Pregunta di Lektor

Den kua parti dje tèmpel di Yehova e “multitut grandi” tabata ora Huan a mira nan ta rindi sirbishi sagrado den e tèmpel?—Revelashon 7:9-15.

Ta lógiko pa bisa ku e multitut grandi ta adorá Yehova den un dje patio òf plenchinan terenal di su gran tèmpel spiritual. Pa ta spesífiko, e plenchi ku ta korespondé ku esun parti pafó di e tèmpel di Sálomon.

Anteriormente tabata reina e idea ku e multitut grandi ta den un tipo di plenchi spiritual ku e Plenchi pa Pagano ku a eksistí den tempu di Hesus a representá. Sin embargo, investigashonnan mas aleu a revelá por lo ménos sinku motibu pakiko esei no ta e kaso. Pa di promé, no ta tur e partinan di e tèmpel di Herodes a representá algu den Yehova su gran tèmpel spiritual. Por ehèmpel den e tèmpel di Herodes tabatin un Plenchi di Hende Muhé i un Plenchi di Israel. Tantu hòmber komo muhé por a drenta e Plenchi di Hende Muhé, pero ta hende hòmber so por a drenta e Plenchi di Israel. Den e plenchinan terenal di Yehova su gran tèmpel spiritual, no tin separashon entre hòmber i muhé; tur ta adorá Dios huntu. (Galationan 3:28, 29) Pues den e tèmpel spiritual no tin nada paresido na e Plenchi di Hende Muhé ni di e Plenchi di Israel.

Na di dos lugá, ni e plannan arkitektóniko ku Dios a perkurá pa e tèmpel di Sálomon ni e tèmpel ku Ezekiel a mira den vishon, no tabatin un Plenchi pa Pagano; esei no tabata e kaso tampoko ku e tèmpel ku Zorobabel a rekonstruí. P’esei, no tin ningun motibu pa konkluí ku den e areglo di adorashon di Yehova su gran tèmpel spiritual mester tin un ekivalente pa e Plenchi pa Pagano. Spesialmente si nos tene kuenta ku e siguiente punto, nos lo no pensa asina.

Di tres, e edomita Rei Herodes a konstruí e Plenchi pa Pagano pa halsa su mes i p’e gana aprobashon di Roma. Herodes a kuminsá renobá e tèmpel di Zorobabel kisas na aña 18 òf 17 promé ku Era Komun. The Anchor Bible Dictionary ta splika: “E antohonan klásiko di poder imperial na Wèst [Roma] . . . a eksigí un tèmpel mas grandi na komparashon ku esnan den statnan oriental.” Sin embargo, e midínan dje tèmpel mes tabata establesé kaba. E dikshonario ta spliká: “Maske e Tèmpel mes lo mester a haña e mesun midínan ku esnan ku a eksistí promé kuné [esun di Sálomon i esun di Zorobabel], no tabatin restrikshon pa e tamaño di e Seru di Tèmpel.” P’esei Herodes a ekspandé e área dje tèmpel dor di agregá loke den tempu moderno hende a yama e Plenchi pa Pagano. Un konstrukshon ku tal antesedente lo tin ku representá algu den Yehova su areglo di tèmpel spiritual?

Di kuater, kasi tur hende—hende siegu, lam i pagano insirkunsidá—por a drenta e Plenchi pa Pagano. (Mateo 21:14, 15) Ta bèrdat ku riba e plenchi ei hopi pagano insirkunsidá ku a deseá esei por a hasi ofrenda na Dios. I tabata einan ku Hesus a yega di papia ku multitut di hende i dos bes el a saka e kambiadónan di plaka i negoshantenan for di einan, bisando ku nan a desonrá e kas di su Tata. (Mateo 21:12, 13; Huan 2:14-16) No opstante, The Jewish Encyclopedia ta bisa: “Pa ta eksakto, e plenchi parti pafó aki no tabata parti dje Tèmpel. Su flur no tabata sagrado, i ken-ku-ta por a drent’é.”

Di sinku, e palabra griego (hi·e·rón) tradusí komo “tèmpel” ku ta ser usá pa referí na e Plenchi pa Pagano, “ta referí na henter e kompleho di edifisio i no spesífikamente na e edifisio  dje Tèmpel riba su mes,” segun A Handbook on the Gospel of Matthew, di Barclay M. Newman i Philip C. Stine. Na kontraste ku hi·e·rón, e palabra griego (na·ós) tradusí komo “tèmpel” den e vishon ku Huan a mira di e multitut grandi ta mas spesífiko. Den e konteksto ku e tèmpel di Yerúsalèm ta aparesé, hopi bes e ta referí na e Santu di Santunan, e edifisio dje tèmpel òf e área kaminda e tèmpel ta situá. Tin bes e ta ser tradusí komo “santuario.”—Mateo 27:5, 51; Lukas 1:9, 21; Huan 2:20.

Miembronan dje multitut grandi ta ehersé fe den Hesus su sakrifisio di reskate. Nan ta spiritualmente limpi dor ku “nan a laba nan pañanan i a hasi nan blanku den e sanger di e Lamchi.” P’esei nan ta ser deklará hustu ku e prospekto di bira amigu di Dios i sobrebibí e gran tribulashon. (Santiago 2:23, 25) Den vários sentido nan ta manera e prosélitonan ku a someté nan mes na e pakto di Lei i a adorá Dios huntu ku e israelitanan.

Ta klaro ku e prosélitonan aki no a sirbi den e plenchi interior, kaminda e saserdotenan tabata kumpli ku nan responsabilidatnan. I e miembronan dje multitut grandi no ta den e plenchi parti paden di Yehova su gran tèmpel spiritual. E plenchi aki di e tèmpel ta representá e kondishon perfekto di yunan hustu ku e miembronan di e “saserdosio santu” di Yehova ta disfrutá di dje miéntras nan ta riba tera. (1 Pedro 2:5) Pero, manera e ansiano selestial a bisa Huan, e multitut grandi ta ègt den e tèmpel i no pafó dje área dje tèmpel den un tipo di Plenchi Pagano. Esta un privilegio esaki ta! I e privilegio aki ta enfatisá ku kada miembro dje multitut grandi mester keda spiritualmente i moralmente puru na tur momentu!

[Diagram/Plachi na página 31]

(Pa e teksto den su formato kompleto, wak e publikashon)

Tèmpel di Sálomon

1. Edifisio dje Tèmpel

2. Plenchi Paden

3. Plenchi Pafó

4. Trapi ku ta hiba na Plenchi di Tèmpel