Mustra Bondat Amoroso na Hende den Nesesidat

“Kada un mustra kariño [bondat amoroso, NW] . . . na su ruman.”—ZAKARÍAS 7:9.

1, 2. (a) Pakiko nos mester mustra bondat amoroso? (b) Kua ta e preguntanan ku nos lo konsiderá?

YEHOVA DIOS su Palabra ta animá nos pa stima “bondat amoroso.” (Mikéas 6:8, NW, nota na pia di página) Tambe e ta duna nos motibu pakiko nos mester hasi esei. Un motibu ta ku “e hende miserikòrdioso [di bondat amoroso, NW] ta hasi bon na su mes alma.” (Proverbionan 11:17) Esei ta hopi sierto! Dor di mustra bondat amoroso, òf amor leal, nos ta forma relashonnan kordial i duradero ku otro hende i komo resultado nos lo tin amigunan fiel. I esei no ta un rekompensa presioso?—Proverbionan 18:24.

² Ademas, e Skritura ta bisa nos: “Esun ku aspirá na hustisia i lealtat [bondat amoroso, NW] ta haña bida.” (Proverbionan 21:21) Sí, Dios ta stima nos ora nos ta aspirá òf buska pa alkansá bondat amoroso, i esei lo pone nos den fila pa risibí bendishonnan den futuro, inkluso bida eterno. Pero kon nos por mustra bondat amoroso? Na ken nos mester demostr’é? I kon bondat amoroso ta distinto for di bondat humano normal òf for di bondat en general?

Bondat Humano i Bondat Amoroso

3. Den ki manera bondat amoroso ta distinto for di bondat humano?

³ Bondat humano normal i bondat amoroso  ta diferensiá di otro den vários manera. Por ehèmpel, hende ku ta demostrá bondat humano hopi bes ta hasi esei sin ku nan tin un kariño òf relashon profundo i personal ku e personanan ku nan ta trata ku bondat. Sin embargo, si nos ta mustra bondat amoroso na un persona, ku amor nos lo kultivá un relashon estrecho kuné. Den Beibel, hende a mustra bondat amoroso na otro basá riba e relashon ku nan tabatin ku otro. (Génesis 20:13; 2 Samuel 3:8; 16:17) Òf e manifestashonnan di bondat amoroso por tabata basá riba relashonnan ku a resultá di echonan anterior di bondat. (Hosué 2:1, 12-14; 1 Samuel 15:6; 2 Samuel 10:1, 2) Pa demostrá e diferensia aki, laga nos kompará dos ehèmpel bíbliko, unu di bondat humano i unu di bondat amoroso ku hende a mustra na otro.

4, 5. Kon e dos ehèmpelnan bíbliko sitá aki ta demostrá e diferensia ku tin entre bondat humano i bondat amoroso?

⁴ Un ehèmpel di bondat humano ta en konekshon ku un grupo di hende ku a noufragá, entre nan apòstel Pablo. Nan a logra yega tera na e isla di Malta. (Echonan 27:37–28:1) Ounke e habitantenan di Malta no tabatin niun obligashon ku e biaheronan noufragá ni un relashon eksistente ku nan, nan a risibí e stranheronan ku hospitalidat, i a mustra bondat òf “kariño eksepshonal” na nan. (Echonan 28:2, 7) Nan hospitalidat tabata bondadoso, pero e tabata pa kasualidat i nan a demostr’é na hende deskonosí. Pues, esei tabata bondat humano.

⁵ Na komparashon, konsiderá e hospitalidat ku Rei David a mustra na Mefíboset, yu hòmber di su amigu Yónatan. David a bisa Mefíboset: “Lo bo kome na mi mesa regularmente.” Splikando dikon el a hasi e areglo aki, David a bis’é: “Siguramente lo mi mustra kariño [bondat amoroso, NW] na bo pa kousa di bo tata Yónatan.” (2 Samuel 9:6, 7, 13) Pues apropiadamente Beibel ta referí na e hospitalidat kontinuo ku David lo a mustra na Mefíboset komo un muestra di bondat amoroso—i no komo simplemente bondat—pasobra e tabata un prueba di su lealtat na un relashon establesí. (1 Samuel 18:3; 20:15, 42) Awe ta meskos. Sirbidónan di Dios ta mustra bondat humano na hende en general. Sin embargo, nan ta ekspresá bondat amoroso, òf amor leal, kontinuo na hende ku ken nan tin un relashon aprobá den bista di Dios.—Mateo 5:45; Galationan 6:10.

6. Ki karakterístikanan di bondat amoroso ku hende ta mustra na otro ta sobresalí den e Palabra di Dios?

⁶ Pa nos por identifiká algun karakterístika mas di bondat amoroso, nos lo konsiderá brevemente tres relato bíbliko ku ta presentá e kualidat aki. For di e relatonan aki nos lo nota ku bondat amoroso ku hende ta mustra na otro ta ser (1) manifestá ku echonan spesífiko, (2) desplegá boluntariamente i (3) demostrá spesialmente na hende ku tin un nesesidat. Ademas, e relatonan aki ta ilustrá kon nos por mustra bondat amoroso awe.

Un Tata Ta Mustra Bondat Amoroso

7. Kiko e sirbidó di Abraham a konta Bètuel i Laban, i ki punto di preokupashon e sirbidó a presentá?

⁷ Génesis 24:28-67 ta konta e restu di e historia di e sirbidó di Abraham, menshoná den e artíkulo anterior. Despues di a topa Rebeka, e sirbidó a haña invitashon pa bini na kas di su tata, Bètuel. (Versíkulo 28-32) Einan e sirbidó a konta en detaye kon el a buska un esposa pa e yu hòmber di Abraham. (Versíkulo 33-47) El a enfatisá ku e ta konsiderá e éksito ku el a logra te ku awor komo un señal for di Yehova, “kende a guia mi den e kaminda korekto pa tuma yu muhé di famia di mi shon pa su yu hòmber.” (Versíkulo 48) E sirbidó sin duda a spera ku su relato sinsero di loke a tuma lugá lo a konvensé Bètuel i su yu hòmber Laban ku Yehova tabata apoyando e mishon aki. Finalmente, e sirbidó di: “P’esei anto, si bo ta bai mustra mi shon miserikòrdia [bondat amoroso, NW] i bèrdat, bisa mi; i  si no, laga mi sa, pa mi bira na man drechi òf na man robes.”—Versíkulo 49.

8. Kon Bètuel a reakshoná den e asuntu relashoná ku Rebeka?

⁸ Yehova ya a mustra bondat amoroso na Abraham. (Génesis 24:12, 14, 27) Bètuel lo tabata dispuesto pa hasi meskos dor di pèrmití Rebeka bai ku e sirbidó di Abraham? Hende su bondat amoroso lo a komplementá Dios su bondat amoroso? Òf e biahe largu di e sirbidó tabata enbano? Lo mester tabata un gran konsuelo pa e sirbidó di Abraham tende Laban i Bètuel bisa: “E asuntu aki ta bin di SEÑOR.” (Versíkulo 50) Nan a rekonosé e man di Yehova den e asuntu i mesora a aseptá su desishon. Anto Bètuel a desplegá su bondat amoroso dor di agregá: “Ata Rebeka bo dilanti, tum’é i bai kuné, i lagu’é ta esposa di e yu di bo shon, manera SEÑOR a papia.” (Versíkulo 51) Rebeka boluntariamente a bai ku e sirbidó di Abraham, i poko despues a bira Isak su esposa stimá.—Versíkulo 49, 52-58, 67.

Un Yu A Mustra Bondat Amoroso

9, 10. (a) Kiko Yakòb a pidi su yu hòmber Yosef hasi p’e? (b) Kon Yosef a mustra bondat amoroso na su tata?

⁹ Abraham su nietu Yakòb tambe a risibí bondat amoroso. Manera Génesis kapítulo 47 ta konta, Yakòb tabata biba e tempu ei na Egipto, i ‘e tempu p’e muri a yega.’ (Versíkulo 27-29) Yakòb tabata preokupá pasobra e tabata bai muri pafó di e tera ku Dios a primintí Abraham. (Génesis 15:18; 35:10, 12; 49:29-32) Yakòb no tabata kier pa nan der’é den Egipto, p’esei el a hasi areglo pa hiba su restunan na e tera di Kanan. Ken lo tabata den mihó posishon pa hasi sigur ku lo a kumpli ku su deseo, ku no ta su yu prominente, Yosef?

¹⁰ E relato ta bisa: “[Yakòb] a yama su yu Yosef i a bis’é: “Pa fabor, si mi a haña grasia den bo bista, . . . trata mi ku miserikòrdia [bondat amoroso, NW] i fieldat. Pa fabor, no dera mi na Egipto, ma ora mi bai sosegá serka mi tatanan, saka mi for di Egipto, i dera mi den nan tereno-pa-dera-morto.’” (Génesis 47:29, 30) Yosef a primintí di kumpli ku e petishon aki, i djis despues Yakòb a muri. Yosef huntu ku Yakòb su otro yu hòmbernan a karga su kurpa “hiba tera di Kanan, i a der’é den e kueba di e kunuku di Makpela dilanti di Mamre, kual Abraham a kumpra.” (Génesis 50:5-8, 12-14) Asina Yosef a mustra bondat amoroso na su tata.

Bondat Amoroso di un Suegra

11, 12. (a) Kon Rut a mustra bondat amoroso na Noemí? (b) Den ki manera e “último” okashon ku Rut a mustra bondat amoroso tabata mihó ku “esun promé”?

¹¹ E buki di Rut ta konta kon e biuda Noemí a risibí bondat amoroso serka su suegra moabita Rut, ku tambe tabata biuda. Ora Noemí a disidí di regresá Bètlehèm, Rut a demostrá bondat amoroso i determinashon, bisando: “Unda ku bo bai, lo mi bai, i unda ku bo keda, lo mi keda. Bo pueblo lo ta mi pueblo, i bo Dios, mi Dios.” (Rut 1:16) Mas despues Rut a manifestá su bondat amoroso ora el a mustra ku e ta dispuesto pa kasa ku Boaz, un hòmber di edat ku tabata famia yegá di Noemí. * (Deuteronomio 25:5, 6; Rut 3:6-9) Boaz a bisa Rut: “Bo a mustra ku bo último kariño [bondat amoroso, NW] ta mihó ku esun promé, dor di no kore tras di hòmber hóben, sea pober òf riku.”—Rut 3:10.

¹² E “promé” okashon ku Rut a mustra bondat amoroso tabata ora el a bandoná su pueblo i a keda ku Noemí. (Rut 1:14; 2:11) Asta e echo ei a ser surpasá pa su “último” muestra di bondat amoroso: Rut tabata dispuesto pa kasa ku Boaz. Awor Rut lo por a duna lus na un heredero pa Noemí, ku ya a pasa e edat di haña yu. E matrimonio a tuma lugá, i despues ora Rut a duna lus, e muhénan di Bètlehèm a  grita: “Noemí a haña un yu hòmber.” (Rut 4:14, 17) Di bèrdat Rut tabata “un muhé ekselente.” I p’esei Yehova a rekompens’é ku e maravioso privilegio di bira un antepasado di Hesukristu.—Rut 2:12; 3:11; 4:18-22; Mateo 1:1, 5, 6.

Demostrá ku Echo

13. Kon Bètuel, Yosef i Rut a mustra nan bondat amoroso?

¹³ Bo a ripará kon Bètuel, Yosef i Rut a ekspresá nan bondat amoroso? Nan no a hasi esei solamente ku palabranan bondadoso, sino tambe ku echonan spesífiko. Bètuel no a djis bisa: “Ata Rebeka,” sino ku di bèrdat el a ‘manda Rebeka bai.’ (Génesis 24:51, 59) Yosef no a djis bisa: “Lo mi hasi manera bo a bisa.” Sino mas bien e ku su ruman hòmbernan a hasi pa Yakòb “manera el a ordená nan.” (Génesis 47:30; 50:12, 13) Rut no a djis bisa: “Unda ku bo bai, lo mi bai.” Tambe el a bandoná su pueblo i a kompañá Noemí, di manera ku “nan dos a bai te ora nan a yega Bètlehèm.” (Rut 1:16, 19) Na Huda, Rut a bolbe aktua “konforme tur loke su suegra a orden’é.” (Rut 3:6) Sí, Rut su bondat amoroso, meskos ku di otronan, a ser ekspresá ku echo.

14. (a) Kon e sirbidónan di Dios di aktualidat ta mustra bondat amoroso ku echo? (b) Ki echonan di bondat amoroso bo sa di dje ku kristiannan den bo área ta mustra na otro?

¹⁴ Ta konmovedor pa mira kon sirbidónan di Dios djawe ta sigui ekspresá bondat amoroso ku echo. Por ehèmpel, pensa riba esnan ku ta duna apoyo emoshonal kontinuo na rumannan kreyente ku ta enfermo, deprimí òf yen di tristesa. (Proverbionan 12:25) Òf kòrda e hopi Testigunan di Yehova ku fielmente ta pasa ku outo buska esnan di edat pa hiba nan Salon di Reino ya nan por asistí na e reunionnan semanal di kongregashon. Anna di 82 aña i ku ta sufri di artrítis, ta ekspresá e sintimentu di hopi di e rumannan aki ora e ta bisa: “E echo ku nan ta buska mi ku outo hiba tur reunion ta un bendishon di Yehova. Mi ta gradisié di fondo di mi kurason ku el a duna mi rumannan asina amoroso.” Abo ta desplegá e tipo di echonan ei den bo kongregashon? (1 Huan 3:17, 18) Si ta asina, bo por tin sigur ku bo bondat amoroso ta ser apresiá mashá.

Demostrá Boluntariamente

15. E tres relatonan bíbliko ku nos a konsiderá a destaká ki otro karakterístika di bondat amoroso?

¹⁵ E relatonan bíbliko ku nos a konsiderá ta mustra tambe ku hende ta mustra bondat amoroso libremente i boluntariamente, no obligá. Boluntariamente Bètuel—i tambe Rebeka—a koperá ku e sirbidó di Abraham. (Génesis 24:51, 58) Yosef a mustra su bondat amoroso sin ku otro hende mester a mand’é. (Génesis 50:4, 5) Rut “tabata desididu pa bai ku [Noemí].” (Rut 1:18) Ora Noemí a sugerí Rut pa e bai serka Boaz, bondat amoroso a motivá e moabita pa deklará: “Tur loke bo bisa, lo mi hasi.”—Rut 3:1-5.

16, 17. Kiko ta hasi e bondat amoroso di Bètuel, Yosef i Rut spesialmente signifikativo, i kiko a motivá nan pa desplegá e kualidat aki?

 ¹⁶ E bondat amoroso ku Bètuel, Yosef i Rut a mustra ta spesialmente signifikativo pasobra ni Abraham, ni Yakòb ni Noemí no tabata den posishon pa obligá nan hasi algu. Al fin i al kabo, Bètuel no tabata bou di ningun obligashon legal pa laga su yu muhé bai. Fásilmente lo e por a bisa e sirbidó di Abraham: ‘Nò, mi no kier pa mi yu muhé trahadó bai biba leu.’ (Génesis 24:18-20) I Yosef tambe tabata liber pa disidí si lo el a aktua konforme e petishon di su tata òf nò, pasobra Yakòb tabata morto i no por a obligu’é kumpli ku su palabra. Noemí mes a bisa ku Rut ta liber pa keda na Moab. (Rut 1:8) Tambe Rut tabata liber pa kasa ku un “hòmber hóben” en bes di kasa ku Boaz ku tabata un hòmber di edat.

¹⁷ Bètuel, Yosef i Rut a mustra bondat amoroso boluntariamente; nan a ser motivá di kurason pa hasi esei. Nan a sinti un responsabilidat moral pa mustra e kualidat aki na esnan ku ken nan tabatin un relashon, meskos ku Rei David a sintié obligá na manifestá bondat amoroso na Mefíboset.

18. (a) Ku ki aktitut ansianonan kristian ta “pastoriá e tou”? (b) Kon un ansiano a ekspresá su sintimentu tokante yuda e rumannan kreyente?

¹⁸ Bondat amoroso te ainda ta un karakterístika di e pueblo di Dios, inkluso di e hòmbernan ku ta pastoriá e tou di Dios. (Salmo 110:3; 1 Tesalonisensenan 5:12) E ansianonan ei—òf superintendente—ta sinti un responsabilidat pa kumpli ku e enkargo konfiá na nan debí na nan nombramentu. (Echonan 20:28) Asina mes, nan ta hasi e trabou di pastoriá i otro echonan di bondat amoroso na fabor di e kongregashon, “no fòrsá, ma boluntariamente.” (1 Pedro 5:2) E ansianonan ta pastoriá e tou pasobra nan tin e responsabilidat i tambe e deseo di hasi esei. Nan ta ekspresá bondat amoroso na e karnénan di Kristu pasobra nan mester i tambe kier hasié. (Huan 21:15-17) Un ansiano kristian a bisa: “Di bèrdat mi gusta bishitá e rumannan na kas òf bèl nan djis pa mustra ku mi ta kòrda riba nan. Mi ta haña hopi goso i satisfakshon ora mi ta yuda e rumannan!” Tur ansiano amoroso ta kompletamente di akuerdo.

Mustra Bondat Amoroso na Hende den Nesesidat

19. Ki echo tokante bondat amoroso e relatonan bíbliko konsiderá den e artíkulo aki a enfatisá?

¹⁹ E relatonan bíbliko ku nos a konsiderá tambe ta enfatisá e echo ku mester mustra bondat amoroso na esnan ku tin un nesesidat ku nan mes no por satisfasé. Pa Abraham por a sigui ku su liña di desendensia, e tabatin mester di Bètuel su koperashon. Pa hiba su restunan Kanan, Yakòb tabatin mester di Yosef su yudansa. I pa produsí un heredero, Noemí tabatin mester di Rut su yudansa. Ni Abraham, ni Yakòb, ni Noemí no por a satisfasé e nesesidatnan ei sin yudansa. Awe ta meskos. Nos mester mustra bondat amoroso spesialmente na esnan den nesesidat. (Proverbionan 19:17) Nos mester imitá e patriarka Job, kende a duna atenshon na “e pober ku tabata sklama pa yudansa, i e huérfano ku no tabatin ningun hende pa yud’é,” i na e hende ku tabata serka di muri. Tambe Job a “hasi kurason di e biuda kanta di alegria” i a bira “wowo pa e siegu i pia pa e lam.”—Job 29:12-15.

20, 21. Ken tin mester di nos ekspreshonnan di bondat amoroso, i kiko kada un di nos mester ta desididu pa hasi?

 ²⁰ Bon mirá, tin ‘hende ku ta sklama pa yudansa’ den tur kongregashon kristian. Esaki por ta debí na faktornan manera soledat, desanimashon, sintimentu di no ta bal nada, hende ku a desepshoná nan, malesa serio òf morto di un ser kerí. Sin importá kiko ta e kousa, tur e rumannan stimá ei tin nesesidat ku nos por satisfasé—i mester satisfasé—ku nos echonan boluntario i kontinuo di bondat amoroso.—1 Tesalonisensenan 5:14.

²¹ Pues anto, laga nos sigui imitá Yehova Dios, kende ta “abundá den miserikòrdia [bondat amoroso, NW].” (Éksodo 34:6; Efesionan 5:1) Nos por hasi esei boluntariamente ku echonan spesífiko, spesialmente na fabor di esnan den nesesidat. I sigur nos lo onra Yehova i eksperensiá gran goso segun ku nos ‘kada un ta mustra bondat amoroso na nos ruman.’—Zakarías 7:9.

[Nota]

Kon Lo Bo Kontestá?

• Kon bondat amoroso ta distinto for di bondat humano?

• Den ki maneranan Bètuel, Yosef i Rut a mustra bondat amoroso?

• Ku ki aktitut nos mester desplegá bondat amoroso?

• Ken tin mester di nos ekspreshonnan di bondat amoroso?

[Preguntanan di Estudio]

[Plachi na página 18]

Kon Bètuel a mustra bondat amoroso?

[Plachi na página 21]

Rut su amor leal tabata un bendishon pa Noemí

[Plachinan na página 23]

Hende ta mustra bondat amoroso na otro boluntariamente, ku echonan spesífiko i na esnan den nesesidat