Desabilidat No Konosé Frontera

CHRISTIAN ta biba na un pais afrikano. Sòldánan a sekuestr’é i a purba oblig’é drenta nan ehérsito, pero el a nenga dor ku esei ta bai kontra su konsenshi basá riba Beibel. E sòldánan a bai kuné na un kampo militar kaminda nan a batié pa kuater dia largu, i despues un di nan a tir’é den un di su pianan. Christian a logra yega hospital, pero nan mester a amputá su pia bou di su rudia. Den un otro pais afrikano, rebeldenan armá tabata kap man ku pia kita afó asta di mucha chikitu. I di Kambodia te n’e region di Balkan, di Afganistan te Angola, mina di tera ta sigui manka hóben i bieu, sin hasi distinshon.

Aksidente i enfermedat manera diabétis tambe ta kousa desabilidat pa nan víktimanan. Asta supstansianan venenoso den medio ambiente por kousa desabilidat. Por ehèmpel, den algun bario banda di otro na un siudat na Ost Europa, vários mucha a nase ku un di nan brasanan inkompleto. Tur loke nan tin ta un stòmpi bou di nan èlebog. Tin indikashon ku e muchanan aki a sufri daño genétiko debí na kontaminashon kímiko. I masha hopi otro hende ku sí tin man ku pia, no por usa nan debí ku nan ta lam, òf debí na otro tipo di desabilidat. Bèrdat, desabilidat no konosé frontera.

Sea kual sea e kousa, un desabilidat por ta algu devastador. Junior a pèrdè parti di su pia robes, di su rudia bai abou, tempu ku e tabatin 20 aña. Despues e ta konta: “Mi tabatin hopi problema emoshonal. Mi tabata yora ku lo mi no tin mi pia nunka mas. Mi no tabata sa kiko pa hasi. Mi tabata konfundí.” Pero ku tempu Junior su aktitut a kambia notablemente. El a kuminsá studia Beibel, i a siña kos ku a yud’é enfrentá su situashon. Pero ademas nan a dun’é un speransa maravioso di un futuro felis aki riba tera mes. Si bo ta desabilitá, abo tambe no kier tin e mesun speransa ei?

Si ta asina, sea asina bon di lesa e siguiente artíkulo. Nos ta rekomendá bo pa buska e referensianan bíbliko den bo mes Beibel pa bo por mira pa bo mes kiko e Kreador ta bai hasi den futuro pa esnan ku siña tokante su propósito i pone nan bida na armonia kuné.