Unda Abo Ta Buska Siguridat?

Den un pueblitu na Wèst Áfrika, e hóben Josué ta yama su famia i amigunan ayó. * E ta muda pa e stat grandi en buska di siguridat finansiero. Pero poko despues ku e yega den stat e ta pèrdè speransa, ora e bin realisá ku e stat no ta un lugá kaminda bo por bira riku lihé.

SEGUN ku Josué ta lucha pa ahustá su mes na e bida di stat, e ta keda hopi desapuntá. E stat grandi ta kompletamente otro for di loke el a imaginá. Miéntras tantu den su kurason, e ta sinti hopi gana di bai bèk serka su famia i amigunan den e pueblitu humilde ku el a laga atras. Pero e tin miedu ku hende den e pueblitu lo hasi mofa di dje. E ta preokupá, pensando: ‘Nan lo yama mi un frakaso pasobra mi no tabatin éksito den stat.’

Loke ta preokup’é mas ainda ta e desepshon ku lo e por kousa su mayornan. Nan ta stèns riba dje pa yudansa finansiero. Miéntras Josué ta luchando ku e karga emoshonal aki, e ta traha tur dia te lat na un trabou ku no ta masha respetá, i ku ta pagu’é solamente un frakshon di loke el a soña. E ta kompletamente agotá di demasiado trabou. Aktividatnan kristian ta masha importante p’e, pero segun ku e simannan ta pasa ta resta kada bes ménos tempu pa esei. Ademas, dor ku e ta asina leu for dje kariño di su famia i amigunan bieu, e ta sintié su so i tristu. E ta realisá ku e stat no a dun’é e siguridat ku el a deseá asina tantu.

Maske nòmber i lugá por varia, e historia tristu di Josué no ta algu nobo, i bes tras bes e ta ripití su mes. Josué su deseo di muda no tabata motivá pa egoismo. E úniko kos ku e tabata buska ta siguridat. El a kere sinseramente ku den stat lo e tabatin mas oportunidat ku den su pueblitu. Ta bèrdat ku tin bes un persona por logra mehorá su posishon material, pero esei no ta nifiká ku el a logra berdadero siguridat. Foral den e kaso di Josué esei no a sosodé. I tin hopi chèns ku lo e no sosodé tampoko den kaso di mayoria otro hende ku ta purba hasi e mesun kos. Esaki ta hasi nos puntra: ‘Kiko ta siguridat?’

Kada hende ta mira siguridat na un manera diferente. Segun un dikshonario, siguridat ta libertat for di peliger òf libertat for di miedu òf ansiedat. Mayoria hende ta konsiente ku libertat kompleto for di peliger no ta eksistí awe. Tanten ku nan por sinti nan sigur, nan ta satisfecho, maske tin situashonnan peligroso rònt di nan.

Kiko di abo? Unda abo ta buska siguridat? Bo ta kere ku bo ta hañ’é den stat i no den un pueblitu, manera Josué a pensa? Òf bo ta hañ’é den plaka, sin importá di unda òf kon bo hañ’é? Kisas bo ta aspirá di haña un posishon sosial mas haltu? Sea kual sea e manera ku bo ta pensa ku bo por haña siguridat, kuantu tempu abo i bo famia lo disfrutá di e siguridat ei?

Laga nos konsiderá tres manera ku hopi hende ta buska siguridat: na sitio geográfiko, den plaka i den posishon òf status. Despues nos lo analisá unda nos por haña berdadero siguridat.

[Nota]