Bo Ta Kapta Kiko Ta Dios Su Amor?

E HÒMBER Job a yega di deskribí e kondishon di hende imperfekto ku e palabranan aki: “Hende ku a nase di muhé ta biba poko dia i ta yen di problema. Manera un flor e ta habri i ta marchitá. Manera un sombra e ta hui bai i no ta permanesé.” (Job 14:1, 2) Pa Job, e tempu ei bida tabata yen di angustia i sufrimentu. Bo a yega di sinti bo asina?

Sin embargo, apesar di tur e difikultat i problemanan ku nos por haña nos konfrontá kuné, nos tin un speransa sólido ku ta basá riba Dios su kompashon i amor. Pa kuminsá, nos miserikòrdioso Tata selestial a perkurá e sakrifisio di reskate pa salba humanidat for di nan kondishon degradá i pekaminoso. Di akuerdo ku Huan 3:16 i 17, Hesukristu a deklará: “Dios a stima mundu [di humanidat] asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno. Pasobra Dios no a manda e Yu [Hesus] den mundu pa kondená mundu, ma pa mundu wòrdu salbá dor di dje.”

Konsiderá tambe Dios su aktitut pa ku hende imperfekto. Apòstel Pablo a deklará: “I for di ún sanger [hende, NW] el a traha tur nashon di hende pa biba riba henter mundu, i el a fiha nan tempunan stipulá i e límitenan di nan lugánan di biba, pa nan buska Dios, si di algun manera, fulando, nan por hañ’é, maske e no ta leu di kada un di nos.” (Echonan 17:26, 27) Imaginá bo! Maske nos ta hende imperfekto, tòg nos por disfrutá di un relashon personal ku nos amoroso Kreador, Yehova Dios.

Pues, nos por enfrentá futuro ku konfiansa, ya ku nos sa ku Dios ta interesá den nos i ku el a hasi perkurashon amoroso pa nos benefisio eterno. (1 Pedro 5:7; 2 Pedro 3:13) P’esei definitivamente, nos tin tur motibu pa siña mas tokante nos Dios amoroso via un studio di su Palabra, e Beibel.