Pregunta di Lektor

Ta bon pa aserká Dios den orashon sin usa e ekspreshon “den nòmber di Hesus”?

Beibel ta mustra ku kristiannan ku kier aserká Yehova den orashon mester hasi esei den nòmber di Hesus. Hesus a bisa su disipelnan: “Ni un hende no ta bin serka e Tata, sino pa medio di mi.” El a agregá: “Tur loke boso pidi den mi nòmber, esei lo mi hasi, pa e Tata wòrdu glorifiká den e Yu. Si boso pidi algu den mi nòmber, lo mi hasié.”—Huan 14:6, 13, 14.

Refiriendo na Hesus su posishon úniko, e Cyclopedia of Biblical, Theological, and Ecclesiastical Literature ta bisa: “Orashon mester ta dirigí na Dios so, via Hesukristu komo e Mediador. P’esei, tur supliká ku hende hasi na santu òf angel no ta solamente en bano sino tambe un blasfemia. Maske kon glorioso e kreashon ku hende ta adorá ta, tur adorashon na kosnan kreá ta idolatria, i e lei sagrado di Dios ta prohibí esei estriktamente.”

Pero kiko si un persona ku a kaba di eksperensiá algu agradabel, bisa “danki Yehova” i e no agregá “den nòmber di Hesus”? Esei lo ta robes? No nesesariamente. Suponé ku un kristian ta hañ’é di ripiente den un peliger i e grita: “Yehova, yuda mi!” Dios sigur lo no keda sin yuda su sirbidó pasobra e no a bisa “den nòmber di Hesus.”

Sin embargo, mester remarká sí ku djis papia na bos haltu, asta ora ta ku Dios, riba su mes no ta nifiká ku bo ta hasiendo orashon. Por ehèmpel, despues ku Yehova a kondená Kain pasobra el a mata su ruman Abel, Kain a bisa: “Mi kastigu ta muchu grandi pa mi soportá! Mira, awe bo a kore ku mi for di superfisie di tera; i lo mi ta skondí pa bo kara; i lo mi ta un fugitivo i un bagamundu riba tera, i lo sosodé ku ken ku haña mi, lo mata mi.” (Génesis 4:13, 14) Ounke Kain a dirigí su komentarionan na Yehova, su ekspreshon emoshonal tabata un keho tokante e fruta amargo di piká.

Beibel ta bisa nos: “Dios ta resistí e orguyosonan, ma ta duna grasia na e humildenan.” Dirigí bo mes di un manera informal na e Haltísimo komo si fuera ta trata di un simpel hende, definitivamente ta mustra un falta di humildat. (Santiago 4:6; Salmo 47:2; Revelashon 14:7) Tambe lo ta un falta di rèspèt si nos sa kiko e Palabra di Dios ta bisa tokante e papel di Hesus, i tòg intenshonalmente nos ta hasi orashon sin duna krédito na Hesukristu.—Lukas 1:32, 33.

Esaki no kier men ku Yehova ta spera ku nos ta sigui un estilo partikular òf un método preskribí ora nos ta hasi orashon. Un faktor klave ta e persona su kondishon di kurason. (1 Samuel 16:7) Den promé siglo Era Komun, un ofisial di ehérsito romano ku yama Kornelio “tabata hasi orashon na Dios kontinuamente.” Kornelio, un pagano insirkunsidá, no tabata dediká na Yehova. Maske no ta masha probabel ku el a hasi su orashonnan den nòmber di Hesus, nan ‘a subi bai dilanti di Dios i El a rekordá nan.’ Dikon? Pasobra ‘esun ku ta sondia kurason,’ a mira ku Kornelio tabata “un hòmber deboto ku tabata teme Dios.” (Echonan 10:2, 4; Proverbionan 17:3) Despues ku Kornelio a gana konosementu di “Hesus di Názarèt,” el a risibí spiritu santu i a bira un disipel batisá di Hesus.—Echonan 10:30-48.

Finalmente, no ta keda na hende pa disidí kua orashon Dios ta tende. Si na un okashon un ruman a ekspresá su mes na Dios i a keda sin usa e ekspreshon “den nòmber di Hesus,” no tin motibu p’e sintié kulpabel. Yehova ta bon konsiente di nos limitashonnan i e kier yuda nos. (Salmo 103:12-14) Nos por ta sigur ku si nos ehersé fe den “e Yu di Dios . . . , si nos pidi kualkier kos konforme su boluntat, e ta tende nos.” (1 Huan 5:13, 14) Sin embargo, spesialmente ora kristiannan berdadero ta representá otronan den un orashon públiko, nan ta rekonosé e papel ku Hesus ta hunga den Yehova su propósito, segun Beibel. I obedientemente nan ta hasi esfuerso pa onra Hesus dor di dirigí nan orashonnan na Dios via dje.