Unda Nos Por Haña un Bon Lider?

“TUR kas ta wòrdu trahá dor di un hende, ma esun ku a traha tur kos ta Dios,” Beibel ta bisa. (Hebreonan 3:4; Revelashon 4:11) Siendo ku e Dios berdadero, Yehova, ta nos Kreador, “e sa di kiko nos ta trahá.” (Salmo 103:14) E sa bon-bon kiko ta nos limitashonnan i nesesidatnan. I komo ku e ta un Dios amoroso, e kier satisfasé e nesesidatnan ei tambe. (Salmo 145:16; 1 Huan 4:8) Esei ta konta tambe pa nos nesesidat di un bon lider.

Via profeta Isaías, Yehova a deklará: “Mira, mi a hasié un testigu pa e pueblonan, un lider i komandante pa e pueblonan.” (Isaías 55:4) E solushon pa e krísis ku tin awe pa haña un bon lider ta enserá identifiká e Lider aki—nombrá dor di e Todopoderoso mes—i aseptá su liderato. Pues, ken ta e Lider i Komandante profetisá aki? Kiko ta su kualifikashonnan komo lider? Na unda lo e dirigí nos? Kiko nos tin ku hasi pa benefisiá di su liderato?

 E Lider Primintí Ta Yega

Un 2.500 aña pasá, angel Gabriel a aparesé na profeta Daniel i a bis’é: “Sabi anto i komprendé ku for di e momentu ku e òrdu a wòrdu duná pa restorá i rekonstruí Yerusalèm te na e Mesías, e Prens, lo tin shete siman i sesent’i dos siman; e lo wòrdu trahá atrobe, ku kaya i roi, den tempu di angustia.”—Daniel 9:25.

Ta bisto ku e angel tabata informando Daniel di e tempu spesífiko ku Yehova su Lider skohí lo a bini. “‘Mesías, e Prens,’ òf e Lider,” lo a presentá na fin di e 69 simannan—òf despues di 483 aña—kontando for di aña 455 promé ku Era Komun, ora ku a duna e òrdu pa rekonstruí Yerusalèm. * (Nehemías 2:1-8) Kiko a sosodé na fin di e periodo ei? Lukas e eskritor di Evangelio ta konta: “Den e di diesinku aña di e reinado di Tiberio Sésar, tempu ku Ponsio Pilato tabata gobernadó di Hudea, i Herodes tabata tetrarka di Galilea [aña 29 Era Komun], . . . e palabra di Dios a yega na Huan, yu hòmber di Zakarías, den desierto. I el a bin den henter e distrito rònt di Yordan, predikando un boutismo di repentimentu pa pordon di piká.” E tempu ei “e pueblo tabata spera yen di ekspektativa” riba Mesías e Lider. (Lukas 3:1-3, 15) Ounke multitut di hende a bini serka Huan, e no tabata e Lider ei.

Anto rònt di òktober di aña 29 Era Komun, Hesus di Názarèt a bini serka Huan p’e batisá. I Huan a duna testimonio, bisando: “Mi a mira e spiritu ta baha for di shelu manera un palomba, i el a keda riba dje. Mi no tabata konos’é, ma Esun ku a manda mi batisá ku awa a bisa mi: ‘Esun ku bo mira e spiritu baha i keda riba dje, ta esaki ta esun ku ta batisá ku spiritu santu.’ I mi a mira i a duna testimonio ku esaki ta e Yu di Dios.” (Huan 1:32-34) Ora Hesus a batisá, el a bira e Lider ungí, e Mesías òf Kristu.

Sí, Hesukristu a resultá di ta esun primintí komo “lider i komandante pa e pueblonan.” I ora nos eksaminá su kualidatnan komo lider, nos ta ripará mesora ku su liderato ta superá tur e rekisitonan moderno di un lider ideal.

E Mesías—Un Lider Ideal

Un bon lider ta duna instrukshon kla. Tambe e ta yuda hende ku ta bou di su kuido pa nan tin fortalesa personal i e abilidatnan nesesario pa nan por solushoná problema ku éksito. ‘Esaki ta un rekisito pa e lider eksitoso di siglo 21,’ segun e buki 21st Century Leadership: Dialogues With 100 Top Leaders (Liderato di Siglo 21: Diálogo ku e 100 Mihó Lidernan). Esta bon Hesus a prepará su oyentenan pa atendé situashonnan di tur dia! Djis konsiderá su diskurso di mas famoso, e Sermon Riba Seru. E palabranan registrá na Mateo kapítulo 5 pa 7 ta yen di konseho práktiko.

Tuma por ehèmpel Hesus su konseho tokante kon pa solushoná desakuerdonan personal. El a bisa: “P’esei, si bo presentá bo ofrenda na altar, i ayanan bo kòrda ku bo ruman tin algu kontra bo, laga bo ofrenda ayanan dilanti di altar, i bai; rekonsiliá ku bo ruman promé, i despues bin presentá bo ofrenda.” (Mateo 5:23, 24) E promé prioridat mester ta pa tuma inisiativa pa hasi pas ku otro hende. Esei ta asta mas importante ku kumpli ku un deber religioso, manera presentá ofrenda riba altar di e tèmpel na Yerusalèm segun loke e Lei di Moises a rekerí. Sino, bo aktonan di adorashon ta inaseptabel pa Dios. Hesus su konseho ta mes práktiko awe ku e tabata siglonan pasá.

Tambe Hesus a yuda su oyentenan evitá e trampa di inmoralidat. El a spièrta nan: “Boso a tende ku a wòrdu bisá: ‘No kometé adulterio’; ma ami ta bisa boso ku ken ku wak un muhé pa dese’é, ya kaba el a kometé adulterio kuné den su kurason.” (Mateo 5:27, 28) Ki un atvertensia apropiado! Pakiko kuminsá  bai den direkshon di kometé adulterio dor di pensa riba dje? Hesus a bisa ku fornikashon i adulterio ta sali for di kurason. (Mateo 15:18, 19) P’esei ta sabí pa nos protehá nos kurason.—Proverbionan 4:23.

E Sermon Riba Seru tin tambe ekselente konseho tokante stima bo enemigu, demostrá generosidat, tene e punto di bista korekto di kosnan material i spiritual, etcétera. (Mateo 5:43-47; 6:1-4, 19-21, 24-34) Hesus a asta mustra su ouditorio kon pa buska Dios su yudansa dor di siña nan kon pa hasi orashon. (Mateo 6:9-13) Mesías e Lider ta fortifiká i prepará su siguidónan pa trata ku problemanan komun di humanidat.

Seis biaha den e Sermon Riba Seru, Hesus a introdusí su deklarashonnan ku e ekspreshon “boso a tende ku a wòrdu bisá” òf “tambe a wòrdu bisá,” anto kaba e ta presentá un otro idea, bisando “ma ami ta bisa boso.” (Mateo 5:21, 22, 27, 28, 31-34, 38, 39, 43, 44) Esei ta indiká ku su oyentenan tabatin kustumber di aktua den un sierto manera, segun e tradishonnan oral di e fariseonan. Pero awor Hesus tabata mustrando nan un otro manera, un manera ku a reflehá e berdadero idea tras di e Lei di Moises. Asina Hesus a introdusí kambio, i el a hasi esaki di tal manera ku tabata fásil pa su siguidónan aseptá. Sí, Hesus a motivá hende pa hasi kambionan drástiko den nan bida, tantu riba tereno spiritual komo moral. Esei ta un karakterístika di un berdadero lider.

Un buki tokante maneho ta indiká ku ta masha difísil pa logra un kambio asina. E ta bisa: “E persona ku ta motivá e kambio [e lider] mester por sinti pa hende manera un trahadó sosial, komprendé mente di hende manera un sikólogo, tin e resistensia di un koredó di máratòn, e persistensia di un bulldog, ser independiente manera un ermitaño, i ku e pasenshi di un santu. I asina mes teniendo tur e kualidatnan ei, no tin ningun garantia di éksito.”

“Lidernan mester komportá nan mes manera nan kier pa nan siguidónan komportá nan,” segun un artíkulo titulá “Liderato: E Karakterístikanan Ta Importante?” Sí, un bon lider ta praktiká loke e ta prediká. I den kaso di Hesukristu, asina tabata! El a siña su disipelnan pa nan ta humilde, pero tambe el a duna nan un ehèmpel práktiko dor di laba nan pia. (Huan 13:5-15) E no a djis manda e disipelnan bai prediká e bon nobo di e Reino di Dios; mas bien e tambe a partisipá vigorosamente den e trabou ei. (Mateo 4:18-25; Lukas 8:1-3; 9:1-6; 10:1-24; Huan 10:40-42) I pa loke ta e manera korekto pa reakshoná riba liderato, Hesus a pone un bon ehèmpel. El a bisa tokante su mes: “E Yu no por hasi nada di su mes, si no ta algu ku e ta mira e Tata hasi.”—Huan 5:19.

Hesus su palabra i echonan ku nos a konsiderá aki, ta mustra bon kla ku e ta e Lider ideal. De echo, e ta surpasá tur norma humano pa ta un bon lider. Hesus ta perfekto. Komo ku despues di su morto i resurekshon el a risibí inmortalidat, e ta biba pa semper. (1 Pedro 3:18; Revelashon 1:13-18) Kua lider humano por igualá e kualifikashonnan aki?

Kiko Nos Tin Ku Hasi?

Komo e Rei reinante di e Reino di Dios, Mesías e Lider lo basha hopi bendishon riba humanidat obediente. E Skritura ta primintí relashoná ku esaki: “Tera lo ta yen di e konosementu di SEÑOR, manera awa ta tapa laman.” (Isaías 11:9) “E humildenan lo heredá e tera, i lo deleitá nan mes den pas abundante.” (Salmo 37:11) “Kada un di nan lo sinta bou di su palu di wendrùif i bou di su palu di figu, i ningun hende lo no spanta nan.” (Mikéas 4:4) “Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.”—Revelashon 21:3, 4.

 Awe mundu ta den un krísis pa haña bon lider. Sin embargo, Hesukristu ta dirigiendo hende mansu na un mundu nobo pasífiko, kaminda humanidat obediente lo ta uní den adorá Yehova Dios i lo sigui rumbo pa perfekshon. P’esei ta masha vital pa nos tuma tempu pa gana konosementu di e Dios berdadero i di su Lider nombrá, i aktua na armonia ku e konosementu ei!—Huan 17:3.

E mihó kòmplimènt ku nos por duna un persona ta di imit’é. Nos lo no mester purba imitá anto e Lider di mas grandi den historia humano—Hesukristu? Kon nos por hasi esei? Ki impakto su liderato lo tin riba nos bida si nos asept’é? Den e siguiente dos artíkulonan nos lo trata entre otro e preguntanan aki.

[Nota]

[Plachi na página 4]

Daniel a profetisá e binida di Dios su Lider skohí

[Plachi na página 7]

Hesus su siñansanan a prepará hende pa trata ku problema di bida

[Plachi na página 7]

Hesus lo dirigí humanidat obediente na un mundu nobo pasífiko