Kon Desabilidat Lo Kaba

IMAGINÁ bo ku wowo di hende siegu ta mira, orea di hende surdu ta tende tur zonido, lenga di hende muda ta kanta ku goso i hende lam ta kana rònt ku pasonan firme! No ta di avanse den siensia médiko nos ta papiando, sino di loke lo pasa ora Dios mes intervení na fabor di humanidat. Beibel ta profetisá: “E ora ei wowo di e siegunan lo mira, i orea di e surdunan lo tende. Anto e kohonan lo bula manera biná, i lenga di e muda lo grita di alegria.” (Isaías 35:5, 6) Pero kon nos por sa sigur ku e profesia asombroso aki lo bira realidat?

Pa kuminsá, tempu ku Hesukristu tabata riba tera, el a kura hende di tur sorto di enfermedat i desabilidat. Ademas, mayoria di su milagernan a tuma lugá dilanti hopi testigu, asta dilanti su enemigunan. De echo, por lo ménos un dje biahanan ei, su opositornan skeptiko a investigá e asuntu a fondo pa purba desakreditá Hesus. Pero nan lo mester a kunsumí hopi, pasobra tur loke nan a logra ta di konfirmá ku ta un milager a sosodé. (Huan 9:1, 5-34) Ora Hesus a bolbe hasi un otro milager innegabel, nan a bisa tur frustrá: “Kiko nos ta hasi? Pasobra e hòmber aki ta hasi hopi milager.” (Huan 11:47) Pero e pueblo komun sí no tabata asina indiferente, pasobra hopi di nan a kuminsá pone fe den Hesus.—Huan 2:23; 10:41, 42; 12:9-11.

E Milagernan di Hesus—Muestra dje Kurashon Mundial na Kaminda

E milagernan di Hesus a proba ku e ta e Mesias i e Yu di Dios. Pero nan a logra mas. Nan ta forma un base pa nos tin fe den e promesanan di Beibel ku ta bisa ku hende obediente lo ser kurá den futuro. Un dje promesanan aki ta na Isaías kapítulo 35. Nos a menshon’é kaba den e promé paragraf. Esaki ta loke Isaías 33:24 ta bisa tokante e futuro estado di salú di hende ku ta teme Dios: “Ningun habitante lo no bisa: ‘Mi ta malu.’” Revelashon 21:4 tambe ta primintí: “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan [e difikultatnan i sufrimentu djawendia] a pasa.”

Regularmente hende ta resa pidi pa e profesianan aki kumpli ora nan hasi e orashon di Nos Tata. Entre otro e orashon ei ta bisa: “Ku bo reino bin. Ku bo boluntat sosodé na tera  meskos ku den shelu.” (Mateo 6:10) Sí, planeta tera i humanidat ta parti di Dios su boluntat. Ounke Dios a permití enfermedat i desabilidat ku un motibu, pronto nan lo pasa pa historia. Nan lo no keda mancha e ‘banki di Dios su pia’ pa semper.—Isaías 66:1. *

Kurashon sin Doló i sin Gastu

Hesus a kura tur enfermedat ku hende a sufri, sin doló, sin tarda i sin ku nan mester a paga nada. Di mes, e notisia aki a plama manera un kandela den yerba seku, i den poko tempu “multitutnan grandi a bin serka dje, i a trese huntu ku nan esnan ku tabata lam, mankaron, siegu, muda, i hopi otronan, i nan tabata pone nan na su pia; i e tabata kura nan.” Kon e pueblo a reakshoná? Mateo, ku a mira personalmente loke a sosodé, ta sigui bisa den su relato: “E multitut a keda atmirá ora nan a mira e mudanan ta papia, e mankaronnan bon di salú, e lamnan ta kana i e siegunan ta mira; i nan a glorifiká e Dios di Israel.”—Mateo 15:30, 31.

Paga tinu ku Hesus no a skohe un par di hende spesífiko for di den e multitut pa e kura nan, manera algun supuesto kuradó sa hasi pa gaña hende. Mas bien, e multitut di famia i amigu tabata ‘kasi tira nan na Hesus su pia, i el a kura nan.’ [NW] Laga nos ban repasá un par di ehèmpel konkreto di Hesus su abilidat di kura hende.

Hende siegu: Na Yerúsalèm Hesus a yega di duna bista na un hòmber ku tabata “siegu for di su nasementu.” E hòmber aki tabata bon konosí den e stat komo un limosnero siegu. P’esei, bo mes por imaginá bo kon asombrá i eksitá e hendenan a keda ora nan a mir’é ta kana rònt ku su bista restorá! Sin embargo, no ta tur hende a keda kontentu. Algun dje fariseonan, un sekta hudiu prominente i ku influensia, tabata rabiá debí ku algun tempu promé Hesus a eksponé kon malbado nan tabata. Awor nan tabata desesperá pa haña evidensia pa mustra ku Hesus tabata gaña hende. (Huan 8:13, 42-44; 9:1, 6-31) P’esei, promé nan a interogá e hòmber ku Hesus a kura, despues su mayornan, i despues e homber mes atrobe. Pero e úniko kos ku e investigashon dje fariseonan a logra ta di konfirmá e milager di Hesus, i nan a kunsumí. Asombrá di mira kon malbado e hipókritanan religioso aki tabata, e hòmber ku Hesus a kura mes a bisa: “For di prinsipio di tempu nunka hende no a tende ku un hende a habri wowo di un persona ku a nase siegu. Si e hòmber aki no tabata di Dios, e lo no por a hasi nada.” (Huan 9:32, 33) Maske e homber aki a ekspresá su fe na un manera franko i lógiko, e fariseonan a “sak’é afó,” loke ta duna di komprendé ku nan a ekspulsá e hòmber for di snoa.—Huan 9:22, 34.

Hende surdu: Ora Hesus tabata na Dekápolis, un region ost di Riu Yordan, “nan a trese serka dje un hende ku tabata surdu i ku tabatin lenga pegá.” (Marko 7:31, 32) Ademas di kura e hòmber aki, Hesus a mustra tambe ku el a komprendé sintimentu di hende surdu hopi bon, ya ku algun di nan ta sinti bèrgwensa ora nan ta den un multitut. Beibel ta konta nos ku Hesus a hala e hòmber surdu un banda, “apartá for di e multitut,” i a kur’é. N’e okashon aki tambe, esnan ku a mira kiko a pasa “a keda masha asombrá mes,” bisando: “El a hasi tur kos asina bon; e ta hasi surdu tende i muda papia.”—Marko 7:33-37.

Hende lam: Ora Hesus tabata na Kapernaum, hende a bini serka dje ku un hòmber lam drumí riba un kama. (Mateo 9:2) Versíkulo 6 pa 8 ta konta kiko a pasa. “[Hesus] a bisa e paralítiko: ‘Lanta, kohe bo kama i bai kas.’ Anto el a lanta i a bai kas. Ma ora ku e multitutnan a mira esaki, nan a keda yen di temor i a glorifiká Dios, kende a duna tal outoridat na hende.” E milager aki tambe a tuma lugá den bista di tantu Hesus su disipelnan komo su enemigunan. Nota ku su disipelnan, ku no tabata siegá pa odio i prehuisio, “a glorifiká Dios” pa loke nan a kaba di mira.

 Enfermedat: “I un leproso a bin serka [Hesus], i a rogu’é i a kai na rudia su dilanti, i a bis’é: ‘Si bo kier, bo por hasi mi bira limpi.’ I yen di kompashon el a saka su man, i a mishi kuné i a bis’é: ‘Mi kier, sea limpi.’ I mesora e lepra a kita for di dje i el a keda limpi.” (Marko 1:40-42) Nota ku Hesus no a kura e hende aki di mala gana, sino ku kompashon genuino. Imaginá bo ku ta abo tabata e leproso. Kon lo bo a sinti si bo a kura den un instante i sin doló di un malesa teribel ku pokopoko a desfigurá bo kurpa i obligá bo biba apartá for di sosiedat? Sin duda bo por komprendé dikon un otro leproso ku Hesus a kura milagrosamente a “tira su kurpa abou ku su kara te na suela na pia di Hesus, i a duna gradisimentu na dje.”—Lukas 17:12-16.

Herida: E último milager ku Hesus a hasi promé ku nan a arest’é i klab’é na staka tabata un kurashon. Aktuando sin pensa kontra esnan ku kier a bai ku Hesus prezu, apòstel Pedro “kende tabatin un spada, a sak’é i a dal e sumosaserdote su esklabo kap su orea drechi kita afó.” (Huan 18:3-5, 10) Lukas, ku tambe ta relatá e mesun sosodementu, ta konta nos ku Hesus a “mishi ku su orea i a kur’é.” (Lukas 22:50, 51) E gesto di bondat aki tambe a tuma lugá dilanti tantu amigu komo enemigu di Hesus; den e kaso aki, esnan ku a bin pa koh’é prezu.

Sí, mas nos eksaminá e milagernan di Hesus, mas evidensia nos ta mira di ku nan ta outéntiko. (2 Timoteo 3:16) I manera nos a menshoná kaba, dor di studia e relatonan ei nos ta haña mas fe den Dios su promesa di kura hende obediente. Beibel ta definí fe kristian komo “e siguransa di kosnan ku hende ta spera, e konvikshon di kosnan ku hende no ta mira.” (Hebreonan 11:1) Klaramente, Dios no ta animá nos pa tin un fe siegu ni un speransa sin base, sino un fe firme basá riba evidensia. (1 Huan 4:1) Segun ku nos desaroyá un fe asina, nos lo mira ku nos ta bira mas fuerte, salú i felis den sentido spiritual.—Mateo 5:3; Romanonan 10:17.

Kurashon Spiritual Mester Bini Promé!

Hopi hende ta físikamente salú pero infelis. Tin hende asta ta purba kometé suisidio debí ku nan no tin speransa pa futuro, òf debí ku nan ta sinti nan hogá ku problema. Lo bo por bisa ku nan ta desabilitá den sentido spiritual. Den Dios su bista e situashon aki ta hopi mas grave ku desabilidat físiko. (Huan 9:41) Di otro banda, hopi hende ku tin un desabilidat físiko, manera Christian i Junior ku nos a menshoná den e artíkulo anterior, ta biba felis i ku un sentido di satisfakshon. Dikon? Dor ku nan ta spiritualmente sano, i yen di ánimo debí n’e speransa sigur ku nan tin basá riba Beibel.

Papiando di nos nesesidat úniko komo hende, Hesus a bisa: “Hende lo no biba di pan so, ma di tur palabra ku ta sali for di boka di Dios.” (Mateo 4:4) Sí, hende tin mester di mas ku djis kuminda físiko; nos no ta manera bestia. Nos ta kreá segun e “imágen” di Dios, i nos tin mester di alimento spiritual, esta, konosementu tokante Dios, tokante ki papel nos ta hunga den su propósito, i tokante kon nos por kumpli ku su boluntat. (Génesis 1:27; Huan 4:34) Konosementu di Dios ta duna nos bida nifikashon i e ta duna nos ánimo pa sirbi Dios. Ademas e ta duna nos chèns di por biba pa semper den paradeis riba tera. Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.”—Huan 17:3.

Ta interesante pa nota ku e hendenan ku a biba den tempu di Hesus no a yam’é “Kurandero” sino “Maestro.” (Lukas 3:12; 7:40) Dikon? Dor ku Hesus a siña hende kiko ta e solushon permanente pa tur problema di humanidat: e Reino di Dios. (Lukas 4:43; Huan 6:26, 27) E gobièrnu selestial aki den man di Hesukristu lo goberná henter mundu i kumpli ku tur e promesanan di Beibel ku ta bisa ku hende hustu i tera, ku ta nan kas, lo ser restorá kompletamente i pa semper. (Revelashon 11:15) Ta p’esei den e orashon Nos Tata, Hesus a mustra ku e binida dje Reino di Dios tin di haber  ku kumplimentu di Dios su boluntat riba tera.—Mateo 6:10.

E speransa animante aki a pone e lágrimanan di tristesa di hopi hende desabilitá kambia bira lágrima di goso. (Lukas 6:21) De echo, Dios ta bai hasi mas ku eliminá enfermedat i desabilidat. E ta bai kaba kompletamente ku e kousa mes di sufrimentu humano, esta, piká. Sí, Isaías 33:24 i Mateo 9:2-7, ku nos a sita kaba, ta mustra ku enfermedat tin di haber ku nos estado di piká. (Romanonan 5:12) P’esei, una bes ku piká ser vensé, por fin humanidat lo disfrutá di “e libertat glorioso di e yunan di Dios,” un libertat ku entre otro ta nifiká perfekshon di mente i kurpa.—Romanonan 8:21.

Si un hende ta gosa di basta bon salú, ta fásil p’e keda sin para ketu i pensa kon importante un bon salú ta. Pero hende aflihí ku desabilidat sí konosé su balor. Nan sa bon kon presioso bida i salú ta, i kon bo situashon por kambia di ripiente i sin ku bo a spera. (Eklesiástes 9:11) P’esei, nos ta spera ku nos lesadónan ku ta desabilitá por presta atenshon spesial na Dios su maravioso promesanan skirbí den Beibel. Hesus a duna su bida pa e por garantisá ku nan lo kumpli. Ki mihó garantia nos por kier?—Mateo 8:16, 17; Huan 3:16.

[Nota]