Siguridat Awor—Siguridat pa Semper

DIKON ta difísil pa haña siguridat, i asta ora hende hañ’é mes, e no ta dura mashá? Akaso nos sentido di siguridat ta basá riba imaginashon, esta, riba loke nos ta spera di logra i no riba loke ta alkansabel? Si ta asina, nos lo ta bibando den un mundu di fantasia.

Imaginashon ta pèrmití e mente bandoná realidat di bida ku tur su insiguridatnan i drenta un mundu bunita i sigur, ignorando tur loke por daña e soño ei. Sin embargo, hopi bes e problemanan di e mundu real ta interumpí e soño aki di ripiente i sin miserikòrdia ta eliminá e sintimentu di bienestar, i ta lanta e persona for di soño p’e mira e realidat amargo.

Laga nos konsiderá un kaminda ku hende ta bai buska siguridat: un sitio geográfiko. Un stat grandi por ehèmpel por parse prometedor, i pone ku hende ta kuminsá soña ku einan tin plaser, salario haltu i lugánan di biba di bon kalidat. Sí, un stat grandi por parse di ta ofresé e siguridat ku hende a spera hopi tempu riba dje. Pero e soño aki ta realístiko?

E Sitio—Un Stat Grandi òf Soñonan Grandi?

Na paisnan den desaroyo, tin propagandanan ku ta promové stat grandi, i esaki kisas ta pone hende su imaginashon kuminsá traha mashá. E organisashonnan ku ta patrosiná e propagandanan ei no nesesariamente ta interesá den bo siguridat, mas bien nan ta interesá den nan benta. Nan ta usa esenanan di éksito ku ta reflehá siguridat, pa tapa e problemanan dje mundu real. Pues, nan ta enlasá siguridat ku e produkto den e propaganda i tambe ku e stat grandi.

Wak e siguiente ehèmpel. Funshonarionan den un stat na Wèst Áfrika a pone bòrchinan di propaganda ku di un manera bibu ta mustra ku bon mirá, humamentu ta meskos ku kima plaka ku bo a traha duru p’e. Esei tabata parti di un kampaña pa spièrta su siudadanonan kontra humamentu. Fabrikante i bendedónan di sigaria a kontrarestá e kampaña aki dor di pone bòrchinan ku plachi di hende ku ta huma den esenanan atraktivo ku ta reflehá felisidat i éksito. Ademas, un kompania di sigaria a laga algun di su empleadonan—bistí ku unifòrm bunita i pèchi di baseball ku ta na moda—parti sigaria riba kaya na hóbennan i animá tur pa “purb’é.” Dor ku hopi di e hóbennan aki a bini di pueblonan chikí, nan no tabata konosé e trampanan astuto di propaganda, i nan a kai pa e invitashon aki. Nan a  bira adikto na sigaria. E hóbennan di pueblo a bini stat grandi pa buska siguridat pa por mantené nan famianan òf bai dilanti finansieramente. En bes di esei, nan tabata kima mayoria di e plaka ku nan por a usa pa algu mihó.

No ta komersiantenan so ta hasi propaganda ku ta deskribí un bida eksitoso den stat grandi. Esaki por bin tambe di hende ku a muda bai stat grandi i ku awor tin bèrgwensa di regresá nan pueblo natal. Pa no parse ku nan a frakasá, nan ta broma tokante nan supuesto rikesa i logronan den e stat. Sin embargo, si bo analisá nan supuesto status bon, lo bo ripará ku nan estilo di bida aktual no ta mihó ku e bida ku nan tabatin den pueblo; nan ta lucha ku problemanan finansiero meskos ku mayoria otro habitante di stat.

Anto foral den statnan grandi sa sosodé ku hende ku a kaba di yega en buska di siguridat, ta bira víktima di personanan sin eskrúpulo. Dikon? Generalmente, nan no a haña chèns di sera bon amistatnan i nan ta hopi leu for di nan famia. Pues, nan no tin ningun konsehero ku lo por yuda nan pa no kai den e trampanan dje bida materialista di stat.

Josué no a kai den e trampa di humamentu. Ademas, el a realisá ku e bida di stat ta eksigí muchu mas di loke e por a trata kuné eksitosamente. Den su kaso, asta bou di e mihó sirkunstansia, e úniko kos ku e stat por a ègt ofres’é tabata soñonan grandi ku lo no a ser realisá. El a rekonosé ku e no a haña berdadero siguridat den stat; gewoon e no ta pertenesé einan. E tabata sinti su mes bashí i inferior, un frakaso. Ku tempu el a guli su orguyo i a regresá su pueblitu.

E tabatin miedu ku hende lo a tene mofa di dje. Pero en bes di esei, su famia i berdadero amigunan a yam’é bon biní ku brasa habrí. Debí n’e kariño di su famia, e ambiente konosí di e pueblitu, i e amor di su amigunan den e kongregashon kristian, no a dura mashá ku e tabata sintié hopi mas sigur ku den e stat grandi, kaminda tur su soñonan a bira pesadia. Pa su sorpresa, traha duru den kunuku huntu ku su tata eigenlijk a duna e i su famia un entrada mas haltu ku su salario nèto lo tabata den stat.

Plaka—Kiko Ta e Berdadero Problema?

Plaka lo duna bo un sintimentu di siguridat? Liz di Kánada ta deklará: “Komo hóben mi a kere ku plaka lo kita preokupashon.” El a enamorá di un hòmber ku tabata bon pará finansieramente. Djis despues nan a kasa. El a sintié sigur? Liz ta sigui konta: “Ora mi a kasa, nos tabatin un kas bunita, dos outo, i nos situashon finansiero a pèrmití nos disfrutá di kasi tur kos material, biahamentu i rekreo. Pa straño ku por parse, ainda mi tabata preokupá ku plaka.” E ta splika dikon: “Nos tabatin masha hopi di pèrdè. Ta parse ku mas bo tin, ménos sigur bo ta sinti bo. Plaka no a librá mi di preokupashon ni ansiedat.”

Si bo ta haña ku bo no tin sufisiente plaka pa sinti bo sigur, puntra bo mes: ‘Kiko ta e berdadero problema? Ta ègt falta di plaka, òf ta mi no sa kon pa manehá sèn bon?’ Reflekshonando riba su pasado, Liz ta bisa: “Awor mi ta realisá ku ta mal maneho di plaka a kousa problema den mi famia ora mi tabata chikitu. Nos tabata kumpra na krédito, i p’esei semper nos tabatin debe. Esei a trese ansiedat.”

Sin embargo, awe Liz ku su kasá ta sinti nan hopi mas sigur maske nan tin ménos plaka. Ora nan a siña e bèrdat dje Palabra di Dios, nan a stòp di skucha propagandanan tokante plaka i a kuminsá skucha na e sabiduria di Dios. Esei a inkluí e palabranan aki: “Ma esun ku skucha mi lo biba konfiadamente, i lo biba  trankil, sin miedu di maldat.” (Proverbionan 1:33) Nan tabata deseá pa nan bida haña mas nifikashon ku loke un kuenta di banko por a duna. Awor, komo misionero den un pais hopi leu, Liz ku su kasá ta siña hende riku i pober ku pronto Yehova lo trese berdadero siguridat riba henter e tera. E aktividat aki ta duna nan profundo satisfakshon i stabilidat ku no ta bini di ganashi finansiero, sino dor ku nan tin un propósito superior i balornan sin igual.

Kòrda e bèrdat básiko aki: Ser riku pa ku Dios ta di hopi mas balor ku poseé rikesa material. Henter e Skritura Sagrado ta enfatisá, no e poseshon di rikesa material, sino un bon relashon ku Yehova, un relashon ku nos por mantené dor di kontinuamente hasi e boluntat di Dios ku fe. Kristu Hesus a animá nos pa “ta riku pa ku Dios” i warda “tesoro den shelu.”—Lukas 12:21, 33.

Status—Unda Bo Ta Bayendo?

Si bo sa pensa ku pa bo haña siguridat bo tin ku haña un posishon mas haltu den komunidat, puntra bo mes: ‘Ken ku tin un posishon mas haltu a ègt logra berdadero siguridat?  Kuantu mas mi tin ku subi pa logra esei?’ Un karera eksitoso por duna bo un sentido falsu di siguridat ku ta hiba na desepshon òf pió ainda, na un kaida desastroso.

Eksperensianan di bida real ta mustra ku un bon nòmber serka Dios ta duna hopi mas siguridat ku fama serka hende. Ta Yehova so por duna hende e don di bida eterno. Esaki ta nifiká ku nos nòmber ta ser skirbí no den un registro sosial, pero den e buki di bida di Dios.—Éksodo 32:32; Revelashon 3:5.

Poniendo speransa irealístiko un banda, kon lo bo evaluá bo situashon aktual, i kiko bo por spera onestamente di futuro? Niun hende no tin tur kos. Un kristian sabí a deskribié asin’aki: “Mi mester a siña ku nunka bida no ta esaki I esaya pero esaki ÒF esaya.” Stòp un ratu i lesa e kuadro “Un Kuenta di Benin.”

Awor kontestá e preguntanan aki: Kiko ta un meta importante den mi bida? Kua ta e ruta mas direkto pa logr’é? Por ta mi a desviá bai riba un ruta largu i insigur? I kisas loke realmente mi ta deseá i loke ta realístikamente posibel por ser lográ via un ruta ménos kompliká?

Despues ku Hesus a kaba di duna konseho riba e balor relativo ku kosnan material tin na komparashon ku e balor di kosnan spiritual, el a bisa pa mantené un wowo “simpel,” òf “enfoká.” (Mateo 6:22, NW; nota na pia di página) El a mustra bon kla ku e kosnan mas importante den bida ta meta i balornan spiritual ku ta enfoká riba Dios su nòmber i su Reino. (Mateo 6:9, 10) Otro kosnan ta di ménos importansia òf, na moda di papia, nan no ta den focus.

Awe hopi kámara ta focus outomátikamente riba tantu kosnan ku ta leu komo esnan ku ta serka. Abo tin tendensia di hasi esei? Ta riba tur kos ku bo mira bo ta “enfoká”? Tur ta importante, atraktivo i, ku un poko fantasia, alkansabel? Asta si pa un parti esei ta e kaso, ta masha fásil pa bo pèrdè for di bista e ophetivo prinsipal di kristiannan, esta, e Reino. E por bruha den otro imágennan ku ta bringa pa kapta bo atenshon. Hesus a urgi: “Ma buska promé e reino di Dios i su hustisia, i tur e kosnan aki lo wòrdu añadí na boso.”—Mateo 6:33.

Siguridat Awor i pa Semper

Nos tur podisé ta soña ku mihó kosnan pa nos mes i pa nos sernan kerí. Sin embargo, e echo ku nos ta imperfekto, ta biba den un mundu imperfekto i tin un bida kòrtiku, ta obligá nos di limitá e kosnan ku nos por spera di logra realístikamente. Un eskritor di Beibel a splika míles di aña pasá: “Atrobe mi a mira bou di solo: ku e kareda no ta pa esun mas lihé, i e bataya no ta pa e guereronan, ni pan no ta pa e sabínan, ni rikesa pa esnan ku tin disernimentu, ni fabor pa e hendenan ku abilidat; pasobra tempu i suerte [suseso imprevisto, NW] ta alkansá nan tur.”—Eklesiástes 9:11.

Tin bes nos ta asina apsorbá den e rutina monótono di bida diario ku nos ta lubidá di wak e asuntu mas importante, esta, ken nos ta i kiko realmente nos tin mester pa nos sinti nos berdaderamente sigur. Konsiderá e  antiguo palabranan di sabiduria aki: “Esun ku ta stima plaka lo no keda satisfecho ku plaka, ni esun ku ta stima abundansia, ku su entrada. Esaki tambe ta banidat. Soño di e hòmber trahadó ta dushi, sea ku e ta kome poko òf hopi. Ma barika yen di e hòmber riku no ta lagu’é drumi.” (Eklesiástes 5:10, 12) Sí, unda abo ta buska siguridat?

Si bo situashon ta parse e soño irealístiko di Josué, bo por kambia bo plannan? Hendenan ku di bèrdat ta stima bo, lo apoyá bo meskos ku Josué su famia i amigunan den e kongregashon kristian a hasi. Den un ambiente humilde huntu ku esnan ku ta stima bo, lo bo por haña mas siguridat ku den un stat kaminda hende lo purba probechá di bo.

Si ya kaba bo tin abundansia, meskos ku Liz ku su kasá, lo bo por ahustá bo estilo di bida pa bo usa mas tempu i energia na yuda hende sea ku nan ta riku òf pober, siña tokante e Reino, e medio pa logra berdadero siguridat?

Si bo ta tratando di haña un posishon mas haltu den komunidat òf na trabou, kisas lo ta bon pa bo meditá seriamente riba bo motivashon. Klaro ku sierto komodidatnan lo por hasi bida mas dushi. Sin embargo, lo bo por sigui enfoká riba e Reino, e berdadero medio pa logra siguridat permanente? Kòrda e palabranan di Hesus: “Ta mas bendishoná pa duna ku pa risibí.” (Echonan 20:35) Si bo partisipá den e vários aktividatnan di e kongregashon kristian, lo bo sinti un siguridat ku ta duna bo gran satisfakshon.

Hende ku tin pleno konfiansa den Yehova i su Reino ta disfrutá di un siguridat alentador awor i nan ta mira padilanti na un siguridat kompleto den futuro. E salmista a bisa: “Mi a pone SEÑOR semper mi dilanti; pasobra e ta na mi man drechi, lo mi no wòrdu moví. P’esei mi kurason ta kontentu, i mi alma ta regosihá; mi karni tambe lo biba den siguridat.”—Salmo 16:8, 9.

[Kuadro/Plachi na página 6]

Un Kuenta di Benin

Hende a konta e kuenta aki míles di biaha i na diferente manera. Resientemente, un habitante di edat di un pueblo na Benin, Wèst Áfrika, a konta algun hóben e siguiente vershon.

Un piskadó ta bolbe kas den su kanoa i ta topa ku un stranhero eksperto den hasimentu di negoshi ku ta sirbi den e pais den desaroyo aki. E eksperto ta puntra e piskadó dikon el a bolbe bèk asina trempan. E piskadó ta kontestá ku e por a keda mas tantu, pero ya el a koge sufisiente pa perkurá pa su famia.

E eksperto ta puntr’é: “Awor kiko bo ta bai hasi ku tur bo tempu?”

E piskadó ta kontestá: “Wèl, mi ta piska un tiki. Hunga ku mi yunan. Ora bira kalor, nos tur ta bai lèg un ratu. Anochi nos ta sinta kome huntu. Despues ami ku mi amigunan ta sinta skucha poko músika, etcetera.”

E eksperto ta interumpié: “Tende, mi a kaba universidat i mi a studia e materia aki. Mi kier yuda bo. Bo mester keda riba laman pa piska mas tantu tempu. Lo bo gana mas tantu sèn i pronto lo bo por kumpra un boto mas grandi ku e kanoa aki. Ku un boto mas grandi lo bo por gana mas plaka ainda i lo no dura mashá ku bo por tin un flota di barku di reda.”

“I despues?” e piskadó ta puntra.

“E ora ei, en bes di bende piská via un otro persona, bo mes por negoshá direktamente ku e fábrika òf asta kuminsá ku bo mes planta di prosesá piská. Lo bo por sali for di bo pueblo i bai biba na Cotonou òf Paris òf New York, i for di einan bo ta manehá bo negoshi. Bo por asta konsiderá e posibilidat di pone bo negoshi riba bolsa di balor i gana miónes di florin.”

E piskadó ta puntr’é: “Kuantu tempu lo tuma promé ku tur e kosnan ei sosodé?”

E eksperto ta kontestá: “Kisas 15 pa 20 aña.”

“I despues?” e piskadó ta bolbe puntra.

“Ta e ora ei bida ta bira interesante,” e eksperto ta splika. “Lo bo por stòp di traha. Lo bo por bai laga tur e aktividatnan drùk di stat i bai biba den un pueblo aislá.”

“I despues?” e piskadó ta puntra.

“E ora ei bo tin tempu pa piska un tiki, hunga ku bo yunan, bai lèg ora bira kalor, kome ku bo famia i skucha músika huntu ku bo amigunan.”

[Plachinan na página 7]

Promoshon ta trese siguridat?

[Plachinan na página 8]

Bo kompañeronan kristian ta ègt interesá den bo siguridat