Buska Dios ku Kurason i Mente

Kristianismo berdadero ta manda nos usa tantu nos kurason komo nos mente pa kultivá un fe ku ta agradá Dios.

DE ECHO Hesukristu, e fundadó di kristianismo, a siña nos ku nos tin ku stima Dios ku ‘henter nos mente,’ esta, ku nos intelekto, i ku ‘henter nos kurason’ i ‘henter nos alma.’ (Mateo 22:37) Sí, nos fakultatnan mental tin ku hunga un papel klave den nos adorashon.

Ora Hesus tabata animá su oyentenan pa meditá riba su siñansa, hopi bes el a puntra nan: “Kiko [boso] ta pensa?” (Mateo 17:25; 18:12; 21:28; 22:42) Meskos tambe, apòstel Pedro a skirbi su kompañeronan di kreensia pa nan ‘stimulá nan fakultatnan di pensa kla.’ (2 Pedro 3:1, NW) Apòstel Pablo, e misionero di promé siglo ku mas a biaha, a supliká kristiannan pa usa nan “fakultat di rasoná” [NW] i pa “komprobá [pa nan mes] kiko ta e bon i agradabel i perfekto boluntat di Dios.” (Romanonan 12:1, 2) Ta solamente ora kristiannan ta analisá nan kreensianan kabalmente i kuidadosamente nan por kultivá un fe ku ta agradá Dios i ku ta pèrmití nan enfrentá ku éksito e pruebanan ku ta surgi den bida.—Hebreonan 11:1, 6.

Pa yuda otro hende kultivá un fe asina, e promé evangelisadónan kristian “a rasoná ku nan for di e Skrituranan, splikando i mustrando” nan e kosnan ku nan tabata siña nan. (Echonan 17:1-3) E método rasonabel ei a generá un reakshon faborabel di parti di hende di kurason onrado. Por ehèmpel, un kantidat di hende den e stat di Berea na Masedonia “a risibí e palabra [di Dios] ku bon boluntat [òf, mayor anhelo mental, NW] i tabata skrudiñá e Skrituranan tur dia, pa mira si e kosnan aki  [ku Pablo i su kompañeronan a splika nan] tabata asina.” (Echonan 17:11) Ta bon pa nota dos kos den e teksto aki. Di promé, e bereanonan a anhelá pa skucha e Palabra di Dios; di dos, nan no a asumí siegamente ku loke nan a tende tabata korekto, pero nan a verifiká esei den e Skritura. E misionero kristian Lukas humildemente a elogiá e bereanonan pa esaki, yamando nan hende di ‘mentalidat noble.’ Abo ta reflehá un mentalidat noble asina den e manera ku bo ta mira kosnan spiritual?

Mente i Kurason Ta Traha Huntu

Manera a ser menshoná anteriormente, adorashon berdadero ta enserá tantu mente komo kurason. (Marko 12:30) Pensa atrobe riba e ilustrashon den e artíkulo anterior di e fèrfdó kontratá ku a usa e kolónan robes pa fèrf un kas. Si el a skucha atentamente na e instrukshonnan di su doño di trabou, lo e por a pone su kurason i mente den su trabou i lo e tabatin e konfiansa ku e doño di e kas lo a gusta su trabou. Meskos ta konta pa nos adorashon.

Hesus a bisa: “E adoradónan berdadero lo adorá e Tata den spiritu i bèrdat.” (Huan 4:23) P’esei apòstel Pablo a skirbi: “Pa e motibu aki tambe . . . nos no a stòp di hasi orashon pa boso i di pidi pa boso por wòrdu yená ku e konosementu di su boluntat den tur sabiduria spiritual i komprendementu. I nos ta pidi pa boso kana na un manera digno di Señor, pa agrad’é den tur sentido.” (Kolosensenan 1:9, 10) Tal “konosementu” ta pèrmití personanan sinsero hinka nan alma i kurason den nan adorashon, hasiendo esei ku pleno konfiansa pasobra nan “ta adorá loke [nan] konosé.”—Huan 4:22.

Pa e motibunan aki, Testigunan di Yehova no ta batisá beibi ni personanan resien interesá ku no a studia e Skritura kuidadosamente. Hesus a manda su siguidónan: “Hasi tur e nashonnan disipel di mi, . . . siña nan pa kumpli ku tur loke mi a ordená boso.” (Mateo 28:19, 20) Ta despues ku studiantenan sinsero di Beibel a haña un konosementu eksakto di Dios su boluntat nan lo por tuma un desishon bon fundá tokante e asuntu di adorashon. Abo ta hasi esfuerso pa gana tal konosementu eksakto?

Kon pa Komprendé e Orashon di Nos Tata

Pa mira e diferensia entre kiko kier men un konosementu eksakto di Beibel i sa mas o ménos kiko e ta bisa, laga nos konsiderá loke nos konosé komo e Orashon di Nos Tata, ku ta pará skirbí na Mateo 6:9-13.

Ku regularidat miónes di hende ta hasi e orashon aki ku Hesus a siña nos ora nan bai misa. Pero kuantu di nan a siña su nifikashon, spesialmente e promé parti di e orashon ku ta trata ku e nòmber i Reino di Dios? E asuntunan aki ta asina importante ku Hesus a pone nan na promé lugá den e orashon.

E ta kuminsá: “Nos Tata ku ta den shelu, bo nòmber sea santifiká.” Santifiká ta nifiká hasi santu. Tuma nota ku Hesus a bisa pa resa pa e nòmber di Dios ser santifiká. Pa hopi hende, esei ta lanta por lo ménos dos pregunta. Di promé, kiko ta e nòmber di Dios? Di dos, pakiko mester santifik’é?

Nos por haña e kontesta riba e promé pregunta den mas ku 7.000 lugá den e idiomanan original di Beibel. Un di nan ta na Salmo 83:18 (NW): “Pa hende por sa ku abo, kende su nòmber ta Yehova, abo so ta e Haltísimo riba henter tera.” Relashoná ku e nòmber divino, Yehova, Éksodo 3:15 ta bisa: “Esaki ta mi nòmber pa semper, i esaki ta mi nòmber konmemorativo di generashon pa generashon.” * Pero pakiko mester santifiká e  nòmber di Dios, ku riba su mes ta e esensia di puresa i santidat? Esei ta pasobra for di kuminsamentu di historia humano e nòmber a ser difamá i kalumniá.

Den Eden, Dios a bisa Adam ku Eva ku nan lo a muri si nan a kome e fruta prohibí. (Génesis 2:17) Satanas tabatin e kurashi di kontradisí Dios dor di bisa Eva: “Siguramente boso lo no muri.” Ku otro palabra, Satanas a akusá Dios di ta gaña. Pero e no a keda te ei. El a sigui difamá e nòmber di Dios dor di bisa Eva ku Dios inhustamente a keda sin dun’é konosementu ku lo por tabata bon p’e. E di: “Pasobra Dios sa ku e dia ku boso kome di [e palu di konosementu di bon i malu], boso wowo lo habri i boso lo ta manera Dios, konosiendo bon i malu.” Esta un kalumnia!—Génesis 3:4, 5.

Dor di kome di e fruta prohibí, Adam ku Eva a tuma parti pa Satanas. For di e tempu ei, mayoria hende, sea konsiente òf inkonsiente, a sigui kalumniá Dios dor di rechasá su normanan hustu. (1 Huan 5:19) Ainda hende ta maldishoná Dios dor di kulp’é pa nan sufrimentu—maske tin biaha ta nan mes por ke ku nan ta sufri. Proverbionan 19:3 ta bisa: “Lokura di un hende ta ruiná su kaminda, i den su kurason e ta bira razu kontra SEÑOR.” Bo por mira pakiko Hesus—kende di bèrdat a stima su Tata—a pidi pa Su nòmber ser santifiká?

“Ku Bo Reino Bin”

Despues ku Hesus a pidi pa e nòmber di Dios ser santifiká, el a bisa: “Ku bo reino bin. Ku bo boluntat sosodé na tera meskos ku den shelu.” (Mateo 6:10) Relashoná ku e pasashi ei, nos por puntra: ‘Kiko ta e Reino di Dios? I kiko binimentu di e Reino ei tin di haber ku e boluntat di Dios riba tera?’

Den Beibel, básikamente e palabra “reino” ta nifiká “gobernashon di un rei.” Lógikamente anto, e Reino di Dios ta referí na un gobernashon di Dios, ku un rei ku e ta skohe. E Rei aki ta nada ménos ku Hesukristu resusitá—e “Rei di reinan i Señor di señornan.” (Revelashon 19:16; Daniel 7:13, 14) Relashoná ku Dios su Reino Mesiániko den man di Hesukristu, profeta Daniel a skirbi: “Den e dianan di e reinan ei [gobièrnunan humano ku ta na mando awor] e Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.”—Daniel 2:44.

Sí, e Reino di Dios lo tuma mando kompleto di tera, i eliminá tur malbado i gobièrnu humano for di riba dje “pa semper.” Den e sentido aki, e Reino di Dios ta e medio ku Yehova ta usa pa santifiká su nòmber, i limpi’é di tur kalumnia di parti di Satanas i hende malbado.—Ezekiel 36:23.

Meskos ku tur gobièrnu, e Reino di Dios tin súpdito. Ken esakinan ta? Beibel ta kontestá: “Ma e humildenan lo heredá e tera, i lo deleitá nan mes den pas abundante.” (Salmo 37:11) Meskos tambe, Hesus a bisa: “Bendishoná ta esnan humilde, pasobra nan lo heredá e tera.” Klaro ku e humildenan aki tin konosementu eksakto di Dios. Esei ta un rekisito pa gana bida.—Mateo 5:5; Huan 17:3.

Bo por imaginá bo e tera kompleto yen di hende humilde, saksenu, ku di bèrdat ta stima Dios i nan próhimo? (1 Huan 4:7, 8) Esei ta loke Hesus a resa pidi p’e ora el a bisa: “Ku bo reino bin. Ku bo boluntat sosodé na tera meskos ku den shelu.” Abo ta komprendé pakiko Hesus a siña su siguidónan resa asina? Mas importante ainda, bo ta mira ki influensia e kumplimentu di e orashon ei por tin riba bo personalmente?

Awe Miónes di Hende Ta Rasoná Riba e Skritura

Hesus a profetisá di un kampaña mundial di edukashon spiritual ku lo a anunsiá e binidero Reino di Dios. El a bisa: “E evangelio aki di e reino lo wòrdu prediká den henter  mundu komo un testimonio na tur nashon, i e ora ei e fin [di e mundu aki] lo yega.”—Mateo 24:14.

Rònt mundu mas o ménos seis mion Testigu di Yehova ta kompartiendo e bon notisia ei ku nan próhimo. Nan ta invitá bo pa siña mas tokante Dios i su Reino dor di “skrudiñá e Skritura,” usando bo fakultat di rasoná. Si bo hasi esei lo bo fortifiká bo fe i bo wowonan lo bria ku e speransa di biba den un paradeis riba tera, ku lo ta “yen di e konosementu di SEÑOR, manera awa ta tapa laman.”—Isaías 11:6-9.

[Nota]

 [Kuadro/Plachi na página 8]

IMITÁ E GRAN MAESTRO

Hopi bes Hesus a siña hende dor di enfoká riba tópikonan spesífiko di Beibel. Por ehèmpel, e morto di Hesus a laga dos disipel di dje tur turdí. Despues di su resurekshon el a splika nan ki papel lo el a hunga den e propósito di Dios. Lukas 24:27 ta bisa: “Kuminsando ku Moises i ku tur e profetanan el a splika nan e kosnan tokante di su mes den tur e Skrituranan.”

Ripará ku Hesus a skohe un tema spesífiko—“tokante di su mes,” e Mesías—i ku den su splikashon, el a sita for di “tur e Skrituranan.” Na moda di papia, Hesus a pone e tekstonan relevante di Beibel huntu manera pida-pida di un pùzel, i esaki a pèrmití su disipelnan haña un bista kla di e bèrdatnan spiritual. (2 Timoteo 1:13) Esei no a djis iluminá nan, sino tambe a konmové nan profundamente. E relato ta bisa nos: “Nan a bisa otro: ‘Nos kurason no tabata kima den nos miéntras ku e tabata papia ku nos na kaminda, miéntras ku e tabata splika nos e Skrituranan?’”—Lukas 24:32.

Testigunan di Yehova ta purba imitá e métodonan di Hesus den nan trabou di prediká. Nan medionan prinsipal di studio ta e foyeto Kico Dios Ta Rekerí di Nos? i e buki Conocimentu cu Ta Hiba na Bida Eterno. Esakinan ta trata desénas di tópiko interesante di Beibel, manera: “Ken Dios Ta?,” “Pakiko Dios Ta Pèrmití Sufrimentu?,” “Kon Bo Por Haña e Religion Berdadero?,” “Esakinan Ta e Último Dianan!” i “Edifikando un Famia Ku Ta Onra Dios.” Den kada lès tin vários teksto di Beibel.

Nos ta animá bo pa tuma kontakto ku Testigunan di Yehova den bo komunidat òf skirbi n’e adrès na página 2 di e revista aki si bo ta deseá un studio di Beibel grátis di e temanan aki i hopi otro mas.

[Plachi]

Yega na kurason di bo studiante dor di enfoká riba un tópiko spesífiko di Beibel

[Plachinan na página 7]

Abo ta kapta e nifikashon di Hesus su orashon modelo?

“Nos Tata ku ta den shelu, bo nòmber sea santifiká . . .”

“Ku bo reino [Mesiániko] bin . . .”

“Ku bo boluntat sosodé na tera meskos ku den shelu”