Dos Pastor Ku A Apresiá Loke Russell A Skirbi

NA 1891, Charles Taze Russell, kende a hasi un trabou ekselente entre e berdadero adoradónan kristian di Yehova, a bishitá Europa pa promé bes. Segun algun informe, durante un estadia di tránsito na Pinerolo, Italia, Russell a topa ku Profesor Daniele Rivoire, un eks-pastor di un grupo religioso ku tabata yama waldense. * Ounke Rivoire a keda ku kontakto estrecho ku e waldensenan despues ku el a bandoná e saserdosio, el a keda ku un mente habrí i a lesa hopi publikashon ku C. T. Russell a skirbi.

Na 1903, Rivoire a tradusí e buki di Russell, E Plan Divino di Épokanan na italiano i e mes a paga e gastunan di imprenta. Esaki tabata hopi tempu promé ku nan a publiká un edishon ofisial na italiano. Den e introdukshon dje buki, Rivoire a skirbi: “Nos ta pone e promé edishon italiano aki bou di protekshon di Señor. Lagu’é bendishon’é di tal forma ku apesar di [e buki] su imperfekshonnan, e por kontribuí na engrandesé Señor su nòmber santísimo i animá su yunan di abla italiano pa bira mas deboto. Ohalá kurason di tur esnan ku lesa e buki aki apresiá e profundidat di rikesa, sabiduria i e konosementu di Dios su plan i amor, i nan gradisí Dios mes. Ta ku su aprobashon, publikashon di e buki aki a bira posibel.”

Tambe Rivoire a kuminsá tradusí Zion’s Watchtower and Herald of Christ’s Presence na italiano. Nan tabata publiká e revista aki, un forma anterior di E Toren di Vigilansia, kada tres luna na 1903. Maske nunca Profesor Rivoire a bira un Studiante di Beibel, manera nan tabata yama Testigunan di Yehova e tempu ei, el a mustra hopi interes den plama e mensahe di Beibel ku e publikashonnan di Studiantenan di Beibel tabata splika.

“Ta Komo Si Fuera Skama A Kai for di Mi Wowo”

Un otro pastor waldense ku a apresiá Russell su publikashonnan tabata Giuseppe Banchetti. Su tata, kende tabata un eks-katóliko ku a kombertí, a kri’é komo waldense. Na 1894, Giuseppe a bira pastor i a sirbi vários komunidat waldense na Apulia i Abruzzi i riba e islanan Elba i Sisilia.

E edishon italiano outorisá di Russell su Plan Divino di Épokanan a ser publiká na 1905. Banchetti a skirbi un análisis interesante tokante e buki. El a aparesé den e revista protestant La Rivista Cristiana. Banchetti a skirbi: “Pa nos, Russell su buki ta e guia mas iluminá i sigur ku kualkier kristian por haña pa kuminsá un studio benefisioso i rekompensador di e Skritura Santu . . . Asina ku mi a les’é tabata komo si fuera skama a kai for di mi wowo, i ku e kaminda di Dios  tabata mas stret i mas fásil. Mayoria di e aparente kontradikshonnan asta a disparsé. Doktrinanan ku na un tempu tabata difísil pa komprendé a parse simpel i perfektamente aseptabel. Kosnan ku anteriormente tabata inkomprendibel a bira kla. E plan atmirabel pa salba mundu mediante Kristu a parse mi asina simpel i asombroso ku esei a impulsá mi pa sklama manera e apòstel: ‘O profundidat di e rikesanan, tantu di e sabiduria komo di e konosementu di Dios!’”—Romanonan 11:33.

Manera Remigio Cuminetti a remarká na 1925, Banchetti tabata “masha di akuerdo” ku e obra di e Studiantenan di Beibel i e tabata “plenamente konvensí” di e doktrinanan ku nan a splika. Na su manera, Banchetti tambe a hasi esfuerso pa e doktrinanan ei bira konosí.

For di loke Banchetti a skirbi ta bisto ku, meskos ku Testigunan di Yehova, e tambe a kere ku lo tin un resurekshon terenal manera e Skritura ta siña. Tambe e tabata di akuerdo ku e Studiantenan di Beibel ora el a splika ku e aña ku Hesus a muri a ser predeterminá i ku Dios a revelá esaki den e profesia di 70 siman di Daniel. (Daniel 9:24-27) Mas ku un bes, i bayendo abiertamente kontra e siñansanan di su iglesia, el a mustra ku e Memorial di e morto di Hesukristu mester ser tene solamente un bes pa aña, “presis riba e dia ku e fecha ta kai.” (Lukas 22:19, 20) El a rechasá e teoria di evolushon di Darwin, i el a afirmá ku kristiannan berdadero no mester partisipá den guera.—Isaías 2:4.

Un biaha, Banchetti tabata kòmbersá ku un hòmber ku yama J. Campbell Wall tokante loke Russell a skirbi. Kontestando Wall su krítika, Banchetti a bisa: “Mi ta sigur ku si bo lesa e seis volúmennan di Russell, lo bo eksperensiá un goso profundo i vigoroso. I yen di emoshon lo bo gradisí mi. Mi no ta broma ku doktrina; pero diesun aña pasá mi a lesa e bukinan ei, i tur dia mi ta gradisí Dios pa a pone e lus i konsuelo ei mi dilanti mediante un obra ku ta kompletamente i firmemente basá riba e Skritura Santu.”

“Skucha, Skucha, Skucha”

Ta remarkabel ku e dos pastornan waldense aki—Daniele Rivoire i Giuseppe Banchetti—a ekspresá nan apresio p’e manera ku Russell a splika Beibel. Banchetti a skirbi: “Mi ta bisa ku nos niun komo hende no sa tur kos. Nos niun ku ta evangéliko, ni sikiera nos pastornan òf profesornan den teologia. Nos tin hopi, hopi mas kos di siña. . . . [Nos mester] . . . para ketu i skucha, sin pensa ku nos sa tur kos, i no rechasá loke nos haña pa investigá. Mas bien, skucha, skucha, skucha.”

Tur aña míles di hende ta skucha e mensahe di Reino ku Testigunan di Yehova ta trese na nan kas. Tur kaminda hende ku mente habrí i ku tin hamber p’e bèrdat di Beibel ta respondé na Hesus su invitashon: “Bin, sigui mi.”—Marko 10:17-21; Revelashon 22:17.

[Nota]

[Plachi na página 28]

Profesor Daniele Rivoire

[Plachi na página 29]

Giuseppe Banchetti

[Rekonosementu]

Banchetti: La Luce, 14 di aprel 1926