Pregunta di Lektor

E echo ku e bírgen Maria tabata imperfekto a afektá e konsepshon di Hesus?

Relashoná ku ‘e nasementu di Hesus,’ e registro inspirá ta bisa: “Tempu ku su mama Maria tabata komprometí pa kasa ku Hosé, promé ku nan a bai biba huntu, a sosodé ku Maria tabata na estado di spiritu santu.” (Mateo 1:18) Sí, Dios su spiritu santu a hunga un papel importante den Maria su embaraso.

Pero kiko di Maria? No ta su eisèl, òf óvulo, a yuda pone ku el a sali na estado? Teniendo kuenta ku e promesanan ku Yehova a hasi na Abraham, Isak, Yakòb, Huda i Rei David—antepasadonan di Maria—e yu ku a nase mester tabata un berdadero desendiente di nan. (Génesis 22:18; 26:24; 28:10-14; 49:10; 2 Samuel 7:16) Di otro forma, kon e yu ku Maria a haña por tabata un heredero legal di e promesanan aki di Dios? E mester tabata Maria su yu outéntiko.—Lukas 3:23-34.

Un angel di Yehova a aparesé na e bírgen Maria i a bis’é: “No tene miedu, Maria, pasobra bo a haña grasia serka Dios. I mira, lo bo konsebí den bo matris i duna lus na un yu hòmber, i lo bo yam’é Hesus.” (Lukas 1:30, 31) Pa por tin konsepshon, un webu mester ser fertilisá. Parse ku ta Yehova Dios a fertilisá un eisèl den matris di Maria dor di transferí e bida di su Yu unigénito for dje region spiritual pa tera.—Galationan 4:4.

Un mucha konsebí dje manera aki dor di un muhé imperfekto, por sali ku un kurpa perfekto i sin piká? Kon leinan di herensia ta funshoná ora perfekshon i imperfekshon uní ku otro? Kòrda ku Dios a usa su spiritu santu pa transferí e forsa di bida perfekto di su Yu i kousa e konsepshon. E proseso aki a neutralisá e imperfekshon ku a eksistí den e eisèl di Maria, produsiendo for di prinsipio di e èisel fertilisá un patronchi genétiko perfekto.

En todo kaso, nos por ta sigur ku e manera ku Dios su spiritu santu a obra e tempu ei, a sigurá ku Yehova su propósito tabatin éksito. Angel Gabriel a splika Maria: “Spiritu santu lo bin riba bo, i e poder di e Haltísimo lo sombrá bo; i pa e motibu ei esun santu ku tin ku nase lo wòrdu yamá e Yu di Dios.” (Lukas 1:35) Sí, ta komo si fuera Dios su spiritu santu a forma un muraya di protekshon rònt di e èmbrio ku tabata desaroyando for di e momentu di konsepshon, pa ningun influensia dañino ni imperfekshon afekt’é.

Ta bisto anto ku Hesus a debe su bida humano perfekto na su Tata selestial, i no na ningun hende. Yehova ‘a prepará un kurpa’ p’e, i—desde su konsepshon padilanti—Hesus en bèrdat tabata “sin mancha, separá for di pekadornan.”—Hebreonan 7:26; 10:5.

[Plachi na página 19]

“Lo bo konsebí den bo matris i duna lus na un yu hòmber”