Fe Mester Ta Basá Riba Lógika?

“Tin muchu hende ‘religioso’ ku a bira religioso hustamente pa evitá ku nan tin ku pensa,” segun e direktor di un seminario teológiko na Merka. E ta bisa mas aleu: “Pa nan, ta ‘fe’ bo mester tin den tur kos, i no tin nodi buska prueba.”

LOKE e direktor aki kier men ta ku mayoria hende ku ta bisa ku nan tin fe den doktrinanan di un religion, no ta para ketu na pakiko nan ta kere loke nan ta kere ni si nan fe tin sufisiente base. Nada straño anto ku religion a bira un tópiko ku hopi hende no kier papia mes ariba.

Lamentablemente, e kustumber di usa imágen religioso i di ripití orashon for di kabes tampoko no ta yuda hende pensa lógiko. E kustumbernan aki, kombiná ku e arkitektura impreshonante di misanan, dibuhonan elaborá riba nan bentananan di koló i músika ku ta konmové hende, ta mas o ménos e konsepto ku miónes di hende tin di nan religion. Ounke algun religion ta pretendé ku nan fe ta basá riba Beibel, nan mensahe di ‘kere den Hesus i lo bo ta salbá’ no ta animá hende pa studia Beibel seriamente. Otro religionnan ta dediká nan mes na prediká un evangelio sosial òf polítiko. Den kiko tur esaki a resultá?

Relashoná ku e situashon na Norteamérika, un eskritor di temanan di religion a bisa: “Kristianismo . . . tin tendensia di ta superfisial, [i] su siguidónan no ta muchu bon eduká den e fe.” Asta un enkuestadó a bai asina leu di deskribí Merka komo “un nashon di analfabeta bíbliko.” Pa ta franko, e opservashonnan aki ta konta tambe pa otro paisnan kaminda e asina yamá kristianismo ta reina. Hopi religion no-kristian tampoko no ta animá hende pa sigui lógika. Mas bien, nan ta duna hopi atenshon na kantika di alabansa, orashon ritual i vários forma di meditashon ku ta enserá kosnan místiko, en bes di pensamentu lógiko i konstruktivo.

Pero e mesun hendenan ku no ta wòri si nan kreensianan religioso ta eksakto òf basá riba bèrdat, hopi bes, den nan bida di tur dia, sí ta analisá otro kosnan masha bon mes. Bo no ta haña ta straño ku e mesun persona ku sí ta analisá un outo bon promé ku e kumpr’é—un outo ku un dia lo putri kaba na nada—ta bisa tokante su religion: ‘Si e tabata bon pa mi mayornan, lo e ta bon pa mi tambe’?

Si di bèrdat nos ta interesá na agradá Dios, nos lo no mester investigá seriamente si tur loke nos ta kere aden tokante dje ta eksakto? Apòstel Pablo a papia di sierto hende religioso di su tempu ku tabatin “un selo pa Dios, ma no segun konosementu.” (Romanonan 10:2) Por kompará hende asina ku un fèrfdó kontratá ku ta traha duru pa fèrf un kas, pero ta usa e  kolónan robes debí ku e no a skucha e instrukshonnan di e doño. E fèrfdó por ta masha kontentu ku su trabou, pero e doño ta pensa meskos?

Kiko Dios ta aseptá komo adorashon berdadero? Beibel ta kontestá: “Esaki ta bon i aseptabel den bista di Dios nos Salbador, kende ta deseá pa tur hende wòrdu salbá i yega na konosementu di e bèrdat.” (1 Timoteo 2:3, 4) Algun hende por pensa ku ta imposibel pa haña e konosementu ei den e hopi religionnan ku tin awe. Pero pensa riba esaki: Si ta Dios su boluntat pa hende yega na un konosementu eksakto di e bèrdat, lo e ta asina inhustu pa skond’é for di nan? No segun Beibel, ku ta bisa: “Si bo buska [Dios], e lo laga bo hañ’é.”—1 Krónikanan 28:9.

Kon Dios ta laga esnan ku ta busk’é sinseramente siña konos’é? E siguiente artíkulo lo kontestá esei.