Ken Dios Ta?

“DIOS ta e nòmber komunmente duná na e fuente i poder mas grandi di universo i ta esun na ken hende ta dirigí deboshon religioso,” segun The Encyclopedia Americana. E palabra “Dios” ta ser definí komo e realidat supremo òf di mas grandi. Kiko ta e naturalesa di tal realidat impreshonante?

Dios ta un forsa impersonal òf un persona real? E tin nòmber? E ta un dios ku ta konsistí di tres persona, un Trinidat, manera hopi hende ta kere? Kon nos por siña konosé Dios? Beibel ta duna kontestanan verídiko i satisfaktorio riba e preguntanan aki. De echo e ta animá nos pa buska Dios, bisando: “E no ta leu di kada un di nos.”—Echonan 17:27.

Un Forsa Impersonal òf un Persona Real?

Hopi hende ku ta kere den Dios ta imaginá nan ku e ta un forsa, no un persona. Por ehèmpel, den sierto kulturanan hende ta asosiá diosnan ku forsanan di naturalesa. Algun hende ku a analisá evidensia optené via investigashon sientífiko relashoná ku e struktura di universo i e karakter fundamental di bida riba tera, a konkluí ku mester tin un Promé Kousa, es desir, algu ku a trese tur kos na eksistensia. Pero nan no ta muchu inkliná na kere ku e Kousa aki tin un personalidat.

Sin embargo, e echo ku kreashon ta asina kompliká no ta indiká ku e Promé Kousa mester tabata hopi inteligente? Anto pa por tin inteligensia mester tin un mente. E gran mente responsabel pa tur kreashon ta pertenesé na e persona di Dios. Sí, Dios tin un kurpa, pero no un kurpa físiko manera esun di nos, sino un kurpa spiritual. Beibel ta bisa: “Si tin un kurpa natural, tin un kurpa spiritual tambe.” (1 Korintionan 15:44) Splikando e naturalesa di Dios, Beibel ta deklará bon kla: “Dios ta Spiritu.” (Huan 4:24) Un spiritu tin un forma di bida ku ta hopi distinto for di esun di nos, i e ta invisibel pa bista di hende. (Huan 1:18) Tin tambe kriaturanan spiritual invisibel. Nan ta angel, “e yu hòmbernan di Dios.”—Job 1:6; 2:1.

Ya ku Dios ta un persona ku no a ser kreá i e tin un kurpa spiritual, ta lógiko ku e tin un lugá di biba. Refiriendo na e region kaminda spiritu ta biba, Beibel ta bisa nos ku shelu ta Dios su “lugá di biba.” (1 Reinan 8:43) Tambe,  e eskritor di Beibel Pablo ta deklará: ‘Kristu a drenta den shelu mes pa aparesé den e presensia di Dios pa nos.’—Hebreonan 9:24.

Beibel ta usa e palabra “spiritu” den un otro sentido tambe. E salmista a bisa Dios den orashon: “Bo ta manda bo spiritu, nan ta wòrdu kreá.” (Salmo 104:30) E spiritu aki no ta Dios mes sino e forsa ku Dios ta manda, òf usa, pa hasi loke e ta deseá. Mediante dje, Dios a krea e shelu literal, tera i tur otro kos bibu. (Génesis 1:2; Salmo 33:6) Su spiritu ta ser yamá spiritu santu. Dios a usa su spiritu santu pa inspirá e hendenan ku a skirbi Beibel. (2 Pedro 1:20, 21) Pues, spiritu santu ta e forsa aktivo invisibel ku Dios ta usa pa kumpli ku su propósito.

Dios Tin un Nòmber Úniko

E eskritor di Beibel Agur a puntra: “Ken a rekohé bientu den su moketa? Ken a lora e awanan den su bistí? Ken a establesé tur e finnan di tera? Kon ta su nòmber i nòmber di su yu?” (Proverbionan 30:4) Bon mirá, Agur tabata puntra: ‘Bo konosé e nòmber òf famia di un persona ku a hasi e kosnan aki?’ Ta Dios so tin e poder pa kontrolá forsanan di naturalesa. Ounke kreashon ta un prueba potente ku Dios ta eksistí, e no ta revelá e nòmber di Dios. De echo, nunka nos lo a sa e nòmber di Dios a ménos ku e mes a revel’é na nos. I el a hasié. “Ami ta Yehova. Esei ta mi nòmber,” e Kreador a bisa.—Isaías 42:8, NW.

Dios su nòmber úniko, Yehova, ta aparesé kasi 7.000 biaha den e teksto original di e Skritura Hebreo so. Hesukristu a hasi e nòmber ei konosí na otro hende i a alab’é nan dilanti. (Huan 17:6, 26) Bo ta haña e nòmber ei den e último buki di Beibel komo parti di e ekspreshon “Aleluya,” ku ta nifiká “alabá Yah.” I “Yah” ta e forma abreviá di “Yehova.” (Revelashon 19:1-6) Sin embargo, hopi Beibel moderno kasi no sa usa e nòmber ei. Mayoria bes nan ta usa e palabra “SEÑOR” òf “DIOS,” skirbí tur na lèter kapital pa distinguié for di e títulonan komun “Señor” i “Dios.” Tin eksperto ta bisa ku kisas ántes nan tabata pronunsiá e nòmber di Dios komo Yahweh.

Pakiko tin puntonan di bista asina distinto for di otro tokante e nòmber di e Personahe  mas grandi di universo? E problema a kuminsá siglonan pasá ora ku e hudiunan pa motibu di superstishon a stòp di pronunsiá e nòmber di Dios. Anto ki ora ku nan a topa e nòmber divino ora nan tabata lesa e Skritura, nan tabata bisa na su lugá e palabra hebreo pa “Señor Soberano.” Komo ku nan tabata skirbi hebreo bíbliko sin vokal (“klinker”), ta imposibel pa sa presis kon Moises, David i otro personanan di antigwedat a pronunsiá e lèternan ku ta forma e nòmber di Dios. Sin embargo, ya pa siglonan hende ta usa e pronunsiashon Yehova, i su ekivalente den otro idiomanan ta ampliamente aseptá awe.—Éksodo 3:14, Beibel na papiamentu koriente, nota na pia di página; Éksodo 6:3; Isaías 26:4, Reina-Valera, revishon di 1960.

Ounke hende no ta kompletamente sigur kon tabata pronunsiá e nòmber di Dios den antiguo hebreo, su nifikashon si no ta deskonosí. Su nòmber ta nifiká “E Ta Kousa pa Bira.” Yehova Dios ta identifiká su mes asina komo Esun ku semper ta pone su propósitonan i promesanan bira un realidat. Ta e Dios berdadero so, ku tin e poder pa hasi esaki, tin derechi di karga e nòmber ei.—Isaías 55:11.

No tin duda ku e nòmber Yehova ta sirbi pa distinguí Dios Todopoderoso for di tur otro dios. Ta p’esei e nòmber ei ta aparesé asina tantu biaha den Beibel. Maske hopi tradukshon no ta usa e nòmber di Dios, Salmo 83:18 ta bisa bon kla: “Abo so, kende su nòmber ta [Yehova, NW], ta e Haltísimo riba henter tera.” Durante su ministerio, Hesukristu a siña su siguidónan: “Pues, hasi orashon anto asin’akí: ‘Nos Tata ku ta den shelu, bo nòmber sea santifiká.’” (Mateo 6:9) Kier men anto ku nos mester usa e nòmber di Dios ora nos ta hasi orashon, ta papia di dje i ta alab’é dilanti otro hende.

Hesus Ta Dios?

Yehova Dios mes ta indiká bon kla ken su Yu ta. E Evangelio di Mateo ta konta ku despues ku Hesus a batisá, tabatin “un bos for di e shelunan, bisando: ‘Esaki ta mi Yu stimá, den kende mi tin goso.’” (Mateo 3:16, 17) Hesukristu ta e Yu di Dios.

Sin embargo, algun hende religioso ta bisa ku Hesus ta Dios. Otronan ta bisa ku Dios ta un Trinidat. Segun e siñansa ei, “e Tata ta Dios, e Yu ta Dios i e Spiritu Santu ta Dios, sin embargo nan no ta tres Dios sino un solo Dios.” Supuestamente nan tres “ta mesun eterno i mesun igual.” (The Catholic Encyclopedia) E puntonan di bista ei ta korekto?

E Skritura inspirá ta bisa di Yehova: “For di eternidat te na eternidat, abo ta Dios.” (Salmo 90:2) E ta “e Rei eterno,” sin prinsipio sin final. (1 Timoteo 1:17) Di otro banda, Hesus ta “e primogénito di henter kreashon,” “e prinsipio di e kreashon di Dios.” (Kolosensenan 1:13-15; Revelashon 3:14) Refiriendo na Dios komo su Tata, Hesus a bisa: “E Tata ta mas ku mi.” (Huan 14:28) Tambe Hesus a splika ku tabatin algun kos ku ni e ni e angelnan no sa sino Dios so. (Marko 13:32) Ademas, Hesus a resa na su Tata, bisando: “[Laga] no mi boluntat, ma di bo sosodé.” (Lukas 22:42) Na ken e tabata resa, si no tabata na un Personahe superior kuné? I ta Dios a resusitá Hesus for di morto, no ta Hesus a resusitá su mes.—Echonan 2:32.

Pues anto, segun Beibel Yehova ta Dios Todopoderoso, i Hesus ta su Yu. Nan dos no tabata pareu di otro promé ku Hesus a bini na tera ni durante Hesus su bida riba tera; ni Hesus no a bira pareu di su Tata despues ku el a ser resusitá pa biba den shelu. (1 Korintionan 11:3; 15:28) Manera nos a mira kaba, e asina yamá terser persona di e Trinidat—e spiritu santu—no ta un persona. Mas bien, e ta e forsa ku Dios ta usa pa hasi loke e ta deseá. Pues Trinidat no ta un siñansa bíbliko. * Beibel ta bisa: “SEÑOR ta nos Dios, SEÑOR ta ún!”—Deuteronomio 6:4.

 Siña Konosé Dios Mihó

Pa nos por stima Dios i dun’é e deboshon eksklusivo ku e meresé, nos tin ku konos’é manera e ta. Kon nos por siña konosé Dios mihó? Beibel ta bisa: “Desde kreashon di mundu su atributonan invisibel, su poder eterno i naturalesa divino, a wòrdu mirá klaramente, siendo komprendí dor di loke a wòrdu trahá.” (Romanonan 1:20) Un manera pa siña konosé Dios mihó ta dor di opservá loke el a krea i meditá riba esei ku apresio.

Pero kreashon no ta konta nos tur loke nos tin ku sa tokante Dios. Por ehèmpel, pa komprondé ku e ta un Persona real spiritual ku un nòmber úniko, nos tin ku wak den Beibel. De echo, e mihó manera pa siña konosé Dios mihó ta dor di studia Beibel. Den e Skritura, Yehova ta konta nos hopi mas tokante e klase di Dios ku e ta. Tambe e ta revelá su propósitonan na nos i e ta eduká nos den su kamindanan. (Ámos 3:7; 2 Timoteo 3:16, 17) Esta kontentu nos por ta ku Dios kier pa nos “yega na konosementu di e bèrdat,” ya asina nos por benefisiá di su perkurashonnan amoroso! (1 Timoteo 2:4) P’esei laga nos hasi tur esfuerso pa siña tur loke nos por tokante Yehova.

[Nota]

[Plachinan na página 5]

Dios a usa su spiritu santu pa krea e tera i pa inspirá hende pa skirbi Beibel

[Plachi na página 5]

Un bos for di shelu a bisa: “Esaki ta mi Yu”

[Plachi na página 7]

Hesus a resa na Dios, e Personahe ku ta superior na dje

[Plachi na página 7]

Hesus a hasi Dios su nòmber konosí na otro hende

[Plachi na página 7]

Nos por siña konosé Dios mihó