Kumpli ku Rekisitonan Divino Ta Engrandesé Yehova

“Lo mi engrandes’é ku gradisimentu.”—SALMO 69:30.

1. (a) Dikon Yehova meresé pa nos engrandes’é? (b) Kon nos ta engrandes’é ku gradisimentu?

YEHOVA ta e Dios todopoderoso, e Soberano di Universo i e Kreador. Komo tal, su nòmber i su propósito meresé pa nos engrandesé nan. Engrandesé Yehova kier men atmir’é profundamente, alab’é i elogi’é ku echo i ku palabra. Pa nos engrandes’é “ku gradisimentu,” semper nos mester mustra gradisimentu pa loke e ta hasi pa nos awor, i loke e ta bai hasi pa nos den futuro. Nos mester tin e mesun aktitut ku e fiel kriaturanan spiritual den shelu menshoná na Revelashon 4:11 tabatin, kendenan a bisa: “Digno bo ta, nos Señor i nos Dios, pa risibí gloria i onor i poder; pasobra abo a krea tur kos, i pa motibu di bo boluntat nan tabata eksistí, i a wòrdu kreá.” Kon nos por engrandesé Yehova? Dor di siña tokante dje i hasi loke e ta spera di nos. Nos mester sinti meskos ku e salmista ora el a bisa: “Siña mi hasi bo boluntat, pasobra abo ta mi Dios.”—Salmo 143:10.

2. Kon Yehova ta trata esnan ku ta engrandes’é i esnan ku no ta hasié?

² Yehova tin apresio pa esnan ku ta engrandes’é. Ta p’esei e ta “esun ku ta rekompensá esnan ku ta busk’é.” (Hebreonan 11:6) Kiko e rekompensa lo ta? Den un orashon na su Tata selestial, Hesus a bisa: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Huan 17:3) Sí, esnan ku ‘engrandesé Yehova ku gradisimentu’ lo “heredá e tera, i lo biba den dje pa semper.” (Salmo 37:29) Di otro banda, “lo no tin futuro pa e hende malbado.” (Proverbionan 24:20) I den e último dianan aki ta urgente pa nos engrandes’é Yehova, pasobra pronto e ta bai destruí hende malbado i skapa e hustunan. “Mundu ta pasa bai i su deseonan tambe, ma esun ku hasi e boluntat di Dios ta permanesé pa semper.”—1 Huan 2:17; Proverbionan 2:21, 22.

3. Dikon nos tin ku presta atenshon n’e buki di Malakías?

³ Den Beibel nos ta haña sa e boluntat di Yehova, pasobra “tur Skritura ta inspirá pa Dios.” (2 Timoteo 3:16) E Palabra di Dios ta kontené hopi relato tokante kon Yehova ta bendishoná esnan ku ta engrandes’é, i kiko ta pasa ku esnan ku no ta hasié. Un di e relatonan ei tin di haber ku loke a tuma lugá na Israel den tempu di profeta Malakías. Rònt di aña 443 promé ku Era Komun, tempu ku Nehemías tabata gobernadó di  Huda, Malakías a skirbi e buki di Beibel ku ta karga su nòmber. E buki emoshonante i impaktante aki tin informashon i profesia ku “a wòrdu skirbí komo un spièrtamentu pa nos, riba kendenan e finnan di e siglonan a bin.” (1 Korintionan 10:11) Dor di presta atenshon na e palabranan di Malakías, nos por ta mihó prepará pa “e dia grandi i teribel” di Yehova, ora e destruí e mal sistema di kosnan aki.—Malakías 4:5.

4. Na kua seis punto Malakías kapítulo 1 ta hala nos atenshon?

⁴ Kon e buki di Malakías, ku a ser skirbí mas ku 2.400 aña pasá, por yuda nos ku ta biba den siglo 21 prepará nos mes p’e dia grandi i teribel di Yehova? E promé kapítulo ta hala nos atenshon na por lo ménos seis punto ku ta krusial si nos kier engrandesé Yehova ku gradisimentu pa gana su aprobashon i bida eterno: (1) Yehova ta stima su pueblo. (2) Nos mester mustra apresio pa kos sagrado. (3) Yehova ta spera ku nos ta dun’é lo mihó di nos. (4) Ta amor inegoista ta motivá adorashon berdadero, i no golosidat. (5) Sirbi Dios na un manera aseptabel no ta djis un formalidat ni un peso pa nos. (6) Nos tur tin ku rindi kuenta na Dios. Pues, den e promé artíkulo aki den un serie di tres tokante e buki di Malakías, laga nos eksaminá kada un dje puntonan aki segun ku nos ta wak Malakías kapítulo 1 mas djaserka.

Yehova Ta Stima Su Pueblo

5, 6. (a) Dikon Yehova a stima Yakòb? (b) Si nos ta fiel manera Yakòb, kiko nos por spera komo resultado?

⁵ Yehova su amor ta bisto den e promé versíkulonan di Malakías. E buki ta kuminsá ku e palabranan: “Un deklarashon formal: E palabra di Yehova tokante Israel.” [NW] Despues Dios ta bisa: “Mi a stima boso.” Den e mesun versíkulo Yehova ta duna un ehèmpel dor di bisa: “Mi a stima Yakòb.” Yakòb tabata un hòmber ku tabatin fe den Yehova. Ku tempu Yehova a kambia Yakòb su nòmber pa Israel, i el a bira un dje antepasadonan dje nashon di Israel. Ta pasobra Yakòb tabata un hòmber di fe Yehova a stim’é. I e israelitanan ku a mustra e mesun aktitut ei, tambe Dios a stima.—Malakías 1:1, 2

⁶ Si nos ta stima Yehova i ta pega lealmente na su pueblo, nos por haña konsuelo den e deklarashon na 1 Samuel 12:22: “SEÑOR lo no bandoná su pueblo pa motibu di Su gran nòmber.” Yehova ta stima su pueblo, i e ta rekompensá nan, finalmente asta ku bida eterno. P’esei Beibel ta bisa: “Konfia den SEÑOR i hasi loke ta bon; biba den e tera i alimentá bo mes ku su fieldat. Deleitá bo mes den SEÑOR, i e lo duna bo e deseonan di bo kurason.” (Salmo 37:3, 4) Amor pa Yehova tin di haber ku e di dos punto ku Malakías kapítulo 1 ta hala nos atenshon na dje.

Mustra Apresio pa Kos Sagrado

7. Dikon Yehova a odia Esau?

⁷ Manera nos por lesa na Malakías 1:2 i 3, despues ku Yehova bisa “Mi a stima Yakòb,” e ta bisa “Esau mi a odia.” Dikon e diferensia aki? Yakòb a engrandesé Yehova, pero su ruman ohochi Esau nò. Un otro nòmber pa Esau ta Edòm. Malakías 1:4 ta yama e tera di Edòm e teritorio di maldat, i su habitantenan ta ser kondená. Esau a risibí e nòmber Edòm (ku kier  men “Kòrá”) despues ku el a bende su presioso derecho di primogénito ku Yakòb pa un poko stobá kòrá. “Esau a despresiá su derecho di primogenitura,” segun Génesis 25:34. Apòstel Pablo a spièrta otro kreyentenan mashá pa nan tene kuidou “pa no tin ningun hende inmoral òf sin Dios manera Esau, kende a bende su mes derecho di nasementu pa un solo kuminda.”—Hebreonan 12:14-16.

8. Dikon Pablo a relashoná Esau ku inmoralidat seksual?

⁸ Dikon Pablo a konektá loke Esau a hasi ku inmoralidat seksual? Pasobra un mentalidat manera di Esau por pone un hende keda sin apresiá kos sagrado. Na su turno, esaki por hiba na piká serio, manera inmoralidat seksual. P’esei, kada un di nos lo por puntra su mes: ‘Tin bes ku mi ta sinti mi tentá pa troka mi herensia kristian—bida eterno—pa algu mes pasahero ku un kònchi di bonchi stobá? Mi por ta despresiando kos sagrado, kisas sin realisá?’ Esau tabatin un deseo impasiente pa hasi algu ku su kurpa a anhelá. El a bisa Yakòb: “Lihé, por fabor, duna mi un boká dje kos kòrá.” (Génesis 25:30, NW) Lamentablemente, tin algun sirbidó di Dios ku den un sentido a bisa: “Lihé! Pakiko warda te ora nos ta kasá, manera mester ta?” Un deseo pa satisfakshon seksual kueste loke kueste a bira nan kònchi di bonchi stobá.

9. Kon nos por keda ku un temor respetuoso pa Yehova?

⁹ Laga nos no despresiá kos sagrado nunka dor di despresiá desensia, integridat i nos herensia spiritual. Na lugá di ta manera Esau, laga nos ta fiel manera Yakòb, i keda ku un temor respetuoso di Dios dor di mustra apresio profundo pa kos sagrado. Kon nos por hasi esaki? Dor di paga bon tinu pa kumpli ku Yehova su rekisitonan. Di mes esaki ta hiba nos na e di tres punto ku Malakías kapítulo 1 ta trese padilanti. Kiko e ta?

Duna Yehova Lo Mihó di Nos

10. Den ki manera e saserdotenan a despresiá e mesa di Yehova?

¹⁰ E saserdotenan di Huda ku tabata sirbi Yehova n’e tèmpel na Yerúsalèm den tempu di Malakías no tabata ofresé Yehova e mihó sakrifisionan posibel. Malakías 1:6-8 [NW] ta bisa: “‘Un yu, di su parti, ta onra un tata; i un sirbidó, su gran doño. Pues, si mi ta un tata, unda e onor pa mi ta? I si mi ta un gran doño, unda e temor di mi ta?’ Yehova di ehérsitonan a bisa boso, o saserdotenan ku ta despresiá mi nòmber.” E saserdotenan a puntra: “Di ki manera nos a despresiá bo nòmber?” Yehova a kontestá nan: “Ora boso a presentá pan kontaminá riba mi altar.” E saserdotenan a puntra: “Di ki manera nos a kontaminá bo?” Pues, Yehova a kontestá nan: “Ora boso ta bisa: ‘E mesa di Yehova ta algu pa ser despresiá.’” Kada bes ku e saserdotenan ei a presentá un sakrifisio mankaron i bisa ku “esei no ta nada malu,” nan a mustra ku nan a despresiá Yehova su mesa.

11. (a) Kiko Yehova a bisa tokante sakrifisio inaseptabel? (b) Dikon e pueblo en general tabatin falta?

¹¹ E ora ei Yehova a rasoná ku nan tokante e sakrifisionan inaseptabel ei: “Pakiko bo no ta ofresé bo gobernadó esei? E lo keda kontentu ku bo? Òf e lo risibí bo ku kariño?” Nò,  nan gobernadó lo no keda kontentu ku un regalo asina. Wèl, e Soberano di Universo muchu ménos lo aseptá ofrenda mankaron! Anto no ta e saserdotenan so tabata fout. En bèrdat nan a mustra despresio pa Yehova dor di efektuá e sakrifisionan. Pero e pueblo en general awor? Nan tabata inosente? Apsolutamente ku nò! Ta nan a skohe e bestianan siegu, lam i enfermo i a trese nan p’e saserdotenan sakrifiká. Esei sí ta un aktitut pekaminoso!

12. Kon nos ta ser yudá pa duna Yehova lo mihó di nos?

¹² E manera pa mustra ku nos ta stima Yehova di bèrdat ta dor di dun’é lo mihó ku nos por. (Mateo 22:37, 38) Yehova su organisashon djawe no ta manera e saserdotenan malu den tempu di Malakías. E ta duna hopi guia bíbliko ekselente ku ta yuda nos engrandesé Yehova ku gradisimentu dor di kumpli ku su rekisitonan. Relashoná ku esaki tin un di kuater punto importante ku nos por saka for di Malakías kapítulo 1.

Ta Amor Ta Motivá Adorashon Berdadero, No Golosidat

13. Kiko e saserdotenan tabata hasi ku a mustra ku ta golosidat a motivá nan?

¹³ E saserdotenan den tempu di Malakías tabata egoista, sin amor i golos pa plaka. Kon nos por sa? Malakías 1:10 [NW] ta bisa: “‘Ken tambe tin den boso ku lo sera e portanan? I boso lo no sende mi altar—pornada. Mi no tin ningun deleite den boso,’ Yehova di ehérsitonan a bisa, ‘i mi no tin plaser den e ofrenda di regalo di boso man.’” Sí, e saserdotenan golos pa plaka ei a eksihí pa hende paga nan pa kumpli ku e sirbishinan di tempel di mas símpel. Nan tabata kier sèn pa sera porta i pa sende kandela di altar! Nada straño ku Yehova no tabatin deleite den e ofrendanan di nan man!

14. Dikon nos por bisa ku ta amor ta motivá Testigunan di Yehova?

¹⁴ E golosidat i egoismo dje saserdotenan pekadó di Yerúsalèm di antigwedat lo por hasi nos kòrda ku, segun e Palabra di Dios, hende golos lo no heredá e Reino di Dios. (1 Korintionan 6:9, 10) Dor di reflekshoná riba e sistema egoista dje saserdotenan ei, nos por haña mas apresio pa e obra di predikashon mundial ku Testigunan di Yehova ta efektuá. E ta un trabou boluntario. Nunka nos no ta kobra pa niun parti di nos ministerio. Nò, nos no ta “kana hasi negoshi ku e palabra di Dios.” (2 Korintionan 2:17) Meskos ku Pablo, kada un di nos por bisa ku tur frankesa: “Ku muchu gustu mi a deklará e bon nobo di Dios na boso sin kosto.” (2 Korintionan 11:7, NW) Tuma nota ku ta “ku muchu gustu [Pablo] a deklará e bon nobo.” Esei ta mustra nos riba un di sinku punto ku Malakías kapítulo 1 ta hala nos atenshon na dje.

Sirbi Dios No Ta un Formalidat ni un Peso

15, 16. (a) Ki aktitut e saserdotenan tabatin tokante ofresé sakrifisio? (b) Kon Testigunan di Yehova ta ofresé sakrifisio?

¹⁵ E saserdotenan sin fe den Yerúsalèm di antigwedat a konsiderá ofresementu di sakrifisio un formalidat fastioso. E tabata un peso pa nan. Manera Malakías 1:13 ta mustra, Dios a bisa nan: “Boso ta bisa: ‘Ai, esta un kansansio!’  I boso ta trèk kara ku despresio.” Sí, e saserdotenan tabata despresiá e kosnan sagrado di Dios. Laga nos resa pidi pa nunka nos no bira manera nan. Mas bien, laga nos semper desplegá e aktitut ku ta bini padilanti den e palabranan na 1 Huan 5:3: “Esaki ta e amor di Dios, ku nos ta warda su mandamentunan; i su mandamentunan no ta pisá.”

¹⁶ Laga nos tin deleite den ofresé sakrifisio spiritual na Dios, sin nunka mira nan komo un peso òf un kansansio. Laga nos hasi manera e palabranan profétiko aki ta bisa: “Bisa [Yehova]: ‘Pordoná eror; i aseptá loke ta bon, i nos lo ofresé en kambio e toronan hóben di nos lepnan.’” (Oséas 14:2, NW) E ekspreshon “toronan hóben di nos lepnan” ta nifiká sakrifisio spiritual, e palabranan ku nos ta papia pa alabá Yehova i su propósito. Hebreonan 13:15 [NW] ta deklará: “Mediante [Hesukristu], laga nos semper ofresé na Dios un sakrifisio di alabansa, esta, e fruta di lepnan ku ta hasi deklarashon públiko di su nòmber.” Esta felis nos ta di sa ku nos sakrifisionan spiritual no ta un simpel formalidat, sino muestranan sinsero di nos amor pa Dios! Esaki ta hiba nos na e di seis punto ku nos por siña for di Malakías kapítulo 1.

Kada Ken Tin Ku Rindi Kuenta

17, 18. (a) Dikon Yehova a maldishoná “esun ku ta aktua ku astusia”? (b) Kiko esnan ku a aktua ku astusia no a tene kuenta kuné?

¹⁷ Kada ken den tempu di Malakías tabata personalmente responsabel pa nan akshonnan, i ku nos ta meskos. (Romanonan 14:12; Galationan 6:5) P’esei Malakías 1:14 ta bisa: “Maldishoná sea e ladron ku tin un chubatu [sin defekto] den su tou di bestia chikitu, i ta primintí esaki, ma ta sakrifiká un bestia ku defekto na Señor.” Un tou no ta konsistí di un bestia so, por ehèmpel un solo karné. P’esei, un hende ku tabatin un tou di bestia por a skohe kua bestia e ta sakrifiká. E no tabatin nodi skohe unu siegu, lam of enfermo. Si el a skohe un bestia mankaron asina tòg, esei lo a mustra ku el a despresiá Yehova su areglo di hasi sakrifisio, pasobra un hòmber ku tin un tou di bestia mester por a haña unu sin defekto!

¹⁸ P’esei, Yehova tabatin bon motibu p’e maldishoná un ladron [‘hende ku aktua ku astusia,’ NW] asina, ku tabatin un bestia drechi, ma a trese—òf kisas asta lastra trese—un bestia siegu, lam of enfermo p’e saserdote sakrifiká. I sin embargo, no tin ningun indikashon di ku sikiera un dje saserdotenan a sita e lei di Dios pa mustra ku bestia mankaron no tabata aseptabel. (Levítiko 22:17-20) Kualke hende rasonabel por a sa ku lo bai e malu si e purba pusha su gobernadó ku un regalo asina. Pero ta ku Yehova mes nan tabata trata, ku e Soberano di Universo. E ta hopi, hopi mas haltu ku kualkier gobernadó humano. Malakías 1:14 ta ekspres’é asin’akí: “‘Ami ta un gran Rei,’ e SEÑOR di ehérsitonan ta bisa, ‘i e nashonnan tin temor di mi nòmber.’”

19. Kiko nos ta anhelá, i kiko nos lo mester ta hasiendo?

¹⁹ Komo sirbidónan leal di Dios, nos ta anhelá e dia ora henter humanidat lo respetá Yehova, e Gran Rei. E ora ei “tera lo ta yen di e konosementu di SEÑOR, manera awa ta tapa laman.” (Isaías 11:9) Entre tantu, laga nos hasi nos bèst pa kumpli ku Yehova su rekisitonan dor di imitá e salmista ku a bisa: “Lo mi engrandes’é ku gradisimentu.” (Salmo 69:30) Ku esei na mente, Malakías tin mas konseho ku por yuda nos hopi. P’esei, laga nos presta bon atenshon na e otro partinan dje buki di Malakías den e siguiente dos artíkulonan.

Bo Ta Kòrda?

• Pakiko nos mester engrandesé Yehova?

• Dikon e sakrifisionan dje saserdotenan den tempu di Malakías tabata inaseptabel pa Yehova?

• Kon nos por ofresé un sakrifisio di alabansa na Yehova?

• Kiko mester ta e motivashon di adorashon berdadero?

[Preguntanan di Estudio]

[Plachi na página 9]

E profesia di Malakías a mustra riba nos tempu

[Plachi na página 10]

Esau no tabatin apresio pa kos sagrado

[Plachi na página 11]

E saserdotenan i e pueblo a ofresé sakrifisionan inaseptabel

[Plachi na página 12]

Rònt mundu, Testigunan di Yehova ta ofresé sakrifisio di alabansa sin kobra nada