“Bini Serka Mi, . . . i Lo Mi Refreská Boso”

Reunionnan Ku Ta Stimulá Hende pa Stima i Hasi Bon Obra

DI Toronto te Tokio, di Moskú te Montevideo, vários bes pa siman, miónes di Testigu di Yehova i nan amigunan ta basha bai nan lugá di adorashon. Entre e personanan aki, tin tata di famia ku ta kansá despues di un dia pisá di trabou, esposanan diligente i mamanan ku yu chikitu, hóbennan enérgiko ku a pasa henter un dia na skol, biehitunan delikado ku ta kana pokopoko di doló, biuda i huérfanonan balente i tambe esnan deprimí ku tin mester di konsuelo.

E Testigunan aki di Yehova ta usa vários medio di transporte: di treinnan super rápido te buriku, di metro patapata di hende te trùk. Algun di nan mester krusa riu yen di krokodel, miéntras ku otronan tin ku soportá e tráfiko di statnan grandi ku ta traha riba hende su nèrvio. Dikon tur e hendenan aki ta hasi tantu esfuerso asina?

Na promé lugá, pasobra asistí i partisipá na reunionnan kristian ta un manera importante pa rindi adorashon na Yehova Dios. (Hebreonan 13:15) Apòstel Pablo a referí na un motibu mas ora el a skirbí: “Laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan, . . . ma enkurashá otro; i muchu mas ainda, ora boso ta mira ku e dia ta yegando serka.” (Hebreonan 10:24, 25) Akinan Pablo a ekspresá e mesun sintimentunan ku e salmista David ku a kanta: “Mi tabata kontentu ora nan a bisa mi: ‘Laga nos bai na e kas di SEÑOR.’”—Salmo 122:1.

Di kon kristiannan ta kontentu pa ta presente na nan reunionnan? Pasobra esnan ku ta asistí no ta bini djis pa sinta tende. Al kontrario, e reunionnan ta duna nan e oportunidat pa siña konosé otro. Riba tur kos, e reunionnan aki ta habri kaminda pa duna—i no risibí so—i stimulá otro pa mustra amor i hasi bon obra. Esaki ta yuda hasi e reunionnan okashonnan edifikante. Ademas, e reunionnan kristian ta un dje medionan ku Hesus ta usa pa kumpli ku su promesa: “Bini serka mi, . . . i lo mi refreská boso.”—Mateo 11:28, NW.

 Un Oásis di Konsuelo i Komprenshon

Testigunan di Yehova tin bon motibu pa mira nan reunionnan komo un fuente di refreskamentu. Pa di promé, ta n’e reunionnan “e esklabo fiel i prudente” ta sirbi kuminda spiritual na e debido tempu. (Mateo 24:45) Tambe reunionnan ta hunga un papel importante den hasi Yehova su sirbidónan maestronan ábil i seloso dje Palabra di Dios. Ademas, na Salon di Reino un persona ta topa un grupo di amigu amoroso, komprensivo i bondadoso ku ta kla pa yuda i konsolá esnan ku ta sufri.—2 Korintionan 7:5-7.

Phillis, un biuda ku a pèrdè su kasá ora su yunan tabatin sinku i ocho aña, a eksperensiá esaki. El a deskribí e efekto refreskante ku e reunionnan kristian tabatin riba dje i su yunan: “Na Salon di Reino bo ta sinti ègt un konsuelo pasobra semper rumannan tabata mustra nan amor i interes ku un brasa, un pensamentu bíbliko òf dor di duna bo un man fuerte. Ei ta e lugá ku mi kier ta pa semper.”—1 Tesalonisensenan 5:14.

Despues ku Marie a hasi un operashon grandi, su dòkter a bis’é ku lo tum’é por lo ménos seis siman p’e rekuperá. Durante e promé simannan di su rekuperashon, Marie no por a bai reunion. Su dòkter a ripará ku e no tabata mes kontentu ku promé. Ora el a haña sa ku Marie no tabata asistí na su reunionnan, el a anim’é p’e bai. Marie a kontestá ku su esposo, ku no ta di e mesun religion, lo no ta dispuesto pa lagu’é bai e reunionnan dor ku e ta preokupá pa Marie su salú. P’esei, e dòkter a skirbi un resèpt ofisial ku a “manda” Marie bai su reunionnan na Salon di Reino p’e haña animashon i asosiashon edifikante. Marie a finalisá bisando: “Despues ku mi a asistí na un solo reunion, mi a sintí mi hopi mas mihó. Mi a kuminsá kome, drumi henter anochi, bebe ménos kalmante pa doló i mi tabata hari atrobe!”—Proverbionan 16:24.

Otro hende tambe ta ripará ku un ambiente di amor ta reina n’e reunionnan kristian. Un studiante di universidat a skohe pa studia e bida i komportashon di Testigunan di Yehova pa asina e skirbi un scriptie pa su lès di antropologia. Den su scriptie el a skirbi lo siguiente tokante e atmósfera na e reunionnan: ‘Mi a haña un bon biní kaluroso i esei a impreshoná mi mashá. E kualidat ku a sobresalí serka e Testigunan ta nan amabilidat. I segun mi, esei ta e parti mas importante dje ambiente.’—1 Korintionan 14:25.

Den e mundu yen di problema aki, e kongregashon kristian ta manera un oásis spiritual. Un refugio di pas i amor. Dor di asistí n’e reunionnan bo por eksperensiá personalmente e bèrdat dje palabranan dje salmista: “Mira, ki bon i ki dushi ta pa rumannan biba huntu den armonia!”—Salmo 133:1.

[Kuadro/Plachi na página 25]

SATISFASIENDO UN NESESIDAT SPESIAL

Kon hende surdu por benefisiá di reunionnan kristian? Rònt mundu Testigunan di Yehova ta formando kongregashonnan na idioma di seña. Durante e último 13 añanan, nan a forma 27 kongregashon i 43 grupo na idioma di seña na Merka. Aktualmente tin 140 kongregashon na idioma di seña na por lo ménos 40 otro pais. A prepará 13 publikashon riba vidio na idioma di seña.

E kongregashon kristian ta duna hende surdu e oportunidat pa alabá Yehova. Odile, un eks-katóliko na Fransia ku tabata sufri di atake di depreshon severo i kier a kometé suisidio, ta masha gradisidu pa e edukashon di Beibel ku el a risibí n’e reunionnan kristian. E ta bisa: “Mi a rekobrá mi salú i goso den bida. Pero mas importante ainda, mi a haña e bèrdat. Awor sí mi bida tin propósito.”