Glorifikando Dios den e Serunan di Filipínas

Bo tin rason si bo ta pensa ku Filipínas ta un grupo di isla. Pero tambe e ta un pais ku serunan impreshonante. Testigunan di Yehova por a prediká relativamente fásil i efikas den stat i áreanan ku tereno plat. Sin embargo, e situashon den e region di serunan ta diferente.

E SERUNAN magnífiko di e pais aki ta forma un kontraste skèrpi ku e playanan di santu, e refnan di koral, e pueblitunan di piskadó i statnan drùk den e áreanan plat di e islanan. Ademas e serunan ta forma un opstákulo grandi p’e predikashon dje bon nobo, e “evangelio” di e Reino di Dios.—Mateo 24:14.

E islanan di Filipínas ta situá na un sitio kaminda dos plachi tektóniko ta dal den otro. * E preshon den e área aki a forma lombanan di serunan steil riba e islanan mas grandi. Mas ku 7.100 isla, ku ta forma e pais Filipínas, ta situá riba e kurva wèst dje Renchi di Kandela den Oséano Pasífiko, kaminda tin mas ku mitar dje volkannan na mundu. Pues, e islanan tin hopi volkan, i esei tambe ta kontribuí n’e formashon di e paisahe yen di seru. E serunan steil i yen di mondi a pone ku e hendenan ku ta biba den seru a keda isolá. Ta difísil pa yega serka nan pasobra masha poko di nan kamindanan ta adekuá pa outo kore ariba.

Apesar di tur e opstákulonan ei, Testigunan di Yehova ta konsiente ku nan mester yega serka “tur hende.” (1 Timoteo 2:4) P’esei, e Testigunan na Filipínas a aktua na armonia ku e nifikashon di Isaías 42:11 i 12: “Laga e habitantenan di Sela [baranka steil, NW] kanta duru, laga nan grita di goso for di kabes di e serunan. Laga nan duna gloria na SEÑOR, i deklará su alabansa den e teranan na kosta.”

Mas ku 50 aña pasá nan a kuminsá hasi esfuerso intenso pa prediká na hende ku ta biba den e serunan. Despues di Segundo Guera Mundial, misioneronan a yuda duna un empuhe na e trabou. Hopi habitante lokal a aseptá e  bèrdat di Beibel i nan, na nan turno, a yuda plama e bèrdat aki den e pueblitunan te leu den e serunan. Esaki tabatin resultadonan ekselente. Por ehèmpel den e serunan di Kordiyera Sentral di nort Luzon, tin mas ku 6.000 publikadó dje bon nobo. Mayoria di nan ta hende lokal, ku ta bini entre otro di e pueblonan ibaloi, ifugao i kalinga.

Sin embargo, ainda tin áreanan den seru ku ta difísil pa yega na dje. E Testigunan no a lubidá riba e hendenan ku ta biba einan. Kon nan a alkansá algun di nan, i kiko tabata e reakshon?

Berdadero Fe Ta Remplasá Tradishon

Riba e isla Luzon ku ta keda n’e parti nort, e pueblo tinggiano ta biba den e áreanan di seru di e provinsia Abra. E nòmber dje pueblo aki ta bini di e palabra antiguo na idioma malayo, tinggi, ku ta nifiká “seru.” Un nòmber ku ta pas hopi bon! Tambe e pueblo ta yama nan mes i nan idioma itneg. Nan ta kere den un dios ku yama Kabunian, i superstishon tin hopi influensia riba nan bida diario. Por ehèmpel, si un persona ku ta planea pa bai un kaminda nister, esei ta un mal señal. E tin ku warda un par di ora p’e mal influensia kita.

Na 1572, e spañónan a introdusí katolisismo, pero nan no a siña e tinggianonan berdadero kristianismo. E hendenan ku a bira katóliko a sigui kere den Kabunian i a sigui nan kustumbernan lokal. Konosementu eksakto di Beibel a yega na e hendenan aki ora ku den añanan ’30 di siglo 20, Testigunan di Yehova a kuminsá plama e mensahe di Reino den e serunan ei. Di e tempu ei en adelante, hopi tinggiano sinsero a kuminsá glorifiká Yehova “for di kabes di e serunan.”

Por ehèmpel, Lingbaoan tabata un lider di tribu respetá den e área. E tabata hopi enbolbí den e kultura tinggiano. E ta konta: “Mi tabata sigui e tradishonnan tinggiano fielmente. Ora un persona ser asesiná, despues di entiero nos tabata  baila i bati klòk. Tambe nos tabata sakrifiká bestia. Nos a kere den Kabunian, i mi no tabata konosé e Dios di Beibel.” Esaki tabata e kaso apesar dje echo ku e tabata un katóliko pa nòmber.

Testigunan di Yehova a bin prediká den e área ei. Nan a topa ku Lingbaoan i a anim’é pa lesa Beibel. E ta kòrda: “Ta Beibel a konvensé mi ku Yehova ta e Dios berdadero.” Anto un Testigu a studia Beibel ku Lingbaoan, i el tuma e desishon di sirbi e Dios berdadero. El a legumai su prosedernan di ántes, inkluso su posishon komo lider di tribu, un paso ku a pone e saserdote lokal i su eks-amigunan rabia mashá. Sin embargo, Lingbaoan tabata determiná pa sigui e bèrdat ku el a haña den Beibel. Awor e ta sirbi komo un ansiano di kongregashon.

Shete Dia i Seis Anochi

Ounke aktualmente tin sierto partinan di Abra ku ta tende e bon nobo regularmente, tin otro partinan hopi aislá ku ta de bes en kuando so Testigunan ta bishitá. Algun tempu pasá nan a hasi un esfuerso pa yega na un di e áreanan aki. Un grupo di 35 Testigu a sali pa bai prediká na Tineg, Abra, un teritorio ku no tabata asigná na ningun kongregashon. E tabata un sitio ku nan tabatin 27 aña sin bishitá.

Nan a kana shete dia pa hasi e biahe aki. Imaginá bo ta krusa brùgnan trahá di kabuya i riunan hundu, i kana oranan largu, subi i baha lomba di seru ku bo ekipahe kargá. Tur e esfuerso aki ta pa prediká e bon nobo na hende ku masha poko bes ta tend’é! Kuater di e seis anochinan, nan a drumi na aire liber den seru.

Maske e Testigunan fuerte ku a hasi e biahe a bai ku algun kuminda, nan no por a karga sufisiente kuminda pa henter e biahe. Pero esaki no tabata un problema pasobra e pueblo tabata masha kontentu di por a kambia kuminda pa publikashonnan basá riba Beibel. E Testigunan a risibí hopi produkto di kunuku, piská i karni di biná. Ounke nan a haña nan ku algun inkumbiniensia, e grupo a bisa: “E gran goso ku nos a eksperensiá a kompensá tur e sakrifisionan aki.”

Durante e shete dianan, e rumannan aki a prediká den dies pueblitu i a laga 60 buki, 186 revista, 50 foyeto i hopi tratado. Nan a duna 74 grupo di hende demostrashon di un studio di Beibel. Den e stat Tineg, riba petishon di funshonarionan lokal i algun siudadano prominente, nan a tene un reunion di kongregashon na kua 78 persona a asistí. Mayoria dje personanan ku a asistí tabata maestro di skol i polis. Nos ta spera ku mas tinggiano lo djòin e personanan aki ku ta “kanta duru” i alabá Yehova for di kabes di e serunan.

Algu Mihó Ku Oro

Mas den zùit di Filipínas tin algun isla kaminda e spañónan a haña oro. Esaki a pone ku a surgi e nòmber Mindoro, un kontrakshon di e palabranan spañó mina de oro. Sin embargo, aktualmente e Testigunan ta hañando algu mihó ku oro riba e islanan aki: hende ku kier sirbi e Dios berdadero, Yehova.

Rònt di 125.000 nativo ku yama mangyan ta biba leu den interior di e selvanan di Mindoro. Nan ta hiba un bida simpel i tin masha poko kontakto ku hende pafó di nan pueblo, i  nan tin nan propio idioma. Mayoria di nan ta animista i politeista, es desir, nan ta kere ku ophetonan natural tin bida konsiente i ta adorá hopi dios. Tambe nan ta kere ku tin vários ser sobrenatural.

De bes en kuando ora nan no tin kuminda òf falta otro kos, mangyannan individual ta baha bai n’e áreanan kant’i kosta pa buska trabou. Esaki tabata e kaso ku Pailing, ku ta bini di un grupo sekundario di mangyan ku yama batangan. El a krese entre su pueblo aya den e selvanan den seru, i tabatin e kreensia i práktikanan di batangan. Nan paña di bisti ta un simpel lapi rònt di nan hep. Pa garantisá un bon kosecha, segun e tradishon batangan, e adoradónan mester mata un galiña i laga su sanger lèk den awa miéntras nan tabata hasi orashon.

Pailing no ta sigui e tradishonnan ei mas. Dikon nò? Ora a el a bai den e áreanan plat, el a haña trabou serka famianan Testigu di Yehova. Un di e famianan aki a probechá di e oportunidat pa papia ku Pailing tokante e bèrdat di Beibel. El a reakshoná bon i a ègt apresiá loke e tabata siña tokante e propósito ku Yehova tin pa hende i e tera. Nan a hasi areglo p’e bai skol básiko i tambe haña un studio di Beibel. Ora Pailing tabatin 24 aña el a batisá komo un Testigu di Yehova. Ora e tabatin 30 aña e tabata den su di dos aña di skol sekundario, i el a hasi e skol su teritorio pa prediká. Awor nan ta yam’é Rolando (un nòmber ku nan ta usa den e áreanan plat).

Ora bo topa Rolando, bo ta haña bo ku un yònkuman sonriendo, bon bistí, i ku ta sirbi komo un predikadó full-time i komo sirbidó ministerial den un kongregashon na Mindoro. Resientemente Rolando a bai bèk den e serunan, no pa djòin e pueblo batangan den nan tradishonnan, sino pa kompartí ku nan e bèrdat di Beibel ku ta duna bida.

Ansioso pa Haña un Salon di Reino

E provinsia Bukidnon—ku na idioma sebuano ta nifiká “Hende di Seru”—ta situá riba e isla den zùit ku yama Mindanao. Esaki ta un área yen di seru, klofnan hundu, vayenan di riu i plateau. E tereno fértil ta produsí kosecha di anasa, maishi, kòfi, aros i bakoba. Ei e tribunan di seru, talaandig i higaonon ta biba. E hendenan aki tambe mester siña di Yehova. Resientemente, e oportunidat aki a habri di un manera masha interesante den besindario di e stat Talakag.

E Testigunan ku a subi e serunan a haña un temperatura friu, pero un bon biní kaluroso. E pueblo lokal tabata bisa ku nan ta kere den e Dios todopoderoso, e Tata, pero nan no tabata sa su nòmber. Dor ku nan ta pasa mayoria di nan tempu den selva, tabata e promé bes ku nan a topa ku Testigunan di Yehova. E Testigunan a siña nan e nòmber di Dios i tambe e propósito maravioso ku Dios tin relashoná ku e Reino. E pueblo a keda enkantá, pues e Testigunan a disidí ku mester bishitá e pueblo aki mas biaha.

Vários bishita a sigui. Komo resultado, e habitantenan lokal a ofresé un sitio komo un “kas” di Testigunan di Yehova. Kontentu e Testigunan a aseptá e oferta. Tabata un sitio riba tòp dje seru mas haltu den e área, for di kua bo por a wak e kaminda. Nan a konstruí e edifisio ku palu, bambu i blachi di palma. Nan a kompletá e proyekto aki den tres luna i dies dia. E bòrchi “Salon di Reino di Testigunan di Yehova” ta resaltá dilanti e edifisio. Imaginá bo, nan a traha un Salon di Reino promé ku nan a forma un kongregashon!

Desde e tempu ei un ansiano ku ta predikadó full-time i tambe un sirbidó ministerial a muda bai einan. Huntu ku Testigunan den e área, nan a traha ku e meta pa forma un kongregashon. Esaki a bira realidat na ougùstùs 1998. Aktualmente un kongregashon chikitu ta hasi pleno uso di e Salon di Reino aki, yudando hendenan ku ta biba den seru pa siña e bèrdatnan di Beibel.

Sí, di un manera poderoso Yehova a usa su sirbidónan dispuesto na Filipínas pa plama e bèrdat di Reino asta den e serunan ku ta difísil pa alkansá. Esaki ta hasi nos kòrda Isaías 52:7, ku ta bisa: “Ki bunita riba e serunan ta e pianan di esun ku ta trese bon nobo.”

[Nota]

[Mapanan na página 11]

(Pa e teksto den su formato kompleto, wak e publikashon)

ABRA

MINDORO

BUKIDNON

[Rekonosementu]

Globo: Mountain High Maps® Copyright © 1997 Digital Wisdom, Inc

[Plachi na página 10]

Prediká den e serunan ta nifiká kana oranan largu dor di mondi i terenonan steil

[Plachi na página 10]

Boutismo den un riu den seru