Ken Lo Sobrebibí e Dia di Yehova?
Ken Lo Sobrebibí e Dia di Yehova?
“E dia ta bin; e lo kima manera fòrnu.”—MALAKÍAS 4:1.
1. Kon Malakías ta deskribí e fin dje mundu malbado aki?
DIOS a inspirá profeta Malakías pa skirbi profesia tokante susesonan impreshonante ku lo tuma lugá den futuro serkano. E susesonan aki lo afektá delaster un hende riba tera. Malakías 4:1 ta profetisá: “‘Mira, e dia ta bin; e lo kima manera fòrnu; i tur e hendenan arogante i kada hasidó di maldat lo ta bagas; i e dia ku ta bin lo sende nan na kandela,’ e SEÑOR di ehérsitonan ta bisa, ‘asina ku ni nan rais ni nan rama lo no keda.’” Kon total e destrukshon dje mundu malbado aki lo ta? Lo ta manera ora un palu su raisnan kima di manera ku e no por bolbe krese nunka mas.
2. Kon algun pasashi di Beibel ta deskribí e dia di Yehova?
2 Kisas lo bo puntra: ‘Di kua “dia” profeta Malakías ta profetisando?’ Ta e mesun dia ku Isaías 13:9 ta papia di dje. E ta bisa: “Mira, e dia di SEÑOR ta bin, kruel, ku furia i ku rabia ardiente, pa hasi e tera un desolashon; i e lo kaba ku e pekadornan ku tin den dje.” Sofonías 1:15 ta deskribié asin’akí: “E dia ei ta un dia di furia, un dia di problema i angustia, un dia di destrukshon i desolashon, un dia di skuridat i tiniebla, un dia di nubia i skuridat profundo.”
“E Gran Tribulashon”
3. Kiko ‘e dia di Yehova’ ta?
3 Den e kumplimentu mayor dje profesia di Malakías, ‘e dia di Yehova’ lo ta un tempu di “gran tribulashon.” Hesus a profetisá: “E ora ei lo tin un gran tribulashon, manera nunka tabatin for di prinsipio di mundu te awor aki, i ku lo no tin nunka mas tampoko.” (Mateo 24:21) Pensa kuantu aflikshon mundu a yega di konosé kaba, spesialmente for di aña 1914 padilanti. (Mateo 24:7-12) Imaginá bo: Segundo Guera Mundial so a kaba ku 50 mion bida! Tòg, e kosnan ei no ta nada na komparashon ku e kalamidatnan ku e “gran tribulashon” lo trese kuné. E suseso ei, ku ta ser yamá tambe e dia di Yehova, lo terminá na Armagedon, i trese un fin na e último dianan dje sistema mundial malbado aki.—2 Timoteo 3:1-5, 13; Revelashon 7:14; 16:14, 16.
4. Ora e dia di Yehova terminá, kiko lo a tuma lugá?
4 Ora e dia di Yehova ei terminá, Satanas su mundu i esnan ku ta apoy’é lo a ser destruí kompletamente. Religion falsu ta e promé ku lo disparsé. Despues Yehova lo ehekutá su desishon hudisial kontra Satanas su sistemanan ekonómiko i polítiko. (Revelashon 17:12-14; 19:17, 18) Ezekiel ta profetisá: “Nan lo tira nan plata riba kaya, i nan oro lo bira un kos di horor. Nan plata i nan oro lo no por libra nan den e dia di e furia di SEÑOR.” (Ezekiel 7:19) Tokante e dia ei Sofonías 1:14 ta bisa: “E gran dia di SEÑOR ta serka; e ta serka i e ta bin masha lihé mes.” En bista di loke Beibel ta bisa tokante e dia di Yehova, nos mester keda determiná pa aktua na armonia ku Dios su rekisitonan hustu.
5. Kiko esnan ku ta teme Yehova su nòmber lo eksperimentá?
5 Despues di profetisá kiko e dia di Yehova lo hasi ku e mundu di Satanas, Malakías 4:2 ta registrá e siguiente deklarashon di Yehova: “Pa boso ku ta teme mi nòmber e solo di hustisia lo sali ku kuramentu den su alanan; i boso lo sali i bula rònt manera bisénan for di stal.” “E solo di hustisia” ta Hesukristu. E ta e “lus di mundu” den sentido spiritual. (Huan 8:12) Hesus ta iluminá nos ku kurashon. Promé tin kurashon spiritual, ku nos ta eksperimentá awe kaba. Despues, den e mundu nobo, kurashon físiko kompleto lo tuma lugá. Manera Yehova ta bisa, esnan kurá lo “sali i bula rònt manera bisénan for di stal,” felis ku nan a sali liber.
6. Ki selebrashon di viktoria Yehova su sirbidónan lo disfrutá di dje?
6 Kiko di esnan ku ignorá Yehova su rekisitonan? Malakías 4:3 ta deklará: “‘Boso [sirbidónan di Dios] lo trapa riba e malbadonan, pasobra nan lo ta shinishi bou di boso plant’i pia riba e dia ku mi ta prepará,’ e SEÑOR di ehérsitonan ta bisa.” Dios su adoradónan humano lo no yuda destruí e mundu di Satanas. Mas bien nan lo “trapa riba e malbadonan” den e sentido ku nan lo partisipá den e selebrashon di viktoria ku lo tuma lugá despues dje dia di Yehova. Despues ku Dios a destruí e ehérsito di Fárao den Laman Kòrá, tabatin un selebrashon grandi. (Éksodo 15:1-21) Despues ku Satanas i su mundu disparsé den e tribulashon grandi tambe lo tin un selebrashon di viktoria. Sobrebibientenan fiel dje dia di Yehova lo sklama: “Laga nos regosihá i sea kontentu den su salbashon.” (Isaías 25:9) Esta un gran goso lo tin ora Yehova vindiká su soberania, esta, mustra ku ta é tin derecho di goberná, i hasi mundu limpi pa hende por biba na pas riba dje!
Kristiandat Ta Imitá Israel
7, 8. Deskribí e kondishon spiritual di Israel den tempu di Malakías.
7 Esnan ku sirbi Yehova lo haña su fabor, pero esnan ku no sirbié nò. Tempu ku Malakías a skirbi su buki tabata meskos. Na aña 537 promé ku Era Komun un resto di Israel a ser restorá despues di 70 aña di koutiverio na Babilonia. Sin embargo, durante e shen añanan ku a sigui, e nashon restorá ei a kuminsá drif bai den apostasía i maldat. Mayoria di nan tabata desonrá e nòmber di Yehova, ignorá su leinan hustu, kontaminá su tèmpel dor di trese bestia siegu, lam i enfermo komo sakrifisio, i divorsiá nan esposa di hubentut.
8 Pa e motibu ei Yehova a bisa nan: “Lo mi hala serka boso pa huisio; i lo mi ta lihé pa testifiká kontra e hasidónan di bruha, kontra e kibradónan di matrimonio, kontra esnan ku ta hura falsu i kontra esnan ku ta defroudá e trahadó den su suèldo, ku ta oprimí biuda i huérfano, i kontra esnan ku ta nenga yudansa na stranhero, i ku no tin temor di mi, . . . pasobra ami, SEÑOR, no ta kambia.” (Malakías 3:5, 6) Tòg Yehova a ekstendé e invitashon aki na tur hende ku ta dispuesto di hala for di nan mal kaminda: “Bolbe serka mi, i lo mi bolbe serka boso.”—Malakías 3:7.
9. Kon e profesianan di Malakías a haña nan promé kumplimentu?
9 E palabranan ei a kumpli tambe den promé siglo di nos Era Komun. Un resto dje hudiunan a sirbi Yehova i a bira un “nashon” nobo di kristian ungí ku spiritu, i ku tempu hende ku no ta hudiu tambe a bin forma parti dje grupo aki. Sin embargo, gran mayoria di Israel karnal a rechasá Hesus. P’esei Hesus a bisa e nashon di Israel: “Mira, boso kas ta keda desolá pa boso!” (Mateo 23:38; 1 Korintionan 16:22) Na aña 70 Era Komun un ‘dia ku a kima manera fòrnu’ a bini riba Israel karnal, nèt manera Malakías 4:1 a profetisá. Yerúsalèm i su tèmpel a ser destruí, i segun informenan, mas ku un mion hende a muri di hamber, den luchanan pa poder, i dor di atakenan dje ehérsitonan romano. Pero esnan ku a sirbi Yehova sí a skapa e tribulashon ei.—Marko 13:14-20.
10. Den ki sentido e pueblo en general i e miembronan di klero ta imitá Israel di promé siglo?
10 Humanidat, i prinsipalmente kristiandat, ta imitá e manera ku e nashon di Israel a aktua den promé siglo. Lidernan di Kristiandat i e pueblo en general ta preferá nan propio kredonan religioso na lugá dje bèrdatnan di Dios ku Hesus a siña hende. E miembronan di klero ta esnan ku tin mas falta. Nan ta nenga di usa e nòmber di Yehova, i ta asta sak’é for di nan vershonnan di Beibel. Nan ta desonrá Yehova ku siñansanan ku no ta kuadra ku Beibel, manera e doktrinanan pagano di fièrnu di kandela, ‘santísima’ Trinidat, inmortalidat di alma i evolushon. Asina nan ta hòrta Yehova dje alabansa ku e meresé, meskos ku e saserdotenan den tempu di Malakías a hasi.
11. Kon religionnan di mundu a mustra ta ken nan ta sirbi di bèrdat?
11 Na aña 1914, ora ku e último dianan a kuminsá, e religionnan dje mundu aki a mustra bon kla ta ken nan ta sirbi di bèrdat, i den esaki, e religionnan ku ta pretendé di ta kristian tabata na kabes. Durante tur dos guera mundial nan a animá nan miembronan pa bai guera pa bringa pleitunan nashonal, asta si nan mester a mata hende di nan mes religion. E Palabra di Dios ta mustra bon kla ta ken ta obedesé Yehova i ken nò: “Na esaki e yunan di Dios i e yunan di Diabel ta konosí: Esun ku no ta praktiká hustisia no ta di Dios, ni esun ku no ta stima su ruman. Pasobra esaki ta e mensahe ku boso a tende for di prinsipio, ku nos mester stima otro; no manera Kain, kende tabata di e malbado, i a mata su ruman.”—1 Huan 3:10-12.
Kumpli ku Profesia
12, 13. Kua profesianan a kumpli riba e sirbidónan di Dios den nos tempu?
12 Ora Promé Guera Mundial a kaba na 1918, Yehova su sirbidónan por a komprendé ku Dios a kondená kristiandat i tur sobrá religion falsu. For di e tempu ei padilanti a kuminsá proklamá e siguiente yamada pa tur hende ku tin e aktitut korekto: “Sali for di dje, mi pueblo, pa bo no partisipá den su pikánan i pa bo no risibí di su plaganan; pasobra su pikánan a montoná yega te na shelu, i Dios a kòrdá su inikidatnan.” (Revelashon 18:4, 5) Esnan ku tabatin deseo di sirbi Yehova a kuminsá ser limpiá di rastronan di religion falsu, i nan a kuminsá prediká e bon nobo dje Reino establesí rònt mundu. Mester terminá e obra aki promé ku e fin dje sistema di kosnan malbado aki yega.—Mateo 24:14.
13 Esaki mester a sosodé pa kumpli ku e profesia na Malakías 4:5, kaminda Yehova a deklará: “Mira, mi ta bai manda profeta Elías serka boso promé ku binida di e dia grandi i teribel di SEÑOR.” E profesia ei a kumpli pa di promé bes den e obra di Huan Boutista, kende Elías a prefigurá. Huan a hasi un trabou similar na esun di Elías ora el a batisá hudiu ku a repentí di nan pikánan kontra e pakto di Lei. Mas importante ainda, Huan a sirbi pa anunsiá yegada dje Mesias. Pero e obra di Huan tabata djis un promé kumplimentu dje profesia di Malakías. Hesus a identifiká Huan komo e di dos Elías, pero el a indiká ku ainda tabatin otro trabou di “Elías” ku mester a tuma lugá den futuro.—Mateo 17:11, 12.
14. Ki trabou vital mester tuma lugá promé ku e sistema aki kaba?
14 Malakías a mustra ku e gran trabou di Elías aki lo ser hasí promé ku “e dia grandi i teribel di SEÑOR.” E dia ei ta terminá den e guera dje gran dia di Dios Todopoderoso na Armagedon, ku ta hopi serka. Pues, promé ku e fin dje mundu malbado aki yega i e Reinado di Mil Aña di Dios su Reino selestial kuminsá, ku Hesukristu komo Rei, un obra paresido na esun di Elías lo ser efektuá. Manera e profesia ei ta bisa, promé ku Yehova destruí e sistema malbado aki, e grupo manera Elías den tempu moderno yen di entusiasmo ta hasi e trabou di restorá adorashon berdadero, engrandesé e nòmber di Yehova, i siña hende manera karné e bèrdatnan di Beibel. Nan ta hasi esaki ku apoyo di miónes di otro kristian ku tin speransa di keda biba riba tera.
Yehova Ta Bendishoná Su Sirbidónan
15. Kon Yehova ta kòrda riba su sirbidónan?
15 Yehova ta bendishoná esnan ku ta sirbié. Malakías 3:16 ta bisa: “E ora ei esnan ku a teme SEÑOR a papia ku otro, i SEÑOR a presta atenshon i a tende esaki, i un buki di memoria a wòrdu skirbí su dilanti pa esnan ku ta teme SEÑOR i ku ta onra su nòmber.” Kuminsando ku Abel, Dios ta skirbiendo den un buki, na moda di papia, nòmber di esnan ku lo e kòrda ariba pa bida eterno. Yehova ta bisa nan: “Trese henter e diesmo den mangasina, pa por tin kuminda den mi kas, i pone mi na prueba awor den esaki,” e SEÑOR di ehérsitonan ta bisa, “si mi lo no habri pa boso e bentananan di shelu, i basha asina tantu bendishon, ku boso lo no tin sufisiente lugá pa konten’é.”—Malakías 3:10.
16, 17. Kon Yehova a bendishoná su pueblo i e obra ku nan ta efektuá?
16 Di bèrdat Yehova a bendishoná esnan ku ta sirbié. Den ki manera? Un manera ta ku el a laga nan komprendé su propósito mihó. (Proverbionan 4:18; Daniel 12:10) Un otro manera ta dor di duna nan resultadonan impreshonante den nan trabou di prediká. Hopi hende sinsero a uni ku nan den adorashon berdadero, i huntu nan tur ta forma e “multitut grandi . . . di tur nashon i tur tribu i pueblo i lenga” ku ta grita na bos haltu: “Salbashon ta di nos Dios, kende ta sintá riba e trono, i di e Lamchi.” (Revelashon 7:9, 10) E profesia dje multitut grandi aki a kumpli na un manera grandioso, i awor tin mas ku seis mion hende ta sirbi Yehova aktivamente den mas ku 93.000 kongregashon rònt mundu!
17 Tambe nos por mira Yehova su bendishon den e echo ku Testigunan di Yehova ta publiká e literatura bíbliko mas plamá di historia. Aktualmente, 90 mion ehemplar di E Toren di Vigilansia i Spièrta! ta ser produsí tur luna; E Toren di Vigilansia den 144 idioma, i Spièrta! den 87. A distribuí un total di 107 mion ehemplar dje buki di estudio titulá E berdad cu ta hiba na bida eterna, publiká na 1968 den 117 idioma. A distribuí mas ku 81 mion ehemplar di Bo por biba pa semper den Paradijs riba tera, publiká na 1982, den 131 idioma. Te ku awor, e buki Conocimentu cu Ta Hiba na Bida Eterno, publiká na 1995, a alkansá 85 mion ehemplar den 154 idioma. Ya kaba a distribuí 150 mion ehemplar dje foyeto Kico Dios Ta Rekerí di Nos?, publiká na 1996 den 244 idioma.
18. Dikon nos ta gosa di prosperidat spiritual apesar di e oposishon ku nos ta enfrentá?
18 E prosperidat spiritual aki ta eksistí apesar ku nos ta enfrentando oposishon dje mundu di Satanas den un forma mas severo i mas largu ku nunka promé. Esei ta mustra ku loke Isaías 54:17 ta bisa ta berdat: “‘Ningun arma ku wòrdu formá kontra bo lo no prosperá; i tur lenga ku lanta kontra bo den huzgamentu lo bo kondená. Esaki ta e herensia di e sirbidónan di SEÑOR, i nan hustifikashon ta bin for di mi,” SEÑOR ta deklará.” Yehova su sirbidónan tin e gran konsuelo di sa ku e kumplimentu mayor di Malakías 3:17 [NW] ta apliká na nan: “‘Sigur nan lo bira di mi,’ Yehova di ehérsitonan a bisa, ‘riba e dia ku mi produsí un propiedat spesial.’”
Sirbiendo Yehova ku Goso
19. Den ki sentido esnan ku ta sirbi Yehova ta klaramente diferente for di esnan ku no ta sirbié?
19 E diferensia skèrpi ku tin entre sirbidónan fiel di Yehova i hende den mundu di Satanas ta birando kada bes mas bisto segun ku tempu pasa. Malakías 3:18 a profetisá: “Boso lo distinguí atrobe entre e hustu i e malbado, entre un ku ta sirbi Dios i un ku no ta sirbié.” Un dje hopi diferensianan ku tin ta ku Yehova su sirbidónan ta sirbié yen di goso. Un motibu di nan goso ta e speransa maravioso ku nan tin. Nan tin tur konfiansa den e palabranan aki di Yehova: “Mira, mi ta krea shelunan nobo i un tera nobo; i e kosnan di ántes lo no wòrdu rekòrdá mas ni bin na memoria. Ma sea kontentu i regosihá pa semper den loke mi ta krea.”—Isaías 65:17, 18; Salmo 37:10, 11, 29; Revelashon 21:4, 5.
20. Dikon nos ta un pueblo gososo?
20 Nos ta kere Yehova su promesa, ku su pueblo fiel lo sobrebibí su gran dia i drenta den un mundu nobo. (Sofonías 2:3; Revelashon 7:13, 14) I maske kisas algun di nos por muri promé ku esei dor di edat avansá, malesa òf aksidente, Yehova ta duna su palabra ku lo e resusitá hende asina pa bida eterno. (Huan 5:28, 29; Tito 1:2) Pues, maske nos tur tin nos problemanan i retonan den bida, segun ku e dia di Yehova aki ta aserkando, nos tin tur motibu pa ta e hendenan di mas gososo na mundu.
Kon Lo Bo Kontestá?
• Kiko ta e dia di Yehova?
• Kon religionnan di mundu ta imitá Israel di antigwedat?
• Kua profesianan ta kumpli riba Yehova su sirbidónan?
• Kon Yehova a bendishoná su pueblo?
[Preguntanan di Estudio]
[Plachi na página 21]
Yerúsalèm di promé siglo a “kima manera fòrnu”
[Plachi na página 23]
Yehova ta sòru pa esnan ku ta sirbié
[Plachi na página 24]
Dor ku Yehova su sirbidónan tin un speransa maravioso, nan ta hende berdaderamente gososo