Kristu Ta Dirigí Su Kongregashon

“Mira, mi ta ku boso semper, te na fin di mundu.”—MATEO 28:20.

1, 2. (a) Ora Hesus resusitá a duna e mandamentu pa hasi disipel, kiko el a primintí su siguidónan? (b) Kon Hesus a dirigí e promé kongregashon kristian aktivamente?

PROMÉ ku nos Lider resusitá, Hesukristu, a subi na shelu, el a aparesé na su disipelnan i a bisa: “Tur outoridat a wòrdu duná na mi den shelu i riba tera. P’esei, bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso; i mira, mi ta ku boso semper, te na fin di mundu.”—Mateo 23:10, NW; 28:18-20.

² Hesus no solamente a asigná su disipelnan pa hasi un trabou ku lo a salba bida, esta, di hasi mas disipel, sino tambe a primintí ku lo e ta ku nan. E historia di e komienso di kristianismo, manera e ta pará skirbí den e buki bíbliko di Echonan, ta mustra fuera di tur duda ku Kristu a usa e outoridat ku el a risibí pa dirigí e kongregashon resien formá. El a manda e “konsoladó” primintí—e spiritu santu—pa fortalesé su siguidónan i pa guia nan esfuerso. (Huan 16:7; Echonan 2:4, 33; 13:2-4; 16:6-10) Hesus resusitá a usa angel ku e tabatin bou di su mando pa apoyá su disipelnan. (Echonan 5:19; 8:26; 10:3-8, 22; 12:7-11; 27:23, 24; 1 Pedro 3:22) Ademas, nos Lider a perkurá guia pa e kongregashon dor di hasi areglo pa hòmbernan kapasitá sirbi komo un kuerpo gobernante.—Echonan 1:20, 24-26; 6:1-6; 8:5, 14-17.

3. Ki preguntanan lo ser tratá den e artíkulo aki?

³ Pero, kiko di nos tempu, “e fin di mundu,” esta, e konklushon di e sistema di kosnan aki? Kon Hesukristu ta dirigí e kongregashon kristian awe? I kon nos por mustra ku nos ta asept’é komo nos Lider?

E Shon Tin un Esklabo Fiel

4. (a) Ken ta forma “e esklabo fiel i prudente”? (b) Kiko e Shon a enkargá e esklabo kuné?

⁴ Ora Hesus tabata duna e profesia tokante e señal di su presensia, el a bisa: “Ken anto  ta e esklabo fiel i prudente ku su shon a laga enkargá ku su kas pa duna nan nan kuminda na su debido tempu? Bendishoná ta e esklabo ei, ku su shon ta haña ta hasi asina ora ku e bin. Di bèrdat mi ta bisa boso ku e lo lagu’é keda na enkargo di tur su propiedatnan.” (Mateo 24:45-47) E “shon” ta nos Lider, Hesukristu, i el a nombra “e esklabo fiel i prudente”—e kuerpo di kristiannan ungí riba tera—pa atendé tur su asuntunan relashoná ku e tera.

5, 6. (a) Kiko “e shete kandelánan di oro” i “e shete streanan” ku apòstel Huan a mira den vishon, ta representá? (b) E echo ku “e shete streanan” ta den Hesus su man drechi ta indiká kiko?

⁵ E buki bíbliko di Revelashon ta mustra ku e esklabo fiel i prudente ta kai direktamente bou di Hesukristu su kòntròl. Den un vishon di “e dia di Señor,” apòstel Huan a mira “shete kandelá di oro, i meimei di e kandelánan un [persona] manera e yu di hende” ku ‘den su man drechi tabatin shete strea.’ Splikando Huan e vishon, Hesus a bisa: “Pa loke ta e misterio di e shete streanan ku bo a mira den mi man drechi, i e shete kandelánan di oro: e shete streanan ta e angelnan di e shete iglesianan, i e shete kandelánan ta e shete iglesianan.”—Revelashon 1:1, 10-20.

⁶ “E shete kandelánan di oro” ta representá tur e berdadero kongregashonnan kristian ku ta eksistí den “e dia di Señor,” ku a kuminsá na aña 1914. Kiko di “e shete streanan”? Na promé instante, nan a simbolisá tur superintendente ungí i engendrá pa spiritu ku tabata kuida e kongregashonnan di promé siglo. * E superintendentenan tabata den Hesus su man drechi, pues bou di su kòntròl i guia. Sí, Kristu Hesus a dirigí e grupo esklabo. Sin embargo, awe tin masha tiki superintendente ungí. Kon Kristu su liderato ta ekstendé na e mas di 93.000 kongregashonnan di Testigunan di Yehova rònt mundu?

7. (a) Kon Hesus ta usa e Kuerpo Gobernante pa perkurá liderato na e kongregashonnan rònt mundu? (b) Dikon nos por bisa ku ta spiritu santu ta nombra superintendentenan kristian?

⁷ Meskos ku den promé siglo, awe un grupo chikí di hòmber kapasitá for di entre e superintendentenan ungí ta sirbi komo Kuerpo Gobernante, i ta representá e grupo dje esklabo fiel i prudente. Nos Lider ta usa e Kuerpo Gobernante aki pa nombra hòmbernan kapasitá—sea ungí òf nò—komo ansiano den e kongregashonnan lokal. E spiritu santu ku Hesus ta usa ku outoridat di Yehova ta hunga un papel hopi importante den e proseso aki. (Echonan 2:32, 33) Promé ku tur kos, e superintendentenan aki mester ta kumpli ku e rekisitonan deskribí den e Palabra di Dios, ku spiritu santu a inspirá. (1 Timoteo 3:1-7; Tito 1:5-9; 2 Pedro 1:20, 21) Rekomendashon i nombramentu di ansiano ta tuma lugá despues di hasi orashon, i bou di guia di spiritu santu. Ademas, e personanan nombrá ta duna evidensia di ta produsí fruta di e spiritu ei. (Galationan 5:22, 23) P’esei Pablo su konseho ta apliká meskos pa tur ansiano, sea ungí òf nò: “Perkurá pa boso mes i pa henter e tou, meimei di kual spiritu santu a pone boso komo wardadó.” (Echonan 20:28) E hòmbernan nombrá aki ta risibí instrukshon for di e Kuerpo Gobernante i boluntariamente ta pastoriá e kongregashon. Den e manera aki, Kristu ta huntu ku nos awor i ta dirigí e kongregashon aktivamente.

8. Kon Kristu ta usa angel pa dirigí su siguidónan?

⁸ Tambe Hesus ta usa e angelnan mes pa dirigí su siguidónan awe. Segun e komparashon di e trigu i yerba shimaron, tempu di kosecha lo a yega na “e fin di mundu,” esta, na konklushon di e sistema aki. Ken e Shon lo a usa pa hasi e trabou di kosecha? “E kosechadónan  ta angelnan,” Kristu a bisa. El a agregá: “E Yu di hende lo manda su angelnan, i nan lo rekohé for di su reino tur piedra di trompeká, i esnan ku ta hasi inikidat.” (Mateo 13:37-41) I meskos ku un angel a dirigí Felipe na e eunuko di Etiopia, asina tambe tin hopi evidensia awe ku Kristu ta usa su angelnan pa dirigí e trabou ku kristiannan berdadero ta hasi pa lokalisá hende di kurason sinsero.—Echonan 8:26, 27; Revelashon 14:6.

9. (a) Ki medionan Kristu ta usa pa dirigí e kongregashon kristian awe? (b) Ki pregunta nos tin ku konsiderá si nos kier benefisiá di Kristu su liderato?

⁹ Ta masha alentador pa sa ku Hesukristu ta perkurá liderato pa su disipelnan awe via e Kuerpo Gobernante, e spiritu santu i e angelnan! Asta si algun adoradó di Yehova keda isolá temporalmente for di e Kuerpo Gobernante debí na persekushon òf kosnan similar, tòg Kristu lo sigui dirigí nan via e spiritu santu i e sosten di e angelnan. Sin embargo, nos ta benefisiá di su liderato solamente ora nos ta asept’é. Kon nos por mustra ku nos ta aseptá Kristu komo nos Lider?

“Sea Obediente . . . Sea Sumiso”

10. Kon nos por mustra rèspèt pa e ansianonan nombrá den kongregashon?

¹⁰ Nos Lider a duna e kongregashonnan “donnan den hende”—“algun komo evangelisadó, algun komo wardadó i maestro.” (Efesionan 4:8, 11, 12, NW) Nos aktitut i akshon pa ku nan ta revelá bon kla si nos ta aseptá Kristu su liderato. Ta na su lugá pa nos ta “gradisidu” pa e hòmbernan spiritualmente kapasitá ku Kristu a duna. (Kolosensenan 3:15) Tambe nan meresé nos rèspèt. “Laga e ansianonan ku ta goberná bon wòrdu konsiderá digno di dòbel onor,” apòstel Pablo a skirbi. (1 Timoteo 5:17) Kon nos por desplegá nos gratitut i rèspèt pa e ansianonan—òf superintendentenan—den kongregashon? Pablo ta kontestá: “Sea obediente na esnan ku ta hiba delantera den boso i sea sumiso.” (Hebreonan 13:17, NW) Sí, nos tin ku obedesé nan i someté nos mes na nan.

11. Dikon nos mester respetá e areglo di ansiano si nos kier aktua di akuerdo ku nos boutismo?

¹¹ Nos Lider ta perfekto. E hòmbernan ku el a duna komo don, no ta perfekto. P’esei tin biaha nan por faya. Sin embargo, ta vital pa nos keda fiel na e areglo di Kristu. De echo, nos ta aktua di akuerdo ku nos dedikashon i boutismo ora nos ta rekonosé ku e outoridat nombrá pa spiritu ku tin den kongregashon ta legítimo, i ta someté nos mes na dje di buena gana. Nos boutismo ‘den nòmber di e spiritu santu’ ta un deklarashon públiko ku nos sa kiko e spiritu santu ta i ku nos ta rekonosé e papel ku e ta hunga den Yehova su propósito. (Mateo 28:19) Nos boutismo ta indiká ku nos ta koperá ku e spiritu i ta evitá kualkier kos ku por strob’é di funshoná entre e siguidónan di Kristu. Siendo ku e spiritu santu ta hunga un papel vital den rekomendá i nombra ansiano, kon nos por ta fiel na nos dedikashon si nos no ta koperá ku e areglo di ansiano den kongregashon?

12. Ki ehèmpelnan di falta di rèspèt pa outoridat Hudas ta sita, i kiko nan ta siña nos?

 ¹² E Skritura tin ehèmpelnan ku ta siña nos e balor di obedensia i sumishon. Refiriendo na esnan ku a papia malu di hòmbernan nombrá den kongregashon, disipel Hudas a señalá tres ehèmpel di atvertensia, bisando: “Ai di nan! Pasobra nan a sigui e kaminda di Kain, i pa ganashi nan a kore bai den e eror di Balam, i a peresé den e rebelion di Kore.” (Hudas 11) Kain a ignorá Yehova su konseho amoroso i deliberadamente a sigui un proseder di odio asesino. (Génesis 4:4-8) Apesar ku Balam a risibí vários atvertensia divino, el a purba maldishoná e pueblo di Dios a kambio di ganashi finansiero. (Numbernan 22:5-28, 32-34; Deuteronomio 23:5) Kore tabatin su propio puesto di onor den Dios su pueblo Israel, pero esei no tabata basta p’e. El a fomentá rebelion kontra Dios su sirbidó Moises, e hòmber mas humilde riba tera. (Numbernan 12:3; 16:1-3, 32, 33) Kalamidat a bini riba Kain, Balam i Kore. Den un manera bibu, e ehèmpelnan aki ta siña nos skucha konseho di esnan ku Yehova ta usa den puesto di responsabilidat i respetá nan!

13. Ki benefisionan Isaías a profetisá pa esnan ku someté nan mes na e areglo di ansiano?

¹³ Ken lo no kier benefisiá di e magnífiko areglo di supervishon ku nos Lider a instituí den e kongregashon kristian? Isaías a profetisá di e benefisionan di e areglo aki, bisando: “Mira, un rei lo reina ku hustisia, i prensnan lo goberná ku huisio. Kada un lo ta manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.” (Isaías 32:1, 2) Kada ansiano mester ta “un refugio” di protekshon i siguridat. Asta si ta difísil pa nos someté nos mes na  outoridat, laga nos hasi nos bèst huntu ku orashon pa nos ta obediente i sumiso na e outoridat ku Dios a nombra den kongregashon.

Kon Ansianonan Ta Someté Nan Mes na Kristu Su Liderato

14, 15. Kon esnan ku ta hiba delantera den kongregashon ta mustra ku nan ta someté nan mes na Kristu su liderato?

¹⁴ Tur kristian, i ansianonan mas ku tur, tin ku sigui Kristu su liderato. E superintendentenan, òf ansianonan, tin un sierto grado di outoridat den e kongregashon. Pero nan no ta buska pa ‘tin dominio riba fe di nan kompañeronan di kreensia’ dor di kontrolá nan bida. (2 Korintionan 1:24) E ansianonan ta tuma na pechu e palabranan aki di Hesus: “Boso sa ku e gobernantenan di e paganonan tin dominio riba nan, i nan shon grandinan ta ehersé outoridat riba nan. Entre boso no ta asina.” (Mateo 20:25-27) Segun ku ansianonan ta kumpli ku nan responsabilidat, nan ta purba sinseramente di sirbi otro hende.

¹⁵ Beibel ta urgi kristiannan: “Kòrda riba esnan ku a guia boso, . . . i konsiderando e resultado di nan kondukta, imitá nan fe.” (Hebreonan 13:7) Nos tin ku imitá e ansianonan, pero no pasobra nan ta lider. Hesus a bisa: “Un so ta boso Lider, e Kristu.” (Mateo 23:10, NW) Loke nos tin ku imitá ta e fe di e ansianonan, pasobra nan ta imitá nos berdadero Lider, Kristu. (1 Korintionan 11:1) Konsiderá algun manera ku ansianonan ta hasi esfuerso pa ta manera Kristu den nan relashon ku otro hende den kongregashon.

16. Apesar di e outoridat ku Hesus tabatin, kon el a trata su siguidónan?

¹⁶ Den tur kos Kristu tabata superior ku hende imperfekto, i e tabatin outoridat sin igual ku su Tata a dun’é. Pero tòg e tabata modesto den su trato ku su disipelnan. E no a hoga nan ku un despliegue impreshonante di konosementu. Hesus a mustra sintimentu i kompashon pa su siguidónan, i a tene kuenta ku nan nesesidatnan. (Mateo 15:32; 26:40, 41; Marko 6:31) Nunka el a eksigí di su disipelnan mas di loke nan por a duna, ni nunka el a pone mas karga riba nan di loke nan por a wanta. (Huan 16:12) Hesus tabata “mansu i humilde di kurason.” P’esei no ta un sorpresa ku hopi hende a hañ’é un persona refreskante.—Mateo 11:28-30.

17. Kon ansianonan mester demostrá modestia den nan relashon ku otro hende den kongregashon?

¹⁷ Si Kristu e Lider mes a demostrá modestia, anto esnan ku ta hiba delantera den e kongregashon mester hasi esei mas ainda! Sí, nan ta tene kuidou pa nan no hasi mal uso di e outoridat konfiá na nan. I nan no ta “bini ku palabra grandi,” pa purba impreshoná otro hende. (1 Korintionan 2:1, 2, Beibel na papiamentu koriente) Mas bien, nan ta hasi esfuerso pa papia e bèrdat bíbliko ku simplesa i sinseridat. Ademas, ansianonan ta purba pa ta rasonabel den loke nan ta spera di otro hende i tene konsiderashon ku nan nesesidatnan. (Filipensenan 4:5, NW) Komo ku ansianonan ta konsiente ku tur hende tin limitashon, nan ta tene kuenta ku e limitashonnan aki den nan trato ku e rumannan. (1 Pedro 4:8) I ansianonan ku ta humilde i mansu no ta realmente refreskante? Klaro ku sí.

18. Kiko ansianonan por siña di e manera ku Hesus a trata mucha?

¹⁸ Hesus tabata un persona aserkabel, asta  pa esnan di mas chikí. Wak kon el a reakshoná ora su disipelnan a skual e hendenan pasobra “nan tabata trese mucha chikitu serka dje.” Hesus a bisa: “Laga e muchanan bin serka mi; no stroba nan.” Anto “el a tuma nan den su brasa i a bendishoná nan, poniendo su mannan riba nan.” (Marko 10:13-16) Hesus tabata kariñoso i bondadoso, i hende a sinti nan atraí na dje. Hende no tabatin miedu di Hesus. Asta mucha a sinti nan kómodo den su presensia. Ansianonan tambe ta aserkabel, i segun ku nan ta mustra kariño i bondat, otro hende—asta mucha—ta sinti nan kómodo serka nan.

19. Kiko ta nifiká ku nos “tin e mente di Kristu,” i ki esfuerso esaki ta eksigí?

¹⁹ Te kon leu ansianonan por imitá Kristu Hesus, ta dependé di kon bon nan konos’é. Pablo a puntra: “Ken a konosé e mente di SEÑOR, ku e por instruyé?” Anto el a agregá: “Ma nos tin e mente di Kristu.” (1 Korintionan 2:16) Ora nos tin e mente di Kristu esei ta nifiká entre otro, ku nos konosé su manera di pensa i tur aspekto di su personalidat di manera ku nos sa kiko lo el a hasi den un sierto situashon. Imaginá bo, asina bon bo por konosé nos Lider! Sí, pa logra esaki nos mester presta sumo atenshon na e relatonan di Evangelio i yena nos mente regularmente ku un komprendementu di Hesus su bida i ehèmpel. Ora ansianonan ta hasi un esfuerso pa sigui Kristu su liderato te na e grado ei, esnan den kongregashon ta keda mas inkliná na imitá nan fe. I e ansianonan lo tin e satisfakshon di mira otro hende sigui e pasonan di e Lider gososamente.

Sigui bou di Kristu Su Liderato

20, 21. Segun ku nos ta wak padilanti na e mundu nobo, kiko mester ta nos determinashon?

²⁰ Ta vital pa nos tur sigui someté nos mes na Kristu su liderato. Segun ku nos ta aserká e fin di e sistema di kosnan aki, nos ta kasi den e mesun posishon ku e israelitanan ora nan tabata na e Yanura di Moab na aña 1473 promé ku Era Komun. Nan tabata na drèmpel di e Tera Primintí, i via profeta Moises, Dios a deklará: “Abo [Hosué] mester bai ku e pueblo aki den e tera ku SEÑOR a hura na nan tatanan di duna nan.” (Deuteronomio 31:7, 8) Hosué tabata e lider nombrá. Pa drenta den e Tera Primintí, e israelitanan tabatin ku someté nan mes na e liderato di Hosué.

²¹ Beibel ta bisa nos: “Un so ta boso Lider, e Kristu.” Ta Kristu so lo dirigí nos pa drenta den e mundu nobo primintí den kua hustisia lo biba. (2 Pedro 3:13) P’esei, laga nos ta determiná pa someté nos mes na su liderato den tur aspekto di nos bida.

[Nota]

Bo Ta Kòrda?

• Kon Kristu a dirigí e kongregashon di promé siglo?

• Kon Kristu ta dirigí su kongregashon awe?

• Dikon nos mester ta sumiso na esnan ku ta hiba delantera den kongregashon?

• Kon ansianonan por mustra ku Kristu ta nan Lider?

[Preguntanan di Estudio]

[Plachi na página 15]

Kristu ta dirigí su kongregashon i ta tene superintendentenan den su man drechi

[Plachinan na página 16]

“Sea obediente na esnan ku ta hiba delantera den boso i sea sumiso”

[Plachi na página 18]

Hesus tabata kariñoso i aserkabel. Ansianonan kristian ta hasi esfuerso pa ta meskos kuné