Sigui Sirbi Yehova ku un Kurason Firme
Sigui Sirbi Yehova ku un Kurason Firme
“Mi kurason ta para firme, o Dios, mi kurason ta para firme.”—SALMO 57:7.
1. Dikon nos por tin e mesun konvikshon ku David tabatin?
YEHOVA por pone nos para firme den e fe kristian pa nos por pega na kristianismo berdadero komo su sirbidónan dediká. (Romanonan 14:4) P’esei, nos por tin e mesun konvikshon ku e salmista David, kende a sinti su mes impulsá pa kanta: “Mi kurason ta para firme, o Dios.” (Salmo 108:1) Si nos kurason ta para firme, nos lo ta motivá pa kumpli ku nos dedikashon na Dios. I dor di akudí na dje pa guia i fortalesa, nos por duna prueba di ta inmovibel, firme den determinashon i konvikshon komo wardadó di integridat, “semper abundando den e trabou di Señor.”—1 Korintionan 15:58.
2, 3. Kiko ta e nifikashon di e apelashon urgente ku Pablo a registrá na 1 Korintionan 16:13?
2 Den un apelashon urgente ku apòstel Pablo a hasi n’e siguidónan di Hesus den e stat Korinto di pasado, pero ku sigur-sigur te ainda ta aplikabel, el a bisa: “Sea alerta, para firme den fe, aktua manera hòmber, sea fuerte.” (1 Korintionan 16:13) Na griego kada un di e verbonan imperativo aki (den forma di mandato) ta den e tempu presente. Pues, nan ta urgi akshon kontinuo. Kiko e spièrtamentu aki ta nifiká?
3 Nos por ta spiritualmente “alerta” dor di oponé Diabel i hala serka Dios. (Santiago 4:7, 8) E echo ku nos ta dependé riba Yehova ta pèrmití nos keda uní i ‘para firme den e fe kristian.’ Nos, huntu ku e hopi ruman muhénan ku nos tin, ta “aktua manera hòmber” sirbiendo Dios ku kurashi komo proklamadónan di Reino. (Salmo 68:11) Nos ta bira “fuerte” dor di akudí kontinuamente na nos Tata selestial pa e duna nos forsa pa hasi su boluntat.—Filipensenan 4:13.
4. Kiko a hiba na nos boutismo komo kristian?
4 Nos a demostrá ku nos a aseptá e bèrdat ora nos a hasi un dedikashon sin reserva na Yehova i a simbolisá esei dor di someté nos na boutismo bou di awa. Pero kiko a hiba na nos boutismo? Na promé lugá, nos a gana konosementu eksakto di e Palabra di Dios. (Huan 17:3) Dor di esei nos a haña fe i nos a sinti nos impulsá pa repentí. Nos a sinti ègt duele di e malu ku nos a hasi den pasado. (Echonan 3:19; Hebreonan 11:6) Despues nos a kombertí, pasobra nos a alehá for di e práktikanan inkorekto pa por sigui un bida na armonia ku e boluntat di Dios. (Romanonan 12:2; Efesionan 4:23, 24) Despues di esaki nos a hasi un dedikashon di henter kurason na Yehova den orashon. (Mateo 16:24; 1 Pedro 2:21) Nos a hasi petishon na Dios pa un bon konsenshi i a batisá komo símbolo di nos dedikashon na dje. (1 Pedro 3:21) Ora nos ta meditá riba e pasonan aki, esaki lo yuda nos keda enfoká riba e nesesidat pa hasi esfuerso kontinuo pa kumpli ku nos dedikashon i sigui sirbi Yehova ku un kurason firme.
Sigui Buska Konosementu Eksakto
5. Pakiko nos tin ku sigui gana konosementu di Beibel?
5 Pa kumpli ku nos dedikashon na Dios, nos tin ku sigui gana konosementu basá riba Beibel. Ora ku na prinsipio nos a konosé e bèrdat di Dios, tabata un berdadero deleite pa haña alimento spiritual! (Mateo 24:45-47) E “kumindanan” ei tabata delisioso, i nan a nutri nos bon spiritualmente. Awor ta esensial pa sigui tuma alimento spiritual nutritivo pa asina nos por mantené un kurason firme komo Yehova su sirbidónan dediká.
6. Kon abo kisas a ser yudá pa desaroyá gratitut di kurason pa e bèrdat di Beibel?
6 Esfuerso ta nesesario pa gana mas konosementu di e Skritura. Esei ta manera buska tesoro skondí, algu ku ta rekerí esfuerso. Pero ta ki un rekompensa pa haña “e konosementu di Dios”! (Proverbionan 2:1-6) Ora un publikadó di Reino a studia Beibel na promé instante ku bo, podisé el a usa e buki Conocimentu cu ta hiba na bida eterno. Kisas lo el a usa basta tempu pa trata kada kapítulo, tal bes den mas ku un seshon. Bo a saka hopi benefisio ora boso tabata lesa i analisá e tekstonan. Ora bo tabatin difikultat pa komprendé un punto, el a ser spliká. Esun ku a kondusí e studio di Beibel ku bo tabata prepará bon, tabata pidi Dios su spiritu den orashon, i el a yuda bo desaroyá un kurason gradisidu pa e bèrdat.
7. Kon un persona ta bira kapas pa e siña otro hende e bèrdat di Dios?
7 E esfuerso aki tabata apropiado, pasobra Pablo a skirbi: “Laga esun ku ta wòrdu siñá den e palabra kompartí tur kos bon ku esun ku ta siñ’é.” (Galationan 6:6) Aki e teksto griego ta indiká ku e siñansanan di e Palabra di Dios a ser inkulká den mente i kurason di esun ku ta “wòrdu siñá.” E echo ku bo a ser siñá asina ta kapasitá bo komo maestro pa abo siña otro hende. (Echonan 18:25) Pa bo ta fiel na bo dedikashon, bo tin ku mantené bo salú spiritual i firmesa dor di sigui studia e Palabra di Dios.—1 Timoteo 4:13; Tito 1:13; 2:2.
Kòrda Kon Bo A Repentí i Kombertí
8. Di ki manera ta posibel pa mantené un kondukta di akuerdo ku e normanan di Dios?
8 Bo ta kòrda e alivio ku bo a haña ora bo a siña e bèrdat, a repentí i despues a sinti ku basá riba fe den Hesus su sakrifisio di reskate, Dios a pordoná bo pikánan? (Salmo 32:1-5; Romanonan 5:8; 1 Pedro 3:18) Sigur lo bo no kier bolbe na un bida di piká. (2 Pedro 2:20-22) Entre otro kosnan, orashon regular na Yehova lo yuda bo mantené un kondukta di akuerdo ku e normanan di Dios, kumpli ku bo dedikashon i sigui sirbi Yehova fielmente.—2 Pedro 3:11, 12.
9. Una bes ku nos a alehá for di práktikanan pekaminoso, ki rumbo nos tin ku sigui?
9 Una bes ku bo a kombertí dor di alehá for di práktikanan pekaminoso, sigui buska e yudansa di Dios dor di mantené bo kurason firme. Na moda di papia, bo tabata bayendo riba e karetera robes pero a konsultá un mapa konfiabel i a kuminsá biaha riba e kaminda korekto. Awor, wak pa bo no bruha. Sigui konfia den e guia di Dios i sea determiná pa keda riba e kaminda ku ta hiba na bida.—Isaías 30:20, 21; Mateo 7:13, 14.
Nunka Lubidá Bo Dedikashon i Boutismo
10. Ki puntonan nos mester tene na mente relashoná ku nos dedikashon na Dios?
10 Kòrda ku bo a hasi un dedikashon na Yehova den orashon, ku e meta di sirbié fielmente pa eternidat. (Hudas 20, 21) Dediká ta nifiká apartá òf separá pa un propósito sagrado. (Levítiko 15:31; 22:2) Bo dedikashon no tabata un akuerdo temporal ni un kompromiso ku hende. E tabata un dedikashon permanente n’e Soberano Universal, i pa kumpli kuné nos mester ta leal na Dios pa bida largu. Sí, ‘sea ku nos biba òf muri, ta di Yehova nos ta.’ (Romanonan 14:7, 8) Ta si nos ta sumiso na su boluntat i ta sigui sirbié ku un kurason firme, nos por ta felis.
11. Pakiko bo tin ku kòrda bo boutismo i loke e ta nifiká?
11 Semper kòrda bo boutismo komo símbolo di bo dedikashon di henter kurason na Dios. Esei no tabata un boutismo fòrsá, pasobra ta bo mes a tuma e desishon ei. Bo ta determiná awor pa ehersé bo boluntat na armonia ku e boluntat di Dios pa e restu di bo bida? Bo a hasi un petishon na Dios pa un bon konsenshi i a batisá komo símbolo di bo dedikashon na dje. Konserbá e bon konsenshi ei dor di kumpli ku bo dedikashon, i e bendishon riku di Yehova lo deskansá riba bo.—Proverbionan 10:22.
Bo Boluntat Ta Hunga un Ròl
12, 13. Ki relashon tin entre nos boluntat propio ku dedikashon i boutismo?
12 En bèrdat dedikashon i boutismo a trese gran bendishon pa miónes di hende rònt mundu. Ora nos simbolisá nos dedikashon na Dios dor di someté nos na boutismo bou di awa, nos ta muri pa loke ta nos kurso di bida den pasado. Pero esei no kier men ku nos no tin nos propio boluntat mas. Komo kreyentenan ku a wòrdu siñá apropiadamente, en realidat ta di nos propio boluntat nos a hasi un dedikashon na Dios den orashon i a batisá. Pa nos hasi un dedikashon i despues batisá, nos tin ku determiná kiko ta e boluntat di Dios anto skohe deliberadamente p’e. (Efesionan 5:17) Asina nos ta imitá Hesus, kende di su propio boluntat a pone su hèrmèntnan di karpinté un banda, a batisá i dediká su mes kompletamente pa hasi e boluntat di su Tata selestial.—Salmo 40:7, 8; Huan 6:38-40.
13 Tabata e propósito di Yehova Dios pa su Yu ser ‘perfekshoná pa medio di sufrimentu.’ P’esei Hesus tabatin ku ehersé su boluntat pa wanta tal sufrimentu fielmente. Ku mira riba esei, el a ofresé “súplika ku gran sklamashon i lágrima . . . i el a wòrdu tendé pa motibu di su piedat.” (Hebreonan 2:10, 18; 5:7, 8) Si nos manifestá mesun temor respetuoso pa Dios, nos tambe sigur lo wòrdu “tendé,” i nos por tin konfiansa ku Yehova lo hasi nos firme komo su Testigunan dediká.—Isaías 43:10.
Bo Por Mantené un Kurason Firme
14. Pakiko nos tin ku lesa Beibel tur dia?
14 Kiko lo yuda bo mantené un kurason firme i asina kumpli ku bo dedikashon na Dios? Pa bo por gana e konosementu oumentante di e Palabra di Dios, lesa Beibel tur dia. Esaki ta algu ku “e esklabo fiel i prudente” ta urgi nos pa hasi konstantemente. Nos a haña e konseho ei pasobra pa kumpli ku nos dedikashon nos tin ku sigui kana den e bèrdat di Dios. Si e organisashon di Yehova ta respaldá siñansa falsu konsientemente, hamas lo el a konsehá Testigunan di Yehova i esnan na ken nan ta prediká pa lesa Beibel.
15. (a) Kiko mester konsiderá ora di tuma desishon? (b) Pakiko nos por bisa ku trabou ta e vokashon sekundario di un kristian?
15 Ora di tuma desishon, semper wak ki efekto eseinan por tin riba bo dedikashon na Yehova. Esaki por tin di haber ku bo trabou. Bo ta hasi esfuerso pa bo trabou por ta un yudansa pa bo den promové adorashon berdadero? Por lo general doñonan di trabou ta haña ku kristiannan dediká ta hende konfiabel i efisiente. Tambe nan ta ripará ku Testigunan di Yehova no ta muchu ambisioso pa bai dilanti den mundu ni no ta kompetí ku otro hende pa e posishonnan di mas lukrativo. Esaki ta asina pasobra e meta di e Testigunan no ta pa alkansá rikesa, fama, prestigio ni poder. Pa esnan ku ta kumpli ku nan dedikashon na Dios, e kos di mas importante ta hasi e boluntat divino. Un trabou ku ta pèrmití nan haña e nesesidatnan básiko di bida ta un vokashon di importansia sekundario. Meskos ku apòstel Pablo, nan vokashon, òf trabou prinsipal, ta e ministerio kristian. (Echonan 18:3, 4; 2 Tesalonisensenan 3:7, 8; 1 Timoteo 5:8) Abo ta mantené interesnan di Reino na promé lugá den bo bida?—Mateo 6:25-33.
16. Kiko nos por hasi si ansiedat innesesario ta stroba nos di kumpli ku nos dedikashon na Dios?
16 Algun hende lo por a haña nan ku vários ansiedat promé ku nan a konosé e bèrdat. Pero nan kurason a hincha di goso, gratitut i amor pa Dios ora nan a brasa e speransa di Reino! Dor di reflekshoná riba e bendishonnan ku nan a disfrutá di dje desde e tempu ei, esaki lo por yuda nan kumpli mihó ku nan dedikashon na Yehova. Di otro banda, kiko bo por hasi awor si ansiedat innesesario ku e problemanan komun di bida den e sistema aki ta kousa, ta menasá di hoga “e palabra di Dios,” meskos ku sumpiña ta stroba un mata chikitu di bira grandi i duna fruta? (Lukas 8:7, 11, 14; Mateo 13:22; Marko 4:18, 19) Si bo sinti ku esaki a kuminsá sosodé ku abo òf bo famia, tira bo ansiedat riba Yehova i pidié den orashon p’e yuda bo krese den amor i apresio. Si bo tira bo karga riba dje, lo e sostené bo i duna bo e forsa pa sigui sirbié felismente ku un kurason firme.—Salmo 55:22; Filipensenan 4:6, 7; Revelashon 2:4.
17. Kon ta posibel pa enfrentá prueba severo?
17 Sigui resa na Yehova Dios regularmente, meskos ku bo a hasi orashon ora bo a dediká bo mes na dje. (Salmo 65:2) Ora bo ser tentá pa hasi malu òf ora bo ta enfrentá un prueba severo, buska e guia di Dios i su yudansa pa siguié. Kòrda ku bo mester tin fe, pasobra disipel Santiago a skirbi: “Ma si kualkier di boso falta sabiduria [pa enfrentá un prueba], lagu’é pidi Dios, kende ta duna na tur hende generosamente i sin reproche, i esaki lo wòrdu duná na dje. Ma lagu’é pidi den fe sin ningun duda, pasobra esun ku duda ta manera un ola di laman ku ta wòrdu lastrá i tirá dor di bientu. Pasobra no laga e hende ei spera ku e lo risibí algu di Señor, siendo un hende di kurason dòbel, inkonstante den tur su kamindanan.” (Santiago 1:5-8) Si un prueba ta parse aplastante, nos por ta sigur di esaki: “Ningun tentashon, fuera di loke tur hende ta pasa aden, no a bin riba boso; i Dios ta fiel, kende lo no pèrmití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.”—1 Korintionan 10:13.
18. Kiko nos por hasi si un piká serio skondí ta debilitando nos determinashon pa kumpli ku nos dedikashon na Yehova?
18 Kiko bo por hasi si un piká serio skondí ta molestiando bo konsenshi i debilitando bo determinashon pa kumpli ku bo dedikashon na Dios? Si bo ta repentí, bo por haña konsuelo den e echo ku bo sa ku Yehova ‘lo no despresiá un kurason repentí i kibrá.’ (Salmo 51:17) Buska yudansa di ansianonan kristian amoroso, sabiendo ku nan, meskos ku Yehova, lo no minimisá bo deseo di rekuperá un bon relashon ku bo Tata selestial. (Salmo 103:10-14; Santiago 5:13-15) Anto ku forsa spiritual renobá i un kurason firme, lo bo por traha bereanan stret pa bo pianan i ripará ku ta posibel pa kumpli ku bo dedikashon na Dios.—Hebreonan 12:12, 13.
Sigui Sirbi ku un Kurason Firme
19, 20. Pakiko ta vital pa nos sigui kumpli ku nos dedikashon?
19 Den e tempu krítiko aki, nos tin ku traha duru pa kumpli ku nos dedikashon i sigui sirbi Dios ku un kurason firme. Hesus a bisa: “Esun ku pèrseverá te na fin, esei lo ta salbá.” (Mateo 24:13) Nos ta biba den “e último dianan,” i e fin por bini kualkier momentu. (2 Timoteo 3:1) Ademas, niun di nos ta sigur ku mañan nos ta na bida. (Santiago 4:13, 14) P’esei ta masha vital pa nos sigui kumpli ku nos dedikashon awe!
20 Apòstel Pedro ta enfatisá esaki den su di dos karta. El a mustra ku meskos ku e malbadonan a peresé den e Diluvio, asina e tera simbóliko, òf sosiedat humano malbado, lo ser destruí durante “e dia di Señor.” P’esei Pedro a sklama: “Ki sorto di hende boso mester ta den un kondukta santu i deboto”! Tambe el a urgi nan: “Boso . . . , stimánan, sabiendo esaki di antemano, tene kuidou, pa boso no wòrdu lastrá hibá [dor di maestro falsu i hòmber malbado] i boso kai for di boso mes firmesa.” (2 Pedro 3:5-17) Lo ta masha lamentabel pa un persona batisá desviá i yega na fin di su bida pa motibu ku e no a mantené un kurason firme!
21, 22. Kon e palabranan di Salmo 57:7 a resultá di ta sierto den e kaso di David i di kristiannan berdadero?
21 Si bo tene na mente e dia felis di bo boutismo i buska e yudansa di Dios pa asina bo palabra i echonan alegrá su kurason, bo determinashon pa kumpli ku bo dedikashon na Dios lo por bira mas fuerte. (Proverbionan 27:11) Yehova nunka ta faya ku su pueblo, i siguramente nos mester ta fiel na dje. (Salmo 94:14) El a mustra miserikòrdia i kompashon ora el a frustra e plannan di enemigunan i a salba David. Gradisidu pa esaki, David a deklará e firmesa, e konstansia, di su amor pa su Salbador. Ku sintimentu profundo, el a kanta: “Mi kurason ta para firme, o Dios, mi kurason ta para firme; lo mi kanta, sí, lo mi kanta alabansa!”—Salmo 57:7.
22 Meskos ku David, kristiannan berdadero no ta vasilá den nan dedikashon na Dios. Ku kurason firme, nan ta duna krédito na Yehova komo esun ku a libra nan i konserbá nan na bida, i na dje nan ta kanta alabansa gososamente. Si bo kurason ta firme, lo e dependé riba Dios, i ku su yudansa lo bo por kumpli ku bo dedikashon. Sí, bo por ta manera “e hustu,” di kende e salmista a kanta: “E lo no tin miedu di mal notisia; su kurason ta trankil, konfiando den SEÑOR.” (Salmo 112:6, 7) Ku fe den Dios i konfiansa kompleto den dje, bo por kumpli ku bo dedikashon i sigui sirbi Yehova ku un kurason firme.
Bo Ta Kòrda?
• Pakiko nos mester sigui gana konosementu eksakto di Beibel?
• Pakiko nos tin ku sigui tene nos repentimentu i kombertimentu na mente?
• Ora nos ta kòrda riba nos dedikashon i boutismo, kon esei ta benefisiá nos?
• Kiko lo yuda nos sigui sirbi Yehova ku un kurason firme?
[Preguntanan di Estudio]
[Plachinan na página 18]
Dor di hasi e ministerio kristian nos trabou prinsipal, esaki ta yuda nos sigui sirbi Yehova ku un kurason firme
[Plachi na página 18]
Abo ta mantené bo mes spiritualmente salú dor di studia e Palabra di Dios tur dia?