Algun Mito Tokante Morto Eksaminá Mas Djaserka

TOKA NA

Algun Mito Tokante Morto Eksaminá Mas Djaserka

DURANTE henter historia, hende a kontemplá morto yen di duda i miedu. Pió ainda, hende a haña asta mas miedu di muri debí na kreensia religioso falsu, tradishon di pueblo i kreensia personal profundo ankrá. E problema di miedu di muri ta ku e por stroba bo di gosa di bida, i e por pone bo duda ku bida tin nifikashon.

Religionnan grandi tin hopi falta den esaki, pasobra nan a promové yen di kreensia di pueblo tokante morto. Eksaminá un par di nan dor di konsiderá e bèrdat di Beibel i wak si bo por haña mas klaridat tokante bo manera di mira morto.

Mito 1: Ta normal pa bida kaba den morto.

Segun e buki Death—The Final Stage of Growth (Morto: E Fase Final di Desaroyo), “morto . . . ta un parti integral di nos bida.” E tipo di komentarionan aki ta karga e idea di ku morto ta un kos normal, e manera natural pa tur kos bibu kaba. E kreensia aki a pone hopi hende adoptá un filosofia nihilístiko, esta, nan ta pensa ku bida no tin niun sentido. Tambe, hopi hende ta purba haña loke nan ke sin preokupá kon nan ta afektá otro hende.

Pero di bèrdat ta normal pa bida kaba den morto? No ta tur investigadó sientífiko ta pensa asina. Calvin Harley, por ehèmpel, ta un biólogo ku ta studia kon hende ta bira bieu, i den un entrevista el a bisa ku e no ta kere ku hende ta “programá pa muri.” William Clark, ku ta studia hende su sistema di inmunidat, a remarká lo siguiente: “Morto no ta un parti indispensabel di bida.” I Seymour Benzer, dje Instituto Teknológiko di California ta pensa ku “morto no ta manera un oloshi sino mas bien un situashon ku nos por spera di kambia.”

Ora sientífikonan studia kon kurpa di hende ta hinká den otro, nan ta keda babuká. Nan ta deskubrí ku nos a risibí hopi mas tantu kapasidat físiko i mental ku loke nos tin mester den nos 70 pa 80 añanan di bida. Por ehèmpel, sientífikonan a deskubrí ku selebro humano tin un kapasidat inmenso pa warda informashon. Un investigadó a kalkulá ku nos selebro por warda informashon ku “lo yena rònt di binti mion buki, mes tantu ku e bibliotekanan di mas grandi na mundu.” Algun neurólogo ta pensa ku un hende komun ta usa den su bida apénas 1/100 parti di un porshento (.0001) di loke su selebro por karga. Ta na su lugá anto pa nos puntra: ‘Dikon nos tin un selebro ku asina tantu kapasidat, si ta un pida chikitu di dje so nos ta usa durante un bida di largura promedio?’

Ademas, ripará kuantu difikultat hende tin pa enfrentá morto! Pa mayoria hende, morto di nan kasá òf yu por ta e eksperensia mas troumátiko di nan bida. Hopi bes nan emoshonnan ta keda kompletamente alterá pa hopi tempu despues di morto di un ser kerí. Asta hende ku ta pretendé ku ta normal pa hende muri tin problema pa aseptá ku ora nan mes muri tur kos a kaba. E revista British Medical Journal ta bisa ku “mayoria eksperto ta sali for dje punto di bista ku tur hende kier biba mas tantu posibel.”

Ora nos tuma na kuenta e manera ku mayoria hende ta reakshoná riba morto, e potensial asombroso ku nos tin pa siña i kòrda, i e anhelo interno ku nos tin pa biba pa semper, no ta bisto ku hende ta trahá pa biba? I ta asina mes. Dios a traha hende ku e posibilidat di sigui biba pa semper, i no pa morto bira e manera normal ku nan mester kaba. Wak ki sorto di futuro Dios a ofresé e promé pareha humano: “Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.” (Génesis 1:28) Sí, un futuro maravioso i eterno!

Mito 2: Hende ta muri pa Dios tuma nan serka dje.

Un mama di 27 aña ku tabata bai muri, lagando tres yu atras, a bisa un sùr katóliko: “No bin bisa mi ku ta Dios su boluntat. . . . Mi tin masha rabia ora hende bisa mi asina.” Tòg, esei ta loke hopi religion ta siña hende tokante morto, esta, ku ta Dios ta tuma hende pa nan ta serka dje.

E Kreador ta asina sin heful ku e ta laga nos muri, sabiendo kuantu tristesa esei ta kousa nos? Nò, e Dios ku Beibel ta papia di dje no ta asina. Segun 1 Huan 4:8, “Dios ta amor.” Paga tinu ku e no ta bisa ku Dios tin amor, ni ku Dios ta amoroso, sino ku Dios ta amor. E amor di Dios ta asina fuerte, asina puru, asina perfekto, i e ta un karakterístika asina dominante di su personalidat, ku ta na su lugá pa bisa ku Dios ta e personifikashon mes di amor. E Dios aki no ta laga hende muri pa nan ta serka dje.

Religion falsu a konfundí hopi hende tokante e paradero i e situashon di hende morto. Nan ta papia di shelu, fièrnu, purgatorio, limbo, i yen di otro destinashon mas. Algun di nan ta difísil pa komprendé. Otronan no ta hasi nada ménos ku yena bo ku teror. Beibel, di otro banda, ta siña nos ku hende morto ta inkonsiente, den un situashon kasi meskos ku ora un hende ta na soño. (Eklesiástes 9:5, 10; Huan 11:11-14) P’esei, nos no tin nodi preokupá tokante kiko ta pasa ku nos despues ku nos muri, meskos ku nos no ta preokupá ora nos mira un hende den un soño profundo. Hesus a bisa ku lo yega un dia ku “tur ku ta den graf” lo “sali” pa biba di nobo den un paradeis riba tera.—Huan 5:28, 29; Lukas 23:43.

Mito 3: Dios ta tuma mucha chikitu pa nan bira angel.

Elisabeth Kübler-Ross, kende a investigá kasonan di hende malu pa muri, a menshoná un otro idea ku hopi hende religioso tin. Papiando di un suseso real, el a bisa ku “no ta sabí pa bisa un mucha chikitu ku a pèrdè su ruman, ku ta Dios ta stima mucha chikitu asina tantu ku el a tuma Johnny bai shelu kuné.” Deklarashonnan asina ta pone Dios den un lus negativo, i nan no ta reflehá su personalidat ni su manera di aktua. Dr. Kübler-Ross a sigui bisa: “E mucha muher aki a krese sin ku nunka el a deshasí dje rabia ku el a sinti kontra Dios, i esaki a hiba na depreshon i trastorno emoshonal severo ora el a pèrdè su propio yu tres dékada despues.”

Pakiko Dios lo mester ranka un mucha bai kuné pa e por tin un angel mas, komo si fuera Dios tin mas mester dje mucha ku e mayornan mes? Si ta di bèrdat Dios ta bai ku mucha, esei lo no ta nifiká ku e ta un Kreador egoista i sin amor? Al kontrario, Beibel ta bisa: “Amor ta bin di Dios.” (1 Huan 4:7) Un Dios di amor lo pone un hende sufri un pèrdida na un manera ku ni sikiera un hende un tiki drechi lo aseptá?

Wèl, pakiko mucha ta muri anto? Na Eklesiástes 9:11 nos ta haña parti dje kontesta ku Beibel ta duna: “Tempu i suerte [suseso inesperá, NW] ta alkansá nan tur.” I Salmo 51:5 ta bisa nos ku nos tur ta imperfekto, pekadó, for di tempu ku nos a ser konsebí. E resultado di esei pa tur hende awe ta morto, di un òf otro forma. Tin bes ku morto ta ataká for di promé ku un kriatura nase, loke ta bira un ‘miskraam.’ Otro muchanan ta muri den sirkunstansia trágiko òf debí na aksidente. No ta Dios ta responsabel ora kos asina pasa.

Mito 4: Tin hende ta ser tormentá despues ku nan muri.

Hopi religion ta siña ku hende malbado ta bai den fièrnu di kandela pa sufri tormento pa semper. E siñansa aki ta lógiko? E ta kuadra ku Beibel? Hende su bida ta dura rònt di 70 pa 80 aña. Asta si un hende ta kulpabel di maldatnan serio durante henter su bida, tormento eterno por ta un kastigu hustu? Nò. Lo ta sumamente inhustu pa tormentá un hende pa semper p’e pikánan ku el a kometé durante su bida kòrtiku.

Ta Dios so por revelá kiko ta pasa ku hende despues ku nan muri, i den su Palabra skirbí, Beibel, el a revel’é tambe. Esaki ta loke Beibel ta bisa: “Manera esun ta muri, e otro tambe ta muri; di bèrdat, nan tur tin e mesun rosea . . . Tur ta bai na e mesun lugá. Tur a bin di stòf i tur ta bolbe na stòf.” (Eklesiástes 3:19, 20) Aki e no ta bisa nada di un fièrnu di kandela. Ora hende muri, nan ta bai bèk na stòf. Nan ta stòp di eksistí.

Un hende mester ta na tinu pa e por sufri tormento. Hende morto ta na tinu? Atrobe, Beibel ta duna e kontesta: “E bibunan sa ku nan lo muri, ma e mortonan no sa nada, ni nan no tin rekompensa mas, pasobra ningun hende no ta kòrda mas riba nan.” (Eklesiástes 9:5) Hende morto no por sufri agonia niun kaminda. Ta simplemente imposibel, pasobra nan “no sa nada.”

Mito 5: Morto ta e fin permanente di nos eksistensia.

Ora nos muri nos ta stòp di eksistí, pero esei no kier men ku no por tin nada mas pa nos den futuro. Job e hòmber fiel tabata sa ku lo e bai den graf, na hebreo Seol, ora e muri. Pero wak kiko el a pidi Dios den orashon: “O ku bo lo a skonde mi den Seol, ku bo lo a skonde mi te ora bo furia pasa, ku bo lo a pone un límite pa mi i kòrda riba mi! Si un hende muri, lo e bolbe biba? . . . Abo lo yama, i ami lo kontestá bo; lo bo anhelá na e obra di bo mannan.”—Job 14:13-15.

Job tabata sa ku si e keda fiel te na morto, Dios lo kòrda riba dje un dia i resusit’é. Tur sirbidó di Dios di antigwedat tabata kere esei. Hesus mes a konfirmá e speransa aki i a mustra ku Dios lo usa e mes pa lanta hende morto. Nos tin Hesus su propio palabranan komo garantia: “E ora lo yega den kual tur ku ta den graf lo tende [Hesus] su bos, i lo sali; esnan ku a hasi bon, pa un resurekshon di bida, esnan ku a kometé maldat, pa un resurekshon di huisio.”—Huan 5:28, 29.

Pronto Dios ta bai kita tur maldat for di riba tera i establesé un mundu nobo ku lo ser goberná for di shelu. (Salmo 37:10, 11; Daniel 2:44; Revelashon 16:14, 16) Komo resultado di esei, henter mundu lo bira un paradeis, i ta hende ku ta sirbi Dios lo biba riba dje. Beibel ta bisa: “Mi a tende un bos duru for di e trono, bisando: ‘Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.’”—Revelashon 21:3, 4.

Libertat for di Miedu

Ora nos konosé e speransa di resurekshon, i tambe Esun ku ta hasi resurekshon posibel, esei por ta un konsuelo. Hesus a primintí: “Boso lo konosé e bèrdat, i e bèrdat lo hasi boso liber.” (Huan 8:32) Un dje kosnan ku nos ta libra di dje ta miedu di morto. Ta Yehova so por kambia e proseso di bira bieu i muri, pa duna nos bida eterno. Bo por konfia den loke Dios primintí? Bo por, pasobra semper e Palabra di Dios ta kumpli. (Isaías 55:11) Nos ta animá bo mashá pa bo siña mas tokante e propósito di Dios pa humanidat. Testigunan di Yehova lo keda hopi kontentu di yuda bo.

[Komentario na página 6]

E problema di miedu di muri ta ku e por stroba bo di gosa di bida

[Tabèl na página 7]

ALGUN MITO KOMUN TOKANTE MORTO KIKO BEIBEL TA BISA?

● Ta normal pa bida kaba Génesis 1:28; 2:17; Romanonan 5:12

den morto

● Hende ta muri pa Dios tuma nan Job 34:15; Salmo 37:11, 29; 115:16

serka dje

● Dios ta tuma mucha chikitu Salmo 51:5; 104:1, 4;

pa nan bira angel Hebreonan 1:7, 14

● Tin hende ta ser tormentá Salmo 146:4; Eklesiástes 9:5, 10;

despues ku nan muri Romanonan 6:23