Integridat Ta Guia Hende Rekto

BEIBEL ta bisa: “Hende ku a nase di muhé ta biba poko dia i ta yen di problema.” (Job 14:1) Ta parse ku doló i sufrimentu ta kosnan komun di eksistensia humano. Sí, asta un dia komun i koriente por ta yen di ansiedat i problema! Kiko por logra guia nos den e sirkunstansianan difísil aki i yuda nos mantené un posishon hustu dilanti Dios?

Konsiderá e ehèmpel di un hòmber riku ku yama Job i ku a biba rònt di 3.500 aña pasá kaminda awe ta Arabia. Esta un kalamidat Satanas a trese riba e hòmber temeroso di Dios aki! El a pèrdè tur su bestianan i su yunan stimá tambe a muri. Djis despues di esei, Satanas a dal Job ku blufein maligno for di kabes te pia. (Job, kapítulo 1 i 2) Job no tabata sa dikon e kosnan malu aki tabata sosodé kuné. Tòg “Job no a peka ku su lepnan.” (Job 2:10) El a bisa: “Te na mi morto lo mi no bandoná mi integridat.” (Job 27:5) Sí, Job su integridat a gui’é atraves di su pruebanan.

Integridat ta ser definí komo puresa moral, algu kompletu i ku ta enserá ser sin mancha i falta den bista di Dios. Sin embargo, e no ta nifiká ku e persona mester ta perfekto den su manera di papia òf aktua ya ku hende imperfekto no por kumpli kompletamente ku Dios su normanan. Mas bien, integridat ku hende por manifestá ta enserá un deboshon di kurason i kompleto na Yehova i na su boluntat i propósito. Tal deboshon na Dios ta guia hende rekto bou di tur sirkunstansia i tur ora . E promé parti di kapítulo 11 di e buki bíbliko di Proverbionan ta mustra kon nos integridat por guia nos den vários área di bida i ta sigurá nos ku tin rekompensa pa integridat. P’esei anto, laga nos presta bon atenshon na loke tin skirbí den e versíkulonan aki.

Integridat Ta Promové Honestidat Ora di Hasi Negoshi

Rei Sálomon di antiguo Israel no a usa términonan legal, sino palabranan poétiko pa enfatisá e prinsipio di honestidat: “Un balansa engañoso ta abominashon pa SEÑOR, ma un peso hustu ta su delisia.” (Proverbionan 11:1) Esaki ta e promé di e kuater biahanan ku e buki di Proverbionan ta usa balansa i peso pa indiká ku Yehova ta deseá pa su adoradónan ta hende onesto ora nan ta hasi negoshi.—Proverbionan 16:11; 20:10, 23.

Rikesa di hende ku ta usa balansa engañoso—òf deshonestidat—por ta un tentashon. Pero realmente nos lo kier bandoná Dios su normanan di bon i malu dor di partisipá den  práktikanan korupto di negoshi? Esei lo no ta e kaso si integridat ta guia nos. Nos ta evitá di ser desonesto pasobra Yehova tin goso den un piedra-pa-pisa kompleto, un peso eksakto, ku ta nifiká onestidat.

“Sabiduria Ta Serka e Humildenan”

Rei Sálomon ta sigui: “Ora ku orguyo [arogansia, NW] bin, desonor tambe ta bin, ma sabiduria ta serka e humildenan.” (Proverbionan 11:2) Sea ku arogansia ta manifestá su mes den forma di orguyo, desobedensia òf envidia, e ta trese desonor. Di otro banda, ta sabí pa nos humildemente rekonosé nos limitashonnan. Tin ehèmpelnan bíbliko ku ta ilustrá e bèrdat di e proverbio aki masha bon mes!

Un levita envidioso ku yama Kore a bira lider di un multitut rebelde ku tabata kontra e outoridat di Yehova su sirbidónan nombrá, Moises i Aron. Kiko tabata e resultado dje akto arogante aki? ‘Tera a habri su boka i traga’ algun dje rebeldenan, miéntras ku kandela a kaba ku otronan manera Kore. (Numbernan 16:1-3, 16-35; 26:10; Deuteronomio 11:6) Esta un humiashon! Kòrda tambe riba Uzah, kende a tribi di saka su man i wanta e arka di pakto pa evitá ku esaki lo a kai. Mesora el a pèrdè su bida. (2 Samuel 6:3-8) Ta masha importante pa nos evitá arogansia!

Ni ora un persona humilde i modesto kometé un eror, e no ta ser desonrá. Ounke Job tabata ehemplar den vários manera, e tabata imperfekto. Su pruebanan a revelá un fayo serio den su manera di pensa. Ora Job tabata defendé su mes kontra esnan ku tabata akus’é, el a bira un poko desbalansá. Asta el a indiká ku e tabata mas hustu ku Dios. (Job 35:2, 3) Kon Yehova a koregí Job su manera di pensa?

Yehova a dirigí atenshon di Job na tera, laman, shelu yen di strea, algun animal i otro maravianan di kreashon, pa e siñ’é ku hende no ta nada na komparashon ku e grandesa di Dios. (Job, kapítulo 38-41) Niun kaminda ku Yehova a papia ku Job, e no a bis’é dikon e tabata sufriendo. E no tabatin nodi. Job tabata un hòmber modesto. Humildemente el a rekonosé e diferensia grandi entre e ku Dios, entre su propio imperfekshon i debilidat ku Yehova su hustisia i poder. El a bisa: “Mi ta hala mi palabranan atras, i ta repentí den stòf i shinishi.” (Job 42:6) Dor di Job su integridat, el a aseptá e reprendementu mesora. Kiko di nos? Nos integridat ta pone nos aseptá reprendementu òf korekshon di biaha ora esaki ta nesesario?

Moises tambe tabata un hòmber humilde i modesto. Ora e tabata kansa su kurpa pa resolvé problema di otro hende, su suegro Yetro, a dun’é un solushon práktiko: delegá sierto responsabilidatnan na otro hòmbernan kualifiká. Moises a rekonosé su propio limitashonnan, i komo un persona sabí el a aseptá e sugerensia. (Éksodo 18:17-26; Numbernan 12:3) Un hòmber modesto no ta vasilá pa delegá outoridat na otro hende, ni e no ta teme ku di un manera òf otro lo e pèrdè su outoridat si e kompartí sierto responsabilidat ku otro hòmbernan kualifiká. (Numbernan 11:16, 17, 26-29) En bes di esei, e ta ansioso pa  yuda nan progresá spiritualmente. (1 Timoteo 4:15) Esaki no mester ta e kaso ku nos tambe?

‘E Kaminda di Hende sin Kulpa Ta Stret’

Rekonosiendo ku no ta semper integridat ta protehá hende rekto for di peliger òf kalamidat, Sálomon ta deklará: “Integridat di e rektonan lo guia nan, ma perversidat di e traidónan lo destruí nan.” (Proverbionan 11:3) Integridat en bèrdat ta guia hende rekto pa hasi loke ta bon den bista di Dios, asta bou di sirkunstansia difísil, i ku tempu e ta duna benefisio. Job a nenga di bandoná su integridat, i Yehova a “bendishoná e último dianan di Job mas ku e proménan.” (Job 42:12) Hende traishonero kisas ta pensa ku nan ta bai dilanti riba kustia di otro hende i asta por parse ku nan ta prosperá pa algun tempu. Pero tardi òf trempan, nan propio engaño lo destruí nan.

Segun e rei sabí: “Rikesa no ta di probecho den e dia di rabia, ma hustisia ta libra for di morto.” (Proverbionan 11:4) Ta un bobedat pa traha hopi duru pa logra haña kosnan material sin traha lugá pa studio personal, orashon, asistensia na reunion i sirbishi di fèlt, nèt e aktividatnan ku ta profundisá nos amor pa Dios i fortalesé nos deboshon na dje! No tin rikesa ku lo por skapa hende dje gran tribulashon ku ta na kaminda. (Mateo 24:21) Ta hende rekto so lo skapa debí na nan hustisia. (Revelashon 7:9, 14) P’esei si nos ta sabí, nos ta tuma na pechu e apelashon ku Sofonías a hasi: “Promé ku e dia di e rabia di SEÑOR bin riba boso. Buska SEÑOR, boso tur humildenan di tera ku a kumpli ku Su ordenansanan; buska hustisia; buska humildat.” (Sofonías 2:2, 3) Miéntras tantu, laga nos hasi esfuerso pa ‘onra Yehova ku nos rikesa.’—Proverbionan 3:9.

Pa pone mas énfasis riba e balor di sigui tras di hustisia, Sálomon a mustra e kontraste entre e resultado pa un hende sin kulpa i e resultado pa e malbado, bisando: “Hustisia di e hende perfekto [sin kulpa, NW] lo dirigí su kaminda, ma e malbado lo kai pa medio di su mes maldat. Hustisia di e hendenan rekto lo libra nan, ma e traidónan lo wòrdu atrapá den nan mes golosidat. Ora ku un hende malbado muri, su ekspektativa lo peresé, i e speransa di hende inhustu ta peresé. E hustu ta wòrdu librá for di tribulashon, ma e malbado ta tuma su lugá.” (Proverbionan 11:5-8) Un persona sin kulpa nunka ta kai den su mes kamindanan ni e no ta keda atrapá den su mes maneranan di anda. Su kaminda ta stret. Finalmente, ta hende rekto ta ser librá di aflikshon. Ounke hende malbado por parse poderoso, nan no tin speransa di ser liberá di aflikshon.

“E Stat Ta Regosihá”

Tantu e integridat di hende rekto komo e maldat dje malbado tin influensia riba otro hende. E rei di Israel ta bisa: “Un hipókrita ta destruí su próhimo ku su boka, ma pa medio di sabiduria e hustu lo wòrdu librá.” (Proverbionan 11:9) Ken por nenga ku kalumnia, redu perhudisial, abla indesente i papiamentu di ko’i loko ta hasi daño na otro hende? Di otro banda, e abla di un persona hustu ta puru, bon pensá i ku konsiderashon. E ta ser salbá dor di konosementu pasobra su integridat ta duna e pruebanan nesesario pa mustra ku esnan ku ta akus’é ta saka mentira.

E rei ta sigui: “Ora ta bai bon ku e hustu, e stat ta regosihá; i ora ku e malbado peresé tin gritu di alegria.” (Proverbionan 11:10) Por lo  general hende ta stima hende hustu, i nan ta hasi nan próhimo regosihá, felis i gososo. Niun hende no gusta hende “malbado.” Ora un malbado muri, por lo general hende no sa lamentá su morto. I ora Yehova ‘kòrtá e malbadonan kita for di tera, i ranka traidónan for di dje ku rais ku tur,’ sigur lo no tin tristesa. (Proverbionan 2:21, 22) Mas bien lo tin goso, pasobra nan no ta eksistí mas. Pero kiko di nos? Ta bon pa nos pensa i wak si nos kondukta ta kontribuí na goso di otro hende.

“E Stat Ta Wòrdu Halsá”

Mas aleu den su kontraste entre e influensia ku e persona rekto i e malbado tin riba un komunidat, Sálomon ta deklará: “Pa medio di e bendishon di e hendenan rekto e stat ta wòrdu halsá, ma pa medio di boka di e malbado e ta keda trastorná.”—Proverbionan 11:11.

Hende den un stat ku ta sigui un proseder rekto ta promové pas i bienestar i ta edifiká otro hende den e komunidat. Asina e stat ta wòrdu halsá, i e ta prosperá. Hende ku ta kalumniá, papia kosnan dañino i robes, ta kousa intrankilidat, infelisidat, desunion i problema. Esaki ta e kaso foral si e personanan aki ta hendenan prominente. Un stat asina ta hañ’é ku desórden, korupshon i deterioro moral i kisas ekonómiko.

E prinsipio deklará na Proverbionan 11:11 ta konta tambe p’e pueblo di Yehova ku ta asosiá ku otro den kongregashonnan manera stat. Un kongregashon influensiá pa hende spiritual—hende rekto ku ta ser guiá dor di integridat—ta un grupo di hende felis, aktivo i koperativo ku ta duna onor na Dios. Yehova ta bendishoná e kongregashon, i e ta prosperá spiritualmente. Aki i aya bo por haña algun hende malkontentu i insatisfecho, ku ta kritiká i ku ta indigná p’e manera ku kosnan ta bai. Nan ta manera “rais di amargura” ku por plama i venená otronan ku inisialmente no tabata afektá. (Hebreonan 12:15) Hende asina hopi bes kier mas outoridat i prominensia. Nan ta plama rumor ku den e kongregashon tin inhustisia, prehuisio étniko òf kosnan por estilo, òf ku e ansianonan ta manifestá e kualidatnan aki. Sí, nan boka por kousa divishon den e kongregashon. Nos no mester nenga di skucha loke nan ta papia i hasi esfuerso pa ta personanan spiritual ku ta kontribuí na pas i unidat den e kongregashon?

Sálomon ta sigui bisa: “Esun ku despresiá su próhimo ta falta huisio, ma un hende ku komprendementu ta keda ketu. Esun ku ta kana hasi redu ta saka sekreto, ma esun ku ta di konfia ta tapa e asuntu.”—Proverbionan 11:12, 13.

Un persona ku no tin sano “huisio” por kousa hopi daño! E ta sigui papia pa loko te ora e kuminsá gaña òf difamá otro hende. Ansianonan nombrá mester ta lihé pa pone un fin na un influensia insaludabel asina. Distinto di un persona ku “ta falta huisio,” un persona ku disernimentu sa ki ora pa keda ketu. En bes di traishoná konfiansa, e ta tene un asuntu sekreto. Sabiendo ku un lenga sin frena por kousa hopi daño, un persona ku disernimentu “ta di konfia.” E ta leal na su kompañeronan kreyente i no ta divulgá asuntunan konfidensial ku lo por hinka nan den peliger. Esta un bendishon e wardadónan di integridat ei ta pa e kongregashon!

Pa yuda nos kana den e kaminda di hende rekto, Yehova ta perkurá un abundansia di alimento spiritual prepará bou di direkshon  di “e esklabo fiel i prudente.” (Mateo 24:45) Tambe nos ta risibí hopi yudansa personal via ansianonan kristian den nos kongregashonnan manera stat. (Efesionan 4:11-13) Nos ta hopi gradisidu pa e esakinan, pasobra “kaminda no tin guiansa, e pueblo ta kai, ma kaminda tin hopi konsehero tin viktoria.” (Proverbionan 11:14) Sin importá loke por sosodé, laga nos ta firmemente determiná pa ‘kana den nos integridat.’—Salmo 26:1.

[Komentario na página 26]

Ta un bobedat pa traha duru pa alkansá kosnan material, pero neglishá aktividatnan teokrátiko!

[Plachinan na página 24]

Job su integridat a gui’é i Yehova a bendishon’é

[Plachi na página 25]

Uzah a muri pa motibu di su arogansia