Bo Ta Kalkulá e Gastunan?

HESUKRISTU a ofresé su disipelnan e speransa di bida eterno, pero tambe el a urgi nan pa kalkulá e gastunan di ser un kristian. El a ilustrá e punto aki dor di puntra: “Kual di boso, ora ku e kier traha un toren, no ta sinta kalkulá e gastunan promé, pa mira si e tin sufisiente pa kab’é?” (Lukas 14:28) Kua gastunan Hesus tabata kier men?

Tur kristian ta haña nan ku prueba, i algun di nan ta pruebanan severo. (Salmo 34:19; Mateo 10:36) P’esei, nos mester ta mentalmente i spiritualmente prepará pa nos no keda sorprendí ora nos haña nos konfrontá ku oposishon òf otro problema. Promé ku esei sosodé, ya kaba nos mester a kalkulá ku ser un disipel di Kristu ta enserá ku nos por haña nos ku e difikultatnan ei. Pero tambe nos ta konsiente ku e rekompensa—salbashon for di piká i morto—ta bal hopi mas ku kualkier kos ku e mundu aktual por ofresé nos. Sí, si nos sigui sirbi Dios, nada ku e pèrmití—ni sikiera morto—no por perhudiká nos pa semper.—2 Korintionan 4:16-18; Filipensenan 3:8.

Kon nos por haña un fe fuerte asina? Nos fe ta bira mas fuerte kada bes ku nos tuma un desishon korekto, para firme pa prinsipionan kristian òf hasi algu ku ta na armonia ku Dios su boluntat, foral ora nos ta bou di preshon pa hasi nèt kontrali. Ora nos eksperensiá Yehova su bendishon personalmente dor ku nos a keda fiel, nos fe ta bira mas fuerte i mas profundo. Di e manera ei nos ta sigui e ehèmpel di Hesus, su promé disipelnan i tur hòmber i muhé di fe ku atraves di siglonan korektamente a “kalkulá e gastunan” ku sirbi Dios ta enserá.—Marko 1:16-20; Hebreonan 11:4, 7, 17, 24, 25, 32-38.