Pregunta di Lektor

Ta konsehabel pa un kristian berdadero asistí na un entiero òf kasamentu den misa?

Yehova no ta keda kontentu si nos partisipá den un òf otro seremonia di religion falsu, p’esei nos tin ku evitá esei. (2 Korintionan 6:14-17; Revelashon 18:4) Un misa pa entiero ta un sirbishi religioso durante kua probablemente lo tin un predikashi ku ta promové ideanan anti-bíbliko manera inmortalidat di alma i ku tur bon hende ta bai shelu. Esei por inkluí tambe hasimentu di krus i uni den orashon ku e pastor. Kisas durante un seremonia religioso di kasamentu den misa òf otro kaminda, bo ta haña tambe orashon i otro aktonan religioso ku no ta kuadra ku siñansa bíbliko. Podisé ta bira difísil pa un kristian resistí e preshon pa partisipá den un akto di religion falsu ora e ta den un grupo kaminda tur otro hende sí ta partisipá. Ta ki un bobedat pa eksponé bo mes na un preshon asina!

Kiko si un kristian sintié obligá pa asistí na un seremonia di entiero òf kasamentu den misa? Por ehèmpel, un kasá ku no ta kreyente por hasi un apelashon na su esposa kristian pa kompañ’é bai un evento asina. E esposa por bai kuné komo djis un opservadó? E esposa por disidí di kumpli ku deseo di su esposo i bai kuné, ku e determinashon pa no partisipá den ningun seremonia religioso. Di otro banda, e por disidí di no bai, pensando ku e preshon emoshonal ku e sirkunstansia ta trese kuné lo por ta demasiado p’e ya ku esaki por pon’é bai kontra Dios su prinsipionan. Ta e esposa tin ku disidí. Definitivamente e tin ku disidí di kurason, manteniendo un konsenshi limpi.—1 Timoteo 1:19.

En todo kaso, lo kumbiní e esposa si e splika su esposo ku su konsenshi no ta pèrmitié partisipá den ningun seremonia religioso, ni kanta, baha kabes ni partisipá di ningun manera ora nan ta hasi orashon. E splikashon aki por pone e esposo konkluí ku presensia di su kasá lo por hink’é den un situashon ku lo ta inkómodo p’e esposo. Podisé debí na su amor pa su esposa, rèspèt pa su kreensianan òf p’e evitá kualkier situashon bergonsoso, e ta disidí di bai su so. Pero si e esposo insistí p’e esposa bai, kisas e por bai djis komo un opservadó.

Tambe nos mester pensa ki efekto e echo ku nos ta asistí na un seremonia den un edifisio religioso lo por tin riba nos kompañeronan kreyente. Esaki lo por ofendé konsenshi di algun di nan? Esei lo por debilitá nan determinashon pa no partisipá den idolatria? Apòstel Pablo a spièrta: “Ma tene kuidou pa e libertat aki di boso, di un manera òf otro, no bira un piedra di trompeká pa esnan ku ta débil.”—1 Korintionan 8:9-13.

Si ta trata di un evento relashoná ku un famia yegá, lo por tin mas preshon di parti di famianan. Den tur kaso, un kristian mester evaluá tur faktor enbolbí kuidadosamente. Bou di sierto sirkunstansia lo e por konkluí ku lo no tin niun problema si e asistí na un seremonia pa un entiero òf kasamentu den misa komo opservadó. Sin embargo, e sirkunstansia por ta di tal índole ku ora e asistí, e daño ku lo e hasi na su mes konsenshi òf na esun di otro hende ta mas grandi ku e posibel benefisionan ku e ta saka dor di ta presente. Sea kual sea e situashon, e kristian tin ku hasi sigur ku su desishon no ta strob’é di tin un bon konsenshi dilanti Dios i hende.