Nos Mester Haña Sa Ken Dios Ta

UN SHELU yen di strea riba un anochi sin nubia no ta yena bo ku emoshon? E fragansia di flornan kolorido no ta algu hopi dushi? Bo no ta gusta skucha para kanta i tende e zonido di blachinan ku ta move dor di un bientu suave? I esta fasinante bayena poderoso i otro kriaturanan ku ta biba den laman ta! Anto no papia mes di hende. Nan tin fakultat di konsenshi i un selebro asombrosamente kompliká. Kon bo ta splika e eksistensia di tur e kosnan maravioso ku tin rònt di nos?

Tin hende ta kere ku tur esaki a bini na eksistensia pa puru kasualidat. Pero si ta asina, dikon hende ta kere den Dios? Kon bini un kombinashon aksidental di vários kímiko a produsí kriaturanan ku un nesesidat spiritual?

“Religion ta profundamente ankrá den naturalesa humano i hende na tur nivel di status ekonómiko i di edukashon ta praktik’é.” E deklarashon aki a resumí e investigashon ku Profèser Alister Hardy a presentá den su buki The Spiritual Nature of Man (E Naturalesa Spiritual di Hende). Eksperimentunan resien ku sientífikonan di nervio a hasi riba selebro ta duna nan e idea ku hende lo por ta genétikamente “programá” ku e kapasidat pa praktiká religion. E buki titulá Is God the Only Reality? (Dios Ta e Úniko Realidat?) ta remarká: “E búskeda di propósito via religion . . . ta e eksperensia komun den tur kultura i tur époka desde ku humanidat a aparesé.”

Konsiderá loke un hòmber eduká a konkluí un 2.000 aña pasá. El a skirbi: “Tur kas ta wòrdu trahá dor di un hende, ma esun ku a traha tur kos ta Dios.” (Hebreonan 3:4) De echo, e promé versíkulo di Beibel ta deklará: “Na prinsipio Dios a krea e shelunan i tera.”—Génesis 1:1.

Pero, ken Dios ta? Hende tin kontestanan kontradiktorio riba e pregunta aki. Ora a puntra un tiner hapones ku yama Yoshi ken Dios ta, el a kontestá: “Mi no sa sigur. Mi ta un budista, i pa mi no tabata importante pa sa ken Dios ta.” Pero Yoshi ta atmití ku hopi hende ta konsiderá Buda mes komo un dios. Nick, un komersiante di 60 i piku aña, ta kere den Dios i e ta pensa ku Dios ta un forsa todopoderoso. Ora a pidi Nick splika loke e sa di Dios, el a kontestá despues di un pousa largu: “Esei ta un pregunta masha difísil, mi amigu. Tur loke mi por bisa ta ku tin un Dios. E ta eksistí.”

 Tin hende ta “adorá i sirbi loke ta kreá na lugá di e Kreador.” (Romanonan 1:25, Beibel na papiamentu koriente) Miónes di hende ta adorá antepasadonan morto, keriendo ku Dios ta muchu leu pa nan yega serka dje. Den religion hindú, tin hopi dios i diosa. Den tempu di e apòstelnan di Hesukristu hende a adorá vários dios, manera por ehèmpel Yúpiter i Merkurio. (Echonan 14:11, 12) Hopi iglesia di kristiandat ta siña ku Dios ta un Trinidat, ku e ta konsistí di Dios Tata, Dios Yu i Dios Spiritu Santu.

Pues ta manera Beibel ta bisa, “tin hopi dios i hopi shon.” Sin embargo e ta agregá: “Tòg pa nos tin ún Dios so, e Tata, for di kende tur kos ta bin.” (1 Korintionan 8:5, 6) Sí, tin un solo Dios berdadero. Pero ken e ta? Kon e ta? Ta importante pa nos sa e kontesta riba e preguntanan aki. Hesus mes a bisa den orashon na e Dios aki: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Huan 17:3) Tin base pa kere ku nos bienestar eterno ta dependé di si nos konosé e bèrdat tokante Dios.

[Plachi na página 3]

Kiko ta splika nan eksistensia?

[Rekonosementu]

Bayena: Kortesia di Tourism Queensland

 [Rekonosementu pa Potrèt na página 2]

PORTADA: Index Stock Photography © 2002