundano te ku asuntunan relashoná ku e Reino ta bai na di dos lugá, esei lo ta un bobedat. Hesus a konfia nos ku e trabou di prediká e Reino i hasi disipel. (Mateo 24:14; 28:19, 20) Sí, kisas nos tin un famia òf otro responsabilidatnan ku nos tin ku atendé, pero nos no ta kontentu di por usa oranan djanochi i wikènt pa kumpli ku nos responsabilidat kristian di prediká i siña hende? I ta ki un animashon ku durante e aña di sirbishi 2001, un 780.000 ruman por a sirbi komo minister di tempu kompleto, òf pionero!

18. Kiko ta yuda nos haña goso den sirbishi?

¹⁸ E relatonan di Evangelio ta deskribí Hesus komo un hòmber di akshon i tambe komo un persona ku tabatin sintimentu tierno. Ora el a mira e nesesidat spiritual di e hendenan rònt di dje, el a sinti kompashon pa nan i ansiosamente el a ofresé nan yudansa. (Marko 6:31-34) Nos sirbishi ta bira gososo ora nos motivashon pa partisipá den dje ta amor pa otro hende i un deseo sinsero pa yuda nan. Pero kon nos por desaroyá e deseo ei? Un yònkuman ku yama Jayson ta bisa: “Tempu mi tabata tiner, mi no tabata gusta sirbishi mashá.” Kiko a yud’é kultivá amor pa e trabou aki? Jayson ta kontestá: “Den mi  famia, tur djasabra mainta tabata pa sali den sirbishi di fèlt. Esaki tabata bon pa mi, pasobra mas mi a sali den sirbishi, mas mi a mira e bon ku esei a logra i mas mi a disfrutá di dje.” Nos tambe mester partisipá regularmente i diligentemente den sirbishi.

19. Kiko mester ta nos determinashon relashoná ku Kristu su liderato?

¹⁹ En bèrdat ta refreskante i rekompensador pa aseptá Kristu komo nos Lider. Ora nos hasi esei, nos hubentut ta bira un tempu pa krese den konosementu i sabiduria. Bida di famia ta bira un fuente di pas i felisidat, i sirbishi ta bira un aktividat ku ta duna goso i satisfakshon. Pues anto, laga nos ta determiná pa mustra den nos bida diario i na e desishonnan ku nos ta tuma, ku pa nos ta un realidat ku Kristu ta nos Lider. (Kolosensenan 3:23, 24) Sin embargo, Hesukristu ta nos Lider via e kongregashon kristian tambe. E siguiente artíkulo lo mustra kon nos por benefisiá di e areglo aki.

[Nota]

Bo Ta Kòrda?

• Kon nos ta benefisiá si nos sigui nos Lider ku Dios a nombra?

• Kon hóbennan por mustra ku nan kier sigui Hesus komo nan Lider?

• Ki efekto Kristu su liderato tin riba bida di famia di esnan ku someté na dje?

• Kon nos sirbishi por mustra ku en realidat nos ta mira Kristu komo nos Lider?

[Preguntanan di Estudio]

[Plachinan na página 9]

Ora bo ta yòn, ta un bon tempu pa siña konosé Dios i nos Lider nombrá

[Plachi na página 10]

Sumishon na Kristu komo nos Lider ta promové felisidat den famia

[Plachi na página 12]

Hesus a buska e Reino promé. Abo tambe?