Pakiko Batisá?
Pakiko Batisá?
“Bai i hasi tur e nashonnan disipel di mi, i batisá nan.” —Mateo 28:19.
1, 2. (a) Bou di ki sirkunstansianan algun boutismo a tuma lugá? (b) Ki preguntanan ta lanta relashoná ku boutismo?
E REI franko Karel e Grandi a obligá e sagonnan bou di su dominio batisá masalmente den e añanan 775 pa 777 Era Komun. Segun historiadó John Lord, “el a obligá nan kombertí na kristianismo pa nòmber.” Meskos tambe, despues ku e gobernante ruso Vladimir I a kasa ku un prinsesa griego òrtodòks na 987 Era Komun, el a disidí ku su súpditonan mester a bira “kristian.” El a dekretá un boutismo masal di su pueblo—ku kuchú na garganta si tabata nesesario!
2 E boutismonan ei tabata apropiado? Nan tin berdadero nifikashon? Ta tur hende mester batisá?
Kon Mester Batisá?
3, 4. Pakiko sprengumentu òf bashamentu di awa riba kabes no ta boutismo kristian?
3 Ora ku Karel e Grandi i Vladimir I a obligá hende pa batisá, e gobernantenan ei no a aktua segun e Palabra di Dios. De echo, sea ku e boutismo ta dor di sprengu òf basha awa riba kabes òf asta dor di manda e persona kompletamente bou di awa, batisá hende ku no a siña e bèrdat di Beibel no ta yuda nan ku nada.
4 Analisá loke a tuma lugá ora Hesus di Názarèt a bai serka Huan Boutista na aña 29 Era Komun. Huan tabata batisá hende den riu Yordan. Nan a bini boluntariamente serka dje pa batisá. El a djis laga nan para den Yordan segun ku e ta basha poko awa di riu riba nan kabes òf sprengu nan kuné? Kiko a sosodé ora Huan a batisá Hesus? Mateo ta informá ku despues ku Hesus a batisá el “a sali mesora for di awa.” (Mateo 3:16) E tabata den awa, i Huan a bah’é kompletamente bou di awa den riu Yordan. Di mes manera, e eunuko deboto di Etiopia a batisá den ‘un lugá ku tabatin hopi awa.’ E lugánan di awa ei tabata nesesario pasobra e boutismo di Hesus i su disipelnan a nifiká bai kompletamente bou di awa.—Echonan 8:36.
5. Kon e promé kristiannan a batisá hende?
5 E palabranan griego tradusí komo “batisá,” “boutismo,” etcetera, ta duna e idea di baha òf bai bou di awa. Smith’s Bible Dictionary ta bisa: “E nifikashon korekto i literal di boutismo ta bai bou di awa.” P’esei mes algun tradukshon di Beibel ta referí na Huan komo “esun ku ta manda òf hinka hende bou di awa.” (Mateo 3:1, Rotherham; Diaglott interlinear) E obra History of the Christian Religion and Church, During the Three First Centuries (Historia di Religion i Iglesia Kristian Durante e Tres Promé Siglonan) di Augustus Neander ta remarká: “Originalmente tabata batisá hende dor di manda nan bou di awa.” E famoso obra franses Larousse du XXe Siècle (Paris, 1928) ta komentá: “E promé kristiannan a batisá dor di bai bou di awa tur kaminda ku nan por a haña awa.” I e New Catholic Encyclopedia ta deklará: “Tin tur indikashon ku den e Iglesia di promé siglo hende tabata batisá dor di bai bou di awa.” (1967, Volúmen II, página 56) Pues awe, nos boutismo komo Testigu di Yehova ta un paso boluntario ku ta enserá bai kompletamente bou di awa.
Un Otro Motibu pa Batisá
6, 7. (a) Pa ki propósito Huan a efektuá boutismo? (b) Kiko tabata nobo tokante e boutismo di Hesus su siguidónan?
6 E boutismonan ku Huan a efektuá tabatin un otro propósito ku esnan ku Hesus su siguidónan a efektuá. (Huan 4:1, 2) Huan a batisá hende komo un símbolo públiko di nan repentimentu pa piká kontra e Lei. * (Lukas 3:3) Pero e boutismo di e siguidónan di Hesus tabatin algu nobo. Na Pentekòste di 33 Era Komun, apòstel Pedro a urgi su oyentenan: “Repentí, i laga kada un di boso wòrdu batisá den e nòmber di Hesukristu pa pordon di boso pikánan.” (Echonan 2:37-41) Ounke Pedro tabata dirigí su mes na e hudiunan i prosélitonan, e no tabata papia tokante boutismo pa simbolisá repentimentu pa piká kontra e Lei; ni e no tabata kier men ku boutismo den nòmber di Hesus ta nifiká laba piká.—Echonan 2:10.
7 N’e okashon ei Pedro a usa e promé ‘yabi dje reino.’ Pa ki propósito? Esei tabata pa el a duna di konosé na su oyentenan e oportunidat ku nan tabatin di drenta e Reino di shelu. (Mateo 16:19) E hudiunan a rechasá Hesus komo Mesías, i awor nan tabatin ku repentí i ehersé fe den dje pa nan por a buska i haña pordon di Dios. Esei tabata un faktor nobo i vital. Nan por a duna prueba públiko di un fe asina dor di baha bou di awa den nòmber di Hesukristu. Den e manera ei nan lo a simbolisá nan dedikashon personal na Dios mediante Kristu. Tur persona ku ta deseá di haña e aprobashon di Dios awe tin ku ehersé un fe similar, dediká nan mes na Yehova Dios, i someté nan n’e boutismo kristian komo símbolo di un dedikashon sin reserva n’e Dios Haltísimo.
Konosementu Eksakto Ta Esensial
8. Pakiko e boutismo kristian no ta pa tur hende?
8 Boutismo kristian no ta pa tur hende. Hesus a manda su siguidónan: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” (Mateo 28:19, 20) Promé ku un persona batisá, mester ‘siñ’é kumpli ku tur loke Hesus a ordená su disipelnan.’ P’esei, no tin sentido pa fòrsa hende ku no tin fe basá riba konosementu di e Palabra di Dios pa batisá. Tambe e ta kontrali na e tarea ku Hesus a duna su berdadero siguidónan.—Hebreonan 11:6.
9. Kiko kier men batisá “den nòmber di e Tata”?
9 Kiko ta nifiká batisá “den nòmber di e Tata”? Esei ta nifiká ku e kandidato pa boutismo ta rekonosé e posishon i outoridat di nos Tata selestial. E ta mira Yehova Dios komo nos Kreador, “e Haltísimo riba henter tera,” i e Soberano Universal.—Salmo 83:18; Isaías 40:28; Echonan 4:24.
10. Kiko kier men batisá ‘den nòmber di e Yu’?
10 Batisá ‘den nòmber di e Yu’ ta nifiká rekonosé Hesus su posishon i outoridat komo e Yu unigénito di Dios. (1 Huan 4:9) Esnan ku ta kualifiká pa boutismo ta aseptá Hesus komo esun mediante ken Dios a perkurá un “preis di reskate pa hopi.” (Mateo 20:28; 1 Timoteo 2:5, 6) Tambe kandidatonan pa boutismo mester rekonosé e “puesto superior” na kua Dios a halsa su Yu.—Filipensenan 2:8-11, NW; Revelashon 19:16.
11. Kiko ta nifiká batisá ‘den nòmber di spiritu santu’?
11 Kiko ta nifiká batisá ‘den nòmber di spiritu santu’? Esaki ta indiká ku e kandidato pa boutismo ta rekonosé ku e spiritu santu ta e forsa aktivo di Yehova ku e ta usa den vários manera na armonia ku su propósito. (Génesis 1:2; 2 Samuel 23:1, 2; 2 Pedro 1:21) Esnan ku ta kualifiká pa boutismo ta rekonosé ku e spiritu santu ta yuda nan komprendé “e profundidatnan di Dios,” sigui ku e obra di prediká e Reino, i manifestá e frutanan di spiritu ku ta “amor, goso, pas, pasenshi, kariño, bondat, fieldat, mansedumbre, dominio propio.”—1 Korintionan 2:10; Galationan 5:22, 23; Yoël 2:28, 29.
E Importansia di Repentí i Kombertí
12. Ki relashon tin entre boutismo kristian i repentimentu?
12 Ku eksepshon di e boutismo di e hòmber sin piká, Hesus, boutismo ta un símbolo di aprobashon di Dios despues ku un persona a repentí. Ora nos repentí, nos ta sinti un duele profundo, òf remordimentu, pa algu ku nos a hasi òf keda sin hasi. E hudiunan di promé siglo ku kier a agradá Dios tabatin ku repentí di nan pikánan kontra Kristu. (Echonan 3:11-19) Algun pagano ku a bira kreyente na Korinto a repentí di fornikashon, idolatria, hòrtamentu i otro piká serio. Pa motibu di nan repentimentu, nan a ser “labá” den e sanger di Hesus; “santifiká,” òf apartá, pa sirbi Dios; i “hustifiká” den nòmber di Kristu i ku spiritu di Dios. (1 Korintionan 6:9-11) Repentimentu ta un paso vital ku hende mester dal pa haña un bon konsenshi i e alivio ku Dios ta duna pa sintimentu di kulpa pa pikánan kometé.—1 Pedro 3:21.
13. Relashoná ku boutismo, kiko kier men kombertí?
13 Promé ku un persona batisá komo Testigu di Yehova e tin ku kombertí. Kombertimentu ta un akto boluntario i sin reserva di parti di un persona ku a disidí di kurason ku e kier sigui Kristu Hesus. Personanan asina ta rechasá e moda di anda robes ku nan tabatin den pasado i ta determiná pa hasi loke ta korekto den bista di Dios. Den e Skritura, e verbonan hebreo i griego relashoná ku kombertí tin e sentido di bira bèk. E akshon aki ta nifiká alehá for di un kaminda robes i akudí na Dios. (1 Reinan 8:33, 34) Kombertí ta nifiká tambe produsí “obranan ku ta kuadra ku repentimentu.” (Echonan 26:20) Tambe e ta rekerí bandoná adorashon falsu, aktua na armonia ku e mandamentunan di Dios i duna Yehova deboshon eksklusivo. (Deuteronomio 30:2, 8-10; 1 Samuel 7:3) Ora nos kombertí nos ta kambia nos manera di pensa, nos metanan i nos disposishon. (Ezekiel 18:31) Nos ta “bira bèk” segun ku nos ta remplasá mal karakterístikanan ku e personalidat nobo.—Echonan 3:19; Efesionan 4:20-24; Kolosensenan 3:5-14.
Dedikashon di Henter Kurason Ta Vital
14. Kiko e dedikashon di Hesus su siguidónan ta nifiká?
14 Promé ku siguidónan di Hesus batisá, tambe nan tin ku dediká nan mes di henter kurason na Dios. Dediká ta nifiká apartá pa un propósito sagrado. E paso aki ta asina importante ku ta den orashon nos tin ku bisa Yehova di nos desishon di dun’é deboshon eksklusivo pa semper. (Deuteronomio 5:9) Esei ta klaro pasobra nos no a dediká nos na un obra òf na un hende sino na Dios mes.
15. Pakiko kandidatonan pa boutismo ta someté nan na boutismo?
15 Ora nos dediká nos mes na Dios mediante Kristu, nos ta ekspresá un determinashon pa usa nos bida pa hasi e boluntat divino manera e Skritura ta manda. Komo símbolo di e dedikashon ei, kandidatonan pa boutismo ta someté nan na boutismo bou di awa, meskos ku Hesus a batisá den riu Yordan pa simbolisá e echo ku e ta presentá su mes na Dios. (Mateo 3:13) Ta bon pa nota ku Hesus tabata hasiendo orashon n’e okashon krusial ei.—Lukas 3:21, 22.
16. Kon nos por mustra nos goso na un manera apropiado ora nos ta mira hende batisá?
16 E boutismo di Hesus tabata un okashon serio pero gososo. E boutismo kristian di aktualidat ta meskos. Ora nos ta mira hende simbolisá nan dedikashon na Dios, nos por ekspresá nos goso ku un aplouso respetuoso i animashon kaluroso. Pero nos lo evitá di grita, flùit i kosnan por estilo, pasobra e ekspreshon di fe aki ta algu sagrado. Nos ta ekspresá nos goso na un manera digno.
17, 18. Kiko ta yuda determiná si un persona ta kumpli ku e rekisitonan pa batisá?
17 Kontrali na esnan ku ta sprengu awa riba beibi òf obligá grupo grandi di hende ku no tin konosementu di Beibel pa batisá, Testigunan di Yehova nunka ta fòrsa ningun hende batisá. De echo, nan no ta batisá esnan ku no ta kumpli ku e rekisitonan bíbliko. Promé ku un persona por bira asta un predikadó no-batisá di e bon nobo, ansianonan kristian ta hasi sigur ku e ta komprendé e siñansanan básiko di Beibel, ku e ta biba na armonia ku nan, i ku e ta respondé afirmativamente riba e pregunta aki: “Di bèrdat bo kier ta un Testigu di Yehova?”
18 Ora e personanan aki ta partisipá bon den e obra di prediká e Reino i ta ekspresá nan deseo di batisá—ku masha poko eksepshon—ansianonan kristian ta kòmbersá ku nan pa hasi sigur ku nan ta kreyente ku a hasi un dedikashon na Yehova i ku ta kumpli ku e rekisitonan di Dios pa boutismo. (Echonan 4:4; 18:8) E manera ku nan ta kontestá mas ku 100 pregunta riba siñansa di Beibel ta yuda e ansianonan determiná si nan ta kumpli ku e rekisitonan bíbliko pa batisá. Algun no ta kumpli ku tur i p’esei no por aseptá nan pa boutismo kristian.
Tin Algu ku Ta Tene Bo Atras?
19. En bista di loke Huan 6:44 ta bisa, ken lo ta ko-heredero huntu ku Hesus?
19 Podisé hopi di e hendenan ku a ser obligá pa batisá masalmente a ser bisá ku ora nan muri nan ta bai shelu. Pero Hesus a bisa di esnan ku ta sigui su pasonan: “Ni un hende no por bin serka mi, si no ta e Tata ku a manda mi a hal’é.” (Huan 6:44) Yehova a hala òf atraé 144.000 persona na Kristu ku lo ta ko-heredero ku Hesus den e Reino selestial. Boutismo fòrsá nunka a santifiká niun hende p’e posishon glorioso ei den e areglo di Dios.—Romanonan 8:14-17; 2 Tesalonisensenan 2:13; Revelashon 14:1.
20. Kiko lo por yuda algun persona ku ainda no a batisá?
20 Desde rònt di 1935 en partikular, multitut di hende ku ta spera di sobrebibí “e gran tribulashon” i biba riba tera pa semper a djòin e filanan di Hesus su “otro karnénan.” (Revelashon 7:9, 14; Huan 10:16) Nan ta kualifiká pa boutismo pasobra nan a armonisá nan bida ku e Palabra di Dios i ta stim’é ‘ku henter nan kurason, alma, forsa i mente.’ (Lukas 10:25-28) Ounke algun hende ta realisá ku Testigunan di Yehova ta ‘adorá Dios den spiritu i bèrdat,’ ainda nan no a sigui e ehèmpel di Hesus i duna evidensia públiko di amor genuino i deboshon eksklusivo na Yehova dor di batisá. (Huan 4:23, 24; Deuteronomio 4:24; Marko 1:9-11) Orashon sinsero i spesífiko relashoná ku e paso vital aki por duna nan nèt e insentivo i kurashi ku nan mester pa kumpli kompletamente ku e Palabra di Dios, pa hasi un dedikashon sin reserva na Yehova Dios i pa batisá.
21, 22. Pa ki motibunan algun hende ta wanta ku dedikashon i boutismo?
21 Algun persona ta asina apsorbá den kosnan di mundu òf korementu tras di plaser ku nan no ta sobra masha tempu pa kosnan spiritual. Dor di esei nan ta wanta ku dedikashon i boutismo. (Mateo 13:22; 1 Huan 2:15-17) Nan lo por ta felis si nan kambia nan punto di bista i metanan! Ora hende ta hala serka Yehova, esei lo enrikesé nan spiritualmente, lo yuda aliviá nan di ansiedat i lo duna nan e pas i e satisfakshon ku hasimentu di e boluntat di Dios ta trese kuné.—Salmo 16:11; 40:8; Proverbionan 10:22; Filipensenan 4:6, 7.
22 Otronan ta bisa ku nan ta stima Yehova pero nan no ta hasi un dedikashon i batisá pasobra nan ta pensa ku asina nan ta evitá di tin ku rindi kuenta na Dios. Pero kada un di nos tin ku rindi kuenta na Dios. For di ora nos a tende e palabra di Yehova, nos a haña un responsabilidat. (Ezekiel 33:7-9; Romanonan 14:12) Komo un ‘pueblo skohí,’ e israelitanan di pasado a nase den un nashon dediká na Yehova, i p’esei nan tabatin e obligashon di sirbié fielmente segun su instrukshonnan. (Deuteronomio 7:6, 11) Awe, no tin niun hende ku ta nase den un nashon asina, pero si nos a risibí instrukshon eksakto di e Skritura, nos tin ku sigui nan ku fe.
23, 24. Ki temornan no mester pone hende wanta ku boutismo?
23 Algun tin miedu ku nan no tin sufisiente konosementu i p’esei nan ta wanta ku boutismo. Pero, ta nos tur tin hopi di siña pasobra ‘hamas hende lo haña sa e trabou ku Dios a hasi for di prinsipio te na fin.’ (Eklesiástes 3:11) Tuma por ehèmpel e eunuko di Etiopia. Komo prosélito, e tabatin un poko konosementu di e Skritura, pero e no por a kontestá tur pregunta tokante e propósito di Dios. Pero despues ku el a haña sa di e areglo di Yehova pa salbashon mediante e sakrifisio di reskate di Hesus, mesora el a someté su mes na boutismo bou di awa.—Echonan 8:26-38.
24 Algun persona ta duda pa hasi un dedikashon na Dios pasobra nan tin miedu di faya. Monique di 17 aña ta bisa: “Mi a wanta ku boutismo dor ku mi tabatin miedu ku lo mi no por kumpli ku mi dedikashon.” Pero si nos ta konfia den Yehova ku henter nos kurason, ‘lo e dirigí nos bereanan.’ Lo e yuda nos “kana den e bèrdat” komo su fiel sirbidónan dediká.—Proverbionan 3:5, 6; 3 Huan 4.
25. Ki pregunta ta meresé nos konsiderashon awor?
25 Konfiansa apsoluto den Yehova i amor sinsero p’e ta impulsá tur aña míles di hende pa dediká nan na dje i batisá. I siguramente tur sirbidó dediká di Dios kier ta fiel na dje. Sin embargo, nos ta biba den tempunan trabahoso, i nos ta enfrentá vários prueba di fe. (2 Timoteo 3:1-5) Kiko nos por hasi pa kumpli ku nos dedikashon na Yehova? Nos lo konsiderá esaki den e siguiente artíkulo.
[Nota]
^ par. 6 Hesus no tabatin piká, p’esei su boutismo no tabata un símbolo di repentimentu. Su boutismo tabata un símbolo ku el a presentá su mes na Dios pa hasi e boluntat di su Tata.—Hebreonan 7:26; 10:5-10.
Bo Ta Kòrda?
• Kon e boutismo kristian ta ser efektuá?
• Ki konosementu un persona tin mester p’e batisá?
• Ki pasonan ta hiba n’e boutismo di kristiannan berdadero?
• Pakiko algun persona ta wanta ku boutismo, pero kiko por yuda nan?
[Preguntanan di Estudio]
[Plachinan na página 14]
Bo sa kiko ta nifiká batisá ‘den nòmber di e Tata, di e Yu i di spiritu santu’?