Ora Ta Sabí pa Hui

E MUNDU djawe hopi bes ta karakterisá pa un spiritu di kurashi i di buska konfrontashon òf di enfrentá tentashon. Generalmente nan ta konsiderá un persona ku ta hui for di un situashon komo un hende débil òf kobarde. Nan por asta tent’é p’esei.

Sin embargo, Beibel ta mustra bon kla ku tin bes ta mas sabí i un muestra di kurashi pa hui. Hesukristu a konfirmá e bèrdat bíbliko aki ora el a bisa su disipelnan promé ku el a manda nan den e ministerio: “Ora nan persiguí boso den e stat aki, hui bai na e otro.” (Mateo 10:23) Sí, Hesus su disipelnan mester a purba hui for di nan persiguidónan. Nan no mester a partisipá den ningun klase di guera religioso ku e intenshon di obligá otro hende pa kombertí. Nan tabatin un mensahe di pas. (Mateo 10:11-14; Echonan 10:34-37) Pues en bes di rabia, kristiannan mester a hui, bai leu for dje fuente di provokashon. Dje manera ei nan a mantené un bon konsenshi i tambe nan relashon presioso ku Yehova.—2 Korintionan 4:1, 2.

Tin un ehèmpel nèt kontrali den e buki bíbliko di Proverbionan. E ta konta di un hóben ku en bes di a hui ora el a hañ’é ku tentashon, a bai tras di un prostituta “manera un bue ta bai pa wòrdu matá.” E resultado? Kalamidat, pasobra el a sukumbí na un tentashon ku a enbolbé su bida mes.—Proverbionan 7:5-8, 21-23.

Kiko abo lo hasi si bo haña bo ku un tentashon pa kometé inmoralidat seksual, òf ku un otro posibel peliger? Segun e Palabra di Dios, podisé e mihó kos pa hasi ta: hui, distansiá bo mes for dje esena inmediatamente.—Proverbionan 4:14, 15; 1 Korintionan 6:18; 2 Timoteo 2:22.